ဝၢႆးလင် သိုၵ်းမၢၼ်ႈယိုတ်းဢဝ်ၶိုၼ်းလႆႈ ဝဵင်းၼွင်ၶဵဝ်ဢမ်ႇႁိုင် သိုၵ်းတဢၢင်း တင်း သိုၵ်းမၢၼ်ႈ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်းၵႄႈၵၢင်ဝဵင်းၼွင်ၶဵဝ် တင်း ဝဵင်းၵျွၵ်ႉမႄး ႁၢၼ်ႉတေႃႇထိုင်ယၢမ်းလဵဝ်ၵေႃႈ သိုၵ်းမၢၼ်ႈၸႂ်ႉႁႅင်းသိုၵ်း၊ ၶိူင်ႈၵွင်ႈလူင်၊ ၶိူင်ႈတရူၼ်ႊ ၸိူဝ်းၼႆႉၵူႈသႅၼ်းသေ တင်းသွင်ၾၢႆႇ သိုပ်ႇပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်းယူႇ ၼႂ်းမိူင်းတႆးပွတ်းႁွင်ႇ။
သိုၵ်းမၢၼ်ႈၶတ်းၸႂ်ထူဝ်းသိုၵ်းၶဝ်ႈၵႂႃႇတၢင်းဝဵင်းၵျွၵ်ႉမႄး ၸႂ်ႉပႃးၶိူင်ႈၵွင်ႈလူင် လႄႈ တရူၼ်ႊၵူႈသႅၼ်းသႅၼ်း ပွႆႇမၢၵ်ႇသႂ်ႇ ၸွမ်းဝၢၼ်ႈၸိူဝ်းမီးၼိူဝ်သဵၼ်ႈသၢႆတၢင်းဢၼ်တေလႆႈလတ်းၽၢၼ်ႇၵႂႃႇႁၢဝ်ႈႁႅင်း ႁဵတ်းႁႂ်ႈႁိူၼ်းယေးၵူၼ်းမိူင်း လူႉၵွႆၼႆ ၼၢင်းယိင်းသႅၼ်းဢႃႇယုမွၵ်ႈ 30 ပၢႆ ၵေႃႉယူႇဝႆႉၼႂ်းပိုၼ်ႉတီႈၸမ်ဝဵင်းၵျွၵ်ႉမႄး လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ၵူၼ်းဝၢၼ်ႈၸိူဝ်းမီးယူႇၼႂ်းပိုၼ်ႉတီႈႁိမ်းႁွမ်းဝဵင်းၵျွၵ်ႉမႄးၼၼ်ႉ ပၢႆႈဢွၵ်ႇဝၢၼ်ႈဝႆႉမူတ်းယဝ်ႉၼႆသေတႃႉ တေႃႇထိုင်မိူဝ်ႈၼႆႉ (ဝၼ်း တီႈ 17/9/2025) ယၢမ်းၵၢင်ၼႂ်ၼႆႉတႄႉ တိုၵ်ႉလႆႈငိၼ်းသဵင်ၵွင်ႈသဵင်မၢၵ်ႇပၼ်းယူႇဢမ်ႇထၢတ်ႇ။ လႅပ်ႈႁိူၼ်းယေးၺႃးၾႆးမႆႈဝႆႉ။ ၵႂၼ်းၾႆးၼမ်ႉလမ်ၶိုၼ်ႈလမ်ၶိုၼ်ႈဢမ်ႇထၢတ်ႇ။”
သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼွင်ၶဵဝ်- ၸႄႈဝဵင်းၵျွၵ်ႉမႄး ၶၢဝ်းတၢင်း မွၵ်ႈ 4 လိူၼ်ၼႆႉလႄႈ ၵူၼ်းမိူင်းၼပ်ႉႁူဝ်သႅၼ်လႆႈပၢႆႈဢွၵ်ႇၽၢတ်ႇယၢၼ်ဝၢၼ်ႈ၊ ႁိူၼ်းယေးလူႉၵွႆ ၼပ်ႉႁူဝ်ပၢၵ်ႇလင် ႁၢၼ်ႉတေႃႇထိုင်ယၢမ်း လဵဝ် ၵူၼ်းမိူင်းပိုၼ်ႉတီႈ ယင်းပႆႇၸၢင်ႈယူႇၶိုၼ်းဝၢၼ်ႈၽႂ်ႁိူၼ်းမၼ်း ။
ၼႂ်းၵၢင်လိူၼ်သႅပ်ႊထႅမ်ႊပိူဝ်ႊၼႆႉ ၶွမ်ႊမသျိၼ်ၵၢၼ်လိူၵ်ႈတင်ႈ တႂ်ႈဢၢမ်းၼၢတ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇသဵၼ်ႈၸိုဝ်ႈ ၸႄႈဝဵင်းၸိူဝ်းဢမ်ႇပဵၼ်ၸတ်းႁဵတ်းပၢင်လိူၵ်ႈတင်ႈ တႃႇ 17 ၸႄႈဝဵင်း။ ၼႂ်းၼၼ်ႉဢမ်ႇပႃးသဵၼ်ႈၸိုဝ်ႈ ၸႄႈဝဵင်းၵျွၵ်ႉမႄး တင်း ၸႄႈဝဵင်းသီႇပေႃႉ။
ၾၢႆႇၽူႈလဵပ်ႈႁဵၼ်းၵၢၼ်မိူင်း မိူင်းတႆး ထတ်းသၢင်လၢတ်ႈၼႄဝႆႉဝႃႈ “ၵၢၼ်တီႈၶဝ်ဢမ်ႇပိုၼ်ၽၢဝ်ႇပႃး သီႇပေႃႉ၊ ၵျွၵ်ႉမႄးၼႆႉ ပွင်ႇဝႃႈ ၶဝ်မီးယိူင်းဢၢၼ်းတႃႇၸတ်းပၢင်လိူၵ်ႈတင်ႈ။ ယွၼ်ႉၼၼ် ပဵၼ်ႁိုဝ်ၵေႃႈ ၵွၼ်ႇၼႃႈတေၸတ်းပၢင်လိူၵ်ႈတင်ႈၼႆႉ တႃႇၵုမ်းၵမ်လႆႈၶိုၼ်း ၵျွၵ်ႉမႄး၊ သီႇပေႃႉၼႆႉ ၶဝ်တိုၼ်းတေၶိုင်ၵူႈလၢႆးႁႂ်ႈပေႃးလႆႈ” ၼႆယဝ်ႉ။
ၸႄႈဝဵင်းၸိူဝ်းသိုၵ်းမၢၼ်ႈ တေဢမ်ႇၸတ်းပၢင်လိူၵ်ႈတင်ႈ 17 ၸႄႈဝဵင်းၼႆႉ ပဵၼ်ၼႂ်းၼႃႈတီႈၸုမ်းသိုၵ်းဝႃႉ (UWSA)၊ ၸုမ်းသိုၵ်းၵဝ်ႈၵၢင်ႉ (MNDAA)၊ တပ်ႉသိုၵ်းမိူင်းလႃး (NDAA ) လႄႈ ၸုမ်းသိုၵ်းတဢၢင်း (TNLA) ၵမ်ႈၽွင်ႈသေတႃႉ ဢမ်ႇပႃးၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး။
တႃႇတိုၵ်းဢဝ်လႆႈၶိုၼ်း ၸႄႈဝဵင်းၵျွၵ်ႉမႄးၼႆႉ သိုၵ်းမၢၼ်ႈ ၸႂ်ႉဢဵၼ်ႁႅင်းသိုၵ်း တပ်ႉမ 11၊ တပ်ႉမ 55 ၸိူဝ်းၶဝ်ႈပၢင်တိုၵ်းမႃး ၸဵမ်မိူဝ်ႈ တိုၵ်းဢဝ်ဝဵင်းၼွင်ၶဵဝ်ၼၼ်ႉၵွႆးဢမ်ႇၵႃး ယၢမ်းလဵဝ်ၸႂ်ႉတိုဝ်းပႃးႁႅင်းသိုၵ်း ၸၵၶ 1 လႄႈ ၸၵၶ 12 ၸဵမ်ၸိူဝ်းၼႆႉထႅင်ႈ။ သၢႆငႃးသိုၵ်း မၢၼ်ႈ ၸိူဝ်းဢၢၼ်းထူဝ်းသိုၵ်းၶဝ်ႈၼႂ်းဝဵင်းၵျွၵ်ႉမႄးႁႂ်ႈလႆႈၼၼ်ႉ ယၢမ်းလဵဝ်ထူဝ်းသိုၵ်းၵႂႃႇတၢင်း ဝဵင်းၼွင်ၶဵဝ်-ၼွင်ပိင် သဵၼ်ႈ ၼိုင်ႈ၊ လုၵ်ႉတၢင်း ႁူၺ်ႈၵိုတ်ႈသေ ၵႂႃႇတၢင်းဝၢၼ်ႈၼွင်ပဵတ်း ဢွၵ်ႇၶၢဝ်းတၢင်းၵႂႃႇၾၢႆႇတူၵ်းဝဵင်းမိူင်းၵုတ်ႈ တၢင်းဝၢၼ်ႈမိူင်းတၢင်ႈ ၼၼ်ႉသဵၼ်ႈၼိုင်ႈ – ၵူၼ်းပိုၼ်ႉတီႈလၢတ်ႈၼင်ႇၼႆ။
လႆႈႁူႉဝႃႈ ၾၢႆႇသိုၵ်းမၢၼ်ႈၸႂ်ႉႁႅင်းၵူၼ်းသိုၵ်းမႂ်ႇ ၸိူဝ်းထုၵ်ႇသူင်ႇၵႂႃႇၾိုၵ်းၵၢၼ်သိုၵ်းတီႈဝဵင်းပၢင်ႇဢူး တိူင်းမၢၼ်းတလေး လႄႈ မိူင်းတႆးပွတ်းၸၢၼ်းၼၼ်ႉၵွႆးဢမ်ႇၵႃး ၵူၼ်းသိုၵ်းၼႂ်းတပ်ႉၵွင် တႂ်ႈၵုမ်းၵမ် တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ရမခ) ၸိူဝ်းတူၵ်းပုၼ်ႈ ၽွၼ်း ၶၢႆႉပၵ်းသဝ်းယူႇၼႂ်းထုင်ႉၼမ်ႉလၼ်ႈ လႄႈ ၸႄႈဝဵင်းမိူင်းယႆၸိူဝ်းၼႆႉ ၶဝ်ႈပၢင်တိုၵ်းၸွမ်း သိုၵ်းတဢၢင်းယူႇ ၼႂ်းၸႄႈ ဝဵင်းၵျွၵ်ႉမႄး ၼႆယဝ်ႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ