တႃႈဝၢၼ်ႈမိူင်းၼိုင်ႈလုၵ်ႈ တေယူႇလွတ်ႈလႆႈၼၼ်ႉ ၵၢၼ်ၵႃႉၵၢၼ်ၶၢႆလမ်ႇလွင်ႈတႄႉတႄႉ  ။ တီႈဢၼ်ၵၢၼ်ၵႃႉၶၢႆ ဢွင်ႇမၢၼ်ၼႆႉသမ်ႉပဵၼ်တီႈလႅၼ်လိၼ်။  မိူၼ်ၼင်ႇၽႅၼ်ႇလိၼ်မိူင်းတႆးၼႆႉတိတ်းၸပ်းတင်းမိူင်းၶႄႇ – မိူင်းထႆးလႄႈ ၸင်ႇဝႃႈ ပဵၼ်တီႈငိုၼ်းၶဝ်ႈၼမ်သုတ်းၼႂ်းၸိုင်ႈမိူင်း။ ၸုမ်းယိပ်းၵွင်ႈၵၢင်ႇလၢႆလၢႆၸုမ်းၵေႃႈၶႂ်ႈလႆႈၽႅၼ်ႇလိၼ်ၸိုင်ႈတႆး- တွၼ်ႈတႃႇယူႇလွတ်ႈလႆႈ။ ၼႂ်းမိူင်းတႆးၼႆႉဝဵင်းဢၼ်ႁႃၵိၼ်လဵင်ႉတွင်ႉငၢႆႈပဵၼ်ဝဵင်းမူႇၸေႊ- ဝဵင်းတႃႈၶီႈလဵၵ်းဢိၵ်ႇလၢႆလၢႆဝဵင်းၼႂ်းၼႃႈလိၼ်ဝႃႉလႄႈမိူင်းလႃး။ ၵူၺ်းၵႃႈၼႂ်းၵႃႈဝဵင်းၸိူဝ်းၼႆႉ ဢၼ်မီးၸုမ်းယိပ်းၵွင်ႈၵၢင်ႇၼမ်ပျီႇတူႉၸိတ်ႉၼမ် ပဵၼ်ဝဵင်းမူႇၸေႊ။ မီးၸုမ်းပျီႇတူႉၸိတ်ႉ ၸုမ်းလဵၵ်ႉ ၸုမ်းယႂ်ႇတင်းမူတ်း ဢမ်ႇယွမ်း 40 ၸုမ်း။ ယိင်ႈၸုမ်းယိပ်းၵွင်ႈၵၢင်ႇၼမ်ၵေႃႈယိင်ႈမီးလွင်ႈသုၵ်ႉယုင်ႈလႄႈ ၵူၼ်းၸူၼ်-ၽူႈလၵ်ႉလိူင်ႇၼမ်။ ယိင်ႈဝၢၼ်ႈမိူင်းဢမ်ႇမီးပၵ်းပိူင်မၢႆမီႈႁူမ်ႇငမ်းၵေႃႈယိင်ႈၶႅၼ်းၸူၼ်ႁၢႆႉ။ တီႈဝဵင်းမူႇၸေႊၼႆႉၼႂ်းၶၢဝ်းတၢင်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼႆႉၵမ်းၵမ်းၸူမ်ၶဝ်ႈႁိူၼ်းၶဝ်ႈႁၢၼ်ႉ။    

ၸႄႈဝဵင်းမူႇၸေႊၼႆႉ ၵမ်းၵမ်းၵႆႉမီးလွင်ႈၸူၼ်ၵၼ် ၊ ၶႃႈၵၼ် ယူႇသေႇသေႇ ။ ဢၼ်ၸုမ်းပျီႇတူႉၸိတ်ႉၶဝ် ၺွပ်းလႆႈ ၊ ၵုမ်းၶင်လႆႈၵေႃႈ မီးမႃးတင်းၼမ် ။ လိူဝ်သေ မီးၵူၼ်းၸူၼ်ၵူၼ်းလၵ်ႉယဝ်ႉ သမ်ႉမီးထႅင်ႈ ၸုမ်းၸိူဝ်းဢၼ်တင်ႈၸႂ် ပႂ်ႉတီႉၺွပ်းၵူၼ်းပဵၼ်တူဝ်ယိူဝ်ႇသေ ထႆၵိၼ်ငိုၼ်းၵေႃႈမီးထႅင်ႈ ။

 ၽူႈလၵ်ႉၸၵ်ႉၶုတ်ႈမၢင်ၸိူဝ်း ၺႃးၸုမ်းယိပ်းၵွင်ႈၵၢင်ႇၶဝ် ယိုဝ်းတၢႆထင်တီႈပႅတ်ႈၵေႃႈမီး ။ ၼႂ်းမူႇၸေႊၼႆႉ ပျီႇတူႉၸိတ်ႉၵေႃႈ မီးဢမ်ယွမ်း 10 ၸုမ်း ။ ၵိုင်ႇလီၵုမ်းလႆႈ လွင်ႈလၵ်ႉလွင်ႈၸူၼ်ၸိူဝ်းၼႆႉလႆႈသေတႃႉ  ဢၼ်လၵ်ႉဢၼ်ၸူၼ်သမ်ႉတိုၵ်ႉမီးယူႇၶိူဝ်းယႂ်းလႄႈ ဢမ်ႇႁူႉငဝ်ႈႁၢၵ်ႈတူၼ်ႈတေႃမၼ်း ပဵၼ်သင်တေႉတေႉၼႆ ၵူၼ်းပိုၼ်ႉတီႈပေႃးဝူၼ်ႉၵႂင် ။

မၢင်ၸိူဝ်းၵေႃႈဝႃႈ မူၸေႊၼႆႉ ၵွပ်ႈမီး ပၢင်တေႃႇလွင်းၼမ် ၊ ယႃႈမဝ်းၵမ်လိူင်ႇ ။ ပျီႇတူႇၸိတ်ႉ ၸုမ်းၸိူဝ်းဢၼ်ဢၢင်ႈၸိုဝ်ႈဝႃႈ ဢဝ်လွင်ႈႁူမ်ႇလူမ်ႈပၼ်ၵူၼ်းမိူင်းဢၼ်ဝႃႈၼၼ်ႉၵေႃႈ ၵမ်ႈၼမ် ပိူင်ပဵၼ်တႄႉသမ်ႉ ပဵၼ်ၸုမ်းတႃႇၵႅတ်ႇၶႄပၢႆးမၢၵ်ႈမီးၸဝ်ႈငိုၼ်းသႃးၶဝ်လႄႈ ပၢင်တေႃႇပၢင်လွင်း ၊ ႁၢၼ်ႉၵိၼ်ၵျေႃႇ ဢၼ်ၽူႈလမ်ႇမၢၵ်ႈၶဝ် ပိုတ်ႇဝႆႉၸိူဝ်းၼၼ်ႉၵူၺ်း- ၼႆ ၵူၼ်းပိုၼ်ႉတီႈလၢတ်ႈ ။

မိူဝ်ႈဝၼ်းတီႈ 17/9/2025 ၼႆႉ ၵၢင်ၶမ်ႈ 9 မူင်းၼႆႉ တီႈႁိူၼ်းလင်ၼိုင်ႈၼႂ်းပွၵ်ႉႁူဝ်မူၼ်ႇ ၸႄႈဝဵင်းမူႇၸေႊ ဢၼ်မီးႁိမ်းသဵၼ်ႈတၢင်းၽႄ 45 ၵုင်း ၼၼ်ႉ ပျီႇတူႉၸိတ်ႉၸုမ်းၼိုင်ႈၶဝ်ႈၵူတ်ႇထတ်းသေတီႉၺွပ်းလႆႈ ၵူၼ်း  6 ၵေႃႉ။ ပျီႇတူႉၸိတ်ႉတႄႉဝႃႈပဵၼ်ၶိူဝ်းၶၢႆႇၼႅင်ႈသၢၼ်ၵူၼ်းၸူၼ်ၽူလၵ်ႉၸၵ်ႉၶုတ်ႈၼႂ်းမူႇၸေႊၼႆႉဝႃႈၼႆ ။

ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – ၸုမ်းဢၼ်ၶဝ်ႈသွၵ်ႈၼႂ်းႁိူၼ်းသေတီႉၺွပ်းၼၼ်ႉပဵၼ် ၸုမ်းပျီႇတူႉၸိတ်ႉၵူၺ်းၼင်ႇၵဝ်ႇ။  ၵူၺ်းၵႃႈ  ပဵၼ်ပျီႇတူႉၸိတ်ႉၸုမ်းလႂ်တႄႉဢမ်ႇႁူႉ ၊ ၵွပ်ႈပျီႇတူႉၸိတ်ႉၼမ်ၼႃႇတီႈၼႆႉ ။ ၼႂ်းႁိူၼ်းလင်ၼၼ်ႉ  ၶဝ်ယိုတ်းလႆႈပႃး ၵွင်ႈပွတ်း ၵွင်ႈယၢဝ်း ၊သိူဝ်ႈႁႄႉမၢၵ်ႇၵွင်ႈ ၊ မႅၵ်ႉၵွင်ႈ၊  ဝႅၼ်သႅင်ၶဵဝ် လႄႈ ၾူၼ်း ၸိူဝ်းၼႆႉ – ဝႃႈၼႆ။

ဢွင်ႈတီႈဢၼ် ၸုမ်းပျီႇတူႉၸိတ်ႉၵႂႃႇသွၵ်ႈသေၺွပ်းၼႆႉ  ပဵၼ်ႁိူၼ်းဢၼ်ၵူၼ်းတၢင်ႇတီႈမႃးၶၢတ်ႇယူႇၸွမ်းၵၼ်ဝႆႉ   ၵူၼ်းၸၢႆး 8 ၵေႃႉ ။ တၼ်းၺွပ်းလႆႈ 6 ၵေႃႉ ၊  တႃႇ 2 ၵေႃႉ ၼႅတ်ႈလႅၼ်ႈပၢႆႈလွတ်ႈ ။ တိုၵ်ႉၸွမ်းႁႃတူဝ်ၶဝ်ယူႇ ၼႆယဝ်ႉ။

ၸႄႈဝဵင်းမူႇၸေႊၼႆႉ ၸဵမ်မိူဝ်ႈ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇယိုတ်းမိူင်း  ပၼ်ႁႃၸုမ်းယိပ်းၵွင်ႈၵၢင်ႇ လႄႈၸုမ်းဢမ်ႇဢွၵ်ႇၸိုဝ်ႈဢွၵ်ႇသဵင်သေထႆၵိၼ်ငိုၼ်းယူႇၸိူဝ်းၼႆႉၵေႃႈ  မီးတင်းၼမ်တင်းလၢႆ ။

ပေႃးဝႃႈလူင်းမိုဝ်းၵႂၢတ်ႇလၢင်ႉတႄႉတႄႉ ၵူၼ်းၵေႃႇၵၢၼ်ႁၢႆႉဢၼ်မူၵ်းယူႇၸွမ်းၼႂ်းမူႇၸေႊၼႆႉ ဢမ်ႇၽဵဝ်ႈမူၺ်ႉလႆႈသဵင်ႈၵေႃႈ တေဢမ်ႇၵိုတ်းၼမ် ။ ၵူၺ်းၵႃႈ ပေႃးတူၺ်းတီႈမူႇၸေႊၼႆႉသမ်ႉ  သင်ပႆႇၸႂ်ႈၵူၼ်းဢၼ်ၵႂႃႇယႃႉၵႂႃႇၵဝ်း ပၢင်တေႃႇပၢင်လွင်းၸိူဝ်းၼႆႉၼႆ ဢမ်ႇသူႈတီႉၺွပ်းလႆႈ ၊ မိူၼ်တင်းဝႃႈ ၵႅတ်ႇၵင်ႈပၼ်ပၢင်တေႃႇပၢင်လွင်းၵူၺ်းၼႆ  ၵူၼ်းပိုၼ်ႉတီႈလၢတ်ႈ။

ပွတ်းတၢင်းမူႇၸေႊၼႆႉ ၸွမ်းၼင်ႇၵူၼ်းပိုၼ်ႉတီႈလၢတ်ႈတႄႉ ပဵၼ်ပိူင်ၽွင်းငမ်းသိုၵ်းဝႆႉယူႇ ဝႃႈၼႆသေတႃႉ ၸုမ်းသိုၵ်း ၸုမ်းယိပ်းၵွင်ႈၵၢင်ႇၼင်ႇၵၼ်ၵေႃႈ ဢမ်ႇၶဝ်ႈၵၼ်။ ဢမ်ႇဢဝ်လွင်ႈႁူမ်ႇလူမ်ႈသင်ပၼ်ၵူၼ်းမိူင်းလႆႈ ၊ ၵူၼ်းမိူင်းၵူၺ်း ဢၼ်လႆႈၺႃးၸၢၵ်ႇၼႂ်းၵႄႈမၼ်း ၵူၼ်းပိုၼ်ႉတီႈလၢတ်ႈၼင်ႇၼႆ ဢိင်ၼိူဝ်လွင်ႈႁူမ်ႇလူမ်ႈၵူၼ်းပိုၼ်ႉတီႈသေ ၸင်ႇလႆႈလၢတ်ႈတႅၼ်းဝႆႉၼင်ႇၼႆ ၶႃႈဢေႃႈ –

“တေလႆႈဝႃႈ လၢႆးဢုပ်ႉပိူင်ႇ ပိူင်သိုၵ်းသေတႃႉ သိုၵ်းၵေႃႈ ဢမ်ႇၵုမ်းလႆႈတေႉတေႉ ပျီႇတူႇၸိတ်ႉၵေႃႈ ဢမ်ႇၵုမ်းလႆႈတေႉတေႉ။ပျီႇတူႉၸိတ်ႉၸုမ်းလႄႈၸုမ်းၵေႃႈ ဢမ်ႇမႅၼ်ႈၵၼ်။  ဢၼ်သုၵ်ႉသၵ်ႉၵေႃႈ မၼ်းတႄႇတီႈငဝ်ႈမၼ်းၵမ်ႈၼမ်ယဝ်ႉဝႃႈ ၸုမ်းပျီႇတူႉၸိတ်ႉၸိူဝ်းၼႆႉ”။

ၵၢၼ်တေႃႇၵၢၼ်လွင်း ၊ ႁၢၼ်ႉၵိၼ်ၵျေႃႇ KTV  ၊ ယႃႈမဝ်းၵမ် ၵၢၼ်ႁႃငိုၼ်းဢၼ်ဢမ်ႇပၼ်ၽွၼ်းလီတေႃႇတူင်ႇၵူၼ်းၵမ်ႈၼမ် တီႈမူႇၸေႊၼႆႉ ပဵၼ်ၸုမ်းပျီႇတူႉၸိတ်ႉၵေႃႉဢွၼ်ႁဵတ်းဝႆႉၵူၺ်း ၊ ပျီႇတူႉၸိတ်ႉၼႆႉ ၶဝ်ႈၸိုဝ်ႈဝႃႈ ပဵၼ်သိုၵ်းၵူၼ်းမိူင်းဝႃႈၼႆသေတႃႉ မၼ်းဢမ်ႇၸႂ်ႈသိုၵ်းဢၼ်ၵႅတ်ႇၶႄပၼ်ၵူၼ်းမိူင်း ။ ၶဝ်ၽွတ်ႈမႃး တႃႇၵႅတ်ႇၵင်ႈလၢႆးႁႃၵိၼ်ၶဝ်ၵူၺ်း၊ ၵူၼ်းၸူၼ်ၵူၼ်းလၵ်ႉမၢင်ပွၵ်ႈ ၸိူဝ်းၺႃးတီႉၸိူဝ်းၼၼ်ႉယင်းပဵၼ်ၵူၼ်းၼႂ်းပျီႇတူႉၸိတ်ႉသေၸုမ်းၸုမ်းၶိုၼ်းၵူၺ်း ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈ။

မူၸေႊၼႆႉ ၼႂ်းဝၢၼ်ႈၼႂ်းဝဵင်းသမ်ႉ ၸုမ်းပျီႇတူႉၸိတ်ႉၵုမ်း ။ ၼႂ်းၵႄႈမူႇၸေႊ – ၼမ်ႉၶမ်း ၼႆႉသမ်ႉ  မီးဝႆႉတပ်ႉသိုၵ်းမၢၼ်ႈ၊ သိုၵ်းတဢၢင်း TNLA လႄႈ သိုၵ်းတႆး SSPP ၸိူဝ်းၼႆႉထႅင်ႈ။ ၵူၼ်းမိူင်းမုင်ႈမွင်းၶႂ်ႈႁႂ်ႈၸုမ်းယိပ်းၵွင်ႈၵၢင်ႇၽဵဝ်ႈမူၺ်ႉပၼ် ၸုမ်းၵူၼ်းလၵ်ႉၵူၼ်းၸူၼ်လႄႈ ၸုမ်းၵျႃႊၽျႅၼ်ႉၸိူဝ်းၼႆႉ- ၵူၼ်းပိုၼ်ႉတီႈလၢတ်ႈၼင်ႇၼႆ။

ၸိူဝ်းႁဵတ်းၵၢၼ်ပၢႆးမၢၵ်ႈမီးလူၺ်ႈၸႂ်ၽိူၵ်ႇၸိုၼ်ႈတႄႉ ဢမ်ႇသူႈႁတ်းယူႇၵၼ်ၼမ်ယဝ်ႉ ။ ၵမ်ႈၼမ်ဢွၼ်ၵၼ် ၶၢႆႉပၢႆႈသွၼ်ႈယူႇဝႆႉၸွမ်းဢွင်ႈတီႈဢၼ်လွတ်ႈၽေး ။ ၸဵမ်ဢဝ် ၸဝ်ႈၶွင်ႁၢၼ်ႉယႂ်ႇႁၢၼ်ႉလူင်ၸိူဝ်းၼႆႉ ဢမ်ႇႁတ်းယူႇၵိုၵ်းႁၢၼ်ႉဝႆႉ ယွၼ်ႉဝႃႈ ၵႆႉမီးၸုမ်းဢမ်ႇႁူႉၸိုဝ်ႈမႃးၺွပ်းၵႂႃႇထႆၵိၼ်ငိုၼ်း ၊ ပေႃးဢမ်ႇပၼ်ငိုၼ်းလႆႈသမ်ႉ ၸၢင်ႈလူႉသၢႆၸႂ်ယွၼ်ႉမၼ်း ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈဝႆႉ ။ ဢိင်ၼိူဝ်လွင်ႈႁူမ်ႇလူမ်ႈၵူၼ်းပိုၼ်ႉတီႈသေ လႆႈဢဝ်သဵင်တႅၼ်းဝႆႉ ၼင်ႇၼႆ  –

“ၶႃႈၵေႃႈ ပေႃးဢမ်ႇလၢတ်ႈယဝ်ႉ ပေႃးပဵၼ်ၵူၼ်းပိုၼ်ႉတီႈ ဢၼ်ပိုတ်ႇႁၢၼ်ႉၾူၼ်း ၊ ႁၢၼ်ႉဢၼ်ယႂ်ႇဢၼ်လူင်ၸိူဝ်းၼႆႉ ၸဝ်ႈၶွင်မၼ်းၸိူဝ်းၼႆႉပၢႆႈဢွၵ်ႇဝဵင်းမူတ်းယဝ်ႉၶႃႈၼႃႇ ။ ပၢႆႈၵႂႃႇယူႇတၢင်ႇဝၢၼ်ႈတၢင်ႇဝဵင်းၵမ်ႈပႃႈၼမ်။ မၢင်ႁၢၼ်ႉၵေႃႈ မိူဝ်ႈဢွၼ်တၢင်းပိုတ်ႇႁၢၼ်ႉယႂ်ႇသေတႃႉ ဝၢႆးၼႆႉ လႅၵ်ႈပဵၼ်ႁၢၼ်ႉလဵၵ်ႉလဵၵ်ႉၵွႆး။ၵမ်ႈၼမ်သမ်ႉ ပေႃးႁၢၼ်ႉယႂ်ႇၼႆ ၵႆႉမီးၵူၼ်းမႃးၺွပ်းၵႂႃႇပဵၼ်တူဝ်ယိူဝ်ႇ ထႆၵိၼ်ငိုၼ်း”

ယွၼ်ႉၵၢၼ်ၽွင်းငမ်းဢမ်ႇမီးပၵ်းမီးပိူင်ၸိူင်ႉၼႆလႄႈ ၵူၼ်းၼုမ်ႇမူႇၸေႊ ၸိူဝ်းတေယႂ်ႇၶိုၼ်ႈမႃးၵေႃႈ သဵၼ်ႈတၢင်းႁၢႆ ။ ၸိူဝ်းပွင်ပဵၼ်လႆႈတႄႉ သူင်ႇၶိုၼ်ႈႁဵၼ်းဢၼ်လႆႈတမ်းၸႂ်သေတႃႉ ၸိူဝ်းႁႃၸဝ်ႉၵိၼ်ၶမ်ႈၵူၺ်းတႄႉ ဢမ်ႇမီးတၢင်းလိူၵ်ႈတႃႇလုၵ်ႈလၢင်း။

ၵူၼ်းၼုမ်ႇၵၢပ်ႈပၢၼ်မႂ်ႇ ၵုမ်ႇသုမ်းၶၢဝ်းယၢမ်းၸွမ်း ၵဵမ်းဢွၼ်ႊလၢႆႊ  ၊  သူဝ်ႊသျႄႊမီႊတီႊယိူဝ်ႊ လႄႈ ပၢင်တေႃႇပၢင်လွင်းၵူၺ်းလႄႈ လီမႆႈၸႂ်တႃႇမိူဝ်းၼႃႈတႄႉတႄႉၼႆ ၵူၼ်းမူႇၸေႊၵေႃႉၼိုင်ႈလၢတ်ႈ။