ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ လႅၼ်ႇၵႂႃႇမိူင်းရတ်ႉသျႃႊထႅင်ႈမိူဝ်ႈဝႃးဝၼ်းတီႈ 24/09/2025 ၊ တႃႇၶဝ်ႈႁူမ်ႈပၢင်ၵုမ်လူင် ၾူဝ်ႊရမ်ႊ World Atomic Week 2025 ဢၼ်တေၸတ်းႁဵတ်းတီႈဝဵင်းလူင် မေႃႊသၵူဝ်ႊ ဝႃႈၼႆ။
ၾူဝ်ႊရမ်ႊ World Atomic Week 2025 ၼႆႉတေၸတ်းႁဵတ်း ၼႂ်းဝၼ်းတီႈ 25 ထိုင် 28 /09/2025 ၊ တေမီးၸဝ်ႈၵၢၼ်ပၢႆးမၢၵ်ႈမီးယႂ်ႇလၢႆလၢႆမိူင်း ၶဝ်ႈႁူမ်ႈ၊ တီႈပၢင်ၼၼ်ႉ တေပၢႆးၼႄပႃး ၵၢၼ်ငၢၼ်းၶိူင်ႈၸၢၵ်ႈ ဢၼ်ၵဵဝ်ႇၵၼ်တင်း ၼိဝ်းၶလီႊယႃႊ – ဝႃႈၼႆ။
ၶၢဝ်းတၢင်းၵမ်းၼႆႉ ၸွမ်ၸိၵ်းသိုၵ်း မိၼ်းဢွင်ႇလၢႆႇ တေႁူပ်ႉထူပ်းပႃး ၸွမ်ၸိုင်ႈမိူင်းရတ်ႉသျႃႊ ဝလႃႊတီႊမႃႊပူႊတိၼ်ႊ လႄႈ ၸုမ်းလူင်ပွင်ၸိုင်ႈ မိူင်းရတ်ႉသျႃႊ၊ တေဢုပ်ႇၵၼ်ပႃးလွင်ႈ ၵၢၼ်မိူင်း ၵၢၼ်မၢၵ်ႈမီး ၵၢၼ်ႁူမ်ႇလူမ်ႈ ဢၼ်တေႁူမ်ႈၵၼ်ႁဵတ်းသၢင်ႈၵႂႃႇၸိူဝ်းၼၼ်ႉ -ၼႆ ႁွင်ႈၵၢၼ်ၾၢႆႇပွင်ႇၶၢဝ်ႇ သိုၵ်းမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။
ၵွၼ်ႇၼႃႈပူၼ်ႉမႃး မွၵ်ႈ 3 ပီၸိူဝ်းၼႆႉ ၸွမ်ၸိုင်ႈမိူင်းရတ်ႉသျႃႊ ဢမ်ႇတွၼ်ႉယွမ်းႁူပ်ႉ ၸွမ်ၸိၵ်းသိုၵ်းမၢၼ်ႈ ၽွင်းဢွၵ်ႇၶၢဝ်းတၢင်းၵႂႃႇဢႅဝ်ႇရတ်ႉသျႃႊ။ ၼႂ်းပီ 2025 ၼႆႉၵူၺ်း ၸွမ်းၸိၵ်းသိုၵ်းမၢၼ်ႈၵမ်းၵမ်းလႅၼ်ႈၵႂႃႇမိူင်းရတ်ႉသျႃႊ ပႃးၵမ်းၼႆႉပဵၼ်ၵမ်းထူၼ်ႈ 3 ယဝ်ႉ။ ၼႂ်းပီၼႆႉ မိူင်းရတ်ႉသျႃႊ ၊ ၶႄႇ၊ မိူင်းပႄႊလႃႊရုတ်ႉသ် ၸိူဝ်းၼႆႉ ၸွႆႈထႅမ်ပၼ်ၶိူင်ႈၵွင်ႈၵၢင်ႇ၊ လွၵ်းလၢႆးပၢႆးမေႃလွင်ႈၸႂ်ႉတိုဝ်းၶိူင်ႈၵွင်ႈၵၢင်ႇ လႄႈ လွင်ႈၾိုၵ်းၵၢၼ်သိုၵ်း ၸိူဝ်းၼႆႉပၼ်သိုၵ်းမၢၼ်ႈမႃးတႄႉတႄႉၼႆ Justice For Myanmar (JFM) ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ