ၼႂ်းႁူဝ်လိူၼ်သႅပ်ႊထႅမ်ႊပိူဝ်ႊၼႆႉ ၶၢဝ်ႇႁူင်လိုဝ်းဢွၵ်ႇမႃးဝႃႈ သိုၵ်းၵဝ်ႈၵၢင်ႉ ၸိူဝ်းၵုမ်းၵမ်ဝႆႉ ဝဵင်းသႅၼ်ဝီ ၼႂ်းၸိုင်ႈတႆးပွတ်းႁွင်ႇ တေလႆႈထွႆဢွၵ်ႇဝဵင်းသေ ၶႃႈႁၢပ်ႇၵၢၼ်ၶုၼ် ၸုမ်းသိုၵ်းမၢၼ်ႈ တေၶိုၼ်းၶဝ်ႈမႃးပၼ်ႇၵၢၼ်ၽွင်းငမ်း  ။

မိူဝ်ႈသိုၼ်း ဝၼ်းတီႈ 22/09/2025 ၼႆႉ ၸုမ်းသိုၵ်းၵဝ်ႈၵၢင်ႉ ပူတ်းယႃႉထွၼ် ၸွမ်ပိဝ် (တုင်း) မိၵ်ႈမၢႆ ၵၢၼ်ၽွင်းငမ်းၶွင် ၸုမ်းသိုၵ်းၵဝ်ႈၵၢင်ႉ ဢၼ်ပၵ်းဝႆႉတီႈၶူဝ်လူင်ၼမ်ႉတူႈ ဢၼ်ၼိူဝ်သဵၼ်ႈတၢင်းလူင် ႁၢႆႊဝေႊ ဝဵင်းသႅၼ်ဝီ-ၵူတ်ႉၶၢႆ-မူႇၸေႊ၊ ဝဵင်းသႅၼ်ဝီ-လၢဝ်ႇၵၢႆး-ၶျိၼ်ႊသူၺ်ႊႁေႃႊ ၼႂ်းမိူင်းတႆးပွတ်းႁွင်ႇ။

ၵွၼ်ႇၼႃႈၼႆႉ မီးၶၢဝ်ႇလိုဝ်းဝႃႈ ဝၼ်းတီႈ 19 ၶႃႈႁၢပ်ႇၵၢၼ်ၶုၼ် ၾၢႆႇသိုၵ်းမၢၼ်ႈ တေၶဝ်ႈမႃးယူႇၶိုၼ်းၼႂ်းဝဵင်းၼႆႁႄ တေႃႇထိုင် မိူဝ်ႈၼႆႉ (23/9/2025) ၵေႃႈဢမ်ႇပႆႇႁၼ်ၽႂ်သေၵေႃႉ။ ၵူၺ်းၸွမ်ပိဝ်ၶဝ် တီႈၶူဝ်ၼၼ်ႉတႄႉ ဢမ်ႇႁၼ်ယဝ်ႉၼႆ ၵူၼ်းမိူင်းပိုၼ်ႉတီႈ ဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၵူၼ်းသိုၵ်းၶဝ် တိုၵ်ႉတူင်ႉၼိုင်ၵႂႃႇမႃးမိူၼ်ၵဝ်ႇၵွႆး။ ၶဝ်တေထွႆႁႃႉဢမ်ႇထွႆၼႆတႄႉ ဢမ်ႇမေႃလၢမ်းယဝ်ႉဝႃႈ။ ၸွမ်ပိဝ်ၶဝ်ဢၼ်ပၵ်းဝႆႉ တီႈၶူဝ်ၼၼ်ႉတႄႉ ၶဝ်ပူတ်းဢွၵ်ႇပႅတ်ႈယဝ်ႉ။ ဢမ်ႇမီးယဝ်ႉမိူဝ်ႈလဵဝ်။ ဢၼ်လၢၵ်ႇလၢႆးတႄႉ ငိၼ်းၵူၼ်းသိုၵ်းၶဝ်လၢတ်ႈၼႄႁဝ်းဝႃႈ ငိုၼ်းလိူၼ်ၵူၼ်းသိုၵ်းပွၵ်ႈၼႆႉ ၶဝ်ထုၵ်ႈပၼ်ဝႆႉတႃႇသွင်လိူၼ်ၸွမ်းၵၼ်ပွၵ်ႈလဵဝ်။ လိူၼ်ၼႆႉ လိူၼ်တမ်ႉပႆႇသဵင်ႈၶဝ်ပေႃးထုၵ်ႈပၼ် ငိုၼ်းလိူၼ်ဢွၼ်တၢင်းယဝ်ႉ။ ၵူႈပွၵ်ႈၼႆႉ ပေႃးလိူၼ်သဵင်ႈယဝ်ႉ မွၵ်ႈ 5 ဝၼ်းၸိူဝ်းၼႆႉၸွင်ႇၵွႆႈထုၵ်ႈပၼ်။ ၵူၼ်းၼႂ်းထႃႇၼသႅင်ႇယႃႇ ၶဝ်ၵေႃႈ ပႆႇႁၼ်ၶဝ်ႈမႃးသေၵေႃႉ။”

ၼွၵ်ႈလိူဝ်သိုၵ်းၵဝ်ႈၵၢင်ႉ ပႆႇမီးငဝ်းလၢႆးတေထွႆသိုၵ်းဢွၵ်ႇၼႂ်းဝဵင်းပၼ်ယဝ်ႉ ယင်းသိုပ်ႇပၼ်ၶႂၢင်ႉ ၵူၼ်းႁဵတ်းၵၢၼ်မၢၵ်ႈမီး ပိုတ်ႇပၢင် တေႃႇလွင်းဝႆႉ ၼႂ်းၵၢင်ဝဵင်းသႅၼ်ဝီ။ ယၢမ်းလဵဝ် ၶူင်ႇပၢင်တေႃႇလွင်း လႄႈ ၵူၼ်းလဵၼ်ႈပႆႇပေႃးမီးၼမ်မိူၼ်မိူဝ်ႈၽွင်း ၸုမ်းသိုၵ်းၵဝ်ႈ ၵၢင်ႉတႄႇၵုမ်းၵမ်ၼၼ်ႉသေတႃႉ ယွၼ်ႉပဵၼ်ၼႃႈၶၢဝ်းပွႆးဢွၵ်ႇဝႃႇလႄႈ ၵူဝ်ပၢင်တေႃႇလွင်း သိုပ်ႇၸတ်းၵႂႃႇၶၢဝ်းယၢဝ်းၼႆ ၼုမ်ႇၸၢႆး ဢႃႇယု 30 ပၢႆ ၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။

“ပၢင်လွင်းၼႆႉ ငိၼ်းဝႃႈၶဝ်တေပိုတ်ႇတေႃႇထိုင် ပွႆးၶႄႇၶဝ်ၵိၼ်ၶဝ်ႈမုၼ်းၼႆဢေႃႈ။ ပေႃးၶဝ်တေပၼ်ၶႂၢင်ႉပိုတ်ႇၵႂႃႇၶၢဝ်းယၢဝ်း ၸိူင်ႉၼႆတႄႉ ၸၢင်ႈႁဵတ်းႁႂ်ႈၾိင်ႈယၢမ်ႈၵူၼ်းမိူင်းလူႉထႅင်ႈဢေႃႈၼႆႉ” ၼႆယဝ်ႉ။

တင်ႈတႄႇပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈယဝ်ႉၼၼ်ႉ သိုၵ်းၵဝ်ႈၵၢင်ႉ ၵုမ်းၵမ်ဝႆႉဝဵင်းသႅၼ်ဝီသေ ပၼ်ႇၵၢၼ် ၽွင်းငမ်း၊ ပိုတ်ႇပၢင်တေႃႇလွင်း၊ ဢွၵ်ႇၶေႃႈပူင် ႁၢမ်ႈဝႃႈ ၼႂ်းၶၢဝ်းတၢင်း 6 လိူၼ် တိုၼ်းတေဢမ်ႇလႆႈႁဵတ်း ၵၢၼ်သိုဝ်ႉၶၢႆတီႈလိၼ်၊ သူၼ်ႁႆႈၼႃး လႃးလႃးၼႆသေ တၢမ်တူဝ်ၽူႈမီးၸၼ်ႉၼႂ်းသိုၵ်းၵဝ်ႈၵၢင်ႉ ၵေႃႉႁွင်ႉဢဝ် ၸဝ်ႈၵၢၼ်ပၢႆးမၢၵ်ႈမီးၶႄႇ ၸိူဝ်းၽွမ်ႉတႃႇလူင်း ငိုၼ်းတိုၼ်း လၢင်းၼၼ်ႉ မႃးတဵၵ်းၶၢတ်ႈတီႈလိၼ်တီႈၵူၼ်းပိုၼ်ႉတီႈ၊ ၵဵပ်းသဵၼ်ႈမၢႆ ႁူဝ်ၼပ်ႉၵူၼ်းပိုၼ်ႉတီႈသေ တဵၵ်းၶၢၼ်းၸႂ်ႉၵူၼ်း မိူင်းသႅၼ်ဝီ ၵႂႃႇၶဝ်ႈႁၢပ်ႇၵၢၼ်သိုၵ်း ၼိုင်ႈဝၢၼ်ႈလႂ် သွင်ၵေႃႉ၊ ၵဵပ်းၶွၼ်ႇၵူႈလွင်ႈ ပႃးၸဵမ်ၵႃႈၽဵဝ်ႈယုၵ်းယၢၵ်း ၼႂ်းဝဵင်းၸဵမ်ၸိူဝ်းၼႆႉ ဝႃႈၼႆ။

တႅမ်ႈ- ၽူၺ်းၼုမ်ႇ