တႄႇႁၢင်လိူၼ် သႅပ်ႊထႅမ်ႊပိူဝ်ႊၼႆႉမႃးသိုၵ်းၵဝ်ႈၵၢင်ႉႁႂ်ႈၵူၼ်းၼႂ်း  16 ဝၢၼ်ႈဢိူင်ႇႁူဝ်ယ ၸႄႈဝဵင်းမိူင်းယႆ ၸိုင်ႈတႆးပွတ်းႁွင်ႇ ႁဵတ်းဝႂ်မုင်ႉႁေႃႁိူၼ်း လႄႈ ဝႂ်မၢႆၾၢင်ၵဝ်ႈၵၢင်ႉ ၊ ပေႃးဢမ်ႇႁဵတ်းတေၼပ်ႉသွၼ်ပဵၼ်ၶႅၵ်ႇ ဝႃႈၼႆ ။

ၼႂ်းဝၼ်းတီႈ18/9/2025 ၼႆႉ သိုၵ်းၵဝ်ႈၵၢင်ႉႁွင်ႉဢဝ်ၵၢင်ႉၵႄႇၵူႈဝၢၼ်ႈဝၢၼ်ႈ ဢၼ်မီးၼႂ်းဢိူင်ႇႁူဝ်ယသေ ဢုပ်ႇၵုမ်ၵၼ်လွင်ႈတေႁဵတ်းဝႂ်မုင်ႉႁေႃႁိူၼ်းလႄႈ မၢႆၾၢင်ၼႆသေ လူင်းၵဵပ်းသဵၼ်ႈမၢႆ တႃႇဝႂ် မုင်ႉႁေႃႁိူၼ်းၵႂႃႇ ၼႂ်းဝၼ်းတီႈ 20/9/2025  ။ ၼႂ်းဢိူင်ႇႁူဝ်ယ ၊ ၵူၼ်းမႃးႁဵတ်းဝႂ် မုင်ႉႁေႃႁိူၼ်း ၵဝ်ႈၵၢင်ႉ ႁူဝ်ၵူၼ်းမီး 500 ပၢႆၼႆယဝ်ႉ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ဝၼ်းတီႈ20 ၼၼ်ႉမႃးႁဵတ်းပၼ်ဝၼ်းလဵဝ် ၵူၼ်းႁဵတ်းမီး 500 ပၢႆ ၊ ၼႂ်းဢိူင်ႇႁူဝ်ယ 80 %ၼႆႉ ၵႂႃႇႁဵတ်းၵၼ်ၵမ်ႈၼမ်  ၊ ၵမ်ႈၽွင်ႈၵေႃႈ ဢမ်ႇႁတ်းႁဵတ်း ၊ ဢၼ်ႁဵတ်းပၼ်ၵႂႃႇ ၼႂ်းဝၼ်းတီႈ 20 ၼႆႉ ပဵၼ်တႃႇဝႂ် မုင်ႉႁေႃႁိူၼ်းၵူၺ်း ၊ ထႅင်ႈ 4 လိူၼ် ၸွင်ႇလႆႈၼႆ မၢႆၾၢင်တႄႉ ဝၢႆးလင်ၼၼ်ႉၸွင်ႇတေလႆႈႁဵတ်း”-ဝႃႈၼႆ ။

ၽွင်းသိုၵ်းၵဝ်ႈၵၢင်ႉၶဝ် မႃးၵဵပ်းသဵၼ်ႈမၢႆတႃႇဝႂ် မုင်ႉႁေႃႁိူၼ်းၼၼ်ႉ ပႃး ႁွင်ႈၵၢၼ်ၾၢႆႇၽွင်းငမ်းၵူႈလွင်ႈ သိုၵ်းၵဝ်ႈၵၢင်ႉ ၊ ၾၢႆႇၸႄႈဝဵင်းလႄႈ ၾၢႆႇၽွင်းငမ်း ႁူမ်ႈၵၼ် မႃးၵဵပ်းသဵၼ်ႈမၢႆ ၼႆယဝ်ႉ။ လိူဝ်ၼၼ်ႉ သင်ဝႃႈ ၵူၼ်းမိူင်းဢမ်ႇႁဵတ်းဝႂ်မၢႆၾၢင် လႄႈဝႂ် မုင်ႉႁေႃႁိူၼ်း ၵဝ်ႈၵၢင်ႉၼႆ  ပဵၼ်ၵူၼ်းပိုၼ်ႉတီႈတႄႉတႄႉယူႇၵေႃႈ တေမၢႆဝႃႈပဵၼ်ၶႅၵ်ႇ – ၼႆ ၵဝ်ႈၵၢင်ႉလၢတ်ႈတီႈၵၢင်ႉၵႄႇၼႂ်းပိုၼ်ႉတီႈၼင်ႇၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ဢမ်ႇတဵၵ်းတဵင်သေတႃႉ ၶေႃႈၵႂၢမ်းဢၼ်ၶဝ်ဝႃႈ ပေႃးဢမ်ႇႁဵတ်းတေၼပ်ႉႁဝ်းၶဝ် ပဵၼ်ၸဝ်ႈၶႅၵ်ႇၼၼ်ႉ လီၼၵ်းၸႂ်တႄႉၶႃႈ ၊ မၼ်းၵေႃႈပွင်ႇဝႃႈတဵၵ်းတဵင်လူၺ်ႈလၢႆးတၢင်းၵူတ်ႉငွၵ်းၼၼ်ႉၵူၺ်း ၊ မိူင်းလႄႈမိူင်းႁဝ်း လီတိူဝ်ႉၸႂ်ၼႃႇ ၊ ပေႃးၵူၼ်းမိူင်းဢမ်ႇႁဵတ်းဝႆႉ ပေႃးဝၢၼ်ႈမိူင်းပိၼ်ႇတေသုမ်းသုၼ်လႆႈၵူၼ်းပိုၼ်ႉတီႈၵူႈလွင်ႈ ၊ တလဵဝ်ၼႆႉ ဝႂ်မုင်ႉႁေႃႁိူၼ်းတေမီးသွင်ဢၼ် ၾၢႆႇမၢၼ်ႈ ၊ ၾၢႆႇၵဝ်ႈၵၢင်ႉဝႆႉ ”- ဝႃႈၼႆ ။

ယၢမ်းလဵဝ် သိုၵ်းၵဝ်ႈၵၢင်ႉလူင်းၵဵပ်းသဵၼ်ႈမၢႆ တႃႇဝႂ်မုင်ႉႁေႃႁိူၼ်း ဢွၼ်တင်းသေ ပေႃးလႆႈမႃး ဝႂ်မုင်ႉႁေႃႁိူၼ်း တေလႆႈပၼ် ငိုၼ်းတႃႇ ၼိုင်ႈႁိူၼ်း  6000 ပျႃး ၊ တႃႇမၢႆၾၢင်တႄႉတေလႆႈပၼ် 18000 ပျႃး ၼႆယဝ်ႉ ။

ဝၢၼ်ႈဢၼ်သိုၵ်းၵဝ်ႈၵၢင်ႉၶဝ်ၸတ်းႁဵတ်းပၼ် မၢႆၾၢင် 16 ဝၢၼ်ႈၼၼ်ႉပဵၼ် ဝၢၼ်ႈၼမ်ႉတူၵ်း ၊ ၵွင်းမွင် ၊ ပၢင်ၼႃးႁူၵ်း ၊ လၵ်းၸၢင်ႉ ၊ ဝၢၼ်ႈလူင် ၊ ဝၢၼ်ႈဢွႆႇ ၊ ပၢင်ၺွင်ႇ ၊ ပၢင်ၵူဝ်း ၊ ၼွင်မူဝ် ၊ ၼမ်ႉလၼ်ႈ ၊ ႁူဝ်လွင်း ၊ ၵွင်းၼႃးမူၼ်း ၸဵမ်ၸိူဝ်းၼႆႉၼႆယဝ်ႉ ။  

ဢိူင်ႇႁူဝ်ယၼႆႉ တင်းမူတ်းမီး 21 ဝၢၼ်ႈ မီးၾၢႆႇႁွင်ႇဝဵင်းမိူင်းယႆ ယၢၼ်ဝဵင်း 5 လၵ်း ။ ဝဵင်းမိူင်းယႆၼႆႉ ဢမ်ႇတိူဝ်ႉၸၢၵ်ႇၽႅၼ်ယၼ်ႇသိုၵ်း 1027 သေတႃႉ ၵူၼ်းမိူင်းၸိူဝ်းထူပ်းၽေးပၢင်တိုၵ်းၼၼ်ႉဢွၼ်ၵၼ်မႃးသွၼ်ႈယူႇသဝ်းဝႆႉတင်းၼမ်။ ပႃးၸဵမ်သိုၵ်းမၢၼ်ႈ လႃႈသဵဝ်ႈၵေႃႈ မႃးယင်ႉယူႇသဝ်းဝႆႉၽွင်းလႆႈထွႆထွၼ်ပၼ်သိုၵ်းၵဝ်ႈၵၢင်ႉ။ ၽွင်းပၢင်တိုၵ်း ၽႅၼ်ယၼ်ႇသိုၵ်း 1027 ၼၼ်ႉ သိုၵ်းတႆး SSPP ၼႄၾၢင်ႁၢင်ႈသိုၵ်း ဢဝ်ႁႅင်းသိုၵ်း တူင်ႉၼိုင်ၵႂႃႇမႃးၵၢင်ဝဵင်းယူႇသေတႃႉ ဝၢႆးပၢင်တိုၵ်းၼႆႉမီးပႃး သိုၵ်းၵဝ်ႈၵၢင်ႉ MNDAA ၊ သိုၵ်းဝႃႉ UWSA လႄႈ သိုၵ်းမၢၼ်ႈ ၸိူဝ်းၼႆႉထႅင်ႈ။ ႁဵတ်းႁႂ်ႈၵူၼ်းမိူင်းထုၵ်ႇတဵၵ်းတဵင်လၢႆပႃႈလၢႆၾၢႆႇ ။

မိူၼ်ၼႆ ၼင်ႇၵဝ် ၼႂ်းဝၼ်းတီႈ 16 လိူၼ်ဢေႃးၵၢတ်ႉသ် ၶႃႈႁၢပ်ႇၵၢၼ် ၼႂ်းၸုမ်းသိုၵ်းတဢၢင်း TNLA လူင်းတဝ်ၼႂ်းဝၢၼ်ႈ တဵၵ်းၵဵပ်းသဵၼ်ႈမၢႆႁူဝ်ၼပ်ႉၵူၼ်း ၼႂ်းထုင်ႉမၢၼ်ႈၸၢမ် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ သေ လွၵ်ႇငိုတ်ႈ တဵၵ်းႁႂ်ႈႁဵတ်းမၢႆၾၢင် ၼိုင်ႈႁိူၼ်းလႂ်ၼိုင်ႈၵေႃႉၼင်ႇၵဝ်ႇ ။