ၵူၼ်းမိူင်းၸိူဝ်းလုၵ်ႉတၢင်း ဝဵင်းၼွင်ၶဵဝ်၊ ၼွင်ပိင်၊ ၵျွၵ်ႉမႄးသေ ပၢႆႈၽေးပၢင်တိုၵ်းၵႂႃႇသွၼ်ႈယူႇဝႆႉ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ လူဝ်ႇတၢင်းၵမ်ႉၸွႆႈႁၢဝ်ႈႁႅင်း ၼႆယဝ်ႉ။
ယၢမ်းလဵဝ် ၵူၼ်းမိူင်း လဵၵ်ႉၼုမ်ႇထဝ်ႈယိင်းၸၢႆး တႃႇ 2000 ၵေႃႉပၢႆ ယၢပ်ႇၽိုတ်ႇတႃႇ ၶဝ်ႈၼမ်ႉတၢင်းၵိၼ်ႁၢဝ်ႈႁႅင်းယူႇ ၼႂ်းၸႄႈဝဵင်း သီႇပေႃႉၼႆ ၸုမ်းၾၢႆႇၸွႆႈထႅမ်ၵူၼ်းပၢႆႈၽေးပၢင်တိုၵ်း လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“လမ်ႇလွင်ႈသုတ်းတႄႉ ပဵၼ်ၶဝ်ႈၼမ်ႉတၢင်းၵိၼ်ဢေႃႈ။ ၵူၼ်းၸိူဝ်းၵမ်ႉၸွႆႈမႃး တိုၵ်ႉဢေႇႁႅင်းၼႃႇလႄႈ ၵိၼ်းၸႂ်ဝႆႉဢေႃႈ။ တႃႇၼၢင်းယိင်းၵေႃႈ လူဝ်ႇၶူဝ်းၼုင်ႈတၢင်းၼႂ်း မိူၼ်ၼင်ႇ ၵူၼ်ပွတ်း၊ ၽႃႈဢွမ်ႈႁူဝ်လိူၼ်ၸိူဝ်းၼႆႉ ယၢပ်ႇၽိုတ်ႇႁႅင်းၼႃႇၶႃႈ။ မိူဝ်ႈလဵဝ် ၵူၼ်းၸိူဝ်းပၢႆႈၽေးပၢင်တိုၵ်းမႃး ၼမ်ႁႅင်းပူၼ်ႉ ဢၼ်ၸုမ်းႁဝ်းၶႃႈ ႁပ်ႉၸွႆႈလႆႈၼၼ်ႉယဝ်ႉၶႃႈ။ ၾၢႆႇႁဝ်းၵေႃႈ ႁႃၵပ်းသိုပ်ႇၽူႈမီးၼမ်ႉၸႂ်လီၶဝ်သေ ယွၼ်းတၢင်းၸွႆႈထႅမ်ယူႇ။ ၵူၺ်းၵႃႈ မၼ်းဢမ်ႇပႆႇၵုမ်ႇၵၼ်၊ ပႆႇၸွႆႈၵၼ်လႆႈႁႂ်ႈၸေးၵေႃႉမၼ်း။ ယွၼ်ႉၼၼ် ၶႂ်ႈတုၵ်းယွၼ်းႁႂ်ႈၵူႈၵေႃႉ ႁူမ်ႈမိုဝ်းၵၼ်ၸွႆႈထႅမ်ၵူၼ်းပၢႆႈၽေးၽွင်ႈၼႆဢေႃႈ။”
တႄႇလိူၼ်ၵျူႊလၢႆႊမႃႉ သိုၵ်းမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၼွင်ၶဵဝ်၊ ၸႄႈဝဵင်းၵျွၵ်ႉမႄး ၸွမ်းထုင်ႉၼွင်ပိင်ႁၢဝ်ႈႁႅင်းသေ ၵူၼ်းမိူင်းၼႂ်းၸႄႈဝဵင်းၼွင်ၶဵဝ်၊ ၵျွၵ်ႉမႄး၊ ထုင်ႉၼွင်ပိင် လႄႈ ဝဵင်းသီႇပေႃႉ ဢမ်ႇလႆႈယူႇသႃႇလူမ်ၸႂ်မႃး ႁၢၼ်ႉတေႃႇထိုင်ယၢမ်းလဵဝ်။ ၵူၼ်းမိူင်းၼပ်ႉႁူဝ်မိုၼ်ႇၵေႃႉ လႆႈၸုၼ်ႉပွႆႇႁိူၼ်းယေး ၶူဝ်းၶွင်သူၼ်ႁႆႈၼႃးသေ ပၢႆႈဢွၵ်ႇဝၢၼ်ႈၵႂႃႇသွၼ်ႈယူႇဝႆႉ ၸွမ်းဢွင်ႈတီႈလွတ်ႈၽေးပၢင်တိုၵ်း၊ မၢၵ်ႇလူင်၊ ၶိူင်ႈတရူၼ်ႊၸဵမ်ၸိူဝ်းၼႆႉယူႇ။
တႅမ်ႈ- မူၺ်ၶမ်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ