ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ဢွၼ်ၵၼ်ပွၵ်ႈယူႇၶိုၼ်းႁိူၼ်း ယေးၽႂ်မၼ်းၵမ်ႈၽွင်ႈယဝ်ႉ ၵမ်ႈၼမ် လႆႈမႆႈၸႂ်တႃႇယူႇသဝ်းလႄႈ မၢၵ်ႇမႅင်းဢၼ်ၵိုတ်းၶင်ႉဝႆႉ ၸိူဝ်းၼႆႉ။
ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ႁဝ်းၶႃႈ တိုၵ်ႉလႆႈၵူဝ်ယူႇၶႃႈ ၶူဝ်းလဵင်းဢၼ်ဢဝ်မႃးၶိုၼ်း ၸိူဝ်းၼၼ်ႉၵေႃႈ ဢမ်ႇႁတ်းယႃႉထူင်မၼ်း။ ဢဝ်မႃး ၵွင်ဝႆႉ ၸိူင်ႉၼၼ်ၵူၺ်း။ ပႆႇတၢမ်းၸႂ်လႆႈ ဢမ်ႇႁူႉဝႃႈ ပၢင်တိုၵ်းတေပဵၼ်ထႅင်ႈမိူဝ်ႈလႂ်။ ပေႃးဢမ်ႇပွၵ်ႈၶိုၼ်းႁိူၼ်းသေ သိုပ်ႇယူႇၵႂႃႇ ၼႂ်းထိူၼ်ႇၼႂ်းၶိူဝ်းၸိူင်ႉၼၼ်ၵေႃႈ လႆႈၵူဝ်ဝႆႉ။ မိူဝ်ႈလဵဝ် ၵူၼ်းမိူၵ်ႈၵူၼ်းလိူင်းၼမ်ၼႃႇ။ ၵမ်ႈၽွင်ႈၵေႃႈ မႃးၽႅဝ်ႁိူၼ်း ယဝ်ႉၵေႃႈ တၼ်းၺႃးမၢၵ်ႇယူႇ ဢမ်ႇႁတ်းၵႂႃႇဢဝ်။ ယွၼ်ႉၼၼ် ပေႃးတေပွၵ်ႈႁိူၼ်းၶိုၼ်းၼႆ ႁဝ်းၶႃႈ တေၸႂ်ႉယႃႈသိတ်းယိူဝ်ႈ ႁႂ်ႈႁႅင်ႈႁႅင်းသေ ၸင်ႇတေႁတ်းၵႂႃႇပတ်းၽဵဝ်ႈႁိူၼ်းယေးဢေႃႈ”- ဝႃႈၼႆ။
ဝၢႆးသေ သိုၵ်းမၢၼ်ႈ ယိုတ်းၵုမ်းလႆႈၶိုၼ်း ၼႂ်းၸႄႈဝဵင်းၼွင်ၶဵဝ်ယဝ်ႉ ၸွမ်းသဵၼ်ႈတႃႈသၢႆတၢင်း ၸိူဝ်းၼႆႉၵေႃႈ ၶဝ်ပႂ်ႉၵူတ်ႇထတ်းၸႅတ်ႈထၢမ် ၵူၼ်းမိူင်းၸိူဝ်းၶဝ်ႈဢွၵ်ႇဝဵင်းႁၢဝ်ႈႁႅင်း။ လွင်ႈၼႆႉ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ ၽွင်းၵႂႃႇတႃႈပႆတၢင်း ၼႆယဝ်ႉ။
“ပေႃးဝႃႈ ၵႂႃႇတၢင်းၼွင်ၶဵဝ်တႄႉ မီးၵဵတ်ႉသိုၵ်းမၢၼ်ႈ ၸႅတ်ႈတီႈလဵဝ်ၵူၺ်း။ ပေႃးလုၵ်ႉတၢင်းသၢမ်သိူဝ်မႃးတႄႉ ၵဵတ်ႉၶဝ်မီးပဵၼ် 3-4 တီႈ။ ၶဝ်တေၸႅတ်ႈမၢႆၾၢင်။ မိူဝ်ႈၵႂႃႇၵေႃႈ တေလႆႈၼႄ၊ မိူဝ်ႈမႃးၵေႃႈ တေလႆႈၼႄ။ ၶဝ်တေႁဵတ်းၵဵတ်ႉပႂ်ႉမၢႆ။ ၵွပ်ႈၼႆလႄႈ ႁဝ်းၶႃႈ ၵူၼ်းမိူင်းတႄႉ ပႆႇလႆႈတၢမ်းၸႂ် ပေႃးသိုၵ်းမၢၼ်ႈၸိူဝ်းၼႆႉ ပႆႇပူၼ်ႉၶိုၼ်ႈၵႂႃႇတၢင်းၼိူဝ် ပွတ်းၵျွၵ်ႉမႄးၼၼ်ႉ။ ပေႃးမီးဢၼ်ၵိၼ်ဢၼ်ယႅမ်ႉယူႇတႄႉ ဢမ်ႇၶႂ်ႈၵႂႃႇတၢင်းလႂ်ယဝ်ႉ ၶၢၼ်ႉသုၵ်ႉသၵ်ႉ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
တႄႇဢဝ် ၼႂ်းၵၢင်လိူၼ်ၵျူႊလၢႆႊ ပီ 2025 ၼၼ်ႉမႃး ၼႂ်းၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈၶဝ်ႈ ယိုတ်းၵုမ်း လႆႈၶိုၼ်းယဝ်ႉသေတႃႉ ၵူၼ်းမိူင်းၸိူဝ်းလႆႈပၢႆႈၽေးသိုၵ်းၶဝ် ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း ၵမ်ႈၽွင်ႈ။ ၵူၺ်းၵႃႈ တႃႇၵူၼ်းပၢႆႈၽေးၶဝ်တႄႉ တိုၵ်ႉလႆႈမႆႈၸႂ် လွင်ႈႁူမ်ႇလူမ်ႈၵူၺ်းဢမ်ႇၵႃး ၽွင်းပၢႆႈၽေးသိုၵ်းၼၼ်ႉၵေႃႈ ဢမ်ႇလႆႈႁဵတ်းၵၢၼ်သူၼ်ႁႆႈၼႃးလႄႈ တႃႇလွင်ႈၵိၼ်ယႅမ်ႉ ၸိူဝ်းၼႆႉ တိုၵ်ႉထူပ်းလွင်ႈယၢပ်ႇဝႆႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ