ဝၼ်းတီႈ 15 ပူၼ်ႉမႃး လုၵ်ႉတီႈႁေႃၶၢဝ်ၻေႃႊၼႄႊလ်ထရမ်ႉ ယိုၼ်ႈလိၵ်ႈႁၢႆးငၢၼ်းထိုင် တႅၼ်းၽွင်းၶွၼ်ႊၵရႅတ်ႉၼၼ်ႉ ပႃးၸဵမ်မိူင်းမၢၼ်ႈ ပဵၼ်ၸိုင်ႈမိူင်းလုတ်ႈႁၢမ်းၼိူဝ် လွင်ႈႁၢမ်ႈႁေႉၵႂၢတ်ႇလၢင်ႉယႃႈမဝ်းၵမ်ဝႃႈၼႆယဝ်ႉ။

 ၼႂ်းၼၼ်ႉၸိုင်ႈမိူင်း ႁူမ်ႈသဵၼ်ႈမီးယူႇ 23 မိူင်းသေ ဢဝ်ၸဵမ်မိူင်းၶႄႇ၊ ဢိၼ်ႊတီႊယိူဝ်ႊ၊ ပႃႊၵိသ်တၼ်ႊ ၸိူဝ်းယူႇၸပ်းၸမ်မိူင်းမၢၼ်ႈၵေႃႈၶဝ်ႈပႃးၵွၼ်ႇ။

 ၵူၺ်းၵႃႈ မိူင်းမၢၼ်ႈၼႆႉ ႁူမ်ႈ ၵိုၵ်းၸွမ်း ဢပ်ႊၾၵၢၼ်ႊၼိတ်ႉသ်တၼ်ႊ ၊ ၶူဝ်ႊလမ်ႊပီႊယႃႊၶဝ်သေ ၺႃးပိုၼ်ၽၢဝ်ႇပႃးၼႂ်းၸိုင်ႈမိူင်း ႁႃႈမိူင်း ဢၼ်တေလႆႈဝႆႉၼၵ်းပႂ်ႉတူၺ်း ယွၼ်ႉပိူဝ်ႈပဵၼ်ပိုၼ်ႉတီႈတေႃႉသူင်ႇဢွၵ်ႇယႃႈမဝ်းၵမ်ၵမ်းသိုဝ်ႈၼႆယဝ်ႉ။

ၵဵဝ်ႇၵပ်းလူၺ်ႈ လွင်ႈမၢပ်ႇမႂ်ပိုၼ်ၽၢဝ်ႇဢၼ်ၼႆႉ ၾၢႆႇၶွမ်ႊသျိၼ်ႊသိုၵ်းမၢၼ်ႈ ပႆႇပႃႈတုမ်ႉတွပ်ႇပဵၼ် တၢင်းၵၢၼ် သေတႃႉ လုၵ်ႉတီႈလေႃႇပီႇၶဝ်သေ တႅမ်ႈတွပ်ႇၼိူဝ်ၼႅင်ႈၶၢဝ်ႇတႄႉ မီးယူႇဢိတ်းဢီႈ။

ၵူၺ်းၵႃႈ တွပ်ႇၵေႃႈႁိုဝ်ထိုင်တီႈ၊ မိူၼ်တင်းလုၵ်ႈဢွၼ်ႇႁွင်ႉႁႆႈ ၵိူဝ်းလႆႈၵေႈၼႃႈၵွႆးလေႃႇ။ မိူင်းမၢၼ်ႈၼႆႉ ဢမ်ႇၵွမ်ႉဝႃႈ ယႃႈၽိၼ်ႇ၊ ယႃႈၶၢဝ် ၵႃႈပဵၼ်ယႃႈမႃႉ၊ ယႃႈဢၢႆႉသ် လႄႈ ယႃႈလုတ်ႇ၊ ယႃႈႁုတ်ႇၵူႈမဵဝ်းမဵဝ်း ဢၼ်ဢဝ်ၶူဝ်းၶွင်ၶႄးမီးႁုင်ပဵၼ်ၼၼ်ႉ ဢွၵ်ႇၼမ်လၢႆပိူဝ်ႇလိူဝ်ႉ တွၼ်းတိူဝ်းတင်းၵမ်ႇၾႃႇ ၼႆ DEA ႁူႉထိုင်ယူႇလူး။

ထဵင်ၵေႃႈ သုမ်းလူမ်းထႅင်ႈၵူၺ်း။

 ၵွင်ႉၵၢႆႇတင်းလွင်ႈၼႆႉလႄႈႁႃႉ သလေႃႇဢမ်ႇတေႃႇႁိုၵ်ႉၺႃးၼႄႇ ဢမ်ႇၸၢင်ႈဝႃႈ၊ ၼႂ်းဝၼ်းတီႈ 19 ဝၢႆးလင်ဢမႄႊရိၵၼ်ႊ ဢွၵ်ႇၶၢဝ်ႇယဝ့် 4 ဝၼ်း လႆႈႁၼ် KNU ၸုတ်ႇၽဝ်ပႅတ်ႈ ယႃႈမႃႉ ႁူၵ်းလၢၼ်ႉမဵတ်ႉလိူဝ်သေ ပိုၼ်ၽၢဝ်ႇပႃးဝႃႈ ၸုမ်းၶဝ်တိုၼ်းဢမ်ႇၵဵဝ်ႇၶွင်ႈၸွမ်း လွင်ႈၵႃႉၶၢႆယႃႈမဝ်းၵမ်၊ ယဝ်ႉၵေႃႈ လွင်ႈႁဵတ်းဢွၵ်ႇပိုၼ်ၽႄယႃႈမဝ်းၵမ်ၼႆႉ တေၽၢၼ်ႉႁႃဢဝ်လိူင်ႈၵႂႃႇၵူႈၸၼ်ႉၸၼ်ႉဝႃႈၼႆပႃးယဝ်ႉ။

ၵွၼ်ႇပႆႇပိုၼ်ၽၢဝ်ႇ လိူင်ႈယႃႈမဝ်းၵမ် ဢမႄႊရိၵၼ်ႊ ဢဝ်လိူင်ႈတေႃႇ BGF ၸေႃးၶျိတ်ႉတူႇၼၼ်ႉၵေႃႈ မီးဝႆႉယဝ်ႉလႄႈ ၵူဝ်ယူးပၢၵ်ႈၵွင်ႉၵၢႆႇမႃးသေ KNU ၸင်ႇၼႅတ်ႈယၼ်ႇၽႃႈၵၢင်ႈလူင်းထႃႈႁိုဝ်ၼႆ တႃႉလီႁေႈႁူထွမ်ႇၸွမ်းယူႇ ငိၼ်းၵမ်ႈၽွင်ႈဝႃႈၼႆယဝ်ႉ။

 လၢႆးၼင်ႇၼႆ ၶွမ်ႊသျိၼ်ႊသိုၵ်းမၢၼ်ႈၵေႃႈ ၸႂ်ႉမႃးႁဵတ်းမႃးၼမ်ၼႃႇၼႃႇ လၢႆသိပ်းပီမိူင်းယဝ်ႉလႄႈ ပိူဝ်ႈတႃႇၵူၼ်းမိူင်းၽႃးၵႃႇတႄႉ ဢမ်ႇလၢၵ်ႇလၢႆးသၢႆတႃသင်ယဝ်ႉသႄႈ။

 ၸုမ်းၸၢဝ်းယိပ်းၵွင်ႈၵၢင်ႇ ၸမ်ၸမ်တင်းသဵင်ႈၼႆႉ ဢမ်ႇလၢႆး႞ၵေႃႈလၢႆး႞ တိုၼ်းၵဵဝ်ႇၵွင်ႉပႃး ဢေႇႁိုဝ်ၼမ်ယဝ်ႉၼႆ လွမ်ပွင်ႇၸႂ်ၵၼ်ဝႆႉယဝ်ႉလူး။

တေႃႈၼင်ႇ PDF ၸိူဝ်းၸင်ႇငႃၶဝ်ႈပႃးၼႂ်း သဵၼ်ႈၸိုဝ်ႈလုၵ်ႉၽိုၼ်ႉမႃးၵွႆး ယဝ်းပဵၼ်လိူင်ႈပဵၼ်လၢဝ်း ဢွၵ်ႇၶၢဝ်ႇလင်တူဝ်ႈၸွတ်ႇမိူင်းမႃး ၼႂ်းပႆႇႁိုင်သင်ၼႆႉဢမ်ႇႁိုဝ်။ ပိုၼ်းလုၵ်ႉၽိုၼ်ႉ လႄႈ ယႃႈမဝ်းၵမ်ၼႆႉ တိုၼ်းသုၵ်ႉပိုၼ်ႉၸွမ်းၵၼ်မႃး ၸဵမ်ပိုင်းၼၼ်ႉယိုင်။

ၵူၺ်းၼၼ်သေတႃႉ ၼင်ႇႁိုဝ်ပိုၼ်းသုၵ်ႉပိုၼ်းသဝ်ႈ တေၸၢႆႇတေၸၢင်တႄႉ ၸိူဝ်းဝႆႉၼၵ်းပၵ်း ၸႂ် သုၵ်ႈသီလၢင်ႉပွတ်ႈ ႁဵတ်းတေႉႁဵတ်းဝႃႈၵေႃႈ မီးယဝ်ႉ။ မၢင်ၸုမ်း ၶုတ်းလဵၵ်းၶုတ်းၽွႆႈၶၢႆသေ လၢင်ႉမွတ်ႇႁွႆးတိၼ်ၵဝ်ႇ၊ မၢင်ၸုမ်း ၶုတ်းၶမ်းၶုတ်းသႅင်သေ သုၵ်ႈသီပိုၼ်းမွင်၊ ၵမ်းလိုၼ်း ဢဝ်ၵၢ ၼ်လိၼ်သႅပ်ႉၶိုၼ်ႈၼႃႈသေ ၶတ်းၸႂ်သုမ်ႇငုမ်းတူမ်းႁၢႆ ဢၢႆတူႇဝၼ်းလင်ၵေႃႈမီး။

 ပေႃးတူၺ်း ၽၢႆႇသိုၵ်းမၢၼ်ႈၵူႈသိုပ်ႇသိုပ်ႇၼႆၵေႃႈ ၵိုၵ်းငိုၵ်းလႄႈၵင်ႇငင်ႇ လင်ႇလႅၼ်ႈဝႅၼ်ႈဝၢႆႈၸွမ်းၵၼ်မႃးၵွႆး ၼႆ ႁူႉထိုင်ၵၼ်ယူႇသၵ်းသၵ်း။

ဢမ်ႇၵႃးၵွႆး ၵၢၼ်ၵႃႉၶၢႆတေႃႉသူင်ႇဢွၵ်ႇမိူင်းၼွၵ်ႈ၊ တီႈဝဵင်းယႂ်ႇဝဵင်းလူင် ပွႆႇႁႂ်ႈမိုတ်ႈသူင်ၽႄႈတိူၼ်း လူၺ်ႈလၢႆးၵၢၼ်မိူင်းတွၼ်ႁေႈသႅၼ်းႁုၼ်ႈမႂ်ႇၼႆႉ ၸွင်ႇဢမ်ႇႁၼ်တႂ်ႈၼႃႈတၼ်းတႃၵၼ်ယဝ်ႉႁိုဝ်။

ပဵၼ်ႁိုဝ်ၵေႃႈလၢႆးလႃႈ တီႈမိူင်းဢမႄႊရိၵ လႄႈ တၢင်းတူၵ်းၼႆႉ ယႃႈၶၢဝ်ဢၼ်လုၵ်ႉတီႈယႃႈၽိၼ်ႇလမ်သေႁုင်ပဵၼ်မႃးၼႆႉ ဢမ်ႇပေႃးၶဝ်ႈလွၵ်းၵၢတ်ႇ ပဵင်းမိူၼ်ယႃႈၶႄႊမီႊဢွၵ်ႇမႂ်ႇၸိူဝ်းၼၼ်ႉယဝ်ႉ ၼႆ ႁူႉထိုင်ၵၼ်ယူႇလႄႈ ႁဵတ်းသင်သမ်ႉ တိုၵ်ႉတူၵ်ႇၸိုဝ်ႈမိူင်းမၢၼ်ႈသႂ်ႇပႃးၼႂ်းသဵၼ်ႈမၢႆ တေလႆႈဝႆႉၼၵ်းပႂ်ႉတူၺ်းၼၼ်ႉလႃႇ။

ၶူဝ်းၶွင်ၶႄႊမီႊ ဢၼ်တေပဵၼ်ပႅင်ႈပဵၼ်မႄႈ ၶွင်ယႃႈမဝ်းၵမ်ပၢၼ်မႂ်ႇ ၼႆႉ လုၵ့်မိူင်းလႂ်မႃး၊ လုၵ်ႉတီႈၸိူဝ်းမိူင်းလူင်ႁိမ်းႁွမ်းၼၼ်ႉ သူင်ႇၶဝ်ႈမႃးၼႆ လွတ်ႈလၢတ်ႈၵၼ်ယဝ်ႉလူင်။ 

ၵွပ်ႈၼႆ ၼႂ်းသဵၼ်ႈမၢႆလုတ်ႈႁၢမ်းၼိူဝ် လွင်ႈႁေႉႁၢမ်ႈၼၼ်ႉ ၸင်ႇပေႃႈလႆႈပႃးဝႆႉမိူင်းၶႄႇ၊ ဢိၼ်ႊတီႊယိူဝ်ႊ၊ ပႃႊၵိသ်တၼ်ႊ ၸိူဝ်းၼႆႉယဝ်ႉ။

တီႈၼႆႈ ၵူၼ်းၵၢၼ်မိူင်းၵမ်ႈၽွင်ႈ ၾၢင်ႉႁၼ်ၵၼ်ဝႃႈ ပေႃႉၼမ်ႉတွင်ႈၸႂ်ပႃ ပေႃႉမႃထိုင်ၸႂ်ၸဝ်ႈဢိူဝ်ႈ၊ ဢဝ်လိူင်ႈတေႃႇသိုၵ်းမၢၼ်ႈၼႆႉ မိူၼ်ဝိုတ်ႉၽၢတ်ႈပႃးပေႃႈလဵင်ႉလူင်မၼ်း ဢၼ်ယူႇလင်ၵမ်ႉယၼ်ယဝ်ႉ ၼႆဢေႃႈ။

သုတ်းတီႈ AA တပ်ႉသိုၵ်းရၶႅင်ႇ ဢိုၵ်းတိုၵ်းဢၢင်းတၢင်း ၼႅတ်ႈၶဝ်ႈႁႃလီတေႃႇ ႁူဝ်ၼႃႈၸၢဝ်းမူႇသလိမ်ႇၼႂ်းပိုၼ်ႉတီႈရၶႅင်ႇၼႆၵေႃႈ ယင်းဢွၼ်လၢမ်းၶၢတ်ႈႁၼ်ထိုင်ဝႃႈ ယွၼ်ႉသၢႆလင်တၢင်းဢမႄႊရိၵ ၽတ်ႉၽႅတ်းယွၼ်ႈသၼ်ႇမႃးၼႆယဝ်ႉ။

ၼႂ်းငဝ်းလၢႆးၼင်ႇၼႆ ၸိူဝ်းလေႃႇပီႇၶွင် ၶွမ်ႊသျိၼ်ႊတပ်ႉသိုၵ်းမၢၼ်ႈ တိုၵ်ႉတႆႈတဵၼ်းတႆႈဢၢင်း သူင်ႇၶေႃႉလွႆးၵဵဝ်ႇ ဢဵင်ႈၵဵင်ႈယႃၸႂ်တူဝ်ၵဝ်ႇဝႃႈ ယွၼ်ႉပိူဝ်ႈၻေႃႊၼႄႊလ်ထရမ်ႉ ၶႂ်ႈလႆႈလိၼ်သႅပ်ႉရႄးဢိူတ်ႉ သမ်ႉ ဢမ်ႇၸၢင်ႈႁႃလႆႈလႄႈ ၸင်ႇတၵ်းဢဝ်လိူင်ႈယႃႈမဝ်းၵမ် ပၢႆႉသႂ်ႇႁူဝ်ၶဝ်ၵွႆးၼႆဝႃႇ။

ဢၼ်ၼႆႉ ၸိူဝ်းႁူႉယိူဝ်ႇ ဢမ်ႁၼ်ၶေႃမဵတ်းၼၼ်ႉ တေၸိူမ်ႈၸႂ်ၸွမ်းၶေႃႈၵႂၢမ်းၼႆႈလႆႈယူႇၵေႃႈ ၸိူဝ်းပိူၵ်ႇမၢင်တႄႉ ၼႅတ်ႈႁႅၼ်းလွၵ်းလိင်ႉမၢၵ်ႈမီးၽႂ်မၼ်း ႁႂ်ႈပေႃးၵဵဝ်ႇၵွတ်ႇၸွမ်းလၢႆးၵၢၼ်မိူင်းတူဝ်ၵဝ်ႇယူႇယဝ်ႉဢေႃႈ။ ၵၢၼ်မိူင်းၼႆႉ ယိူင်းသၢႆႉၸၢင်ႈယိုဝ်းၶႂႃ ငႃႁူဝ်ၸၢင်ႈႁမ်းတိၼ်ၼႆ လူင်လိုမ်းပႅတ်ႈ ဢမ်ႇလႆႈၶႃႈလူးၼေႃႈ။