ၽႂ်မီးငိုၼ်းပဵၼ်ၸဝ်ႈ ၽႂ်မီးၶဝ်ႈပဵၼ်ၶုၼ်ၼႆၼၼ်ႉ ပွင်ႇဝႃႈ တႃႇပဵၼ်ၸဝ်ႈပဵၼ်ၸွမ်ၼႆႉ ငိုၼ်းၼႆႉ လမ်ႇလွင်ႈ ယူႇတွၼ်ႈၼိုင်ႈ ။ ၵၢၼ်ပဵၼ်ၸဝ်ႈပဵၼ်ၶုၼ်ၼႆႉ ၶတ်းၸႂ်မီးငိုၼ်းမီးၶမ်းၵူၺ်းႁိုဝ်တေယဝ်ႉ ။ တၵ်းလႆႈတူၺ်း ထိုင်ပႃးလွင်ႈယူႇလွင်ႈၵိၼ် ၵူၼ်းဝၢၼ်ႈၵူၼ်းမိူင်း  ၸင်ႇႁွင်ႉဝႃႈ ၶုၼ်လီ ။

ၵူၺ်းၵႃႈ ၼႂ်းမိူင်းႁူမ်ႈတုမ်မၢၼ်ႈသမ်ႉ ၵမ်ႈၼမ်ႁႃသဵၼ်ႈတၢင်း တႃႇမီးၸၼ်ႉမီးထၢၼ်ႈ ပဵၼ်ၸဝ်ႈ ပဵၼ်ၸွမ် ၵူၺ်း ဢမ်ႇတွၼ်ႉသႂ်ႇၸႂ်တႃႇပုၼ်ႈၵူၼ်းၼမ် ။ ပွတ်းတၢင်း ၸႄႈဝဵင်းပူႇတႂ်း ၸႄႈမိူင်းၶၢင်ယၢမ်းလဵဝ် ၼႆႉၵေႃႈ ၼင်ႇၼၼ်။  ပဵၼ်ဢွင်ႈတီႈဢၼ် မီးမေႃႇၶမ်း ယႂ်ႇလူင်လႄႈ ၵူၼ်းၸိူဝ်းႁၼ်ပုၼ်ႈသုၼ်ႇတူဝ် ၵမ်ႈၼမ်ၶတ်း ၸႂ်မီးဢႃႇၼႃႇ မီးၸၼ်ႉထၢၼ်ပွတ်းၼၼ်ႉသေ ၶိုင်ပွင်ႁဵတ်းသၢင်ႈတႃႇသုၼ်ႇတူဝ် မႃးပၢၼ်သိုပ်ႇပၢၼ် ။ ပီႈၼွင်ႉတႆးလႄႈ ၵူႈၸၢဝ်းၶိူဝ်းဢၼ် ယူႇသဝ်းၼႂ်းပူႇတႂ်းမႃးၸဵမ်မိုၼ်ႉသိုၼ်းၵွၼ်ႇသမ်ႉ ၵုမ်ႇလႆႈၺႃး ၽွၼ်းယွၼ်ႈ မၼ်းလွၼ်ႉလွၼ်ႉ ။

ဝဵင်းပူႇတႂ်းၼႆႉ တိုၼ်းမီးပိုၼ်းၵိုၵ်း ၸၢဝ်းၶိူဝ်းတႆးမႃး ၸဵမ်မိုၼ်ႉသိုၼ်းၵွၼ်ႇ ။  ၵၢပ်ႈယၢမ်းလဵဝ် ၶဝ်ႈၸိုဝ်ႈဝႃႈ မီးၼႂ်းၸႄႈမိူင်းၶၢင်ၼႆသေတႃႉ ၸၢဝ်းတႆးတိုၵ်ႉယူႇထင်သဝ်းၼမ်မိူၼ်ၵဝ်ႇ ။

ပဵၼ်ဝဵင်းဢၼ် တိတ်းၸပ်းၵၼ်တင်းမိူင်းၶႄႇ ယူႊၼၢၼ်ႊ လႄႈ မိူင်ဢိၼ်ႊတီႊယိူဝ်ႊ ဢႃႇသမ်ႇ ။ ဝဵင်း ပူႇတႂ်းၼႆႉ ပဵၼ်ဢွင်ႈတီဢၼ်ၵိုၵ်းပိုၼ်းၸၢဝ်းတႆးၶမ်းတီႈလႄႈ  ၵွၼ်ႇၼႃႈ ၵူၼ်းဢိင်းၵလဵတ်ႈ ပႆႇၶဝ်ႈ မိူင်းမႃးၼၼ်ႉ ယင်းတိုၵ်ႉႁွင်ႉဝႃႈ ထုင်ႉၶမ်းတီႈလူင် ၼႆယူႇ။

ဝဵင်းပူႇတႂ်းၼႆႉ ၵူၼ်းမိူင်းယူႇၸွမ်းၵၼ်လၢႆၸၢဝ်းၶိူဝ်းယူႇသေတႃႉ ဢိင်ၼိူဝ်ၶုၼ်မၢၼ်ႈ ပၢၼ်သိုပ်ႇပၢၼ် ၸႅၵ်ႇထႅၵ်ႇမႃးတႃႇသေႇလႄႈ ႁိုဝ်ပဵၼ်ၼမ်ႉၼိုင်ႈၸႂ်လဵဝ်ၵၼ် ။ ၵွပ်ႈၼၼ် ဝဵင်းပူႇတႂ်းၼႆႉ ၺႃးၸိူဝ်းမီး ဢႃႇၼႃႇၶဝ် ၸတ်းပွင်မႃးထိုင်ဝၼ်းမိူဝ်ႈၼႆႉ။

ၸဵမ်ဢဝ်ၵၢၼ်ၶုတ်းၶမ်းၼႂ်းပိုၼ်ႉတီႈၸိူဝ်းၼႆႉ ၵမ်ႈၼမ်ယူႇတႂ်ႈမိုဝ်းၽူႈမီးဢႃႇၼႃႇၶဝ်မႃးၵူၺ်း ။ ပေႃးဢဝ် ၾိင်ႈယၢမ်ႈၵူၼ်းၼႂ်းပိုၼ်ႉတီႈပူႇတႂ်းဝႃႈတႄႉ ၵၢၼ်ၶုတ်းၶမ်းၼႆႉ မိူဝ်ႈဢွၼ်တၢင်း ၶုတ်းဢဝ်ၵႃႈမႃႇ ၵႃႈႁႅင်း ၽႂ်မၼ်းၵူၺ်း ၊ ဢမ်ႇထိုင်တီႈ ၸႂ်ႉၶိူင်ႈၶုတ်းလိူဝ်ႁႅင်း။

ဝၢႆးသေ လူင်ပွင်ၸိုင်ႈမၢၼ်ႈပၢၼ်သိုပ်ႇပၢၼ် ပၼ်ၶႂၢင်ႉၶွမ်ႊပၼီႊၶုတ်းၶမ်းၶဝ်ႈယဝ်ႉၼၼ်ႉတႄႉ ၵူႈၸိူဝ်ႉ ၵူႈလွင်ႈလႅၵ်ႈလၢႆႈ ဢမ်ႇဝႃႈ ၵၢၼ်ယူႇသဝ်းၵူၼ်းပိုၼ်ႉတီႈလႄႈ သိင်ႇဝႅတ်ႉလွမ်ႉ ။

ၼႂ်းပီ 2021 ၼၼ်ႉ ၸွမ်းၼင်ႇ သဵၼ်ႈမၢႆၼႂ်း ႁွင်ႈၵၢၼ်ၾၢႆႇၶုတ်းႁႄႈ သတ္တုတွင်းဦးစီးဌာန ၵိင်ႇၽႄၸႄႈမိူင်းၶၢင် တႅမ်ႈမၢႆဝႆႉတႄႉ ၵၢၼ်ၶုတ်းႁႄႈသႅၼ်းပၢၼ်ၵၢင်လႄႈသႅၼ်းယႂ်ႇ မီးဝႆႉ 10 တီႈ ၊ တင်းၵႂၢင်ႈ မီး 8417295 ဢေႊၶိူဝ်ႊ။

ဢွင်ႈတီႈဢၼ်ပၼ်ၶႂၢင်ႉၶုတ်းယွႆႈယွႆႈယႅမ်းယႅမ်းသမ်ႉ မီး 4 တီႈ တၢင်းၵႂၢင်ႈ မီး 4220389 ဢေႊၶိူဝ်ႊ။ တင်းမူတ်းဝႆႉ ဢွင်ႈတီႈၶုတ်းၶမ်းမီး 14 တီႈ။

မိူဝ်ႈပၢၼ်လူင်ပွင်ၸိုင်ႈၼူၵ်ႉယုင်း ပီ 2020 ၼႂ်းသဵၼ်ႈမၢႆ ထိုင် လိူၼ်မေႊ ၼၼ်ႉ ၼႂ်းၸႄႈမိူင်းၶၢင် တႃႇ 11 ၸႄႈဝဵင်း ၼႆႉ ပၼ်ၶႂၢင်ႉဢွင်ႈတီႈၶုတ်းၶမ်းသႅၼ်းယႂ်ႇ ဝႆႉ 223 တီႈ ။ ဢွင်ႈတီႈၶုတ်းၶမ်းဢၼ်ယွႆႈယႅမ်းသမ်ႉ မီးဝႆႉ 262 တီႈ။  

ၵူၺ်းၵႃႈ ဝၢႆးၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ၶိုၼ်ႈမႃးပဵၼ်ၶုၼ်ယဝ်ႉၼၼ်ႉ ဢွင်ႈတီႈၶုတ်းၶမ်းၸိူဝ်းၼႆႉ ၶႅၼ်းၼမ်တိူဝ်းၶိုၼ်ႈမႃးထႅင်ႈ   2 ပုၼ်ႈ ၊ ဢမ်ႇၵွမ်ႉၶွမ်ႊပၼီႊၵူၺ်း ၸဝ်ႈငိုၼ်းသႃးၶဝ်ၵေႃႈ လူင်းတိုၼ်း သိုဝ်ႉတီႈလိၼ်ၸွမ်းၼႂ်းဝၢၼ်ႈၼႂ်းသူၼ်သေ ဢွၼ်ၵၼ်ၶုတ်းထႅင်ႈ ၵၢၼ်ၶုတ်းၶမ်းယႂ်ႇၵႂၢင်ႈ မႃးလိူဝ်ၵဝ်ႇ ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈ။

ၼႂ်းႁူဝ်ပီ 2023 ၼၼ်ႉ ဢိင်ၼိူဝ် ၸုမ်းယိပ်းၵွင်ႈၵၢင်ႇလႄႈ သိုၵ်းမၢၼ်ႈၵႆႉမီးလွင်ႈ ၶဵင်ႈၶႅင်ၵၢၼ်သိုၵ်း တေႃႇၵၼ်ၸိူဝ်းၼႆႉသေ ပိၵ်ႉဢိုတ်းသဵၼ်ႈတႃႈသၢႆတၢင်း ၸွမ်းၵႄႈဝဵင်းပူႇတႂ်းလႄႈဝဵင်းၸေႊၼႃး။

ၽွၼ်းယွၼ်ႈပၢင်သိုၵ်းၸိူဝ်းၼႆႉ ႁဵတ်းႁႂ်ႈ ၵုၼ်ႇၵႃႉတၢင်းၶၢႆႁႃသိုဝ်ႉယၢပ်ႇ။  ၵိုင်ႉၵၢင်ႉၵႃႈၶၼ်သုင်။ ၼမ်ႉမၼ်းၸိူဝ်ႉၾႆး ၼိုင်ႈလိတ်ႉ လႆႈသိုဝ်ႉထိုင်သႅၼ် ၊ ၶႆႇၼိုင်ႈႁူၺ်ႇထိုင် 5000 ပျႃး။

ၵၢၼ်ၵႃႉၵၢၼ်ၶၢႆဢမ်ႇပဵၼ်ၵၢၼ်လႄႈ ၵမ်ႈၼမ်ၶႂ်ႈပိၼ်ႇဝၢႆႇမႃးႁဵတ်း ၵၢၼ်ၶုတ်းၶမ်းထႅင်ႈ။ ၸိူဝ်းယၢမ်ႈ လူင်းတိုၼ်းႁဵတ်းၵၢၼ်ၶုတ်းလိၼ်ၶုတ်းတၢင်းၸိူဝ်းၼႆႉၵေႃႈ လႅၵ်ႈပဵၼ်ၵၢၼ်ၶုတ်းၶမ်းမႃးၶိူဝ်းယႂ်း ။ ၸင်ႇဝႃႈ ၶၢဝ်းသိုၵ်းမၢၼ်ႈယိုတ်းမိူင်းၼႆႉ ဢွင်ႈတီႈၶုတ်းၶမ်းတိူဝ်းၼမ်မႃးလိူဝ်ၵဝ်ႇ။

ၼၢင်းယိင်းၵူၼ်းႁဵတ်းၵၢၼ်တူင်ႇၵူၼ်းၵေႃႉၼိုင်ႈလၢတ်ႈၼႄဝႆႉတၢင်းၵႂၢမ်းမၢၼ်ႈၼင်ႇၼႆ –

 ၵႄးၼမ်ႉဢွၼ်ႇဢၼ်လႆႈယူႇၼႂ်းၸႄႈဝဵင်းပူႇတႂ်းၼႆႉ ပေႃးၶၢဝ်းလွႆၼမ်ႉၶႅင်ၸိူမ်ႈ ၸင်ႇတေမီး ၼမ်ႉႁူၺ်ႈၼမ်ႉလွႆလေႃႈလႆလူင်းမႃး ။ ၵူၺ်းၵႃႈ ပေႃးၶၢဝ်းႁႅင်ႈမႃးသမ်ႉ ဢမ်ႇမီးၼမ်ႉ ၊ ပေႃးၶၢဝ်းၼၼ်ႉ ၵူၼ်းၶုတ်းၶမ်းၶဝ်သမ်ႉ ဢဝ်ၵႃးဝူၵ်း ၵႂႃႇၶုတ်းၽိုၼ်ႉလိၼ်မူတ်း။ထိုင်တီႈ ႁွင်ႈၼမ်ႉၵႄးၼမ်ႉပေႃးႁၢႆ ။ ၽိူဝ်ႇထိုင်ၶၢဝ်းၼမ်ႉၶႅင်ၸိူမ်ႈသေ ၼမ်ႉလွႆလေႃႈမႃးၼၼ်ႉ ဢမ်ႇမီးတီႈ ၼမ်ႉလႆယဝ်ႉလႄႈ ၸင်ႇလူၵ်ႈထူမ်ႈ ၼႂ်းဝၢၼ်ႈၼႂ်းသူၼ်။

ပွတ်းတၢင်းဝၢၼ်ႈၼမ်ႉၶမ်းၼၼ်ႉၵေႃႈ ယူႇတီႈႁွင်ႈၵၢၼ်ဢၼ်ယူႇတႂ်ႈသိုၵ်းမၢၼ်ႈၸိူဝ်းၼၼ်ႉ တင်ႈၸႂ် ပၼ်ၶႂၢင်ႉႁႂ်ႈၶွမ်ႊပၼီႊၶဝ်ၶုတ်းၶမ်းႁင်းၵူၺ်းသေ ၵဵပ်းၶွၼ်ႇႁင်းၵူၺ်းလူးၵွၼ်ႇ ။

 မိူၼ်ၼင်ႇ ပလိၵ်ႈၾၢႆႇႁူမ်ႇလူမ်ႈ ၊ ၾၢႆႇၶႄၾႆး ၊ၾၢႆႇၽွင်းငမ်းၵူႈလွင်ႈလွင်ႈ လႄႈ  ၾၢႆႇႁွင်ႈမိူင် ၸိူဝ်းၼႆႉ ႁူမ်ႈမိုဝ်းၵၼ်သေ ၵဵပ်းၶွၼ်ႇၶုတ်းၶမ်း ၸႅၵ်ႇပၼ်ၵၼ်ၵိၼ်သုၼ်ႇတူဝ်ၽႂ်မၼ်း ။

ဝၢင်းႁိူၼ်း ဝၢင်းသူၼ် လႄႈ ဝၢင်းႁူင်းႁဵၼ်းၸိူဝ်းၼႆႉၵေႃႈ ဢမ်ႇဝႆႉ ပေႃးလႆႈၶွၼ်ႇတိုၼ်းပၼ်ၶႂၢင်ႉ ၼႆ ၸွမ်းၼင်ႇ ၸုမ်းတူင်ႇၵူၼ်းၸႄႈမိူင်းၶၢင် လူင်းထတ်းတူၺ်းၵူၼ်းပိုၼ်ႉတီႈ မိူဝ်ႈႁူဝ်ပီ 2025 ၼႆႉသေ လႆႈႁူႉဝႆႉ။

ပူႇတႂ်းၼႆႉ ၵူၼ်းႁႃၸဝ်ႉၵိၼ်ၶမ်ႈၵမ်ႈၼမ်ၵေႃႈ သႂ်ႇၸႂ်မုင်ႈၸူး ၶႂ်ႈၵိၼ်ၸၢင်ႈၶုတ်းၶမ်း ၸွမ်းၸဝ်ႈ ငိုၼ်းသႃး ၶဝ်မႃး ။ ၸဝ်ႈၶွင် ၵၢၼ်ၶုတ်းၶမ်း မၢင်ၸိူဝ်းၵေႃႈၸၢႆႇပၼ်ငိုၼ်း ၊ မၢင်ၸိူဝ်းသမ်ႉ ဢမ်ႇၸၢႆႇငိုၼ်းသေ ၼင်ႇႁိုဝ် ၵၢၼ်ၶဝ် တေၸဵဝ်းယဝ်ႉၼၼ်ႉသမ်ႉ ပၼ်ယႃႈမဝ်းၵမ် ။ ယွၼ်ႉၵူၼ်းၸိူဝ်းၶႂ်ႈႁႃငိုၼ်းတၢင်းလတ်း မႃးၶွၼ်ႈ ၵၼ်ၼမ်လႄႈ ပွတ်းတၢင်းပူႇတႂ်းၼႆႉ ၸဵမ်ဢဝ် ၵၢၼ်တေႃႇလွင်း ၊ လွင်ႈလၵ်ႉၸူၼ် ၊ လွင်ႈၶႃႈႁႅမ်ၵၼ် ၸိူဝ်းၼႆႉ မီးမႃးၸွမ်း။

ၽွင်းယၢမ်းၽေးၼမ်လူၼ်ႉမိုဝ်းမႃး  ၾၢႆႇၵဵဝ်ႇၶွင်ႈၶဝ် ၸင်ႇသင်ႇပိၵ်ႉပႅတ်ႈၵၢၼ်ၶုတ်းၶမ်းၸူဝ်ႈၶၢဝ်း ၼႆ- ၼၢင်းယိင်းၵူၼ်းႁဵတ်းၵၢၼ်တူင်ႇၵူၼ်းၼႂ်းၸႄႈမိူင်းၶၢင်ၵေႃႉၼိုင်ႈလၢတ်ႈၼႄတၢင်းၵႂၢမ်းမၢၼ်ႈဝႆႉၼင်ႇၼႆ –

တီႈတႄႉမၼ်းမီးဝႆႉ ၵေႃႇမတီႇ မေႃႇၶမ်း ၸိူဝ်းၼႆႉမီးယူႇ။ မီးဝႆႉသေတႃႉၵေႃႈ ၶဝ်ဢမ်ႇၵုမ်းသင်လႆႈ ယႃႈမဝ်းၵမ်ၸိူဝ်းၼႆႉ ၶဝ်ဢမ်ႇႁႄႉႁၢမ်ႈသင်လႆႈသေဢိတ်း။ ဢၼ်ၶဝ်ႁဵတ်းလႆႈတႄႉ ပေႃးဝႃႈ သိုၵ်းၶၢင် KIA တေမႃးၵဵပ်းၶွၼ်ႇၼႆၵေႃႈ ၸႅင်ႈပၼ်ၸဝ်ႈၶွမ်ႊပၼီႊၶုတ်းၶမ်းႁေ ၊ ပေႃးဝႃႈ သိုၵ်းမၢၼ်ႈမႃး ဢမ်ႇၼၼ် ၽူႈယႂ်ႇၵူၼ်းလူင် ၼႂ်း ၵူႈႁွင်ႈၵၢၼ် (ဌာနဆိုင်ရာ) မႃးၼႆ ပွင်ႇၶၢဝ်ႇပၼ်ၵူၼ်းၶုတ်းၶမ်းၶဝ် ႁႂ်ႈဢဝ် ၵႃးဝူၵ်း ၊ ၶိူင်ႈမႆႉၶိူင်ႈမိုဝ်းဢၼ်ၶုတ်းၶမ်းၶဝ် လၵ်ႉသူင်ႇဝႆႉ ၸိူဝ်းၼႆႉၵူၺ်း။

တူၺ်းပိူင်ပဵၼ်ၸိူဝ်းၼႆႉသေ ႁွင်ႈၵၢၼ် ၶႃႈႁၢပ်ႇၵၢၼ်ၶုၼ်ၵေႃႈ သိုၵ်းမၢၼ်ႈပွႆႇလူမ်လၢမ်ဝႆႉသေ ၶႂ်ႈႁဵတ်းသင် ၵေႃႈႁဵတ်း။ ၸၼ်ႉပႃႈၼိူဝ်ၵေႃႈ တင်ႈႁူဝ်ၶေႃႈဝႃႈ လူင်းၵူတ်ႇထတ်းပိုၼ်ႉတီႈၼႆသေတႃႉ လူင်းၵူတ်ႇ ထတ်း တီႈ ဢၼ်ဢမ်ႇၸႂ်ႈတီႈၶုတ်းၶမ်းၵူၺ်း ၊ ပေႃးဝႃႈပဵၼ်တီႈၶုတ်းမၼ်းတႄႉတႄႉသမ်ႉ ဢဝ်သိူင်ႇ ဢဝ်မႅပ်း လူင်ႈၼႃႈသေ ၸင်ႇလူင်းၵူတ်ႇထတ်း ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

ဢွင်ႈတီႈ ၶုတ်းၶမ်းၸိူဝ်းၼႆႉ ၵမ်ႈၼမ် သမ်ႉၸႂ်ႉ ယႃၶမ်ႊမီႊၶိူဝ်ႊၼမ် ၸဵမ်ဢဝ် ၼမ်ႉၸိုၼ်း ၊ ၼမ်ႉမႃႇၵျူႇရီႇ ၊ မႅၵ်ႊၼိသ်ႉ လႄႈ ၵႅတ်ႉမီႊယမ်ႊ ၊ သႆႊယႃႊၼၢႆႉ ၸိူဝ်းၼႆႉ။ ထၢတ်ႈၸိူဝ်းၼႆႉ ပဵၼ်ၵွင်ႉငူၼ်ႉ ႁဵတ်းႁႂ်ႈ တူဝ်မီး ၸႂ်တင်းလၢႆ မိူဝ်ႇလႄႈပဵၼ်ၽေးလႆႈ။ သင်ဝႃႈ ၵိၼ်မႅၼ်ႈ ၊ တိူဝ်ႉမႅၼ်ႈၵေႃႈ မီးၽေးတေႃႇ တူဝ်လႄႈ တင်းၸႂ် ။

ယွၼ်ႉၼမ်ႉၵွင်ႉၼမ်ႉငူၼ်ႉၸိူဝ်းၼၼ်ႉ လႆႈသူႇၸူးတီႈတႅမ်ႇ လႆၶဝ်ၸွမ်းသူၼ်ၸွမ်းဝၢၼ်ႈလႄႈ ၵူၼ်းၸိူဝ်း ယူႇၵိၼ်ထင်သဝ်းၸိူဝ်းၼၼ်ႉ ႁိုဝ်တေလွတ်ႈ။ ပႃးၸဵမ် တူဝ်မီးၼႂ်းၼမ်ႉ ၵုင်ႈႁွႆပူပႃၸိူဝ်းၼႆႉ ၸမ်မူၺ်ႉ ၸမ်ႁၢႆ မူတ်းယဝ်ႉၼႆ ၵူၼ်းပူႇတႂ်းၵေႃႉၼိုင်ႈလၢတ်ႈ။

သိုၵ်းၶၢင် KIA  ၊ ၸုမ်း ပျီႇတူႉၸိတ်ႉ ၊ ၸုမ်းသိုၵ်းမၢၼ်ႈ ပႃးၸဵမ် ၶႃႈႁၢပ်ႇၵၢၼ်ၶုၼ်တႂ်ႈၶဝ် ၵဵပ်းၶွၼ်ႇၼႆႉ ၼိုင်ႈပီလႂ်  ၵႃးဝူၵ်း ၼိုင်ႈလမ်း  –  90 သႅၼ်ပျႃး ၊ ၶွၼ်ႇၵူၼ်းၵိၼ်ၸၢင်ႈၶုတ်းၶမ်း ၼိုင်ႈၵေႃႉလႂ် ဢဝ် 5 မိုၼ်ႇ ၼႆၸိူဝ်းၼႆႉ – လိူဝ်ၼႆႉၵေႃႈၶဝ်ၵဵပ်း ၵွပ်ႈဢမ်ႇမီးၽႂ်ထတ်းၽႂ်ၵုမ်း ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

ၵွပ်ႈလႆႈပၼ်ၶွၼ်ႇလၢႆပႃႈလၢႆၾၢႆႇၼမ်ၼႃႇဢႃးလႃးလႄႈ ၶွမ်ႊပၼီႊၶုတ်းၶမ်းၵေႃႈ ၼင်ႇႁိုဝ်တေၵိုင်ႇၵႃႈ မၼ်းၼၼ်ႉ ၵႃႈမီးၵႃႈၶုတ်း  ထိုင်တီႈဢမ်ႇတၼ်းဝူၼ်ႉ တေႃႇသိင်ႇဝႅတ်ႉလွမ်ႉလႄႈ ၵူၼ်းဝၢၼ်ႈၵူၼ်းမိူင်း လႄႈတူဝ်မီးၸႂ်တင်းသဵင်ႈ ။

ၸုမ်းႁၵ်ႉသႃသိင်ႇဝႅတ်ႉလွမ်ႉ ပွတ်းတၢင်းပူႇတႂ်းၼႆႉ မီးၸုမ်းမၼ်းဝႆႉယူႇသေတႃႉ ဢမ်ႇၸၢင်ႈဢွၵ်ႇသဵင် သင်လႆႈတႄႉတႄႉ။ ၽႂ်မီးဢႃႇၼႃႇၵေႃႈ မၼ်းပေႉပုၼ်ႈဝႆႉလႄႈ ၸုမ်းတူင်ႇၵူၼ်း ဢၼ်ပႂ်ႉတူၺ်း သုၼ်ႇလႆႈ ၵူၼ်းၵေႃႈ ဢမ်ႇၸၢင်ႈၶိုင်သင်။

ယိင်ႈဝၢၼ်ႈမိူင်းဢမ်ႇမီးပၵ်းမီးပိူင် ၵူၼ်းမိူင်းထူပ်းၽေးဢိုပ်းၽေးယၢၵ်ႈယိင်ႈၼမ်မႃး ။ ၼင်ႇႁိုဝ်တေယူႇ လွတ်ႈၼၼ်ႉ ၵူၼ်းပူႇတႂ်းၸိူဝ်းယူႇၸွမ်းဝၢၼ်ႈၼွၵ်ႈၼႃးပၢင်ႇ ၶၢႆတီႈႁိူၼ်းတီႈသူၼ် တီႈၼႃးၸဝ်ႈၵဝ်ႇသေ ပၢႆႈၵႂႃႇတင်ႈတူဝ်တၢင်ႇတီႈ။

မၢင်ၸိူဝ်းဢမ်ႇၶႂ်ႈပၢႆႈသေတႃႉ ၶၢတ်ႈပၼ်ၶွမ်ႊပၼီႊ ၶုတ်းၶမ်းၸူဝ်ႈၵႅပ်ႉသေ ၶၢႆႉယူႇၶိုၼ်းတီႈၵဝ်ႇ။ ႁွႆးၶုတ်း ၶမ်းယင်းပႆႇႁၢႆ ၶဝ်ႈယူႇၶိုၼ်းလႄႈ ထူပ်းၽေးလိၼ်လူမ်ႇထႅင်ႈ ။ ဢၼ်လူႉတၢႆၵေႃႈမီးမႃးၼမ် ။

မၢင်ၸိူဝ်း ဢမ်ႇတွၼ်ႉလႆႈၸႂ်ႉၸၢႆႇငိုၼ်းၼမ်လႄႈ  မိူဝ်ႈၶၢႆလွၵ်းလိၼ်သူၼ်ၼႃးသေ လႆႈငိုၼ်းမႃးၼပ်ႉႁူဝ် ႁဵင်သႅၼ်ၼၼ်ႉ သိုဝ်ႉရူတ်ႉသိုဝ်ႉၵႃးၶီႇလူၺ်ႈဢမ်ႇမီးပၵ်းမီးပိူင် ၊ သဵၼ်ႈတၢင်းၵေႃႈ ဢမ်ႇလီလႄႈ ဢၼ်တၢႆ ၸွမ်းၽေးၵိုင်ႉၵၢင်ႉမီးတင်းၼမ်။

ၽွၼ်းယွၼ်ႈဢၼ် ၵၢၼ်ၶုတ်းၶမ်းမီးၼမ်မႃးၼႆႉ သိင်ႇဝႅတ်ႉလွမ်ႉၵေႃႈလူႉ ၊ ၾိင်ႈယၢမ်ႈၵူၼ်းၵေႃႈလူႉ ။ သတ်းၼႂ်းၼမ်ႉၼိူဝ်လွႆၵေႃႈမူၺ်ႉ လႄႈ သင်ဝႃႈ ၶုၼ်မိူင်းမိူၵ်ႈတေယိုၼ်းယၢဝ်းၵႂႃႇထႅင်ႈၶၢဝ်းႁိုင်တႄႉ ၽေးၸိူဝ်းၼႆႉ တေလၢမ်းထိုင်ၼႂ်းမိူင်းႁူမ်ႈတုမ်ပတ်းပိုၼ်ႉ ဢမ်ႇႁၢင်ႉ။