ပၢၼ်ပဵၼ်ၵူၼ်းမိူင်းႁူမ်ႈတုမ်မၢၼ်ႈၼႆႉ ၸဵမ်မိူဝ်ႈလၢႆၸူဝ်ႈၵူၼ်းမႃး ဢမ်ႇတွၼ်ႉလႆႈယူႇ လူၺ်ႈတၢင်းၵတ်းယဵၼ်လွတ်ႈၶဵၼ်သေပွၵ်ႈ။ ထၢမ်တူၺ်း ၵူၼ်းသႅၼ်းလႂ်ၵေႃႈ ႁူပ်ႉထူပ်းလွင်ႈႁၢႆႉၸႃႉ ၼႂ်းဝၢၼ်ႈၼႂ်းမိူင်းမႃးတႃႇသေႇ။ ၽွင်းသိုၵ်းၸၢဝ်းၶိူဝ်းၼႂ်းမိူင်း တိုၵ်ႉတိုၵ်းတေႃး သိုၵ်းမၢၼ်ႈယူႇၼႆႉၵေႃႈ ၵူၼ်းမိူင်းလႆႈမႆႈၸႂ်လၢႆလွင်ႈ ယူႇမိူင်းလႂ်ၵေႃႈယၢပ်ႇၸႂ် မိူင်း ၼၼ်ႉ။

ၵူၼ်းၸိူဝ်းယူႇၸွမ်းလႅၼ်လိၼ်တႆး – ၶၢင် မိူၼ်ၼင်ႇ ၸႄႈဝဵင်းမၢၼ်ႈၸေႊ၊ မၢၼ်ႈဝဵင်းလူင် ၸိူဝ်းၼႆႉ ၺႃးသိုၵ်းၶၢင်တဵၵ်းၵဵပ်းသိုၵ်းလႄႈ ယူႇယၢပ်ႇၵိၼ်းၸႂ်ဝႆႉ ဝႃႈၼႆ။

တႄႇၸဵမ်မိူဝ်ႈ လိူၼ်မေႊ 2025 ၼၼ်ႉမႃး တေႃႇထိုင်ယၢမ်းလဵဝ် သိုၵ်းၶၢင် KIA လူင်းၵဵပ်း သိုၵ်းမႂ်ႇ ၸွမ်းသဵၼ်ႈတႃႈသၢႆတၢင်း လႅၼ်လိၼ်မိူင်းတႆး – မိူင်းၶၢင် တိတ်းၸပ်းၵၼ်ဝႆႉ ၸိူဝ်းၼၼ်ႉ။

ၸုမ်းသိုၵ်းၶၢင် KIA ၼႆႉ ပႂ်ႉဝႆႉၸွမ်းသဵၼ်ႈတႃႈသၢႆတၢင်း ၼႂ်းၵႄႈဝၢၼ်ႈပၢင်ႇၵွင်းမူးလႄႈ မိူင်းၶွင်၊ မၢၼ်ႈဝဵင်းလူင် တေႃႇထိုင်မၢၼ်ႈၸေႊ ဢၼ်မီးၼႂ်းၶဵတ်ႇၸႄႈဝဵင်းမၢၼ်ႈၸေႊ ဢၼ်တိတ်းၸပ်း ၸိုင်ႈတႆးပွတ်းႁွင်ႇ။ ၵူၼ်းမိူင်းၸိူဝ်းယူႇပွတ်းၼႆႉ ယူႇႁိူၼ်းၵေႃႈ လႆႈၵူဝ်၊ ပၢႆႈၵေႃႈ သမ်ႉတိုၵ်ႉၵႂႃႇၺႃးတီႉၺွပ်းပွတ်းတၢင်း – ၵူၼ်းပိုၼ်ႉတီႈ လၢတ်ႈၼႄဝႆႉၼင်ႇၼႆ –

“တႄႇၸဵမ်မိူဝ်ႈလိူၼ်မေႊ ၸိူဝ်းၼႆႉ ဢၼ်ၶဝ်တႄႇၵဵပ်းသိုၵ်းၼႆႉ တေႃႇထိုင်တေႃႈလဵဝ်ယဝ်ႉ။ ၵူၼ်းၸိူဝ်း ႁေႃႈရူတ်ႉၶိူင်ႈ ႁပ်ႉသူင်ႇၵူၼ်းၸိူဝ်းၼႆႉၵေႃႈ ၺႃးၵိၼ်ၼမ်ဢေႃႈ။ မီးၶၢဝ်းတၢင်း 4 – 5 လိူၼ်ယဝ်ႉ ဢၼ်ၶဝ်ႁဵတ်းၼႆ။ ၵၢၼ်ၵဵပ်းသိုၵ်းၶဝ် ၶဝ်ဢမ်ႇယင်ႉ။ ၸၢဝ်းတႆးႁဝ်းၵေႃႈ လႆႈၶၢမ်ႇတၢမ်ႇ သိုၵ်းၸၢဝ်းၶိူဝ်းမႃး ပၢၼ်သိုပ်ႇပၢၼ်”။

ၵူၼ်းၼုမ်ႇၵမ်ႈၼမ် ဢွၼ်ၵၼ်ပၢႆႈသွၼ်ႈဝႆႉ တၢင်ႇတီႈတၢင်ႇလႅၼ်။ ၵူၼ်းဢႃယုသႅၼ်းပၢၼ်ၵၢင်ၵေႃႈ သိုၵ်းၶၢင်ဢဝ်ၵႂႃႇႁၢပ်ႇၵၢၼ်သိုၵ်း။ ႁူဝ်ၼပ်ႉၵူၼ်းၸၢႆး ဢၼ်သိုၵ်းၶၢင် တီႉၺွပ်းၵႂႃႇၼႆႉ ဢမ်ႇႁူႉတႅတ်ႈတေႃးသေတႃႉ ဢမ်ႇယွမ်းႁူဝ်သၢဝ်းမၼ်းယဝ်ႉၼႆ – ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

လိူဝ်သေ တီႉၺွပ်းၵူၼ်းပိုၼ်ႉတီႈယဝ်ႉ မိူၼ်ၼင်ႇ ၵူၼ်းၸၢႆးၸိူဝ်းလုၵ်ႉတၢင်းမိူင်းမၢၼ်ႈတူင်ႈပဵင်းသေ မႃးႁႃႁဵတ်းၵၢၼ်ၸွမ်း ဝဵင်းၸေႊၼႃး၊ ၽႃၵၢၼ်ႉ ၸိူဝ်းၼႆႉၵေႃႈ ၺႃးသိုၵ်း ၶၢင်တီႉၺွပ်းမိူၼ်ၵၼ်။

ပေႃးပဵၼ်ၸၢဝ်းၶိူဝ်း ဢၼ်မီးသဵၼ်ႈၸိုဝ်ႈယူႇၼႂ်းၸႄႈမိူင်းၶၢင်တႄႉ တေၺွပ်းဝႆႉပဵၼ်သိုၵ်းၶၢင်သေ ပေႃးပဵၼ်ၸၢဝ်းမၢၼ်ႈသမ်ႉ ၵႆႉဢဝ်သူင်ႇပၼ် ၸုမ်း PDF – ၵူၼ်းပိုၼ်ႉတီႈ ၵေႃႉ ၼိုင်ႈ လၢတ်ႈၼႄဝႆႉၼင်ႇၼႆ –

“ၵူၼ်းမိူင်းမၢၼ်ႈၸိူဝ်းမႃး ႁဵတ်းၵၢၼ်တီႈၽႃၵၢၼ်ႉသေ ၸိူဝ်းၶႂ်ႈပွၵ်ႈၶိုၼ်းၼၼ်ႉ ၶဝ်တေလတ်းမႃးတၢင်းၼမ်ႉၶမ်း။ ၵွပ်ႈဝႃႈ သဵၼ်ႈတၢင်း ၵၢတ်ႇသႃ – ထီးၶျၢႆႉ (ကသာ – ထီးချိုင့်) ၸိူဝ်း ၼၼ်ႉ ဢမ်ႇၵႂႃႇလႆႈ။ ၶဝ်သမ်ႉ ပၼ်ႇမႃးတၢင်းမၢၼ်ႈၸေႊ ၾၢႆႇၼႆႉ။ ၶိုၼ်းမႃးပွင်ႇ တၢင်းၼမ်ႉ ၶမ်း။ မိူဝ်ႈၶဝ်မႃးၼၼ်ႉ သမ်ႉမႃးထူပ်းသႂ်ႇ သိုၵ်းၶၢင်သေ ၺႃးၺွပ်းဝႆႉ။ ပေႃးပဵၼ် ၸၢဝ်းမၢၼ်ႈၼႆ ၶဝ်တေဢဝ်သူင်ႇပၼ် PDF”။

ၸိူဝ်းပဵၼ်ပေႃႈမႄႈပီႈၼွင်ႉ ၵူၼ်းၼုမ်ႇဢၼ်ၺႃးသိုၵ်းၶၢင်တီႉၺွပ်းဝႆႉၸိူဝ်းၼၼ်ႉ ဢွၼ်ၵၼ် မႃးၸွမ်းၶႆႈသေတႃႉ မၢင်ၵေႃႉထုတ်ႇတူဝ်ဢမ်ႇလႆႈလႄႈ ပေႃႈမႄႈပီႈၼွင်ႉ ပဵၼ်ၼမ်ႉ ႁူႉၼမ်ႉတႃသေ လႆႈပွၵ်ႈၶိုၼ်းၵေႃႈမီးၼႆ ၵူၼ်းမၢၼ်ႈၸေႊ ၵေႃႉၼိုင်ႈလၢတ်ႈ။

ၸွမ်းၼင်ႇ ၽူႈႁူႉႁၼ်ၸွမ်းၵေႃႉၼိုင်ႈလၢတ်ႈတႄႉ ပေႃးဝႃႈ ၺႃးသိုၵ်းၶၢင်တီႉဢဝ်ၵႂႃႇဝႆႉ တီႈလုမ်းၵပ်းသၢၼ် သိုၵ်းၶၢင် ၼႂ်းမၢၼ်ႈဝဵင်းလူင်ၼၼ်ႉၸိုင် ၵူၼ်းႁိူၼ်းတိုၵ်ႉထုတ်ႇမႃး တူဝ်လႆႈ ယူႇ။ ၵူၺ်းၵႃႈ ပေႃးသူင်ႇၵႂႃႇ ၾိုၵ်းၵၢၼ်ၼႂ်းတပ်ႉသိုၵ်းၶၢင်ယဝ်ႉတႄႉ တႃႇထုတ်ႇတူဝ်ၶိုၼ်းဢမ်ႇငၢႆႈယဝ်ႉ ဝႃႈၼႆ။

တီႈလုမ်းၵပ်းသၢၼ်သိုၵ်းၶၢင်ၼၼ်ႉတႄႉ ၼိုင်ႈၵေႃႉၶဝ်ပၼ်ထုတ်ႇတူဝ်ၶိုၼ်းလူၺ်ႈငိုၼ်း 3 သႅၼ်ထိုင် 5 သႅၼ်ပျႃး။ ပေႃးၵႂႃႇမီးၼႂ်းတပ်ႉသိုၵ်းၶၢင်ဝႆႉယဝ်ႉတႄႉ ဢမ်ႇယွမ်း 20 သႅၼ်ပျႃး ၼႆယဝ်ႉ။

ၵူၼ်းဝၢၼ်ႈၸိူဝ်းဢၼ်ယူႇၼႂ်းဢိူင်ႇမၢၼ်ႈၸေႊ တင်းမူတ်း မီး 19 ဝၢၼ်ႈၼၼ်ႈၵေႃႉ ၼိုင်ႈဝၢၼ်ႈလႂ် 5 ၵေႃႉ သိုၵ်းၶၢင် ႁႂ်ႈၵူၼ်းဝၢၼ်ႈၵႂႃႇႁၢပ်ႇၵၢၼ်သိုၵ်း။ ၵူၼ်းၸၢႆးၸိူဝ်းလတ်းၵႂႃႇမႃး ပွတ်းတၢင်းမၢၼ်ႈၾႃႉ(မန်ဖ) ၊ မၢၼ်ႈႁၢၼ်ထၢၵ်ႇ (ဟန်ထက်ရွာ) ၸိူဝ်းၼႆႉၵေႃႈ ၵႆႉၺႃးၺွပ်း ၵူၼ်းပိုၼ်ႉတီႈ လၢတ်ႈၼင်ႇၼႆ။

ဢိင်ၼိူဝ် လွင်ႈၵဵပ်းသိုၵ်းၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ သိုၵ်းၶၢင်ယူႇ။ ၵူၺ်းၵႃႈ ဢမ်ႇႁပ်ႉတွပ်ႇပၼ်။

ၵူၼ်းမိူင်း ၸိူဝ်းယူႇၸွမ်း ပွတ်းတၢင်းမိူင်းမွၵ်ႇ၊ ၵူတ်ႉၶၢႆ ၸိူဝ်းၼႆႉၵေႃႈ ၺႃးသိုၵ်းၶၢင်လူင်းၵဵပ်း သိုၵ်းမိူၼ်ၵၼ်။ ၸွမ်းၼင်ႇၵူၼ်းပိုၼ်ႉတီႈ တႅမ်ႈတၢင်ႇၼိူဝ်ၼႅင်ႈသိုဝ်ႇ ဢွၼ်ႊလၢႆႊဝႆႉတႄႉ လုၵ်ႈဢွၼ်ႇ 10 ၶူပ်ႇပၢႆၵူၺ်းၵေႃႈ လႄႇႁႃၵဵပ်းဢဝ်။ လုၵ်ႈဢွၼ်ႇမၢင်ၸိူဝ်း တိုၵ်ႉလူဝ်ႇႁဵၼ်း လိၵ်ႈယူႇၵေႃႈ သိုၵ်းၶၢင် ဢမ်ႇထၢမ်ၵၢင်ၸႂ် ဢမ်ႇယွၼ်းဢၼုၺၢတ်ႈတီႈပေႃႈမႄႈသေ တီႉၵႂႃႇၵေႃႈမီး ဝႃႈၼႆ။

ၵွပ်ႈၼႆလႄႈ ၵူၼ်းပိုၼ်ႉတီႈတႄႉလၢတ်ႈဝႃႈ – သိုၵ်းၶၢင်ဢမ်ႇၸွႆႈသင်ၵေႃႈ ဢမ်ႇပဵၼ်သင် ၵူၺ်းၵႃႈ ယႃႇယႃႉပၢႆးပၺ်ႇၺႃႇလုၵ်ႈဢွၼ်ႇၵေႃႈလႆႈယဝ်ႉ – ဝႃႈၼႆ။

ၵၢပ်ႈယၢမ်းလဵဝ် သိုၵ်းၸၢဝ်းၶိူဝ်း ၶိူဝ်းလႂ်ၶိူဝ်းၼၼ်ႉ ၸုမ်းလႂ်ၵေႃႈ ၶႂ်ႈၵဵပ်းသိုၵ်းမႂ်ႇ ႁင်းၽႂ်မၼ်းလႄႈ ၵူၼ်းမိူင်းၵႂႃႇယူႇလႂ်ၵေႃႈ ဢမ်ႇလွတ်ႈၽေးသိုၵ်း။ တေၶႂ်ႈဝႄႈသိုၵ်းၸုမ်းၼိုင်ႈၵေႃႈ သမ်ႉ ၸၢင်ႈၵႂႃႇ ၺႃးသိုၵ်းၸုမ်းၼိုင်ႈလႄႈ ပီႈၼွင်ႉတႆး ၸိူဝ်းယူႇမိူင်းတႆးၵေႃႈ ဢမ်ႇလွတ်ႈ ၸိူဝ်းယူႇ တၢင်းပွတ်းမိူင်းၶၢင်ၵေႃႈ ဢမ်ႇလွတ်ႈၼႆ တႆးယူႇမိူင်းၶၢင် ၵေႃႉၼိုင်ႈ လၢတ်ႈၼင်ႇၼႆ။