သိုၵ်းမၢၼ်ႈယိုဝ်း သင်ၶၸဝ်ႈတူၼ်ႈၼိုင်ႈ လႄႈ 3 ၵေႃႉမႄႈလုၵ်ႈ တီႈပၢင်သဝ်းၵူၼ်းပၢႆႈၽေးသိုၵ်း တီႈႁိမ်းဝၢၼ်ႈၼႃးဢၢႆႈၶၢၼ်ႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။
ၼႂ်းဝၼ်းတီႈ 24/9/2025 ယၢမ်းၵၢင်ဝၼ်း 11 မူင်း သိုၵ်းမၢၼ်ႈသွင်ၵေႃႉ ၶဝ်ႈဝၢၼ်ႈၼႃးဢၢႆႈၶၢၼ်ႉ ယိုဝ်းၶႃႈႁႅမ် ၵူၼ်းပၢႆႈၽေးသိုၵ်းၸိူဝ်းၼၼ်ႉ။ ၼႂ်း 3 ၵေႃႉမႄႈလုၵ်ႈၼၼ်ႉသမ်ႉ လုၵ်ႈဢွၼ်ႇယိင်း ပိူၼ်ႈ ဢႃယု 16 ၶူပ်ႇၼၼ်ႉ ၺႃးၵၼ်ႉၸၼ်လူလၢႆဝႆႉ ဝႃႈၼႆ။
ၵေႃႉပဵၼ်ပေႃႈလုၵ်ႈဢွၼ်ႇယိင်း ဢၼ်ၺႃးၶႃႈႁႅမ်တၢႆၼၼ်ႉလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈႁဝ်းၶႃႈ ၵႂႃႇႁၼ်တႄႉ မႄႈၶဝ်တႄႉ ၺႃးယိုဝ်းသႂ်ႇဝႆႉတီႈဢူၵ်း ႁူဝ်ၸႂ်ၼၼ်ႉလီလီ တၢႆဝႆႉယူႇၼႃႈသုမ်ႉၼၼ်ႉ။ ၼႂ်းသုမ်ႉၼၼ်ႉသမ်ႉမီးတူဝ်တၢႆလုၵ်ႈယိင်းၶႃႈ။ ပွႆႇပူၺ်ဝႆႉႁေ။ မီးႁွႆးမၢၵ်ႇၵွင်ႈၶဝ်ႈဝႆႉ တီႈၼႃႈၽၢၵ်ႇ မၼ်းဝႆႉဢေႃႈ။ လုၵ်ႈၸၢႆးၶႃႈတႄႉ ၺႃးယိုဝ်းတီႈပဵမ်ႉ တီႈႁူဝ်ၼဝ်ႇမၼ်းဝႆႉ ”-ဝႃႈၼႆ ။
တီႈတူဝ်တၢႆလုၵ်ႈဢွၼ်ႇယိင်းၼၼ်ႉ ဢဝ်ၽႃႈတူင်ႇႁူမ်ႇဝႆႉပွတ်းတႂ်ႈမၼ်းသေ ဢဝ်ၽႃႈၶဵၼ်းႁူဝ်ၼၼ်ႉႁူမ်ႇဝႆႉပွတ်းတၢင်းၼိူဝ်။ ႁိမ်းတူဝ်တၢႆလုၵ်ႈဢွၼ်ႇၼၼ်ႉသမ်ႉ မီးသိူဝ်ႈၶူဝ်းသိုၵ်းမၢၼ်ႈထွတ်ႇၵွင်ဝႆႉ – ၼႆ ၵေႃႉပဵၼ်ပေႃႈလုၵ်ႈဢွၼ်ႇ လၢတ်ႈၼင်ႇၼႆ။
သၢမ်ၵေႃႉမႄႈလုၵ်ႈဢၼ်ထုၵ်ႇယိုဝ်းတၢႆၼၼ်ႉတႄႉပဵၼ် ပႃႈလႅင်း ဢႃယု 48 ပီ ၊ ၸၢႆးတၢၼ်းမွင်ႇ 12 ပီ ၊ ၼၢင်းတဵင်းသႃႇ16 ပီ ။
ၵူၼ်းၼႂ်းမုင်ႉႁေႃႁိူၼ်းၽူႈထုၵ်ႇယိုဝ်းတၢႆၼၼ်ႉလၢတ်ႈၽူႈတွႆႇႁွၵ်ႈဝႃႈ -“ သိုၵ်းမၢၼ်ႈလုၵ်ႉၼႂ်းဝၢၼ်ႈ သေၵႂႃႇတီႈထဵင် ( သုမ်ႉပၢႆႈၽေးသိုၵ်း ) ၼၼ်ႉသေ လၢတ်ႈဝႃႈ ပေႃးဢမ်ႇပၢႆႈတေယိုဝ်းတၢႆ ၊ ၶဝ်မႄႈ လုၵ်ႈၵေႃႈ တင်းတိုၵ်ႉတေဢၢင်းႁႅၼ်းၶူဝ်းသေ ဢွၵ်ႇမႃးၼႃႈသုမ်ႉ မႃးတၢႆၼႃႈသုမ်ႉ ၊ ၵူၼ်းဢၼ်ပၢႆႈၽေးသိုၵ်းၸွမ်းၵၼ်သၢမ်ၵေႃႉတႄႉ တင်းတၼ်းပၢႆႈပူၼ်ႉၵႂႃႇ။ ”- ဝႃႈၼႆ ။
ဝၼ်းၼၼ်ႉယၢမ်းၵၢင်ၼႂ် သင်ၶၸဝ်ႈတူၼ်ၼိုင်ႈ ဢၼ်ပၢႆႈၽေးသိုၵ်းမႃးသွၼ်ႈဝႆႉ တီႈသုမ်ႉၸွမ်း ၵူၼ်းဝၢၼ်ႈ ႁိမ်းသုမ်ႉၶႃမႄႈလုၵ်ႈၺႃးယိုဝ်းၼၼ်ႉၵေႃႈ ၺႃးသိုၵ်းမၢၼ်ႈမႃးယိုဝ်းတၢႆ။
မၼ်းၸဝ်ႈပဵၼ် ၸဝ်ႈထမ်မဢၵ်ၵ ဢႃယု 40 ပီ ၊ ၽွင်းသိုၵ်းမၢၼ်ႈၶဝ်ႈမႃးၼၼ်ႉ မၼ်းၸဝ်ႈလုၵ်ႉၼႂ်းသုမ်ႉၼၼ်ႉသေ ၶဝ်ႈၵႂႃႇၼႂ်းသူၼ်ၶဝ်ႈၵၢပ်ႇ၊ သိုၵ်းမၢၼ်ႈၵေႃႈလမ်းၸွမ်းလင်ၸဝ်ႈသေ ယိုဝ်းတၢႆၼႂ်းသူၼ်ၼၼ်ႉ ႁဵတ်းႁႂ်ႈၵူၼ်းပၢႆႈၽေးသိုၵ်းၼႂ်းသုမ်ႉၼၼ်ႉဢွၼ်ၵၼ်တူၵ်းၸႂ် ။
ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ၸဝ်ႈၸၢင်းတင်း ၵူၼ်းပၢႆႈၽေးသိုၵ်း ၵမ်ႈၽွင်းပၢႆႈယူႇဝႆႉၼႂ်းသူၼ် ၊ ၸဝ်ႈၸၢင်းႁဝ်းပႃးၼၼ်ႉ ဢမ်ႇယူႇလီလႄႈ ဢမ်ႇၸၢင်ႈပၢႆႈၵႆ လႆႈမႃး သွၼ်ႈယူႇၸွမ်းၵူၼ်းဝၢၼ်ႈတီႈသုမ်ႉၼၼ်ႉ။ ၽွင်းသိုၵ်းမၢၼ်ႈမႃးဝၼ်းၼၼ်ႉ ၸဝ်ႈႁဝ်းၵေႃႈ ၶဝ်ႈၵႂႃႇ ၼႂ်းသူၼ်ၶဝ်ႈၵၢပ်ႇႁိမ်းသုမ်ႉၼၼ်ႉလႄႈ သိုၵ်းမၢၼ်ႈသမ်ႉၶဝ်ႈၵႂႃႇၸွမ်းမၼ်းၸဝ်ႈ။ ၽွင်းသိုၵ်းမၢၼ်ႈ ဢွၵ်ႇသူၼ်မႃးၶိုၼ်းၼၼ်ႉ လၢၵ်ႈမႃးတူဝ်တၢႆၸဝ်ႈၸၢင်းၼၼ်ႉမႃးပႃး”- ဝႃႈၼႆ ။
ဝၼ်းတီႈ 25/9/2025 ယၢမ်းၵၢင်ၼႂ် ယူႇတီႈၵူၼ်းပိုၼ်ႉတီႈၼႂ်းဝၢၼ်ႈသေ ဢွၼ်ၵၼ် သၢင်းၵဵဝ်ႇ ၶၢပ်ႈတူဝ်တၢႆ ၸဝ်ႈၸၢင်းဢၼ်လႆႈလူႉလွၼ်ႇၵႂႃႇလႄႈ မႄႈလုၵ်ႈသၢမ်ၵေႃႉ ၼၼ်ႉယဝ်ႉဝႃႈၼႆ။
ၵဵဝ်ၵပ်းလွင်ႈ သိုၵ်းမၢၼ်ႈယိုဝ်းတၢႆ ၸဝ်ႈၸၢင်းတူၼ်ၼိုင်ႈ လႄႈ မႄႈလုၵ်ႈသၢမ်ၵေႃႉၼၼ်ႉ ၸုမ်း TSU တုၵ်းယွၼ်းထိုင် ၵူႈမိူင်းမိူင်း လႄႈ ၸုမ်းၸၢတ်ႈၸိုင်ႈလုမ်ႈၾႃႉဝႃႈ ယႃႇပေႁူမ်ႈမိုဝ်းၵၼ်တၢင်းသိုၵ်းမၢၼ်ႈ၊ ႁႂ်ႈဢဝ်လိူင်ႈ သိုၵ်းမၢၼ်ႈ ဢၼ်ပူၼ်ႉပႅၼ် ပိူင်တိုဝ်းၵမ်သိုၵ်းသေ ၶႃႈႁႅမ်ၵူၼ်းမိူင်း ဢၼ်ဢမ်ႇမီးတၢင်းၽိတ်း – ဝႃႈၼႆ။
ဝၢၼ်ႈၼႃးဢၢႆႈၶၢၼ်ႉ တီႈဢၼ်ၵူၼ်းဝၢၼ်ႈပၢႆႈၽေးသိုၵ်းၵႂႃႇသွၼ်ႈယူႇဝႆႉၼႆႉ ယၼ်ၵႆၵၼ်တင်းဝဵင်းၵျွၵ်ႉမႄးမွၵ်ႈ 10 လၵ်း ။ ယၢမ်းလဵဝ် ၵူၼ်းဝၢၼ်ႈၼႃးဢၢႆႈၶၢၼ်ႉ ပၢႆႈယူႇဝႆႉၼႂ်းထိူၼ်ႇၼႂ်းလွႆ ႁူဝ်ၵူၼ်း 500 ပၢႆ လူဝ်ႇတင်းၸွႆႈထႅမ် ၶဝ်ႈၼမ်ႉတင်းၵိၼ်ဝႆႉ ႁၢဝ်ႈႁႅင်း ။ ၵူၼ်းဝၢၼ်ႈၵေႃႈ ပၢႆလိူဝ်လႆႈပၢႆႈၽေးသိုၵ်း သမ်ႉဢမ်ႇမီးလွင်ႈႁူမ်ႇလူမ်ႈသေဢိတ်း- လႆႈႁူႉၼင်ႇၼႆ။
ၼႂ်းဝၼ်းတီႈ 25/9/2025 သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်းတင်းဝၢၼ်ႈၸၶၢၼ်းသႃႇ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဢိူင်ႇၸၶၢၼ်းသႃႇထႅင်ႈဢမ်ႇယွမ်း 30 လုၵ်ႈ တိူဝ်ႉၺႃးႁိူၼ်းယေးၵူၼ်းမိူင်းလူႉၵွႆ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ