တိုၵ်းသူၼ်းပၼ်ႁႅင်း ႁႂ်ႈၵူၼ်းၵူႈၵေႃႉၵူႈမိူင်းမိူင်း ၼႂ်းလုမ်ႈၾႃႉ လႆႈသုၼ်ႇသွၼ်ႁဵၼ်းလိၵ်ႈၼႆသေ ဝၼ်းတီႈ 08/09/2025 ၼႆႉ မၵ်းမၼ်ႈဝႆႉ ပဵၼ်ဝၼ်းတေလႆႈမေႃလိၵ်ႈ။ ၼႂ်းမိူင်းမၢၼ်ႈပတ်းပိုၼ်ႉတႄႉ ဝၢႆးသိုၵ်းမၢၼ်ႈယိုတ်းမိူင်းယဝ်ႉ လုၵ်ႈဢွၼ်ႇႁၢမ်းသုၼ်ႇသွၼ်ႁဵၼ်း ၼမ်ၶိုၼ်ႈမႃးၵူႈပီလႄႈ ယၢမ်းလဵဝ် တေမီးမွၵ်ႈ 7 လၢၼ်ႉၵေႃႉ ဝႃႈၼႆ။
မိူဝ်ႈပီ 2019 ၼၼ်ႉ ၸုမ်းၾၢႆႇသဵၼ်ႈမၢႆႁူဝ်ၵူၼ်းလႄႈ ၾၢႆႇငိုၼ်းၵွင်ၵၢင် ၸၢတ်ႈၸိုင်ႈ UNFPA ၵဵပ်းၶေႃႈမုလ်းႁၢႆးငၢၼ်းဝႆႉဝႃႈ ၼႂ်းမိူင်းႁူမ်ႈတုမ်ပတ်းပိုၼ်ႉၼႆႉ လုၵ်ႈဢွၼ်ႇၸိူဝ်းမီးသုၼ်ႇသွၼ်ႁဵၼ်း မီးဝႆႉမွၵ်ႈ 13 လၢၼ်ႉၵေႃႉ။
ၵွၼ်ႇသိုၵ်းမၢၼ်ႈ ပႆႇယိုတ်းမိူင်း မိူဝ်ႈပီၵၢၼ်ႁဵၼ်း 2019 – 2020 လုၵ်ႈဢွၼ်ႇ ၸိူဝ်းၶိုၼ်ႈႁဵၼ်း မီးၸမ် 10 လၢၼ်ႉ။ ဝၢႆးလင် သိုၵ်းမၢၼ်ႈယိုတ်းမိူင်း ႁိုင်ၶၢဝ်းတၢင်း 4 ပီပၢႆ ၼႂ်းပီၵၢၼ် ႁဵၼ်း 2025 – 2026 လုၵ်ႈဢွၼ်ႇၼႆႉ ၸိူဝ်းၶိုၼ်ႈႁဵၼ်းမီး 6 လၢၼ်ႉပၢႆၵူၺ်းယဝ်ႉၼႆ ISP Myanmar ၵဵပ်းၶေႃႈမုလ်းႁၢႆးငၢၼ်းဝႆႉၼင်ႇၼႆ။
လိူဝ်ၼၼ်ႉ လုၵ်ႈႁဵၼ်းတွပ်ႇလိၵ်ႈၸၼ်ႉသိပ်းသွင် တႃႇၶဝ်ႈၸၼ်ႉၸွမ်လႆႈၼၼ်ႉၵေႃႈ ယွမ်းလူင်းမႃးၵူႈပီ၊ ၼႂ်းပီ 2025 ၼႆႉ မီးဝႆႉမွၵ်ႈ 2 သႅၼ်ၵေႃႉၵူၺ်း ဝႃႈၼႆ။
တႃႇလုၵ်ႈဢွၼ်ႇ ၼႂ်းမိူင်းႁူမ်ႈတုမ်မၢၼ်ႈ တေလႆႈၶိုၼ်ႈႁဵၼ်းၼႆႉ ပဵၼ်လွင်ႈၶဵင်ႇတႃႉလူင်ဢၼ်ၼိုင်ႈသေ ၼႂ်းႁူဝ်ၼပ်ႉလုၵ်ႈဢွၼ်ႇ ၶိုင်ႈပၢႆၼႆႉ ႁၢမ်းဝႆႉသုၼ်ႇသွၼ်ႁဵၼ်း။
မိူၼ်ၼႆ ယွၼ်ႉသိုၵ်းမၢၼ်ႈၸႂ်ႉႁိူဝ်းမိၼ် ၶိူင်ႈတရူၼ်း ၵႆႉပွႆႇမၢၵ်ႇယိုဝ်းတိုၵ်းလႄႈ ႁဵတ်းႁႂ်ႈလုၵ်ႈႁဵၼ်းလုၵ်ႈဢွၼ်ႇလူႉတၢႆမၢတ်ႇၸဵပ်းၸွမ်းတင်းၼမ် ႁူင်းႁဵၼ်းၵေႃႈလူႉၵွႆထႅင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ