ၶၢဝ်းတၢင်း ၽႅၼ်ယၼ်ႇသိုၵ်း 1027 တႄႇမီးမႃးၼၼ်ႉသေ လုၵ်ႈၸုမ်းဢူၺ်းလီပွတ်းႁွင်ႇ 3 ၸုမ်း ယိုတ်းလႆႈလၢႆဝဵင်းၼႂ်းမိူင်းတႆးပွတ်းႁွင်ႇ။ ၸဵမ်ဢဝ်ပိူင်ၵဵပ်းၶွၼ်ႇၸိူဝ်းၼႆႉၵေႃႈ ၽႂ်ပေႉၵေႃႈမၼ်းၵဵပ်း။ ၵူၼ်းမိူင်းတႄႉ ယၢပ်ႇၵိၼ်းၼႂ်းၵႄႈမၼ်း။

တီႈၸႄႈဝဵင်းၼမ်ႉၶမ်းၼႆႉၵေႃႈ မိူဝ်ႈလဵဝ် သိုၵ်းတဢၢင်း လူင်းၵဵပ်းၶွၼ်ႇတႃႇပီ 2026 ဝႃႈၼႆထႅင်ႈ။ ၵူၼ်းမိူင်းလူမ်ၸႂ်ႁႃႉ ဢမ်ႇလူမ်ၸႂ်ၵေႃႈဢမ်ႇတူၺ်း။ ႁူႉဝႃႈ ၵဵပ်းၶွၼ်ႇၵူၺ်းလႄႈ ၸဝ်ႈႁၢၼ်ႉၸဝ်ႈသႅင်ႇမၢင်ၸိူဝ်း ယၢပ်ႇၸႂ်တႃႇတေသိုပ်ႇၵႂႃႇမိူဝ်းၼႃႈတႄႉတႄႉ။

ၸဵမ်မိူဝ်ႈ ၸုမ်းဢူၺ်းလီပွတ်းႁွင်ႇ 3 ၸုမ်း ၸုမ်းသိုၵ်းၵဝ်ႈၵၢင်ႉ MNDAA ၊ ၸုမ်းသိုၵ်းတဢၢင်း TNLA ၊ ၸုမ်းသိုၵ်းရၶႅင်ႇ AA ၽႅၼ်ယၼ်ႇသိုၵ်း 1027 သေ လေႃႇတိုၵ်းသိုၵ်းမၢၼ်ႈမႃးၼႆႉ ၼႂ်းမိူင်းတႆးၵေႃႈ ပဵၼ်ၽိုၼ်းပဵၼ်ၾႆး။

ၼႂ်းၵႄႈၼၼ်ႉ PDF ဢၼ်ပဵၼ်ၸုမ်းလုၵ်ႉၽိုၼ်ႉၶၢဝ်းႁွင်ၸိူဝ်းၼႆႉၵေႃႈ ဢဝ်တိုဝ်ႉတၢင်းလီ ၶဝ်ႈႁူမ်ႈၸွမ်း ၵေႃႈမီး။ ဢဝ် NUG ဝႃႈၵေႃႈ ႁၼ်လီၸွမ်းတႄႉတႄႉဝႃႈဝႃႈ။ ၵူၺ်းၵႃႈ ဝၢႆးသေ လုၵ်ႈၸုမ်းဢူၺ်းလီ 3 ၸုမ်း ယိုတ်းၵုမ်းလႆႈလၢႆဝဵင်းၼႂ်းပွတ်းႁွင်ႇယဝ်ႉသမ်ႉ ၼႅတ်ႈၶိုင်တႃႇၽွင်းငမ်းၽႂ်မၼ်း။ ႁဵတ်းဢွၵ်ႇပိူင်ႁင်း ၵူၺ်းၶေႃၶေႃ။ လုၵ်ႉတီႈၾၢႆႇၽွင်းငမ်းဢၼ် ၵဝ်ႇသေ လႅၵ်ႈပဵၼ်ပိူင်ၸုမ်းလႂ်ၸုမ်းၼၼ်ႉမႃး။

မိူၼ်ၼင်ႇ တီႈဝဵင်းၼမ်ႉၶမ်းၼႆႉ တႃႇပီ 2026 ၼႆသေ သိုၵ်းတဢၢင်း TNLA လူင်းၵဵပ်းၶွၼ်ႇလူင်ႈၼႃႈ ၸိူဝ်းဢၼ်ပိုတ်ႇႁၢၼ်ႉပိုတ်ႇသႅင်ႇ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

သင်ပိုတ်ႇႁၢၼ်ႉဝႆႉ သႅၼ်းလႂ်သေဢမ်ႇဝႃႈ တၵ်းတေလႆႈပၼ်ၶွၼ်ႇ ၸွမ်းၼင်ႇပိူင်သိုၵ်းတဢၢင်း တမ်းဝႆႉ။  မိူၼ်ၼင်ႇ ႁၢၼ်ႉၶၢႆၵုၼ်ႇၵူႈသႅၼ်းသႅၼ်း၊ ႁၢၼ်ႉၶၢႆၶိူင်ႈၾႆးၾႃႉ၊ ႁၢၼ်ႉၼမ်ႉၼဵင်ႈ၊ ႁၢၼ်ႉၶဝ်ႈၽၵ်း၊ ႁၢၼ်ႉၵိၼ်ၵျေႃႇ (ႁၢၼ်ႉၶၢႆလဝ်ႈ) ၸဵမ်ၸိူဝ်းၼႆႉ တေလႆႈသႂ်ႇပၼ်ၶွၼ်ႇ ၼႆယဝ်ႉ။

ဢိင်ၼိူဝ်ႁၢၼ်ႉသႅၼ်းလဵၵ်ႉသႅၼ်းယႂ်ႇသေ ၸဝ်ႈၶွင်ႁၢၼ်ႉ တေလႆႈပၼ် 5 သႅၼ်ထိုင် 50 သႅၼ်ပျႃး။ ၶွၼ်ႇၼႆႉ ပဵၼ်တႃႇၶၢဝ်းတၢင်းၼိုင်ႈပီ။ ၵူၼ်းမိူင်း ဢဝ်ဝႂ်ၶွၼ်ႇ ဢၼ်ယၢမ်ႈႁဵတ်းဝႆႉ မိူဝ်ႈသိုၵ်းမၢၼ်ႈၵုမ်း ၸိူဝ်း ၼၼ်ႉၼႄယူႇၵေႃႈ သိုၵ်းတဢၢင်းဢမ်ႇမၵ်းမၼ်ႈပဵၼ်တၢင်းၵၢၼ်။

မၢင်ႁၢၼ်ႉ ဢမ်ႇၸႂ်ႈႁၢၼ်ႉသႅၼ်းယႂ်ႇသေတႃႉ သိုၵ်းတဢၢင်းၶဝ် ယွၼ်းၵဵပ်းၶွၼ်ႇလိူဝ်ႁႅင်းလႄႈ ၸဝ်ႈႁၢၼ်ႉၶဝ် ၵိၼ်းၸႂ်ဝႆႉ ၵူၼ်းၼမ်ႉၶမ်းၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“တႃႇတီႈၼိုင်ႈၼၼ်ႉ ၶဝ်ယွၼ်း 15 သႅၼ်၊ ၵူၺ်းၵႃႈ ၶိုၼ်းယွၼ်းၼွမ်းၶဝ်သေ ၶဝ်ၸင်ႇယွမ်းပၼ်။ ႁဵတ်းၼၼ်သေ လႆႈၸၢႆႇပၼ် 5 သႅၼ်။ ၼွၵ်ႈလိူဝ် 5 သႅၼ်ၼၼ်ႉယဝ်ႉ သမ်ႉဝႃႈ ၵႃႈၼမ်ႉၼဵင်ႈၶဝ်ၼႆသေ လႆႈပၼ်ထႅင်ႈ 2 သႅၼ် ပဵၼ်ၵႂႃႇ 7 သႅၼ်။ ႁႂ်ႈသူင်ႇပၼ်ၶဝ်ၼႂ်း K-pay ၼႆဢေႃႈ”- ဝႃႈၼႆ။  

ၶၢဝ်းဝၢၼ်ႈမိူင်းယုင်ႈၼႆႉ ၵၢၼ်ႁႃၵိၼ်လဵင်ႉတွင်ႉၵူႈသႅၼ်းသႅၼ်း ယၢပ်ႇၽိုတ်ႇ၊ တႃႇတေတေႃႉတၢင်ႇၵုၼ်ႇ တၢင်းမိူင်းမၢၼ်ႈလႄႈ မိူင်းၶႄႇ ၸိူဝ်းၼၼ်ႉ မႃးထိုင်တီႈၸႄႈဝဵင်းၼမ်ႉၶမ်းၵေႃႈ ဢမ်ႇငၢႆႈ။ ၵူၼ်းတၢင်ႇၵုၼ်ႇ ၺႃးသိုၵ်းၸုမ်းၼိုင်ႈယဝ်ႉၸုမ်းၼိုင်ႈ ပႂ်ႉၵဵပ်းၶွၼ်ႇ။

မိူဝ်ႈတိုၵ်ႉတေႃႉၵုၼ်ႇမႃးပွတ်းတၢင်းၵေႃႈ လႆႈသဵင်ႈငိုၼ်းတီႈၼိုင်ႈယဝ်ႉတီႈၼိုင်ႈ၊ မႃးထိုင်ၼႂ်းဝဵင်းၼမ်ႉၶမ်း ယဝ်ႉၵေႃႈ သမ်ႉလႆႈပၼ်ၶွၼ်ႇထႅင်ႈလိူဝ်ႁႅင်း။ ႁဵတ်းႁႂ်ႈၵူၼ်းမိူင်း သုၵ်ႉၸႂ် ထိုင်တီႈၶႂ်ႈယွမ်းၵၢၼ်ႉ၊ ဢမ်ႇမီးၸႂ် ၶႂ်ႈပိုတ်ႇႁၢၼ်ႉပိုတ်ႇသႅင်ႇသင်။ မၢင်ၸိူဝ်းသမ်ႉ ပေႃးပိၵ်ႉဢိုတ်းႁၢၼ်ႉၵႂႃႇၵေႃႈမီး၊ ၸိူဝ်းပွင်ပဵၼ်လႆႈၼၼ်ႉ ပၢႆႈၵႂႃႇယူႇသဝ်းတၢင်ႇတီႈတၢင်ႇဝဵင်းသေတႃႉ ၸိူဝ်းဢမ်ႇပွင်ပဵၼ်လႆႈ ဢမ်ႇၶႂ်ႈပၢႆႈဝၢၼ်ႈၵိူတ်ႇမိူင်းၼွၼ်းၵေႃႈ လႆႈသိုပ်ႇႁပ်ႉၽွၼ်းယွၼ်ႈၸဝ်ႈဢႃႇၼႃႇသိုၵ်း ယူႇဢမ်ႇထၢတ်ႇဢမ်ႇဝၢႆး – ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈ ၼႄဝႆႉၼင်ႇၼႆ –

“ၵဵပ်းၶွၼ်ႇၵေႃႈ ၵႃႈႁႅင်းၼႃႇ၊ ဢၼ်ၶဝ်ႁဵတ်းၼႆႉ မၼ်းဢမ်ႇၸႂ်ႈလၢႆးၽွင်းငမ်းဢၼ်မီးပၵ်းမီးပိူင် မၼ်းပဵၼ်လၢႆးၵူၼ်းထိူၼ်ႇပႅတ်ႈယဝ်ႉ။ မၼ်းဢမ်ႇမိူၼ်သိုၵ်းဢၼ်တေယူႇ ၼႂ်းဝဵင်းသေၵုမ်းဝၢၼ်ႈမိူင်း မၼ်းမိူၼ်သိုၵ်းယူႇၼႂ်းထိူၼ်ႇသေ မႃးၵုမ်းၼႂ်းဝဵင်းဝႆႉဢေႃႈ”။

တႃႇသႂ်ႇၶွၼ်ႇၼၼ်ႉ သိုၵ်းတဢၢင်းသင်ႇႁႂ်ႈၵူၼ်းမိူင်းၵႂႃႇၸၢႆႇပၼ် တီႈလုမ်းၵဵပ်းသဵၼ်ႈမၢႆတီႈလိၼ် (မြေစာရင်းရုံး) ၸႄႈဝဵင်းၼမ်ႉၶမ်း။

မိူဝ်ႈလိူၼ်ဢေႃႊၵတ်ႊသ် ပူၼ်ႉမႃးၼႆႉၵေႃႈ ၾၢႆႇၽွင်းငမ်းသိုၵ်းတဢၢင်း လူင်းၵဵပ်းၵႃႈၾႆးၾႃႉ လူၺ်ႈဢမ်ႇၸွမ်းပိူင်ဢၼ်တမ်းဝႆႉ၊ ၸႂ်ႉၾႆးၾႃႉ ၼိုင်ႈယူႇၼိတ်ႉလႂ် တေလႆႈၸၢႆႇၵႃႈမၼ်းၵႃႈႁိုဝ်ၼႆ တမ်းဝႆႉယူႇသေတႃႉ သမ်ႉၵဵပ်းလိူဝ်သေ ဢၼ်တမ်းဝႆႉ။ ၼၼ်ႉၵေႃႈ ၵူၼ်းမိူင်းဢွၼ်ၵၼ်ၵိၼ်းၸႂ်ဝႆႉပိူင်ၼိုင်ႈၼႆ ၵူၼ်းပိုၼ်ႉတီႈလၢတ်ႈ။

လိူဝ်ၼၼ်ႉ မိူၼ်ၼင်ႇ ၶွၼ်ႇၵႃး ၸိူဝ်းၼႆႉၵေႃႈ သိုၵ်းတဢၢင်း တမ်းၵႃႈၶၼ်မၼ်းသေၵဵပ်း။ ဢိင်ၼိူဝ် ၵႃးလမ်းလဵၵ်ႉလမ်းယႂ်ႇသေ လႆႈပၼ် 2 သႅၼ်ထိုင် 5 သႅၼ်ပျႃး။ တမ်းဝႆႉၸိူင်ႉၼၼ်သေတႃႉ ၵူၼ်းၸိူဝ်းလႆႈ ပၼ်လိူဝ်ၼၼ်ႉၵေႃႈမီး ဝႃႈၼႆ။

ဢိင်ၼိူဝ် လွင်ႈသိုၵ်းတဢၢင်းၵဵပ်းၶွၼ်ႇၸိူဝ်းၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇထၢမ်ၸူးတီႈလုမ်း ၵဵပ်းၶွၼ်ႇဢၼ်ယူႇတႂ်ႈသိုၵ်းတဢၢင်းၼၼ်ႉၵေႃႈ ဢမ်ႇႁပ်ႉတွပ်ႇသင်ပၼ်။

ၵူၼ်းပိုၼ်ႉတီႈလၢတ်ႈဝႃႈ -“သိုၵ်းတဢၢင်း တီႈၼမ်ႉၶမ်းၼႆႉ ပႂ်ႉၸွမ်းၼႂ်းဝၢၼ်ႈၼႂ်းဝဵင်းသေ ႁၢမ်ႈပႃး ၵူၼ်းမိူင်းၵပ်းသိုပ်ႇတေႃႇ ၸုမ်းၼၼ်ႉၸုမ်းၼႆႉသေဢမ်ႇၵႃး ဢမ်ႇႁႂ်ႈၵူၼ်း ၶွၼ်ႈတုမ်ၵၼ်ၼမ်၊ သင်ဝႃႈ မီးလွင်ႈၵပ်းသိုပ်ႇၵၼ်တၢင်း တၢင်ႇမူႇတၢင်ႇၸုမ်း ဢၼ်ဢမ်ႇၸႂ်ႈၸုမ်းသိုၵ်းတဢၢင်းၼႆၸိုင် တေပၼ်တၢမ်ႇလူးၵွၼ်ႇ”- ဝႃႈၼႆ။

ဝဵင်းၼမ်ႉၶမ်းၼႆႉ လွတ်ႈတႂ်ႈမိုဝ်းၸဝ်ႈဢႃႇၼႃႇသိုၵ်းမၢၼ်ႈယဝ်ႉသေ  သိုၵ်းၸၢဝ်းၶိူဝ်းၵုမ်းဝႆႉယဝ်ႉဝႃႈၼႆသေတႃႉ ၵူၼ်းမိူင်းသမ်ႉ ပႆႇလွတ်ႈတၢင်းမႆႈၸႂ် တေႃႇထိုင်ယၢမ်းလဵဝ် တိုၵ်ႉ ၵႂႃႇပိူင်သိုၵ်းမၢၼ်ႈၽွင်းငမ်းယူႇ ၵူၼ်းမိူင်းၼမ်ႉၶမ်းလၢတ်ႈၼင်ႇၼႆ။ ၾၢႆႇၼိုင်ႈၵေႃႈ သိုၵ်းမၢၼ်ႈ ၸႂ်ႉလၢႆးၵျၢမ်းသေ ၶိုၼ်းတိုၵ်းဢဝ်ၶိုၼ်း ဝဵင်းဢၼ်သိုၵ်းၸၢဝ်းၶိူဝ်းၵုမ်းလႆႈဝႆႉ။ မိူၼ် ၼင်ႇ ပွတ်းတၢင်းၼွင်ၶဵဝ်၊ ၵျွၵ်ႉမႄး၊ သီႇပေႃႉလႄႈ မိူင်းၵုတ်ႈ ၸိူဝ်းၼႆႉလႄႈ ၵူၼ်းၼမ်ႉၶမ်းၵေႃႈ ၵူဝ်ပဵၼ်ပၢင်တိုၵ်းယႂ်ႇလူင်ထႅင်ႈသေ ၵူဝ်သိုၵ်းမၢၼ်ႈဢဝ်မၢၵ်ႇလူင် မႃးပွႆႇသႂ်ႇ ဝႃႈ ၼႆ။

ၸူးၸႂ်ၵူၼ်းမိူင်းတႄႉ ၶႂ်ႈၸဵဝ်းပူၼ်ႉလွတ်ႈတႂ်ႈသိုၵ်းသိူဝ်ၸိူဝ်းၼႆႉဝႆးဝႆး။ ၵွပ်ႈဝႃႈ ပဵၼ်ၽွင်းသိုၵ်းၼင်ႇၵၼ် ႁိမ်ၵၼ်ၽွင်းငမ်းဝႆႉလႄႈ ဢမ်ႇၸၢင်ႈႁဵတ်းႁႃၵိၼ်လဵင်ႉတွင်ႉထၢင်ႇႁၢင်ႈ။ ယွၼ်ႉသိုၵ်းလၢႆပႃႈလၢႆၾၢႆႇ ၵမ်ၵိၼ်းတေႃႇၵၼ်ဝႆႉလႄႈ ၵူၼ်းမိူင်းႁၢမ်းသုၼ်ႇလၢႆၸိူဝ်ႉလၢႆပိူင်။ ပၢႆးပၺ်ႇၺႃႇလုၵ်ႈဢွၼ်ႇၵေႃႈ ဢမ်ႇလႆႈတမ်းၸႂ်။ ၵူၼ်းမိူင်းလုတ်ႈႁၢမ်း တိုဝ်ႉတၢင်းလီ တႃႇသၢင်ႈၽဝၸူဝ်ႈပၢၼ်ၸဝ်ႈၵဝ်ႇၶိုၼ်ႈယႂ်ႇ – ပေႃးပဵၼ်ၼႆ ၵႂႃႇတိၵ်းတိၵ်းၸိုင် လီမႆႈၸႂ်တႃႇမိူဝ်းၼႃႈထႃႈပၢႆ ၵူဝ်ဢမ်ႇၸၢင်ႈၸွႆႈၵၼ်သင်သေ ပႃးၵၼ်ဢိုပ်းယၢၵ်ႈၵူၺ်းယဝ်ႉ ဝႃႈၼႆ။