တႄႇႁူဝ်လိူၼ်သႅပ်ႊထႅမ်ႊပိူဝ်ႊၼႆႉမႃး သိုၵ်းတဢၢင်း TNLA ႁဵတ်းလိၵ်ႈဢွၵ်ႇ ပိုၼ်ၽၢဝ်ႇပူၵ်းပၢႆႉၸွမ်းၼႂ်းၵၢင်ဝဵင်းၼမ်ႉၶမ်း ႁႂ်ႈၵူၼ်းမိူင်း ဝဵင်းၼမ်ႉၶမ်း ၵႂႃႇႁဵတ်းမၢႆၾၢင် ရူတ်ႉၵႃး ၊ လိူဝ်ၼၼ်ႉ ၵဵပ်းပႃးၶွၼ်ႇၵၢၼ်ၵႃႉၶၢႆ လႄႈ ၵူႈလွင်ႈလွင်ႈ တီႈၵူၼ်းမိူင်း ဢမ်ႇလိူဝ်သေၵူၼ်းၶီႇရူတ်ႉၶိူင်ႈၶၢႆၽၵ်းၵူၺ်းၵေႃႈ ပႂ်ႉၵဵပ်းၶွၼ်ႇပႃးလႄႈၵူၼ်းမိူင်းၶၢင်းပွင်ႉဝႃႈၵိၼ်းၸႂ်။
မိူဝ်ႈၼႆႉ ဝၼ်းတီႈ 22 /09/2025 သိုၵ်းတဢၢင်း TNLA ၵူတ်ႇထတ်းရူတ်ႉၵႃး ၸိူဝ်းဢမ်ႇပႆႇႁဵတ်းဝႂ်လၢႆႊသိၼ်ႊ ၸွမ်းၼင်ႇ ၸဝ်ႈၼႃႈတီႈၵဵဝ်ႇၶွင်ႈတႂ်ႈ သိုၵ်းတဢၢင်း ၸီႉသင်ႇဢွၵ်ႇၶေႃႈပူင်ဝႆႉၼၼ်ႉၼႆ ၵူၼ်းမိူင်းၵေႃႉယူႇဝႆႉၼႂ်းဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ လၢႆႊသိၼ်ႊၵႃးၼႆႉၶဝ်ၵူတ်ႇထတ်းတီႈ တိၼ်လွႆႁူင်းယႃၼမ်ႉၶမ်း၊ လၢတ်ႈဝႃႈ ပေႃးပႆႇလႆႈႁဵတ်းၵေႃႈ ႁႂ်ႈၵႂႃႇႁဵတ်းဝႆးဝႆး။ မိူဝ်ႈၼႆႉၶဝ်တိုၵ်ႉပႂ်ႉၵူတ်ႇထတ်းလၢႆလၢႆၵွႆး။ ပႆႇၺွပ်း။ မိူဝ်ႈလဵဝ် ၵူၼ်းၶၢႆဝၢၼ်ႇၽိုၼ်းဢုၼ်ႇ တၢင်ႇသၢမ်လေႃႉၶၢႆယူႇၸွမ်းတၢင်း ၼၼ်ႉၵေႃႈ တေလႆႈသႂၢင်းၶွၼ်ႇ ဝႃႈ။ ဝၼ်းတီႈ 19 ၼႆႉ ၶဝ်မႃးယူႇတီႈၵၢင်ဝဵင်းသေ ပႂ်ႉယိုၼ်ႈပၼ် လိၵ်ႈပွင်ႇၶၢဝ်ႇၶဝ် ၼၼ်ႉႁႂ်ႈၵႂႃႇႁဵတ်း တီႈလုမ်းၸီႇပိၼ်ႇ။”
လႆႈႁူႉဝႃႈ ၵူၼ်းၶီႇရူတ်ႉၶိူင်ႈ လႄႇႁႃၶၢႆၽၵ်းၸွမ်းၵိဝ်ႇ လႆႈပၼ်ၶွၼ်ႇတီႈ သိုၵ်းတဢၢင်း ၼိုင်ႈၵေႃႉလႂ် 15000 ပျႃး၊ ၸိူဝ်းပဵၼ်ရူတ်ႉၵႃး သင်ႇၶ လႄႈ ၸုမ်းတူင်ႇဝူင်းၵူၼ်း မိူၼ်ၼင်ႇ ပရႁိတ၊ ရူတ်ႉၵႃးၸိူဝ်းမီးဝႆႉဝႂ်ၶွၼ်ႇပဵၼ်တၢင်းၵၢၼ် တီႈလူင်ပွင်ၸိုင်ႈသိုၵ်းမၢၼ်ႈ ၼၼ်ႉၵေႃႈ တိုၼ်းတေလႆႈၵႂႃႇႁဵတ်းဝႂ်လၢႆႊသိၼ်ႊဢၼ်ၸုမ်းသိုၵ်းတဢၢင်း ၶိုင်ပွင်ႁဵတ်းပၼ်ၼၼ်ႉ ၼႆယဝ်ႉ။
ဝၢႆးလင်ပၢင်တိုၵ်း ၽႅၼ်ယၼ်ႇသိုၵ်း 1027 မႃး ၼႂ်းမိူင်းတႆးပွတ်းႁွင်ႇလၢႆလၢႆၸႄႈဝဵင်း ၸုမ်းသိုၵ်းၵဝ်ႈၵၢင်ႉ၊ ၸုမ်းသိုၵ်းတဢၢင်း လႄႈ ၸုမ်းသိုၵ်းဢူၺ်းလီၶဝ်လၢႆလၢႆၸုမ်းႁူမ်ႈၵၼ်ၵုမ်းၵမ်ဝႆႉ။
ၸႄႈဝဵင်းၵျွၵ်ႉမႄး၊ သီႇပေႃႉ၊ ၼမ်ႉတူႈ၊ ၼမ်ႉၶမ်း ၸိူဝ်းပဵၼ်ၸုမ်းသိုၵ်းတဢၢင်းၵုမ်းၵမ် လႄႈ ၸႄႈဝဵင်းသႅၼ်ဝီ၊ ၼမ်ႉပွင်ႈ၊ ႁူဝ်ယ၊ မိူင်းၵူဝ်း ၊ လၢဝ်ႇၵၢႆးၸိူဝ်းပဵၼ်ၼႃႈတီႈၸုမ်းသိုၵ်းၵဝ်ႈၵၢင်ႉၵုမ်းၵမ်ဝႆႉၼၼ်ႉ သိုၵ်းတင်းသွင်ၸုမ်း တဵၵ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉ တီႈၵႂႃႇႁဵတ်းမၢႆၾၢင်၊ ဝႂ်မုင်ႉႁေႃႁိူၼ်း လႄႈ ဝႂ်လၢႆႊသိၼ်ႊရူတ်ႉၵႃး ဢိၵ်ႇၵႃး ႁႂ်ႈသႂ်ႇၶွၼ်ႇၵူႈလွင်ႈလွင်ႈထႅင်ႈ။
တႃႇႁဵတ်းဝႂ်လၢႆႊသိၼ်ႊ၊ ဝႂ်မုင်ႉႁေႃႁိူၼ်း၊ မၢႆၾၢင်ၸိူဝ်းၼႆႉ သိုၵ်းတင်းသွင်ၸုမ်း ဢမ်ႇႁဵတ်းပၼ်လၢႆလၢႆသေ ၵဵပ်းငိုၼ်းတီႈၵူၼ်းမိူင်းလႄႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်ၵႃႈၸႂ်ႉၸၢႆႇပႃးထႅင်ႈ ။
ယွၼ်ႉၸုမ်းယိပ်းၵွင်ႈၵၢင်ႇ တဵၵ်းၸႂ်ႉႁဵတ်းဝႂ်ၵူႈလွင်ႈလွင်ႈၸုမ်းၽႂ်ၸုမ်းမၼ်းယူႇတိၵ်းတိၵ်းလႄႈ ယၢမ်းလဵဝ် ၵူၼ်းၼႂ်းမိူင်းတႆးပွတ်း ႁွင်ႇ ႁူပ်ႉတၢင်းယၢပ်ႇႁၢဝ်ႈႁႅင်း ၼႂ်းၶၵ်ႉၵၢၼ်ဢွၵ်ႇၶၢဝ်းတၢင်း ဝႃႈၼႆ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ