ဝၢႆးလင် ၸုမ်းလုၵ်ႉၽိုၼ်ႉထွႆဢွၵ်ႇ ဝဵင်းၾၢႆၶုၼ်ယဝ်ႉ သိုၵ်းမၢၼ်ႈႁူမ်ႈပျီႇတူႉၸိတ်ႉ ၶဝ်ႈပၵ်းတပ်ႉ ၼႂ်းဝၢၼ်ႈသေ ၸႂ်ႉၵူၼ်းပၢႆႈၽေးသိုၵ်း ၸိူဝ်းပၢႆႈသွၼ်ႈယူႇဝႆႉၸွမ်း ဝဵင်းပၢင်လွင်း ၊ ယွင်ႁူၺ်ႈ ၊ သီႇသႅင်ႇ ဢွၼ်ၵၼ်ပွၵ်ႈယူႇႁိူၼ်းယေးၽႂ်မၼ်းၶိုၼ်း ။
ယၢမ်းလဵဝ် ၵူၼ်ႈပၢႆႈၽေးသိုၵ်းဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းယဝ်ႉသေတႃႉ ယွၼ်ႉဢမ်ႇမီး ၸုမ်းလႂ်မႃးၽဵဝ်ႈပၼ်မၢၵ်ႇမႅင်းဢၼ်ၵိုတ်းၶင်ႉဝႆႉၽွင်းပၢင်တိုၵ်းၼၼ်ႉလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ပွၵ်ႈၶိုၼ်းႁိူၼ်းယေး ယဵပ်ႇၺႃးမၢၵ်ႇ ။
ၼႂ်းဝၼ်းတီႈ 12/9/2025 ၵူၼ်းဝၢၼ်ႈၼႃးႁီး ၸႄႈဝဵင်းၾၢႆၶုၼ် ၵႂႃႇယဵပ်ႇၺႃးမၢၵ်ႇလူႉတၢႆထင်ႇတီႈ ၽွင်းၵႂႃႇႁႃၼေႃႇ တီႈၼႂ်းႁိမ်းၸမ်ဝၢၼ်ႈၼႃးႁီး ၼၼ်ႉ ။
ၽူႈၶၢၼ်ပၢၵ်ႇ ၵေႃႁူမ်ႈသၢင်ႈၵူၼ်းၼုမ်ႇတႆးၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ -“ ပဵၼ်သွင်ၵေႃႉ ပီႈၼွင်ႉ ၽွင်းၵႂႃႇႁႃၼေႃႇ ၊ ႁဵပ်းၼႂ်းထိူၼ်ႇ ၵႂႃႇယဵပ်ႇၺႃးမၢၵ်ႇ တၢႆထင်ႇတီႈၵမ်းလဵဝ် ၊ ၵူၼ်းပိုၼ်ႉတီႈ ပွၵ်ႈယူႇၶိုၼ်း ႁိူၼ်း ၵႆႉလႆႈၺႃးမၢၵ်ႇမႅင်းၼႃႇ ၊ မၢၵ်ႇမႅင်းလိူင်ႇၼမ်ၼႃႇ ၊ ၵႆႉႁၼ် ၼႂ်းထိူၼ်ႇၼႂ်းသူၼ်ၼႂ်းၼႃး ဢမ်ႇႁူႉဝႃႈ ပဵၼ်မၢၵ်ႇၸုမ်းလႂ်ၵၢင်ဝႆႉ”- ဝႃႈၼႆ ။
သွင်ပီႈၼွင်ႉဢၼ်ယဵပ်ႇၺႃးမၢၵ်ႇလူႉတၢႆၼၼ်ႉပဵၼ် ၸၢႆးပျႃး ဢႃယု 36 လႄႈ ၸၢႆးၸိၵ်ႉတႃႉ ဢႃယု 39 ပီ ၊ မီးလုၵ်ႈ3 ၵေႃႉ ။
ၵူၼ်းမိူင်းၸိူဝ်းပၢႆႈၽေးသိုၵ်းပွၵ်ႈယူႇၶိုၼ်းၼၼ်ႉ ၵမ်ႈၼမ် ပဵၼ်ၵူၼ်းႁဵတ်းသူၼ်ႁဵတ်းႁႆႈ ယွၼ်ႉၵႆႉႁၼ် မၢၵ်ႇမႅင်းလႄႈ လႆႈၾၢင်ႉၵႂႃႇၾၢင်ႉမႃး ယၢပ်ႇၽိုတ်ႇၵိၼ်းၸႂ် တႃႇႁႃၵိၼ်လဵင်ႉတွင်ႉဝႆႉ ဝႃႈၼႆ ။
ၵူၼ်းၸၢႆးပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ- “ လႆႈႁႃၵိၼ်လဵင်ႉတွင်ႉၼႂ်းသူၼ်ၼႂ်းႁႆႈၵူၺ်းလႄႈ ပေႃး ဢမ်ႇၵႂႃႇသူၼ်ၵေႃႈ ဢမ်ႇၸၢင်ႈႁႃၵိၼ်လဵင်ႉတွင်ႉသင် လႆႈၾၢင်ႉၵႂႃႇၾၢင်ႉမႃးဢဝ်ၵူၺ်းဢေႃႈ”- ဝႃႈၼႆ ။
ယွၼ်ႉၼႂ်းပိုၼ်ႉတီႈ မၢၵ်ႇမႅင်းၾင်လိၼ်လိူင်ႇၼမ်လႄႈ ယူႇတီႈၵူၼ်းမိူင်း တေၵႂႃႇလႂ်မႃးလႂ်ၵေႃႈထုၵ်ႇလီ ၾၢင်ႉ ယႂ်ႇၼမ်လႄႈ ဝႆႉသတိတႃႇသေႇ ဝၢႆးသေလင်ပၢင်တိုၵ်းယဝ်ႉ မၢၵ်ႇဢၼ်ပႆႇတႅၵ်ႇ တေၸၢင်ႈ ၵိုတ်းယူႇတင်းၼမ် သင်ႁၼ်မႅၼ်ႈၸိုင်ထုၵ်ႇလီယူႇႁၢင်ႇၵႆလႄႈ ငိူင်ႉဝႄႈ ။ ႁႂ်ႈၸႅင်ႈၽူႈမီး ပုၼ်ႈၽွၼ်း ၼႂ်းပိုၼ်ႉတီႈမႃးပူတ်းပၼ်ၸဵမ်ၸိူဝ်းၼၼ်ႉၼႆႉ- ၸုမ်း ၵေႃႁူမ်ႈသၢင်ႈၵူၼ်းၼုမ်ႇတႆးၾၢႆၶုၼ် ပၼ် ၾၢင်ႉဝႆႉၼင်ႇၼႆ ။
လိူဝ်ၼၼ်ႉ ႁိူၼ်းယေးၵူၼ်းပၢႆႈၽေးသိုၵ်း ၺႃးယႃႉသွၵ်ႈတဝ် ဢဝ်ၵႂႃႇၶူဝ်းၶွင်ဢၼ်မီးၵႃႈၶၼ်၊ ၽွင်းၵူၼ်းမိူင်းပွၵ်ႈမိူဝ်းၶိုၼ်း လႆႈႁၼ်ႁိူၼ်းပဝ်ႇၵူၺ်းယဝ်ႉသေ ဢမ်ႇၵႃး ၽွင်းပၢင်တိုၵ်းၼၼ်ႉ ထုၵ်ႇၽဝ်ဝႆႉလႄႈ ၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေး ဢမ်ႇမီးတီႈယူႇ လႆႈၵႂႃႇသွၼ်ႈယူႇ ၵျွင်းမုၼ်ႇၸဝ်ႈဝႆႉ- ၵူၼ်းပိုၼ်ႉတီႈလၢတ်ႈ ။
ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၾၢႆၶုၼ် မိူၼ်ၼင်ႇ ဝၢၼ်ႈလွႆပဝ်း ၊ ၼမ်ႉသွင်ၶႄး ၊ လႁႄႇ ၊ ၼႃးၵူင်း ၊ ၺွင်ႇမူၼ်း ၊ ဝၢၼ်ႈလွႆပူၵ်ႇ( တွင်ႇပူဝ်ႉၵျီး) ၊ ၸၢင်ႉၽိူၵ်ႇ ၊ ငႃးမူး လႄႈ ၵူၼ်းပၢႆႈၽေးသိုၵ်း ၼႂ်းၸႄႈဝဵင်း ယွင်ႁူၺ်ႈ မိူၼ်ၼင်ႇ ဝၢၼ်ႈလိၼ်ပူၵ်ႇတႅၵ်ႇ ၊ လွႆလူင် ၸိူဝ်းၼႆႉ ႁူဝ်ၵူၼ်းမီး ၸမ်မိုၼ်ႇ ဢွၼ်ၵၼ်ပွၵ်ႈယူႇၶိုၼ်းႁိူၼ်းယေး ဝႃႈၼႆ ။
တႄႇဢဝ် ႁူဝ်ပီ 2025 ၼၼ်ႉမႃး တေႃႇထိုင်လိူၼ်ၵျူႊလၢႆႊၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉ ပဢူဝ်း PNO ႁူမ်ႈၵၼ်သေ လေႃႇတိုၵ်းၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈမႃးႁၢဝ်ႈ ႁႅင်း ။ ဝၢႆးၼၼ်ႉ ၼႂ်းဝၼ်းတီႈ 07/07/2025 သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈယဝ်ႉသေ ၸႂ်ႉၵူၼ်းပိုၼ်ႉတီႈ ပွၵ်ႈယူႇၶိုၼ်းႁိူၼ်းၽႂ်မၼ်းၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ