တႄႇႁူဝ်လိူၼ် သႅပ်ႊထႅမ်ႊပိူဝ်ႊ ၼႆႉမႃးသိုၵ်းမၢၼ်ႈ တင်းသိုၵ်းတဢၢင်း TNLA  သိုပ်ႇပဵၼ်ပၢင်တိုၵ်းႁၢဝ်ႈႁႅင်း ၼႂ်းဝၢၼ်ႈၼွင်ပႅတ်း ထုင်ႉၼွင်ပိင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းဝၢၼ်ႈႁိမ်းႁွမ်းပၢင်တိုၵ်းၼၼ်ႉၵိုတ်းၶမ်ဝႆႉ ၼႂ်းဝၢၼ်ႈဢမ်ႇၸၢင်ႈၵႂႃႇၸူးၵၼ်တႃႇၸွႆႈထႅမ်ၶဝ်ႈၼမ်ႉတၢင်းၵိၼ် ။

ၼၢင်းယိင်း ၵူၼ်းထုင်ႉၼွင်ပိင် ဢၼ်ပၢႆႈၽေးသိုၵ်းဝႆႉလၢတ်ႈၽူႈတွႆႇႁွၵ်ႈဝႃႈ-“သိုၵ်းတဢၢင်း ယူႇၾၢႆႇၼိုင်ႈ သိုၵ်းမၢၼ်ႈယူႇၾၢႆႇၼိုင်ႈသေ ယိုတ်းၵၼ်ၼႂ်းဝၢၼ်ႈၼွင်ပဵတ်း ပၢင်တိုၵ်းပဵၼ်ႁၢဝ်ႈႁႅင်းဝႆႉ ၊ ၵူၼ်းဢၼ်ဢမ်ႇပၢႆႈဢွၵ်ႇလႆႈၶမ်ဝႆႉၼႂ်းဝၢၼ်ႈ ၊ ႁိမ်းဝၢၼ်ႈၸိူဝ်းၼၼ်ႉၵေႃႈ ထိုင်တလဵဝ် ဢမ်ႇၸၢင်ႈဢွၵ်ႇ လူဝ်ႇတင်းၸွႆႈထႅမ်ၶဝ်ႈၼမ်ႉတင်းၵိၼ် ဝႆႉႁၢဝ်ႈႁႅင်း”- ဝႃႈၼႆ ။

လိူဝ်ၼၼ်ႉ ၼႂ်းဝၼ်တီႈ 5/9/2025 သိုၵ်းမၢၼ်ႈတင်းသိုၵ်းတဢၢင်းပဵၼ်ပၢင်တိုၵ်းဢၼ် သွင်ၾၢႆႇ ဢဝ်ၶိူင်ႈၵွင်ႈလူင် ယိုဝ်းလႄႈႁဵတ်းႁႂ်ႈ ဝတ်ႉဝႃးၽႃႇသိူဝ်လႄႈ ႁိူၼ်းယေး ၵူၼ်းဝၢၼ်ႈၵွင်းမူးလႅင် လူႉၵွႆတင်းၼမ် – ၵူၼ်းပိုၼ်ႉတီႈလၢတ်ႈၼင်ႇၼႆ ။

ၼၢင်းယိင်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ – “ တီႈၼႂ်းထုင်ႉၼွင်ပိင် 16 ဝၢၼ်ႈၼႆႉပၢင်တိုၵ်း ႁၢဝ်ႉႁႅင်းဝႆႉ ။ မၢင်ၸိူဝ်းၵိုတ်းၶမ်ဝႆႉၼႂ်းဝၢၼ်ႈ ဢမ်ႇၸၢင်ႈဢွၵ်ႇ ၼႂ်းၵႄႈပၢင်တိုၵ်း  ၶဝ်ႈၵေႃႈဢမ်ႇမီးတႃႇၵိၼ်ယဝ်ႉ ၊ သိုၵ်းမၢၼ်ႈသမ်ႉဢမ်ႇပၼ်ၶဝ်ႈဢွၵ်ႇၼႂ်းဝၢၼ်ႈ ၊ ၽႂ်ၵေႃႈ ဢမ်ႇႁတ်းၵႂႃႇၸွႆႈ”-ဝႃႈၼႆ ။

ၵူၼ်းဝၢၼ်ႈဢၼ်ဢမ်ႇၸၢင်ႈပၢႆႈၽေးသိုၵ်းၼၼ်ႉ ဢၼ်ၵိုတ်းၶမ်ဝႆႉၼႂ်းၵႄႈပၢင်တိုၵ်းၼၼ်ႉ ပဵၼ်ၵူၼ်းဝၢၼ်ႈ ဝၢၼ်ႈၵျွင်းၵုင်း ႁူဝ်ၼပ်ႉၵူၼ်းမီး 137 ၵေႃႉ ဝၢၼ်ႈထၢၼ်းတပၢင်ႇၵေႃႈ ၾၢႆႇတင်းသိုၵ်းမၢၼ်ႈႁၢမ်ႈၵူၼ်းၶဝ်ႈဢွၵ်ႇသေ ယၢမ်းလဵဝ် ၵူတ်ႇထတ်း ႁၢဝ်ႈႁႅင်း ႁဵတ်းႁႂ်ႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈဝႃႈၼႆ ။

ၵူၼ်းဝၢၼ်ႈ ဢၼ်လႆႈပၢႆႈတင်းဝၢၼ်ႈၼႆႉၼႂ်းထုင်ႉၼွင်ပိင်ၼႆႉ  မီး16 ဝၢၼ်ႈပၢႆ ၊ ၼႂ်းၼၼ်ႉတေပဵၼ်ဝၢၼ်ႈ ၼွင်ပိင် ၼႂ်းၼွင်ပိင်ၼႆႉ ၵူၺ်း ႁူဝ်ၵူၼ်းမီးၸမ် 2000  ။ မိူၼ်ၼင်ႇ ဝၢၼ်ႈတၢင်းၽႄ ၊ ပၢင်ႇတီး ၊ ပၢင်မၢၵ်ႇၶေႃ ၊ ၼွင်ပႅတ်း ၊ ၵွင်းလၢင်း ၊ ၵွင်းမူးလႅင် ၊ ၼမ်ႉၸေႃႉ ၊ မၢၼ်ႈပၢင် ၊ လုၵ်းပႃ ၸိူဝ်းၼႆႉ ၼႆယဝ်ႉ ။

ၵူၼ်းပၢႆႈၽေးသိုၵ်းၵမ်ႈၼမ် ပၢႆႈၵႂႃႇယူႇၸွမ်းဝၢၼ်ႈပုင်ႇဝူဝ်း ၊ လွႆၵူင် ၊ ၼမ်ႉႁၢင်ႈၶိူင်ႈ ၊ ၶမ်းသႃႇ ၊ ဝၢင်းမႃႉ ၊ မၢင်ၸိူဝ်း လႆႈပၢႆႈယဝ်ႉပၢႆႈထႅင်ႈထိုင် 2 -3 ဝၢၼ်ႈယဝ်ႉ ၊ မၢင်ၸိူဝ်း ဢမ်ႇပၢႆႈယူႇၸွမ်းဝၢၼ်ႈပၢႆႈယူႇဝႆႉၼႂ်းႁူၺ်ႈၼႂ်းလွႆ ၸိူဝ်းၼႆႉ – ၵူၼ်းပၢႆႈၽေးသိုၵ်းလၢတ်ႈ ။

လိူဝ်ၼၼ်ႉ သိုၵ်းမၢၼ်ႈ ဢဝ်ၵႃး ၵူၼ်းဝၢၼ်ႈဢၼ်ၵိုတ်းၶမ်ဝႆႉၼႂ်းၵႄႈပၢင်တိုၵ်း တီႈထုင်ႉၼွင်ပိင်ၸိူဝ်းၼၼ်ႉသေ ၵႂႃႇတေႃႉၵူၼ်းသိုၵ်းၶဝ်ဢၼ်မၢတ်ႇၸဵပ်းဝႆႉၼႂ်းၵႄႈပၢင်တိုၵ်းၼၼ်ႉထႅင်ႈ  ။

ယၢမ်းလဵဝ် သိုၵ်းတဢၢင်း ပိၵ်ႉဢိုတ်းဝႆႉ တၢင်းၶဝ်ႈတၢင်းဢွၵ်ႇ ဝၢၼ်ႈသၶၢၼ်းတႃႇသေ ၵူၼ်းမိူင်း ၸိူဝ်းယူႇၼိူဝ်သဵၼ်ႈတၢင်းလူင် လႆႈငိူင်ႉပၢႆႈၽေးသိုၵ်း ယွၼ်ႉသွင်ၾၢႆႇဢဝ်ၵွင်ႈလူင် ပိုတ်းယိုဝ်းၵၼ် ဝႃႈၼႆ ။