မိူဝ်ႈၼႆႉဝၼ်းတီႈ 18 /09/2025ယၢမ်းၵၢင်ၼႂ် ၶွမ်ႊမတီႊတူဝ်တႅၼ်းသၽႃးမိူင်းႁူမ်ႈတုမ် (CRPH) ၊ ၶွင်ႊသီႊၵိူဝ်းၵုမ် ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ (NUCC) လႄႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ႁူမ်ႈၵၼ် ပိုၼ်ၽၢဝ်ႇဝႃႈ တၢင်းႁဵတ်းသၢင်ႈ ၸုမ်းသိုၵ်းမၢၼ်ႈ လႄႈ ၸုမ်းၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈတင်းသဵင်ႈ ပဵၼ်လၢႆးၵေႃႇၵၢၼ်ႁၢႆႉ ဢမ်ႇၶဝ်ႈတၢင်းၵၢၼ်သေလွင်ႈ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ၸႅင်ႈပႃးဝႆႉဝႃႈ တေဢဝ်လိူင်ႈၸုမ်းသိုၵ်းမၢၼ်ႈ တင်း ၸုမ်းၸိူဝ်း ႁပ်ႉထွမ်ႇၶေႃႈသင်ႇသိုၵ်းမၢၼ်ႈၵႂႃႇ – ၸွင်းၼင်ႇပၵ်းပိူင်ဝၢၼ်ႈမိူင်း ဢၼ်လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈႁဵတ်းဢွၵ်ႇဝႆႉၼၼ်ႉၼႆ ၸုမ်း CRPH ၊NUCC ၊ NUG ပိုၼ်ၽၢဝ်ႇဝႆႉၼင်ႇၼႆ။
“လၢႆးႁဵတ်းတၢင်းသၢင်ႈ ၶွမ်ႊမသျိၼ်ႊသႃႇယႃႇၵတ်းယဵၼ် လႄႈ ၵၢၼ်ႁူမ်ႈလူမ်ႈၸိုင်ႈမိူင်း တင်း ၸုမ်းၸိူဝ်းယူႇတႂ်ႈဢႃႇၼႃႇဢၢမ်း ၼၢတ်ႈၶဝ်တင်းသဵင်ႈၼႆႉ ဢမ်ႇၶဝ်ႈပဵၼ်တၢင်းၵၢၼ်သေလွင်ႈ။ ယူႇတီႈလူင်ပွင်ၸိုင်ႈၵၢၼ်ၽွမ်ႉႁူမ်ႈၸိူဝ်ႉၸၢတ်ႈသေ တေဢဝ်လိူင်ႈ ၵႂႃႇပဵၼ်တၢင်းၵၢၼ် လူၺ်ႈပၵ်းပိူင်ၾိင်ႈမိူင်းၽဵဝ်ႈမူၺ်ႉလွင်ႈၵေႃႇၵၢၼ်ႁၢႆႉ ” ၼႆယဝ်ႉ။
မိူဝ်ႈပီ 2021 လိူၼ်မၢတ်ႉၶျ် ဝၼ်းတီႈ 1 ၼၼ်ႉ ၶွမ်ႊမတီႊတူဝ်တႅၼ်းသၽႃးမိူင်းႁူမ်ႈတုမ် ယၢမ်ႈပိုၼ်ၽၢဝ်ႇဢွၵ်ႇဝႃႈ “ၶွင်ႊသီႊၵၢၼ် ဢုပ်ႉပိူင်ႇၽွင်းငမ်းၸိုင်ႈမိူင်း (ႁိုဝ်) ၸုမ်းသိုၵ်းမၢၼ်ႈယိုတ်းမိူင်း” ၼႆႉ ပဵၼ်ၸုမ်းဢၼ်ၵေႃႇၵၢၼ်ႁၢႆႉသေ ပူၼ်ႉပႅၼ်ၾိင်ႈမိူင်း “တႃႇ ၽဵဝ်ႈမူၺ်ႉၸုမ်းၵေႃႇၵၢၼ်ႁၢႆႉ ၸိူဝ်းပေႉၵိၼ်လူလၢႆတေႃႇၵူၼ်းမိူင်း” ပတ်းပိုၼ်ႉမိူင်းႁူမ်ႈတုမ်တင်းသဵင်ႈယူႇ ၼႆယဝ်ႉ။
လိူဝ်ၼၼ်ႉ မိူဝ်ႈပီႊ 2024 လိူၼ်သႅပ်ႊထႅမ်ႊပိူဝ်ႊ ဝၼ်းတီႈ 5 ၼၼ်ႉၵေႃႈ ၸုမ်းလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ယၢမ်ႈ ဢွၵ်ႇလိၵ်ႈပိုၼ်ၽၢဝ်ႇဢွၵ်ႇ မၵ်းမၼ်ႈဝႃႈ “ၸွမ်ၸိုင်ႈမိူင်းႁူမ်ႈတုမ်ၼႆႉ ပဵၼ်ၽူႈၶဵၼ်တႃႇဝၢၼ်ႈမိူင်း လႄႈ ၵူၼ်းမိူင်း -Enemy of the State” ၼႆဝႆႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ