ၵူၼ်းပၢႆႈၽေးသိုၵ်း ဝၢၼ်ႈၼွင်ပဵတ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယဵပ်ႇၺႃးမၢၵ်ႇ ၽွင်းပွၵ်ႈမိူဝ်းႁိူၼ်း လႆႈလူႉသုမ်း တိၼ်ၶႂႃ ယၢမ်းလဵဝ် လူဝ်ႇတင်းၸွႆႈထႅမ် တႃႇယူတ်းယႃတူဝ်ဝႆႉ ဝႃႈၼႆ ။
ၼႂ်းဝၼ်းတီႈ 18/9/2025 ယၢမ်းၵၢင်ၼႂ် ပီႈၵျေႃႇတဵင်း ဢႃယု40 ၵူၼ်းဝၢၼ်ႈၼွင်ပဵတ်း ပွၵ်ႈမိူဝ်း ၸႂ်းႁိူၼ်းမိူဝ်းယဵပ်ႇၺႃးမၢၵ်ႇ တၢင်းၼႃႈႁိူၼ်းၸဝ်ႈၵဝ်ႇသေ တိၼ်ပုတ်းၵႂႃႇ ၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၽွင်းယဵပ်ႇၺႃးမၢၵ်ႇၼၼ်ႉတႄႉ ႁွင်ႉဢဝ် ၵူၼ်းဝၢၼ်ႈၶၢႆးလူင် ဢဝ်ရူတ်ႉၶိူင်ႈၵႂႃႇသူင်ႇ ( ဘေးတွဲဆိုင်ကယ် ) တီႈႁူင်းယႃ ပၢင်လႃႈ တလဵဝ်ၼႆႉ လူဝ်ႇတင်းၸွႆႈထႅမ်တႃႇယူတ်းယႃတူဝ်ဝႆႉ ”- ဝႃႈၼႆ ။
ယၢမ်းလဵဝ် ပီႈၵျေႃႇတဵင်း ၵေႃႉယဵပ်ႇၺႃးမၢၵ်ႇ ယူတ်းယႃႇတူဝ်ဝႆႉတီႈ ႁူင်းယႃ ဢၼ်မီးဝႆႉၼႂ်းဝဵင်းပၢင်လႃႈ ။ လိူဝ်ၼၼ်ႉၵူၼ်းပၢႆႈၽေးသိုၵ်းၸိူဝ်းပၢႆႈမႃးၸွမ်းၵေႃႈယၢမ်းလဵဝ် လူဝ်ႇတင်းၸွႆႈထႅမ်ႈၶဝ်ႈၼမ်ႉတင်းၵိၼ် ၼႆယဝ်ႉ ။
ၽွင်းပၢင်တိုၵ်းၼႂ်းၵႄႈသိုၵ်းမၢၼ်ႈတင်းသိုၵ်းတဢၢင်း TNLA ယဵၼ်ၼႆႉ တီႈၼႂ်းဝၢၼ်ႈၼွင်ပဵတ်းၼၼ်ႉ သိုၵ်းမၢၼ်ႈၸႂ်ႉ ၵူၼ်းပၢႆႈၽေးသိုၵ်းၸိူဝ်းယူႇဝႆႉ ၼႂ်းသူၼ်ၼႂ်းထိူၼ်ႇ ပွၵ်ႈမိူဝ်းၶိုၼ်းႁိူၼ်းၽႂ်မၼ်း ။
ၽွင်းၼၼ်ႉ ၵူၼ်းပၢႆႈၽေးသိုၵ်းဢၼ်ယူႇဝႆႉၼႂ်းထိူၼ်ႇ မုင်ႉႁေႃႁိူၼ်း 25 လင် ဢွၼ်ၵၼ်ပွၵ်ႈမိူဝ်းၶိုၼ်း ၼႂ်းဝၢၼ်ႈၼွင်ပဵတ်းသေ ပီႈၵျေႃႇတဵင်းယဵပ်ႇၺႃးမၢၵ်ႇလႄႈ ၵူၼ်းဝၢၼ်ႈဢွၼ်ၵၼ် ငိူင်ႉပၢႆႈၽေးသိုၵ်းၶိုၼ်းၼႆယဝ်ႉ ။
မိူၼ်ၼင်ႇၼႆ ၼႂ်းဝၼ်းတီႈ 17/9/2025 ပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်းသိုပ်ႇပဵၼ်ႁၢဝ်ႈႁႅင်း တီႈတၢင်းဝၢၼ်ႈၶၢႆးလူင် ။ ၽွင်းပၢင်တိုၵ်းၼၼ်ႉ လုင်းထုၼ်းၸိင်ႇ ဢႃႇယု 50 ပၢႆ ၺႃးယိုဝ်းတီႈတွင်ႉ လူႉတၢႆၵႂႃႇ တီႈႁူင်းယႃႇဝဵင်းတီႈပၢင်ဢူႈ ( ပြင်ဉီးလွင်) ၽွင်းယူတ်းယႃတူဝ်ဝႆႉ- ၼႆယဝ်ႉ ။
ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇမႃး ၼႂ်းၶၢဝ်းတၢင်း 4 ပီၼႆႉ မီးပၼ်ႁႃပၢင်တိုၵ်းမႃးႁၢဝ်ႈႁႅင်းလႄႈ ၵူၼ်းမိူင်း ၸိူဝ်းလူဝ်ႇတၢင်းၸွႆႈထႅမ်ၵေႃႈ ၼမ်ၶိုၼ်ႈမႃး။
မိူင်းမၢၼ်ႈၼႆႉ ပဵၼ်မိူင်းမီးၵူၼ်းလူႉတၢႆ ယွၼ်ႉမၢၵ်ႇမႅင်းၾင်လိၼ်လႄႈ ၶိူင်ႈၵွင်ႈၵၢင်ႇ ၸိူဝ်းၸၢင်ႈ တႅၵ်ႇ ၼမ်လိူဝ်ပိူၼ်ႈသုတ်း ၼႂ်းလုမ်ႈၾႃႉ။ ၼႂ်းၶၢဝ်းတၢင်း 4 ပီၵူၺ်း ၵူၼ်းတၢႆယွၼ်ႉမၢၵ်ႇမႅင်းၾင်လိၼ်ၼႆႉမီးထိုင် 2998 ၵေႃႉယဝ်ႉ ၊ ၽတ်ႉၽဵင်ႇမီးၵူၼ်းတၢႆယွၼ်ႉမၢၵ်ႇမႅင်းၾင်လိၼ်ၼိုင်ႈဝၼ်း 2 ၵေႃႉၼႆ – UNOCHA ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 19/02/2025 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ