တႃႇမၢႆတွင်းပွႆးၵိၼ်ၶဝ်ႈမုၼ်းလိူၼ်လႅင်းၾိင်ႈထုင်းၶႄႇၼႆသေ သိုၵ်းၵဝ်ႈၵၢင်ႉ သင်ႇၵူၼ်းမိူင်းသႅၼ်ဝီ ၸတ်းႁဵတ်းပၢင်တေႃႇလွင်း 2 တီႈ တႃႇၶၢဝ်းတၢင်း 15 ဝၼ်း ဝႃႈၼႆ။
တႄႇလိူၼ် ဢွၵ်ႊတူဝ်ႊပိူဝ်ႊ ဝၼ်းတီႈ1 ၼႆႉမႃး တႃႇပွႆးၵိၼ်ၶဝ်ႈမုၼ်းလိူၼ်လႅင်းၼႆသေ သိုၵ်းၵဝ်ႈၵၢင်ႉ ပၼ်ၶႂၢင်ႉၸဝ်ႈငိုၼ်းသႃး ပိုတ်ႇပၢင်တေႃႇလွင်းႁိုင်ၶၢဝ်းတၢင်း 15 ဝၼ်း ၊ ၸတ်းတီႈၼႂ်းဝၢင်း ပွႆးလိူၼ်သီႇ ၼႂ်းပွၵ်ႉ 1 ႁိမ်းၸမ်ၵျွင်းၵၢင်ဝဵင်း လႄႈ တီႈၵၢတ်ႇပၢင်လေႃႉ ၵႂႃႇဝႃႈၼႆ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တႄႇမိူဝ်ႈသိုၼ်းဢေႃႈ ၊ တႃႇပွႆးၵိၼ်ၶဝ်ႈမုၼ်း လိူၼ်လႅင်းၼႆသေ သိုၵ်းၵဝ်ႈၵၢင်ႉသင်ႇႁဵတ်းပွႆး 15 ဝၼ်း တီႈဝၢင်းပွႆးလိူၼ်သီၼၼ်ႉ ၊ ပေႃးပဵၼ် ၵူၼ်းဝၢၼ်ႈၵူၼ်းသူၼ်တႄႉ တေဢမ်ႇမီးၵူၼ်းၵႂႃႇၼမ် ၊ ဢမ်ႇပေႉတၼိုင်ႇၵႂႃႇလဵၼ်ႈ ၊ ပေႃးၵိုၼ်းၵေႃႈ တေၵိုၼ်းဝၼ်းလိူၼ်မူၼ်းၼၼ်ႉၵူၺ်း ”- ဝႃႈၼႆ ။
ၼႂ်းပွႆးၵိၼ်သီႇလိူၼ်လႅင်းၼႆႉ သိုၵ်းၵဝ်ႈၵၢင်ႉ ပၼ်ၶႂၢင်ႉပိုတ်ႇပၢင်တေႃႇလွင်းသေ မီးၸဝ်ႈၼႃႈတီႈ ၾၢႆႇသိုၵ်းၶဝ် ဢဝ်ႁူမ်ႇလူမ်ႈဝႆႉသေ သႂ်ႇသိူဝ်ႈၶူဝ်းသိုၵ်း ပႃးၵွင်ႈမႃးပႂ်ႉဢဝ်ႁူမ်ႇလူမ်ႈၸွမ်းပွႆး။ လွင်ႈၼႆႉ ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ – ၵူၼ်းပိုၼ်ႉတီႈလၢတ်ႈ ။
ၼႂ်းပၢင်တေႃႇလွင်းၼၼ်ႉ မီးပၢင်လေးၵွင်ႇၵျိၼ်ႇ၊ မၢၵ်ႇၵိင်ႈလွႆ၊ ပၢင်ၶႅင်ႇမၢၵ်ႇၶင်ႇလႄႈ ပၢင်ၽၢႆႉၵူႈသႅၼ်းသႅၼ်းသေ ၵူၼ်းၵႂႃႇဢဝ်ၽိူၼ် ပိုတ်ႇပၢင်တေႃႇလွင်း တေလႆႈပၼ်ၶွၼ်ႇ တီႈသိုၵ်းၵဝ်ႈၵၢင်ႉ 10 သႅၼ်ၼႆယဝ်ႉ ။
ၼၢင်းယိင်းဢႃယု 30 ပီၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ သိုၵ်းၵဝ်ႈၵၢင်ႉၶဝ် ယွၼ်းၶွၼ်ႇၼမ်လႄႈ ၵူၼ်းယၢမ်ႈၵႂႃႇပိုတ်ႇဢွၼ်တၢင်းၵေႃႈ လႆႈလိုဝ်ႈဝႆႉ ၊ 15 ဝၼ်းၼႆႉ တေလႆႈပၼ် 10 သႅၼ်ၼႆ ၊ မၢင်ၵေႃႉၵေႃႈ ဢမ်ႇမီးၵၢၼ်သင်လႄႈ ၵႂႃႇပိုတ်ႇႁဵတ်းၵိၼ်ၸွမ်းငဝ်းလၢႆးမၼ်းယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇ”- ဝႃႈၼႆ ။
လိူဝ်ၼၼ်ႉ ၽွင်းၵူၼ်းမိူင်း ႁႃၵိၼ်လဵင်ႉတွင်ႉယၢပ်ႇၽိုတ်ႇ ၸိူင်ႉၼႆ ယွၼ်ႉမီးပၢင်တေႃႇလွင်းလႄႈ ၵူၼ်းမိူင်း မိုင်ႉၵၢၼ်တေႃႇလွင်း ဢမ်ႇထၢတ်ႇဢမ်ႇဝၢႆးႁဵတ်းႁႂ်ႈ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ မုင်ႉႁေႃႁိူၼ်းၽိတ်းမေႃးတႅၵ်ႇယၢႆႈၵၼ် ၼႆယဝ်ႉ ။
ဝဵင်းသႅၼ်ဝီၼႆႉ သိုၵ်းၵဝ်ႈၵၢင်ႉ MNDAA ၶဝ်ႈယိုဝ်းၵုမ်းလႆႈ ၼႂ်းလိူၼ် January ပီ2024 သေ ပၼ်ၶႂၢင်ႉၸဝ်ႈငိုၼ်းသႃး ပိုတ်ႇပၢင်တေႃႇလွင်း တႄႇၼႂ်းလိူၼ် April ၼၼ်ႉမႃးၼႆယဝ်ႉ ။
ဝၢႆးလင်ၽႅၼ်ယၼ်ႇသိုၵ်း 1027 တပ်ႉသိုၵ်းၵဝ်ႈၵၢင်ႉ ပိုၼ်ၽၢဝ်ႇ ၵုမ်းၵမ်မိူင်းသႅၼ်ဝီမႃးၶၢဝ်းတၢင်း ၼိုင်ႈပီပၢႆၼႆႉ မီးႁူင်းမိပ်ႇၼူတ်ႇလႄႈ KTV ၼမ်လိူင်ႇမႃးလိူဝ်ၵဝ်ႇသေ ၵူၼ်းၸိူဝ်းၵႂႃႇႁဵတ်းၵၢၼ်ၼၼ်ႉ လႆႈႁူႉဝႃႈ ပဵၼ်ၼၢင်းယိင်းၼုမ်ႇ သႅၼ်းႁုၼ်ႈမႂ်ႇ ဢႃယု 18 လႄႈ 20 ၶိုၼ်ႈၼိူဝ်၊ မီးလၢႆၸၢဝ်းၶိူဝ်း ပႃးၸဵမ် တႆး၊ လွႆ၊ မၢၼ်ႈ၊ ၶႄႇ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ