သင်ဢမေႊရိၵၼ်ႊ ၵိုတ်းလွင်ႈတုၵ်းယွၼ်း ႁႂ်ႈၶူဝ်ႊရီႊယိူဝ်ႊႁွင်ႇ ပွႆႇၽႃႈပႅတ်ႈ လွင်ႈၶိူင်ႈယိပ်းၵွင်ႈၵၢင်ႇ ၶိူင်ႈၼိဝ်ႊၶလီႊယႃႊၼၼ်ႉၸိုင် ၶူဝ်ႊရီႊယိူဝ်ႊႁွင်ႇ တိုၼ်းတူဝ်ႈတၼ်းဝႆႉ တႃႇဢုပ်ႇၵုမ်ၵၼ်တင်း ဢမေႊ ရိၵၼ်ႊယူႇ ဝႃႈၼႆ။
ၽူႈဢွၼ်ႁူဝ် မိူင်းၶူဝ်ႊရီႊယိူဝ်ႊႁွင်ႇ ၶိမ်ႊၵျွင်ႊဢိုၼ်ႊ Kim Jong Un လၢတ်ႈဝႃႈ – တႃႇမိူင်းၶူဝ်ႊရီႊယိူဝ်ႊႁွင်ႇ တေပူၼ်ႉ လွတ်ႈ လွင်ႈပိၵ်ႉဢိုတ်းႁႅတ်ႉႁၢမ်ႈၼၼ်ႉ တိုၼ်းတေဢမ်ႇဢဝ်ၶိူင်ႈၼိဝ်ႊၶလီႊယႃႊ ႁဵတ်းၶေႃႈလႅၵ်ႈလၢႆႈ -ဝႃႈၼႆ။
ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ တင်း ၽူႈဢွၼ်ႁူဝ် မိူင်းၶူဝ်ႊရီႊယိူဝ်ႊႁွင်ႇၼႆႉ ယၢမ်ႈႁူပ်ႉထူပ်းဢုပ်ႇၵုမ်ၵၼ် 3 ပွၵ်ႈ ၼႂ်းပၢၼ်တေႃႊၼႄႊလ်ထရမ်ႉ ပဵၼ်ၸွမ်ၸိုင်ႈမိူင်းဢမေႊရိၵၼ်ႊ ၵမ်းထူၼ်ႈၼိုင်ႈ။
မိူဝ်ႈၽွင်းမီးၶေႃႈတိုၵ်းသူၼ်း ႁႂ်ႈၸွမ်ၸိုင်ႈမိူင်းဢမေႊရိၵၼ်ႊ ဢွၼ်ႁူဝ်သေ ငူပ်ႉငီႉပၼ် ႁႂ်ႈၸုမ်းလူင်ပွင် ၸိုင်ႈမႂ်ႇ မိူင်းၶူဝ်ႊရီႊယိူဝ်ႊၸၢၼ်းလႄႈတင်း ၽူႈဢွၼ်ႁူဝ် မိူင်းၶူဝ်ႊရီႊယိူဝ်ႊႁွင်ႇ ႁူပ်ႉဢုပ်ႇၵၼ်ယူႇၼႆႉ Kim Jong Un ၸင်ႇလၢတ်ႈဢွၵ်ႇမႃးၼင်ႇၼႆ။
မိူဝ်ႈၽွင်း မိူင်းၶူဝ်ႊရီႊယိူဝ်ႊႁွင်ႇ လႆႈၺႃး မိူင်းၶူဝ်ႊရီႊယိူဝ်ႊၸၢၼ်း တင်း မိူင်းဢမေႊရိၵၼ်ႊ လွၵ်ႇငိုတ်ႈ တေႃႇ လွင်ႈႁူမ်ႇလူမ်ႈယူႇၼႆႉ တႃႇၵႅတ်ႇၶႄႁႄႉၵင်ႈဝၢၼ်ႈမိူင်းလႆႈၼၼ်ႉ ၶိူင်ႈၼိဝ်ႊၶလီႊယႃႊပဵၼ် ဢၼ်လမ်ႇလွင်ႈလိူဝ်ႁႅင်း – ၽူႈဢွၼ်ႁူဝ် မိူင်းၶူဝ်ႊရီႊယိူဝ်ႊႁွင်ႇ လၢတ်ႈၵႂႃႇၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ