ဝၢႆးလင်ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းတဢၢင်း TNLA ယဵၼ် ၼႂ်းဝၢၼ်ႈၼွင်ပဵတ်း ထုင်ႉၼွင်ပိင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ၾၢႆႇတင်းသိုၵ်းမၢၼ်ႈ ၸႂ်ႉ ၵူၼ်းပၢႆႈၽေးသိုၵ်းၸိူဝ်းယူႇဝႆႉ ၼႂ်းသူၼ်ၼႂ်းထိူၼ်ႇ ပွၵ်ႈမိူဝ်းၶိုၼ်းႁိူၼ်းၽႂ်မၼ်း  ။ 

 မိူဝ်ႈဝႃးဝၼ်းတီႈ 18/9/2025 ယၢမ်းၵၢင်ၼႂ် ၵူၼ်းပၢႆႈၽေးသိုၵ်း ဝၢၼ်ႈၼွင်ပဵတ်း   25 လင်ၶႃးႁိူၼ်းပွၵ်ႈၶိုၼ်းဝၢၼ်ႈၽႂ်မၼ်း ။  ၽွင်းၵူၼ်းပၢႆႈၽေးသိုၵ်း ပွၵ်ႈမိူဝ်းႁိူၼ်းၼၼ်ႉ ပီႈၵျေႃႇတဵင်း ဢႃယု 30 ပၢႆ  ၵူၼ်းဝၢၼ်ႈၼွင်ပဵတ်း ယဵပ်ႇၺႃးမၢၵ်ႇ တၢင်းၼႃႈႁိူၼ်းၼၼ်ႉသေ ၶႃပုတ်းၵႂႃႇ ဝႃႈၼႆ ။

ၽွင်းၺႃးမၢၵ်ႇၼၼ်ႉ ၾၢႆႇတင်းသိုၵ်းမၢၼ်ႈ မႃးႁွင်ႉၵႂႃႇတီႈ ဝၢၼ်ႈၶၢႆးလူင် လိူတ်ႈဢွၵ်ႇၼမ်လူၼ်ႉသေ လႆႈလူႉတၢႆၵႂႃႇ ယၢမ်းဝၢႆးဝၼ်း 4 မူင်းၼႆႉဝႃႈၼႆ ။

ၼၢင်းယိင်းဢႃယု 30 ပၢႆ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးၼႆႉ ၶဝ်(သိုၵ်းမၢၼ်ႈ )လၢတ်ႈဝႃႈ ၵူၼ်းယူႇၼႂ်းသူၼ်ပွၵ်ႈမိူဝ်းႁိူၼ်းၶိုၼ်းလႆႈယဝ်ႉၼႆလႄႈ ဢွၼ်ၵၼ်ပွၵ်ႈမိူဝ်းၶိုၼ်း ၊ ၽွင်းၵူၼ်းဝၢၼ်ႈပွၵ်ႈမိူဝ်းႁိူၼ်းၼၼ်ႉ  ယဵပ်ႇၺႃးမၢၵ်ႇၼႃႈႁိူၼ်း ၶႃပုတ်းၵႂႃႇ ဢမ်ႇၸၢင်ႈသူင်ႇယူတ်းယႃတီႈလႂ် ”- ဝႃႈၼႆ ။

လိူဝ်ၼၼ်ႉ ၼႂ်းဝၼ်းတီႈ 17 /9/2025 ပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်းသိုပ်ႇပဵၼ်ႁၢဝ်ႈႁႅင်း တီႈတၢင်းဝၢၼ်ႈၶၢႆးလူင် ။ ၽွင်းပၢင်တိုၵ်းၼၼ်ႉၵူၼ်းဝၢၼ်ႈၶၢႆးလူင်  ၺႃးယိုဝ်းလူႉတၢႆၵႂႃႇ ၵေႃႉၼိုင်ႈ   ။

ၵေႃႉထုၵ်ႇၺႃးယိုဝ်းၼၼ်ႉ ၸိုဝ်ႈႁွင်ႉ လုင်းထုၼ်းၸိင်ႇ  ဢႃႇယု 50 ပၢႆ ။  ၺႃးယိုဝ်းတီႈတွင်ႉ လူႉတၢႆၵႂႃႇ တီႈႁူင်းယႃႇဝဵင်းတီႈပၢင်ဢူႈ ( ပြင်ဉီးလွင်) ၽွင်းယူတ်းယႃတူဝ်ဝႆႉ- ၼႆယဝ်ႉ ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“မိူဝ်ႈၼႆႉပၢင်တိုၵ်းယဵၼ်ဝႆႉ တင်းၶၢႆးလူင်ၼႆႉသေတႃႉ ၊ ပဵၼ်တင်းဝၢၼ်ႈၼမ်ႉသေႃး ၊ ၵူၼ်းမိူင်းယူႇၼႂ်းႁိူၼ်းၵေႃႈ ဢမ်ႇမီးလွင်ႈႁူမ်ႇလူမ်ႈ ပၢႆႈယူႇၼႂ်းထိူၼ်ႇၵေႃႈ ဢမ်ႇႁူမ်ႇလူမ်ႈ ၊ ဢမ်ႇမီးလွင်ႈႁူမ်ႇလူမ်ႈသင် ”- ဝႃႈၼႆ ။

ၽွင်းၵူၼ်းဝၢၼ်ႈပၢႆႈၽေးသိုၵ်းယူႇၼၼ်ႉ သိုၵ်းမၢၼ်ႈၶဝ်ႈသွၵ်ႈတဝ်ႁိူၼ်းယေးၵူၼ်းမိူင်း ၼႂ်းဝၢၼ်ႈၼႂ်းႁိူၼ်းသေ ဢဝ် ၵႃး ၊ ထေႃႈ ၶူဝ်းၶွင်ႁိူၼ်းယေးၵူၼ်းပိုၼ်ႉတီႈၵႂႃႇ ဢမ်ႇၵိုတ်းလိူဝ်သင် ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၶူဝ်းၶွင် ၵူၼ်းမိူင်းတႄႉ ဢမ်ႇၵိုတ်းသင်ယဝ်ႉ ၊ ဢဝ်ၵႂႃႇမူတ်း ၊ ၵႃး  ၊ ထေႃႈၸိူဝ်းၼႆႉၵေႃႈ ဢဝ်ၵႂႃႇ  ၊ ပေႃးပွၵ်ႈမိူဝ်းႁိူၼ်းၼႆႉ မၢင်ၸိူဝ်း မီးႁိူၼ်းၵေႃႈ ၶူဝ်းႁိူၼ်းၶူဝ်းယေး ၼႆႉဢမ်ႇၵိုတ်းသင် ၊ မၢင်ၸိူဝ်း ႁိူၼ်းၵေႃႈဢမ်ႇမီး ထုၵ်ႇၾႆးမႆႈ ဢမ်ႇၸၢင်ႈၵႂႃႇယူႇတီႈလႂ် ၵူၼ်းပိုၼ်ႉတီႈယၢပ်ႇၵိၼ်းၸႂ်ၼႃႇ”- ဝႃႈၼႆ ။

ဝၢၼ်ႈဢၼ်သိုၵ်းမၢၼ်ႈၶဝ်ႈတဝ်ဢဝ်ၶူဝ်းႁိူၼ်း ၶူဝ်းယေးၵႂႃႇၼၼ်ႉပဵၼ်ဝၢၼ်ႈ ၼွင်ပိင် ၊ ပၢင်ပဝ်း ၊ ၼွင်ပဵတ်း ၊ ၵျွင်းၵုင်း ၊ မၢၼ်ႈၵွင်း ၊ ပၢင်ႇတိုင် ၊ ပၢင်မၢၵ်ႇၶေႃ ၊ လုၵ်းပႃ ၸိူဝ်းၼၼ်ႉၼႆယဝ်ႉ – ၵူၼ်းပိုၼ်ႉတီႈလၢတ်ႈ ။

တႄႇႁၢင်လိူၼ် ဢေႃႊၵတ်ႉသ် ၼႆႉမႃး သိုၵ်းမၢၼ်ႈႁႅၼ်းသိုၵ်းၶဝ်ႈဝၢၼ်ႈၵျွင်းၵုင်း  ယူႇၼႂ်းဝၢၼ်ႈသေပႂ်ႉ တၢင်းၶဝ်ႈ/ဢွၵ်ႇဝၢၼ်ႈ ၵူတ်ႇထတ်းထဵတ်ႈထၢမ်ၵူၼ်းမိူင်း ။ ႁဵတ်းႁႂ်ႈၵူၼ်းပိုၼ်ႉတီႈ 100 ပၢႆ  ၶမ်ဝႆႉၼႂ်းဝၢၼ်ႈ ဢမ်ႇၸၢင်ႈ ၶဝ်ႈဢွၵ်ႇ  လူဝ်ႇတၢင်းၸွႆႈထႅမ်ၶဝ်ႈၼမ်ႉတင်းၵိၼ်ဝႆႉႁၢဝ်ႈႁႅင်းဝႆႉ ထိုင်ဝၼ်းမိူဝ်ႈၼႆႉ   ။

ပေႃးတေလႆႈၵႂႃႇၼႂ်းသူၼ်ၼႂ်းႁႆႈ ၊ ၼႂ်းယုမ်းၸိူဝ်းၼႆႉၼႆၸိုင် ႁႂ်ႈၾၢင်ႉသတိၵိုၵ်းတူဝ်ဝႆႉတႃႇသေႇ။ ပေႃး ထၢင်ႇထိူမ်ဝႃႈ မီးမၢၵ်ႇမႅင်းၼႆၸိုင်ႇ ယႃႇပေၵႂႃႇၸမ် ၊ ၵႂႃႇတိူဝ်ႉ ၊ ၵႂႃႇယႃႉ ၊ ယႃႇဢဝ်မႆႉၶႄႇ ယႃႇၵႂႃႇတိူဝ်ႉ တွႆႇလႃးလႃး။ ပွႆႇတူဝ်သတ်း မိူၼ်ၼင်ႇ ( မႃ ၊ မႅဝ်း ) ၵႂႃႇၼူမ်ၵႂႃႇတူၺ်းၵေႃႈ ဢမ်ႇၵိုင်ႇလီႁဵတ်း။ တင်းၵူၼ်းတင်းသတ်း တေလႆႈၶတ်းၸႂ်ယဵပ်ႇၶိုၼ်းႁွႆးတိၼ်ၵဝ်ႇသေထွႆလင်သုတ်ႉဢွၵ်ႇႁၢင်ႇယၢၼ်မႃးၵႆၵႆ မွၵ်ႈ 1 ဝႃး ။တႃႇတေပၼ်ၾၢင်ႉၵူၼ်းၸိူဝ်းတေလတ်းၽၢၼ်ႇၵႂႃႇမႃး ႁႂ်ႈပေႃးႁူႉဝႃႈ မီးၽေးမၢၵ်ႇမႅင်းၼၼ်ႉ ႁႂ်ႈႁဵတ်း မိၵ်ႈမၢႆဝႆႉသေဢၼ်ဢၼ်မိူၼ်ၼင်ႇ ပၵ်းလၵ်းႁဵတ်းၶႂၢႆႇၶႃပႄဝႆႉ။ ဢမ်ႇၼၼ် တႅမ်ႈလိၵ်ႈပၼ်ၾၢင်ႉ ဝႆႉသေ ၼႅတ်ႈၵႂႃႇသေႃႇၵႂႃႇလၢတ်ႈၵၢင်ႉၵႄႇလႄႈ ၽူႈမီးပုၼ်ႈၽွၼ်းၾၢႆႇႁူမ်ႇလူမ်ႈ၊ ၵူၼ်းၼႂ်းဝၢၼ်ႈ -ယႃႇႁႂ်ႈၸႂ်ႉသဵၼ်ႈတၢင်းဢၼ်မီးၽေးမၢၵ်ႇမႅင်းၼၼ်ႉ ။