တႃႇတေၵုမ်းလႆႈၶိုၼ်းဝဵင်းၵျွၵ်ႉမႄးလႄႈသီႇပေႃႉ ဢၼ်သိုၵ်းတဢၢင်းၵုမ်းလႆႈဝႆႉ ၽွင်းၽႅၼ်ယၼ်ႇသိုၵ်း 1027 ပွၵ်ႈၵမ်း 2 ၼၼ်ႉသိုၵ်းမၢၼ်ႈထႅမ်ႁႅင်းသိုၵ်းတၢင်းလိၼ်လႄႈတၢင်းၵၢင်ႁၢဝ် ၊ ၸႂ်ႉၶိူင်ႈၵွင်ႈလူင် ၶိူင်ႈတရူၼ်ႊၵူႈသႅၼ်းသႅၼ်း ပွႆႇမၢၵ်ႇ ယိုဝ်းသႂ်ႇ ၸုမ်းသိုၵ်းတဢၢင်း ၸိူဝ်းတူင်ႉၼိုင်ယူႇဝႆႉ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁၢဝ်ႈႁႅင်း ၵူႈမိုဝ်ႉၵူႈဝၼ်း။
မိူဝ်ႈၼႆႉ ဝၼ်းတီႈ 25 လိူၼ်သႅပ်ႊထႅမ်ႊပိူဝ်ႊ ယၢမ်းၵၢင်ၶမ်ႈ မွၵ်ႈ 7 မူင်းၶိုင်ႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဢိူင်ႇ သၶၢၼ်းတႃႇထႅင်ႈမွၵ်ႈ 30 လုၵ်ႈပၢႆလႄႈ ႁဵတ်းႁႂ်ႈတိူဝ်ႉၺႃးႁိူၼ်းယေးၵူၼ်းမိူင်းလူႉၵွႆၵႂႃႇႁၢဝ်ႈႁႅင်းၼႆ ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းၵျွၵ်ႉမႄး လၢတ်ႈၼႄၼင်ႇၼႆ။
“မိူဝ်ႈၼႆႉ (25/9/2025) ယၢမ်းၵၢင်ၼႂ်မွၵ်ႈ 8 မူင်းၼၼ်ႉၵေႃႈ သိုၵ်းမၢၼ်ႈမႃးပွႆႇမၢၵ်ႇသႂ်ႇၾၢႆႇၸၢၼ်းဝဵင်းၵျွၵ်ႉမႄး တၢင်းဝၢၼ်ႈလူင်ဝၢႆၼၼ်ႉ လႅဝ်ႁႅင်းၼႃႇယဝ်ႉၶႃႈ၊ ၵၢင်ၶမ်ႈၼႆႉၵေႃႈ မႃးပွႆႇသႂ်ႇတၢင်းသၶၢၼ်းတႃႇၼႆႉထႅင်ႈ မီးမွၵ်ႈ 30 လုၵ်ႈပၢႆ။ ဝၢႆးလင်ႁိူဝ်းမိၼ်တိုၵ်း မိူဝ်းၵႂႃႇယဝ်ႉ သဵင်ၵွင်ႈသဵင်မၢၵ်ႇ ပၼ်းၶိုၼ်ႈမႃးႁႅင်း။ တင်ႈတႄႇၵၢင်ၼႂ်တေႃႇၵၢင်ၶမ်ႈၼႆႉ သဵင်ၵွင်ႈဢမ်ႇပႆႇထၢတ်ႇ။”
လႆႈႁူႉဝႃႈ သၢႆငႃးသိုၵ်းမၢၼ်ႈ ၸိူဝ်းလုၵ်ႉတၢင်းဝဵင်းၼွင်ၶဵဝ် ၶိုၼ်ႈမႃးတၢင်းထုင်ႉၼွင်ပိင် ဢၢၼ်းထူဝ်းသိုၵ်းၶဝ်ႈၵႂႃႇ ၼႂ်းဝဵင်းၵျွၵ်ႉမႄး ၼၼ်ႉ ယၢမ်းလဵဝ် ႁွတ်ႈၽႅဝ်ဝႆႉ တၢင်းဝၢၼ်ႈပျွင်ႇၶွင်း ဢၼ်ယၢၼ်ၵႆၵၼ်တင်း ဝဵင်းၵျွၵ်ႉမႄးမွၵ်ႈ 10 လၵ်းပၢႆၼၼ်ႉသေ ပဵၼ်ပၢင်တိုၵ်းၵၼ်တင်း သိုၵ်းတဢၢင်းဝႆႉႁၢဝ်ႈႁႅင်းယူႇၼႆ ၵူၼ်းမိူင်းၸိူဝ်း မီးယူႇဝႆႉၼႂ်းပိုၼ်ႉတီႈ လၢတ်ႈၼႄၼင်ႇၼႆ။
“ၵူၼ်းမိူင်းၸိူဝ်းယူႇၸွမ်းဝၢၼ်ႈပၢင်တီး၊ ၼႃးဢၢႆႈၶၢၼ်ႉ၊ ၶၢႆးတူၼ်ႈႁုင်း လႄႈ ပျွင်ႇၶွင်း ၸွမ်းတူင်ႇတၢင်ႇ သၶၢၼ်းတႃႇၸိူဝ်းၼၼ်ႉ ငိူင်ႉပၢႆႈဢွၵ်ႇဝႆႉၼမ်ယဝ်ႉၼင်ႇၵဝ်ႇၶႃႈ။ ၵူၺ်းၵႃႈ ၵမ်ႈၽွင်ႈဢမ်ႇပၢႆႈႁႄ ၵိုတ်းယူႇပႂ်ႉႁိူၼ်းဝႆႉ။ မိူဝ်ႈလဵဝ်ၼႆႉ လႆႈမႆႈၸႂ်တႃႇၵူၼ်းၸိူဝ်း ၵိုတ်းဝႆႉၼၼ်ႉဢေႃႈ။”
ၼႂ်းၶၢဝ်းတၢင်း သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄးၼႆႉ ၵူၼ်းမိူင်းၼပ်ႉႁူဝ်သႅၼ်ၵေႃႉ လႆႈၶၢႆႉဢွၵ်ႇဝၢၼ်ႈ ငိူင်ႉဝႄႈပၢင်တိုၵ်းၵႂႃႇယူႇဝႆႉတၢင်ႇဝၢၼ်ႈတၢင်ႇဝဵင်းၸူဝ်ႈၶၢဝ်း။ ၵူၼ်းမိူင်းပိုၼ်ႉတီႈ မၢင်ၸိူဝ်းၵေႃႈ ဢမ်ႇတၼ်းဢွၵ်ႇ ပူၼ်ႉဝၢၼ်ႈသေ ၺႃးၸုမ်းသိုၵ်းတင်းသွင်ၾၢႆႇ ႁေႉႁၢမ်ႈဢမ်ႇပၼ်ဢွၵ်ႇဝၢၼ်ႈၵေႃႈ ယင်းတိုၵ်ႉၵိုတ်းယူႇမွၵ်ႈ 3 ပုၼ်ႈၼႆႉ 1 ပုၼ်ႈၼႆ ၵူၼ်းၼုမ်ႇ ၵေႃႉၸွႆႈထႅမ် ၵူၼ်းပၢႆႈၽေးသိုၵ်းၼႂ်းၸႄႈဝဵင်းၵျွၵ်ႉမႄး လၢတ်ႈၼႄၼင်ႇၼႆ။
“ၶႂ်ႈတိုၵ်းသူၼ်းထိုင် ၵူၼ်းၸိူဝ်းၵိုတ်းဝႆႉၼႂ်းၸႄႈဝဵင်းၵျွၵ်ႉမႄး ၸူဝ်ႈပၢင်တိုၵ်းပႆႇယဵၼ်ၼႆႉ ၶႂ်ႈႁႂ်ႈငိူင်ႉပၢႆႈဢွၵ်ႇဝႆႉပၼ်တင်းသဵင်ႈၵမ်း ၼိုင်ႈ။ ၽွင်းလုၵ်ႉတီႈဝၢၼ်ႈငိူင်ႉဢွၵ်ႇၼၼ်ႉ ယႃႇဢွၵ်ႇၶၢဝ်းတၢင်းၵႂႃႇႁင်းၽႂ်ႁင်းမၼ်း။ ၶႂ်ႈႁႂ်ႈႁူမ်ႈၵၼ်သေ ဢွၵ်ႇဝၢၼ်ႈၵႂႃႇၸွမ်းၵၼ်။ ၵႂႃႇသွၼ်ႈယူႇတီႈ ဢွင်ႈတီႈၵူၼ်းၼမ်။ ဢွင်ႈတီႈႁပ်ႉၸွႆႈၵူၼ်းပၢႆႈၽေး။ ဢမ်ႇၶႂ်ႈႁႂ်ႈၵႂႃႇယူႇၸွမ်းထိူၼ်ႇၸွမ်းၶိူဝ်း။ ၵွပ်ႈဝႃႈ ႁဝ်းဢမ်ႇ လၢမ်းလႆႈၸႂ်သိုၵ်း။ မိူဝ်ႈလဵဝ် လႅင်းၾူၼ်းၵေႃႈဢမ်ႇလႆႈ။ တႃႇၵပ်းသိုပ်ႇႁႃၵၼ်ၼႆႉယၢပ်ႇယဵၼ်းႁႅင်းၼႃႇ။ ၼႂ်းပိုၼ်ႉတီႈပဵၼ်ပၢင်တိုၵ်း မီးသိုၵ်းၼမ်ၼႆႉ ပေႃးပဵၼ်မႃး ဢမ်ႇၸၢင်ႈၸွႆႈၵၼ်လႆႈႁႂ်ႈၶိုတ်းတၼ်းၶႃႈဢေႃႈ။”
ၶမ်ႈၼႆႉၵေႃႈသိုၵ်းမၢၼ်ႈဢဝ်ႁိူဝ်းမိၼ် မႃးပွႆႇမၢၵ်ႇဢမ်ႇယွမ်း 30 လုၵ်ႈၸိူဝ်းၼႆႉ။ မိူဝ်ႈၼႆႉတင်းဝၼ်း သဵင်ၵွင်ႈသဵင်မၢၵ်ႇဢမ်ႇထၢတ်ႇ – ၵူၼ်းပိုၼ်ႉတီႈလၢတ်ႈၼင်ႇၼႆ။
လႆႈႁူႉဝႃႈ မိူဝ်ႈဝႃး ဝၼ်းတီႈ 24 လိူၼ်သႅပ်ႊထႅမ်ႊပိူဝ်ႊ ယၢမ်းတၢမ်းၶမ်ႈၼၼ်ႉ သင်ႇၶၸဝ်ႈပႃးၼိုင်ႈ ၺႃးၸုမ်းသိုၵ်းယိုဝ်း လူႉလွၼ်ႇထင်တီႈဝႆႉ ၼႂ်းပႃႇၶဝ်ႈၵၢပ်ႇ။ လိူဝ်ၼၼ်ႉ ၼၢင်းယိင်း ဢႃႇယု 48 ပီ တင်း ယိင်းသၢဝ်ဢွၼ်ႇ ဢႃႇယု 16 ပီ လႄႈ ၸၢႆးဢွၼ်ႇ ဢႃႇယု 12 ပီ တင်းသၢမ်ၵေႃႉမႄႈလုၵ်ႈ ၺႃးၸုမ်းသိုၵ်းမိူၵ်ႈမႂ်ႈယိုဝ်းတၢႆထင်တီႈ ၼႂ်းဝၢၼ်ႈၼႃးဢၢႆႈၶၢၼ်ႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။ ပဵၼ်သိုၵ်းၸုမ်းလႂ်ယိုဝ်းတႄႉပႆႇႁူႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ