ၸုမ်းသိုၵ်းထၼူႉ DSNDA ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 26/9/2025 ဝႃႈ လိၼ်ၵူၼ်ႇတဵင် တီႈၵူၼ်းပၢႆႈၽေးသိုၵ်း ၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း၊ ၵူၼ်းပၢႆႈၽေးသိုၵ်းလူႉတၢႆ 10 ၵေႃႉ ပႃးလုၵ်ႈဢွၼ်ႇ 3 ၵေႃႉ ။
လွင်ႈၼႆႉပဵၼ်ၵႂႃႇ ၼႂ်းဝၼ်းတီႈ 24/9/2025 ၾူၼ်တူၵ်းဢမ်ႇထၢတ်ႇသေ လိၼ်မၢၵ်ႇႁိၼ်ၵူၼ်ႇ တူၵ်းသႂ်ႇ ၵူၼ်းပၢႆႈၽေးသိုၵ်း ဢၼ်မီးၼႂ်းဝၢၼ်ႈၵျွၵ်ႉတေႃး ႁဵတ်းႁႂ်ႈလိၼ်ၵူၼ်ႇတဵင် ၵူၼ်းပၢႆႈၽေးသိုၵ်းလူႉတၢႆ 10 ၵေႃႉ ၊ ထိုင်ဝၼ်းမိူဝ်ႈၼႆႉတိုၵ်ႉထူပ်းႁၼ်တူဝ်တၢႆ ၼုမ်ႇၸၢႆးဢႃယု 22 ပီ ၵေႃႉလဵဝ်ၵူၺ်း ဝႃႈၼႆ ။
ၵူၼ်းပၢႆႈၽေးသိုၵ်း ဢၼ်ပႃးၵႂႃႇၼႂ်းလိၼ် ၵူၼ်ႇၼၼ်ႉ ပဵၼ်ၵူၼ်းၸၢႆး 5 ၵေႃႉလႄႈ ၵူၼ်းယိင်း 5 ၵေႃႉ ပႃးလုၵ်ႈဢွၼ်ႇ 3 ၵေႃႉ တိုၵ်ႉမီးဢႃယု ၶူပ်ႇပၢႆ ၵေႃႉၼိုင်ႈ၊ 7 ၶူပ်ႇၵေႃႉၼိုင်ႈလႄႈ ဢႃယု 10 ၶူပ်ႇၵေႃႉၼိုင်ႈ ဝႃႈၼႆ။
ၽူႈၶၢၼ်ပၢၵ်ႇ DSNDA လၢတ်ႈၽူႈတွႆႇႁွၵ်ႈဝႃႈ – “ ၸူဝ်ႈဝူင်ႈဝၢင်ႈၼႆႉ တီႈယႂႃႇငၢၼ်ႇ ၾူၼ်တူၵ်း ဢမ်ႇထၢတ်ႇ လိၼ်လွႆ ၵိုင်ႉၵၢင်ႉၵူၼ်ႇတဵင်သႂ်ႇ တီႈယူႇၵူၼ်းပၢႆႈၽေးသေ ၵူၼ်းပၢႆႈၽေးသိုၵ်း 10 ၵေႃႉ ၺႃးလိၼ်ထူမ်ၵႂႃႇ ၊ တလဵဝ်ႁၼ်ဝႆႉ ၼိုင်ႈၵေႃႉယဝ်ႉ ။ ထႅင်ႈ 9 ၵေႃႉတႄႉ တိုၵ်ႉၸွမ်းႁႃ ဝႆႉယူႇ”- ဝႃႈၼႆ ။
ဝၢၼ်ႈၵျွၵ်ႉတေႃးၼႆႉ လင်ႁိူၼ်းမီး 86 လင် ၊ ဝၢၼ်ႈၺွင်ႇလေးပိၼ်ႇ ၼႆႉ လင်ႁိူၼ်းမီး 46 လင် ။ ၼႂ်းဝၼ်းတီႈ18/8/2025 ယွၼ်ႉသိုၵ်းမၢၼ်ႈထႅမ်ႁႅင်းသိုၵ်း ဢဝ်ႁိူဝ်းမိၼ်မႃးပွႆႇမၢၵ်ႇ ဢဝ်ၾႆးၽဝ်ႁိူၼ်းလႄႈ ၵူၼ်းဝၢၼ်ႈၺွင်ႇလေးပိၼ်ႇလႄႈ ၵူၼ်းဝၢၼ်ႈၵျွၵ်ႉတေႃး ပၢႆႈမႃးယူႇဝႆႉၼႂ်းထိူၼ် ႁူဝ်ၵူၼ်းမီးၸမ် 600 ၼႆယဝ်ႉ ။
“သိုၵ်းမၢၼ်ႈၵႆႉထႅမ်ႁႅင်းသိုၵ်းထူဝ်းသိုၵ်းၶဝ်ႈၼႂ်းဝၢၼ်ႈၼႃႇ ၊ ၵူၼ်းပၢႆႈၽေးသိုၵ်းၶဝ်ၵေႃႈ လႆႈပၢႆႈယူႇၼႂ်းထိူၼ် ။မီးသင်ၵေႃႈ လႆႈၵိၼ်ၼၼ်ႉၵူၺ်း ၊ ယၢမ်းလဵဝ်လူဝ်ႇတင်းၸွႆႈထႅမ် ၶဝ်ႈၼမ်ႉတင်းၵိၼ်ဝႆႉ”- ဝႃႈၼႆ ။
လိူဝ်ၼၼ်ႉ ၼႂ်းဝၼ်းတီႈ 23/9/2025 သိုၵ်းမၢၼ်ႈထူဝ်းသိုၵ်းၶဝ်ႈၾၢႆႇႁွင်ႇဝဵင်းယႂႃႇငၢၼ်ႇသေ တီႉၺွပ်းၵူၼ်းပၢႆႈၽေးသိုၵ်း ဢၼ်ပၢႆႈမူၵ်းဝႆႉတီႈၼႂ်းထမ်ႈၼၼ်ႉၵႂႃႇ တေႃႇထိုင်ယၢမ်းလဵဝ်ဢမ်ႇလႆႈၶၢဝ်ႇငၢဝ်းသင်ၼႆ – ၽူႈၶၢၼ်ႇပၢၵ်ႇ DSNDA လၢတ်ႈၼင်ႇၼႆ ။
ၼႂ်းႁူဝ်လိူၼ်ၼႆႉ သိုၵ်းမၢၼ်ႈ ႁႅင်းသိုၵ်းပၢၵ်ႇပၢႆ ထူဝ်းသိုၵ်းၶဝ်ႈၼႂ်းမူႇဝၢၼ်ႈသေ ၵူတ်ႇထတ်း ႁဵတ်းႁၢႆႉထုပ်ႉပေႃႉၵူၼ်းဝၢၼ်ႈ။ လိူဝ်ၼၼ်ႉ တီႉၺွပ်းၵူၼ်းဝၢၼ်ႈၵႂႃႇ 6ၵေႃႉ ပႃးလုၵ်ႈဢွၼ်ႇဢႃယု 9ၶူပ်ႇၵေႃႉၼိုင်ႈသေ ၸုတ်ႇၽဝ်ႁိူၼ်းယေး လူႉၵွႆ 20 ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ