ပျီႇတူႉၸိတ်ႉပဢူဝ်း PNO ၸႂ်ႉၵူၼ်းထုင်ႉၸၢမ်ႇၵႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၼုင်ႈၶူဝ်းသိုၵ်း ပၼ်ႇပုတ်ႈၵၼ်ပႂ်ႉယမ်းဢဝ်ႁူမ်ႇလူမ်ႈ ၼႂ်းဝၢၼ်ႈ 10 ဝၼ်းၼိုင်ႈပွၵ်ႈ ဝႃႈၼႆ ။
တႄႇႁၢင်လိူၼ် ဢေႃးၵတ်ႉသ် ၼႆႉမႃး ပျီႇတူႉၸိတ်ႉ PNO ၶဝ်ပၵ်းတပ်ႉဝႆႉ ၼႂ်းဝၢၼ်ႈထုင်ႉၸၢမ်ၵႃးသေ ၵဵပ်းငိုၼ်းၵူၼ်းဝၢၼ်ႈၼိုင်ႈႁိူၼ်း 5 သႅၼ်ပျႃး ။ သင်ဢမ်ႇပၼ်လႆႈ ငိုၼ်းၼႆၸိုင် ၸႂ်ႉၵူၼ်းဝၢၼ်ႈ ၼုင်ႈၶူဝ်းသိုၵ်းPNO သေ 10 ဝၼ်းၼိုင်ႈပွၵ်ႈ ပၼ်ႇပုတ်ႈၵၼ်ပႂ်ႉယမ်း ၼႂ်းဝၢၼ်ႈဝႃႈၼႆ ။
ၵူၼ်းၸၢႆးဝၢၼ်ႈၽြႃးလွႆလၢတ်ႈၽူႈတွႆႇႁွၵ်ႈဝႃႈ -“ PNO ၶဝ် ယွၼ်းငိုၼ်း ၼိုင်ႈႁိူၼ်း 5သႅၼ် ၊ ပေႃးဢမ်ႇပၼ်လႆႈ 5 သႅၼ်ၼႆႉ ၸႂ်ႉၼုင်ႈၶူဝ်းသိုၵ်းၶဝ် ယိပ်းၵွင်ႈ ပႂ်ႉယၢမ်းၼႂ်းဝၢၼ်ႈ ၊ ၶဝ်ဢမ်ႇပၼ်ပၢင်သွၼ်ၵူၼ်းဝၢၼ်ႈသင် ၵွင်ႈၵေႃႈဢမ်ႇမေႃယိပ်း ၊ ပေႃးပဵၼ်သိုၵ်းသိူဝ်ၼႆႉမႃး ၵူၼ်းဝၢၼ်ႈပႂ်ႉယၢမ်းၸိူဝ်းၼၼ်ႉ တေတၢႆဢွၼ်တၢင်းၵူၺ်း ၊ ၵူၼ်းဝၢၼ်ႈဢွၼ်ၵၼ်ၵူဝ်ဢမ်ႇၶႂ်ႈပႂ်ႉယၢမ်း လႆႈႁႃပၼ်ငိုၼ်း 5 သႅၼ်ၵႃႈဢမ်ႇလႆႈဢေႃႈ”- ဝႃႈၼႆ ။
ဢၼ်ပျီႇတူႉၸိတ်ႉပဢူဝ်း PNO ၶဝ်ပၵ်းတပ်ႉဝႆႉၼၼ်ႉ ပဵၼ် ဝၢၼ်ႈၽြႃးလွႆ ၊ လွႆၼွႆႉ ၊ ၺွင်ႇလေးပိၼ်ႇ ၊ ဝၢၼ်ႈၼမ်ႉဢုၼ်ႇ လႄႈ ဝၢၼ်ႈၼမ်ႉတူၵ်း ၸိူဝ်းၼႆႉသေ ၸႂ်ႉၵူၼ်းမိူင်းသူင်ႇပၼ် ႁေႃႇၶဝ်ႈ ၸွၵ်းၽၵ်းၵူႈဝၼ်းႁိုင်ၶၢဝ်းတၢင်း ၸမ် 2 လိူၼ် ႁဵတ်းႁႂ်ႈၵူၼ်းဝၢၼ်ႈယၢပ်ႇၽိုတ်ႇၵိၼ်းၸႂ်ဝႃႈၼႆ ။
ၵူၼ်းၸၢႆးဢႃယု 30 ပီလၢတ်ႈၽူႈတွႆႇႁွၵ်ႈဝႃႈ -“PNO ၶဝ်ၸႂ်ႉၵူၼ်းဝၢၼ်ႈသူင်ႇႁေႃႇၶဝ်ႈၽၵ်းပၼ်ၵူႈဝၼ်း ၊ မၢင်ဝၢၼ်ႈတႄႉလႆႈသူင်ႇတီႈၼႂ်းဝၢၼ်ႈ မၢင်ဝၢၼ်ႈ ၶဝ်ၸႂ်ႉၵႂႃႇသူင်ႇတီႈၼႂ်းထိူၼ်ႇတီႈၶဝ်ယူႇ ။ လႆႈၵႂႃႇႁုင်တီႈၵျွင်းမုၼ်ၸဝ်ႈသေ သူင်ႇပၼ်ၸိူင်ႉၼႆၵူႈဝၼ်း မီးၸမ် 2 လိူၼ်ယဝ်ႉ ၊ ပေႃးၸႂ်ႉသူင်ႇၼႂ်းထိူၼ်ႇတႄႉ ဢမ်ႇႁတ်းပၼ်ၼၢင်းယိင်းၼႂ်းဝၢၼ်ႈၵႂႃႇ ၵူဝ်ဢမ်ႇမီးလွင်ႈႁူမ်ႇလူမ်ႈတႃႇၶဝ် ”- ဝႃႈၼႆ ။
ယွၼ်ႉသိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ် တီႈတၢင်း ၾၢႆႇဢွၵ်ႇ ဝဵင်းၾၢႆၶုၼ် ၼႂ်းထုင်ႉၼွင်ႁၢႆးယႃႈသေ ၾၢႆႇတင်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇတူၵ်းလႄႈ ၵူၼ်းမိူင်းလႆႈပၢႆႈၽေးသိုၵ်း တႄႇႁူဝ်ပီ 2025။ ထိုင်မႃး ၼႂ်းလိူၼ် ဢေႃးၵတ်သ်ႉ ၼႆႉၸင်ႇပွၵ်ႈမိူဝ်း ၶိုၼ်းၽႂ်မၼ်း ၽွင်းပွၵ်ႈမိူဝ်းႁိူၼ်းၼၼ်ႉ ႁိူၼ်းယေးၵူၼ်းမိူင်းၵေႃႈ ထုၵ်ႇယႃႉၵဝ်းတဝ်သွၵ်ႈဝႆႉ သမ်ႉပေႃးမၢၵ်ႇပေႃးမိူဝ်မူတ်းၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ- “ ၊မိူဝ်းႁဝ်းၶႃႈပၢႆႈၽေးသိုၵ်း ႁိူၼ်းႁဝ်းထုၵ်ႇသွၵ်ႈတဝ်ဝႆႉ ဢၼ်မီးၵႃႈၶၼ်သမ်ႉပေႃးဢမ်ႇၵိုတ်းသင်။ ႁဝ်းၶႃႈပွၵ်ႈမႃးႁိူၼ်းတိုၵ်ႉမီးမွၵ်ႈၼိုင်ႈလိူၼ်ၵူၺ်း ၊ လႆႈတႄႇၶိုၼ်းမႂ်ႇမႂ်ႇမူတ်းဢေႃႈ ”- ဝႃႈၼႆ ။
ယၢမ်းလဵဝ် ပျီႇတူႉၸိတ်ႉပဢူဝ်းႁၢမ်ႈၵူၼ်းပိုၼ်ႉတီႈ ၵႂႃႇသူၼ်ၵႂႃႇႁႆႈ ၊ တတ်းမၵ်းပၼ်ၶၢဝ်းယၢမ်း လွင်ႈၵႂႃႇ မႃး ၵၢင်ၼႂ် 6 မူင်းထိုင် ၵၢင်ၶမ်ႈ 6 မူင်းၼၼ်ႉၵူၺ်း၊ ပေႃးဢမ်ႇႁဵတ်းၸွမ်းၼင်ႇၶဝ်ဢွၵ်ႇမၢႆမီႈဝႆႉၼၼ်ႉ သင်ဝႃႈၺႃးယိုဝ်း ၶဝ်တေဢမ်ႇဢဝ်ပုၼ်ႈၽွၼ်းသင် – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ