ၽွင်းသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းထုင်ႉၼွင်ပိင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇပႃးလႄႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်တူၵ်းၸႂ်ၵူဝ်ႁႄ မႆႈၸႂ်လွင်ႈႁူမ်ႇလူမ်ႈ ၼႆယဝ်ႉ။

ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈတႄႇမၼ်းတႄႉ ပဵၼ်တၢင်းၼွင်ၶဵဝ်ၵူၺ်း။ တိုၵ်ႉယူႇငၢႆႈယူႇ တီႈၵျွၵ်ႉမႄးၼႆႉ ၽိူဝ်ႇၼွင်ၶဵဝ်ၵေႃႈတူၵ်းၼႂ်းမိုဝ်းမၢၼ်ႈ ၶိုၼ်းယဝ်ႉ ဢမ်ႇႁိုင်ဢမ်ႇၼၢၼ်း တေၽႅဝ်ၵျွၵ်ႉမႄးယဝ်ႉၼႆ သမ်ႉၵိုင်ႉၵၢင်ႉမႃးပဵၼ်တီႈၼွင်ပိင် ၼႆႉၵမ်းလဵဝ်။ တူၵ်းၸႂ်ႁႅင်းသေ ၸင်ႇဢွၼ်ၵၼ်ပၢႆႈၽေးၶိုၼ်းၼၼ်ႉၼႃႇ။ ဢမ်ႇထၢင်ႇသေ ပဵၼ်မႃး ၵွပ်ႈပိူဝ်ႈဢမ်ႇၸၢင်ႈၶၢတ်ႈလၢမ်းလႆႈ လွင်ႈသိုၵ်းၼႆႉ။ ၵူၼ်းၼႂ်းဝဵင်းၵျွၵ်ႉမႄးတႄႉ ပၢႆႈၵႂႃႇတၢင်းလႃႈသဵဝ်ႈ တၢင်းၼမ်ႉလၼ်ႈၼမ်။ ၵူၼ်းၼွင်ပိင်သမ်ႉ ပၢႆႈၵႂႃႇတၢင်းပုင်ႇဝူင်းၼမ် ပေႃးမႃးၼပ်ႉႁူဝ်ၵူၼ်းၼႆ တေဢမ်ႇယွမ်းၼိုင်ႈမိုၼ်ႇ”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄးၼႆႉ ၵူၼ်းမိူင်းဢွၼ်ၵၼ်ပၢႆႈဢွၵ်ႇၼမ် ပေႃးဢဝ်ပုၼ်ႈမၼ်းဝႃႈၸိုင် 4 ပုၼ်ႈ 1 ပုၼ်ႈၵူၺ်း ဢၼ်ၵိုတ်းဝႆႉၼႆႉ ဝႃႈၼႆ။

ၽွင်းၶၢဝ်းၵူၼ်းမိူင်း ဢွၼ်ၵၼ်ပၢႆႈၽေးသိုၵ်းယူႇၼႆႉ သမ်ႉပဵၼ်ၶၢဝ်းလူဝ်ႇၽုၵ်ႇသွမ်ႈ မၢၵ်ႇၶဝ်ႈတဝ်ႈၼမ်ႉ ၼႂ်းသူၼ်ၼႂ်းၼႃး။ ယွၼ်ႉလႆႈၵိုင်ႉၵၢင်ႉပၢႆႈၽေးလႄႈ ယၢမ်းလဵဝ် ထူပ်းတၢင်းယၢပ်ႇၽိုတ်ႇဝႆႉ လွင်ႈၶဝ်ႈၼမ်ႉတၢင်းၵိၼ်။

“ဢၼ်ယၢပ်ႇမၼ်းတႄႉ တေပဵၼ်လွင်ႈၵိၼ်ယႅမ်ႉၶႃႈယဝ်ႉ။ ယွၼ်ႉပဵၼ်ၽွင်းႁဵတ်းႁႆႈႁဵတ်းသူၼ်လႄႈ ၸဝ်ႈႁႆႈၸဝ်ႈၼႃးၶဝ် မူတ်းငိုၼ်းၼမ်ၼႃႇ ၶၢဝ်းၼႆႉ ငိုၼ်းၵေႃႈ ၽႂ်ဢမ်ႇပေႃးမီးယဝ်ႉ။ ပဵၼ်ၽွင်းၶဝ်ႈႁႅင်ႈငိုၼ်းႁႅင်ႈယဝ်ႉ။ ၵမ်းၼႆႉသမ်ႉ ဢွၼ်ၵၼ်ပၢႆႈ ဢွၼ်ၵၼ်ယၢပ်ႇၽိုတ်ႇဢိူဝ်ႈ။ လွင်ႈၵိၼ်ယႅမ်ႉတႄႉ ပေႃးၵူၼ်းမီးၸိုင် သိုဝ်ႉၵိၼ်လႆႈသေတႃႉ ပေႃးဢမ်ႇမီးတႄႉ ယၢပ်ႇႁႅင်းၼႃႇ။ မၢင်တီႈမီးငိုၼ်းယူႇၵေႃႈ ဢမ်ႇၸၢင်ႈသိုဝ်ႉၵိၼ်ၵေႃႈမီး။ ပေႃးၽႅဝ်ၼႂ်းဝၢၼ်ႈ ၼႂ်းၸွၵ်ႉၼႂ်းၸဵင်ႇတႄႉ မၼ်းဢမ်ႇမီးလၢၼ်ႉၶၢႆ ပဵၼ်ဢၼ်ယၢပ်ႇဢေႃႈ”- ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။

ယွၼ်ႉပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင် ဢၼ်ပဵၼ်တီႈမိူင်းတႆးပွတ်းႁွင်ႇၼၼ်ႉ ႁဵတ်းႁႂ်ႈႁိူၼ်းယေးၵူၼ်းမိူင်းၼႂ်းၸႄႈဝဵင်းၵျွၵ်ႉမႄး ၺႃးၸၢၵ်ႇမၢၵ်ႇ လူႉၵွႆတင်း ၼမ်။ တေႃႇထိုင်ဝၼ်းမိူဝ်ႈၼႆႉ မီးၶၢဝ်းတၢင်း 2 ပီယဝ်ႉ ယင်းပႆႇၸၢင်ႈမႄးၵုမ်းလုမ်းလႃးၶိုၼ်း၊ ယၢမ်းလဵဝ်သမ်ႉ လႆႈသိုပ်ႇပၢႆႈၽေးထႅင်ႈလႄႈ ပဵၼ်လွင်ႈယၢပ်ႇၽိုတ်ႇဝႆႉတင်းၼမ် ၼႆယဝ်ႉ။

“ၵမ်ႈၼမ် ႁိူၼ်းယေး ဢၼ်လူႉၵွႆၵႂႃႇ ၸဵမ်မိူဝ်ႈပီ 2023 ဢၼ်ပဵၼ်ပၢင်တိုၵ်းၼၼ်ႉ တေႃႇထိုင်မိူဝ်ႈလဵဝ် ႁဝ်းယင်းပႆႇလႆႈမႄးၶႃႈ။ တေမႄးၶိုၼ်းၵေႃႈ ၵႃႈၶၼ်ၶူဝ်းၵုၼ်ႇၵႃႈၼႃႇ ၵူၼ်းမႄးမၼ်းၵေႃႈ ႁႃယၢပ်ႇ။ ႁိူၼ်းယေး ဢၼ်လႆႈလူႉၵွႆၵႂႃႇၼၼ်ႉ ၵမ်ႈၼမ်တေၺႃးၸၢၵ်ႇမၢၵ်ႇမေႃႇထႃႇ သဵၼ်သႂ်ႇႁဵၵ်ႇမၼ်း ၽႃမၼ်း ၸိူဝ်းၼႆႉ။ ဢၼ်ႁဝ်းၶႃႈႁူႉတႄႉ ႁိူၼ်းယေး ဢၼ်လႆႈလူႉၵွႆသေ မႄးၶိုၼ်းၼႆႉပႆႇမီးၽႂ်ၶႃႈ ပေႃးဢဝ် % မၼ်းဝႃႈၸိုင် တိုၵ်ႉမီးသုၼ် % ၵူၺ်း”- ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။

ဢၼ်ၵူၼ်းမိူင်းဢွၼ်ၵၼ်ပၢႆႈၽေးပွၵ်ႈၼႆႉ ပဵၼ်ယွၼ်ႉသိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇၼႂ်းၸႄႈဝဵင်းၵျွၵ်ႉမႄး ၶိူဝ်းယႂ်း မိူဝ်ႈၽွင်းႁၢင်လိူၼ်ဢေႃႊၵတ်ႊသ် ပီ 2025 ၼႆႉ။ ပေႃးမႃးတူၺ်းၵူၼ်းမိူင်း ဢၼ်လႆႈပၢႆႈၽေးဝႆႉ ဢမ်ႇယွမ်း 20 ဝၢၼ်ႈ၊ ႁူဝ်ၼပ်ႉၵူၼ်းသမ်ႉ မီးမိုၼ်ႇပၢႆ။ တေႃႇထိုင်ဝၼ်းမိူဝ်းၼႆႉ ပႆႇၸၢင်ႈပွၵ်ႈၶိုၼ်း ယွၼ်ႉၾၢႆႇသိုၵ်းမၢၼ်ႈ တိုၵ်းၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇယူႇ ဝႃႈၼႆ။