ၶၵ်ႉတွၼ်ႈၵၢၼ်ငၢၼ်း လူင်ပွင်ၸိုင်ႈမိူင်းဢမေႊရိၵၼ်ႊ လႆႈၵိုတ်းယင်ႉၵႂႃႇ ပဵၼ်ပွၵ်ႈၵမ်းႁႅၵ်ႈ ၼႂ်းၶၢဝ်းတၢင်း ႁိမ်းၸမ် 7 ပီ။

တႅၼ်းၽွင်းသၽႃးဢမေႊရိၵၼ်ႊသွင်ၾၢႆႇ မီးလွင်ႈထဵင်မေႃး တၢင်ႇတၢင်းၽိတ်းၼိူဝ်ၵၼ်။ ႁိူၼ်းႁေႃၶၢဝ် မိူင်းဢမေႊရိၵၼ်ႊၵေႃႈ ပိုၼ်ၽၢဝ်ႇဢွၵ်ႇမႃးဝႃႈ ၼႂ်းၶၢဝ်းတၢင်း 2 ဝၼ်းၼႆႉ တေပူတ်းပႅတ်ႈၽူႈႁၢပ်ႇၵၢၼ် ၸုမ်းလူင်ပွင်ၸိုင်ႈ ၾႅတ်ႊတရႄႊ တၢင်းၼမ်ဝႃႈၼႆ။

တႃႇတေတႅပ်းတတ်း တမ်းဝၢင်း ၽႅၼ်ၵၢၼ်မႂ်ႇ တႃႇငိုၼ်းၵႃႈၸႂ်ႉၸၢႆႇလူင်ပွင်ၸိုင်ႈၼၼ်ႉ ၽူႈတႅၼ်းၽွင်းပႃႇတီႇ ရီႊပႃႊပလီႊၵၼ်ႊတင်း ပႃႇတီႇ တီႊမူဝ်ႊၶရႅတ်ႉ ဢုပ်ႇၵုမ်ၵၼ်တီႈသၽႃးသေတႃႉ ဢမ်ႇလႆႈၶေႃႈတူၵ်းလူင်းၵၼ် တေႃႇထိုင်ၶၢဝ်းယၢမ်း ဢၼ်မၵ်းမၼ်ႈဝႆႉၵမ်းလိုၼ်းသုတ်း။

ၵွပ်ႈၼၼ်လႄႈ တႄႇဢဝ်ဝၼ်းတီႈ 1 လိူၼ်ဢွၵ်ႊထူဝ်ႊပိူဝ်ႊၼႆႉၵႂႃႇ လိူဝ်သေၵၢၼ်ငၢၼ်း ဢၼ်လမ်ႇလွင်ႈသေ ၶၵ်ႉတွၼ်ႈၵၢၼ်ငၢၼ်းလူင်ပွင်ၸိုင်ႈ ၸိူဝ်းၵိုတ်းလိူဝ်ၼၼ်ႉ တေလႆႈၵိုတ်းယင်ႉဝႆႉၸူဝ်ႈၶၢဝ်း ဝႃႈၼႆ။

ယွၼ်ႉလွင်ႈၵိုတ်းလိုဝ်ႈၼႆႉသေ ၽူႈႁၢပ်ႇၵၢၼ်လူင်ပွင်ၸိုင်ႈ တႃႇ 7 သႅၼ်ပၢႆ တေၸၢင်ႈၺႃးသင်ႇၵိုတ်းၵၢၼ်ဝႆႉ ၸူဝ်ႈၶၢဝ်း လူၺ်ႈဢမ်ႇလႆႈ ငိုၼ်းလိူၼ်ၼႆ – ၽူႈလဵပ်ႈႁဵၼ်းၶဝ် ၶၢတ်ႈလၢမ်းထတ်းသၢင်ဝႆႉၼင်ႇၼႆ။

ငဝ်းလၢႆးၼႆႉ ႁဵတ်းႁႂ်ႈတုမ်ႉတိူဝ်ႉၵၢၼ်ငၢၼ်းပၢႆးမၢၵ်ႈမီး မိူင်းဢမေႊရိၵၼ်ႊ ၼပ်ႉပီႊလီႊယၼ်ႊတေႃႇလႃႇ။ ၾၢႆႇၼိုင်ႈၵေႃႈ ယွၼ်ႉႁႃသဵၼ်ႈတၢင်း တႃႇငူပ်ႉငီႉၵၼ်ပႆႇလႆႈလႄႈ မီးလွင်ႈမႆႈၸႂ် ၵူဝ်ငဝ်းလၢႆးႁိုင်ၵႂႃႇၶၢဝ်းယၢဝ်း ၼႆယဝ်ႉ။

ၼႂ်းဝၼ်းသုၵ်း ဝၼ်းတီႈ 3/10/2025 ၼႆႉ တေမီးလွင်ႈဢုပ်ႇၵုမ်ၵၼ်သေ တွတ်ႈၶႅပ်းၵၢင်ၸႂ်ထႅင်ႈၵမ်းၼိုင်ႈ ၼႆယဝ်ႉ။