မိူဝ်ႈၼႆႉ ဝၼ်းတီႈ 26/09/2025 ယၢမ်းၵၢင်ၼႂ် 7 မူင်း သိုၵ်းၵဝ်ႈၵၢင်ႉ ဢဝ်ၵူၼ်းၸိူဝ်းဢၼ်ၶဝ်တီႉၺွပ်းထတ်းထွင်ဝႆႉဝႃႈ မီးတၢင်း ၽိတ်းယႂ်ႇ ၼႆၸိူဝ်းၼၼ်ႉသေဢွၵ်ႇမႃးပၼ်ႇလဵပ်ႈၼေၵူၼ်းမိူင်းဝဵင်းသႅၼ်ဝီယဝ်ႉ ပၼ်တူတ်ႈတၢမ်ႇၶႃႈႁႅမ်တၢႆ တေႃႇၼႃႈၵူၼ်းမိူင်း။
ၵူၼ်းမီးတၢင်းၽိတ်းဢၼ်ၶဝ်ဢဝ်ဢွၵ်ႇမႃးပၼ်ႇလဵပ်ႈဝဵင်းၼၼ်ႉ မီး 7 ၵေႃႉ။ ပဵၼ်ၵူၼ်းမီးတၢင်းၽိတ်းမိူၼ်ၼင်ႇ ၵၼ်ႉၸၼ်လူလၢႆ ၼၢင်းယိင်း လႄႈ ၽူႈလၵ်ႉၸၵ်ႉၶုတ်ႈ တင်း ၵူၼ်းၸိူဝ်းလွၵ်ႇလႅၼ်ၵိၼ်ငိုၼ်းပိူၼ်ႈၸိူဝ်းၼႆႉ။ ပိုၼ်ၽၢဝ်ႇၼႄပိုၼ်းတူဝ် ႁူဝ်ယွႆႈ တင်းသဵင်ႈ သေ တႅပ်းတတ်း ပၼ်တူတ်ႈတၢမ်ႇတၢႆ 2 ၵေႃႉ တူတ်ႈတၢမ်ႇၶွၵ်ႈ 5 ၵေႃႉ လႆႈႁူႉၼင်ႇၼႆ ။
ၵူၼ်းၸိူဝ်းၺႃးသိုၵ်းၵဝ်ႈၵၢင်ႉ ပၼ်တူတ်ႈတၢမ်ႇတၢႆ လႄႈ တၢမ်ႇၶွၵ်ႈ 7 ၵေႃႉၼၼ်ႉ ပဵၼ်ၸၢဝ်းၶိူဝ်းမၢၼ်ႈ 3 ၵေႃႉ သိုၵ်းၵဝ်ႈၵၢင်ႉ 1 ၵေႃႉလႄႈ ၵူၼ်းမိူင်းထႅင်ႈ 3 ၵေႃႉၼႆ ၵူၼ်းမိူင်းပိုၼ်ႉတီႈ မိူင်းသႅၼ်ဝီၵေႃႉၼိုင်ႈလၢတ်ႈၼႄၼင်ႇၼႆ။
“ပူၼ်ႉမႃးမွၵ်ႈ သွင်သၢမ်ဝၼ်းၼႆႉ လႆႈငိၼ်းဝႃႈ သိုၵ်းၵဝ်ႈၵၢင်ႉၶဝ်တေပၼ်တူတ်ႈတၢမ်ႇ ၵူၼ်းမီးတၢင်းၽိတ်း ၊ တေယိုဝ်းတၢႆၼႄ တေႃႇၼႃႈ ၵူၼ်းမိူင်းၼႆ ႁဝ်းထၢင်ႇၶဝ်တေဢမ်ႇႁဵတ်းတေႉ။ ၵွပ်ႈဝႃႈ မိူဝ်ႈပူၼ်ႉမႃး ၼႂ်းၵၢင်လိူၼ်ၼႆႉၵေႃႈ ၶဝ်ဢဝ်ၸိူၵ်ႈမတ်ႉၵူၼ်းၸၢႆးသွင်ၵေႃႉ ႁႄ ၵႂႃႇယိုဝ်းတၢႆပႅတ်ႈ ဢွင်ႈတီႈဢမ်ႇမီးၵူၼ်းယူႇ။ ပွၵ်ႈၼႆႉတႄႉ ၶဝ်ႁဵတ်းပွႆးလဵပ်ႈဝဵင်းတေႉတေႉဝႃႈဝႃႈ ၶၢၼ်းၵူၼ်းမိူင်းၵႂႃႇ 7 ပွၵ်ႉ။ ၼိုင်ႈႁိူၼ်းၼိုင်ႈၵေႃႉႁႂ်ႈၵႂႃႇတူၺ်းၼႆဝႃႇ။ ၵူၼ်းၸိူဝ်းဢၼ်ၶဝ်ဢဝ်မႃးပၼ်တၢင်းၽိတ်းၵမ်းၼႆႉ မၢင်ၸိူဝ်းၵေႃႈ ၺႃးတၢမ်ႇတၢႆ။ ၵမ်ႈၽွင်ႈၵေႃႈ ၺႃးတၢမ်ႇထွင်ႇ။”
လႆႈႁူႉဝႃႈ ၵွၼ်ႇတေဢဝ် ၵူၼ်းၸၢႆးသွင်ၵေႃႉ ၵႂႃႇယိုဝ်းတၢႆၼၼ်ႉ သိုၵ်းၵဝ်ႈၵၢင်ႉႁွင်ႉဢဝ် ၵူၼ်းၸိူဝ်းမီးတၢင်းၽိတ်း 7 ၵေႃႉ တၢင်ႇၶိုၼ်ႈၵႃးသေ ပၼ်ႇႁွၼ်ႈလဵပ်ႈၸွတ်ႇတူဝ်ႈဝဵင်းဢွၼ်တၢင်း။ ဝၢႆးလင်ၼၼ်ႉၸင်ႇႁွင်ႉဢဝ်ၵူၼ်းၸိူဝ်းၺႃးတၢမ်ႇတၢႆ ၵႂႃႇယိုဝ်းတၢႆ ပႅတ်ႈ တီႈလွႆသၢႆးတီႈၼိုင်ႈ ၼႂ်းဢိူင်ႇမိူင်းလီ ႁိမ်းလႅၼ်ၶႅၼ်ႈ ဝဵင်းသႅၼ်ဝီ – လႃႈသဵဝ်ႈ ၼႆယဝ်ႉ။
ၼၢင်းယိင်း ဢႃႇယု 30 ပၢႆ ၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈၼႄဝႃႈ “ၵူၼ်းၵေႃႉၺႃးပၼ်တၢမ်ႇတၢႆၵေႃႉၼိုင်ႈၼႆႉ ပဵၼ်ၸၢဝ်းၶိူဝ်းၶႄႇ ၵဝ်ႈၵၢင်ႉ၊ မၼ်းပဵၼ်သိုၵ်း၊ တၢင်းၽိတ်းမၼ်းတႄႉ ၵႂႃႇၵၼ်ႉၸၼ်မေႃသွၼ်လိၵ်ႈၶႄႇႁႄ ႁႅမ်မေႃသွၼ်ၼၼ်ႉတၢႆၼၼ်ႉၼႃႇ။ ၵမ်းၼႆႉ ၵူၼ်းၵေႃႉႁဵတ်းၽိတ်းၼၼ်ႉ ၺႃးတၢမ်ႇတၢႆယဝ်ႉ” ဝႃႈၼႆ။
လႆႈႁူႉဝႃႈ ၵူၼ်းၸိူဝ်းဢမ်ႇပႆႇၺႃးပၼ်တၢမ်ႇတၢႆသေ ၺႃးတၢမ်ႇတူၵ်းၶွၵ်ႈၵူၺ်းၼၼ်ႉ ဢိင်ၼိူဝ် တၢင်းၽိတ်းၼၵ်း၊ တၢင်းၽိတ်းမဝ် ၼၼ်ႉသေ ၼိုင်ႈၵေႃႉလႂ် ၺႃးတၢမ်ႇၶွၵ်ႈၶင် 12 ပီ တေႃႇ 15 ပီ လႄႈ ငိုၼ်းၶႄႇ 6000 ယႂၢၼ်ႇ တေႃႇ 10000 ယႂၢၼ်ႇ ၼႆယဝ်ႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ