ၵၢင်ႉၵႄႇတႂ်ႈသိုၵ်းမၢၼ်ႈ တဵၵ်းၸႂ်ႉ ၵူၼ်းပၢႆႈၽေးသိုၵ်းဝဵင်းလွႆၶေႃ ဢၼ်မႃးသွၼ်ႈယူႇဝႆႉတီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ သႂ်ႇငိုၼ်းတႃႇၵမ်ႉထႅမ်ၵူၼ်းၾိုၵ်းၵၢၼ်သိုၵ်း ႁၢပ်ႇၵၢၼ်သိုၵ်းၵူႈလိူၼ် ဝႃႈၼႆ ။
ၵူၼ်းပၢႆႈၽေးသိုၵ်းဢၼ်မႃးသွၼ်ႈယူႇဝႆႉၼႂ်းပွၵ်ႉၸဝ်ႈၸၢမ်ႇထုၼ်း ၶဵတ်ႇ 16 ဝဵင်းတူၼ်ႈတီးၼၼ်ႉ လႆႈသႂ်ႇငိုၼ်းတႃႇႁၢပ်ႇၵၢၼ်သိုၵ်း ၼိုင်ႈလိူၼ်လႂ် 2 မိုၼ်ႇထိုင် 3 မိုၼ်ႇ ပျုးၵူႈလိူၼ် ၊ ငိူင်ႉဝႄႈဢမ်ႇလႆႈ ပေႃးဢမ်ႇသႂ်ႇ ၵၢင်ႉၵႄႇလွၵ်ႇငိုတ်ႈဝႃႈ တေႁဵတ်းႁႂ်ႈဢမ်ႇၸၢင်ႈယူႇၼႂ်းပွၵ်ႉ တေၸႂ်ႉပွၵ်ႈမိူဝ်းယူႇၶိုၼ်းဝၢၼ်ႈၵဝ်ႇမိူင်းၼွၼ်း ဝႃႈၼႆ။
ၼၢင်းယိင်းၵူၼ်းပၢႆႈၽေးသိုၵ်းမႃးသွၼ်ႈယူႇဝႆႉတီႈဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ၼိုင်ႈဝူင်ႈၼႆႉ မႃးၵဵပ်းမဵဝ်း႞ယဝ်ႉမဵဝ်း႞ ၊ လႆႈပၼ်ပႃးတႃႇႁၢပ်ႇၵၢၼ်သိုၵ်း ၵူႈလိူၼ်၊ သဵၼ်ႈမၢႆႁူဝ်ႁိူၼ်း ဢမ်ႇမီးတီႈ ဝဵင်းတူၼ်ႈတီးၼႆႉ ၼႆၵေႃႈလၢတ်ႈဢမ်ႇလႆႈ။ တဵၵ်းၸႂ်ႉသႂ်ႇငိုၼ်းယူႇတိၵ်းတိၵ်း၊ ပေႃးဢမ်ႇသႂ်ႇငိုၼ်း ပၼ်ၼင်ႇၶဝ်လၢတ်ႈၼၼ်ႉၼႆ ၶဝ်ဝႃႈ တေဢမ်ႇပၼ်ယူႇတီႈတူၼ်ႈတီး တေၸႂ်ႉပွၵ်ႈႁိူၼ်းၶိုၼ်းၼႆဝႃႇ ။ ပဵၼ်ၶေႃႈၸီႉသင်ႇတၢင်းၼိူဝ်လႄႈ ၶႂ်ႈၵႂႃႇတိူင်ႇလႂ်တိူင်ႇၶဝ်ဢမ်ႇၵူဝ်ၼႆ။ ပေႃးတေႁဵတ်းႁႂ်ႈႁဝ်း ဢမ်ႇယူႇလႆႈ ၼႆတႄႉႁဝ်းၵေႃႈၵူဝ်ၼင်ႇၵဝ်ႇၶႃႈဢိူဝ်ႈၼေႃႈ” – ဝႃႈၼႆ။
ၵူၼ်းပၢႆႈၽေးသိုၵ်းဢၼ်မႃးသွၼ်ႈယူႇဝႆႉဝဵင်းတူၼ်ႈတီႈၼႆႉ လႆႈပၼ်တႃႇႁၢပ်ႇၵၢၼ်သိုၵ်း မီးမႃး 5-6 ပွၵ်ႈယဝ်ႉ ။ ယၢမ်းလဵဝ် တီႈဝဵင်းတူၼ်ႈတီး ၵၢင်ႉၵႄႇၼႂ်းပွၵ်ႉ ၸႂ်ႉၵူၼ်းပၢႆႈၽေးသိုၵ်း တၢင်ႇသဵၼ်ႈမၢႆၶႅၵ်ႇ ၼိုင်ႈဝူင်ႈၼိုင်ႈပွၵ်ႈ ၊ ၼိုင်ႈပွၵ်ႈၼႆႉ ၼိုင်ႈၵေႃႉ လႆႈပၼ် 3 ႁဵင်ပျုး – လႆႈႁူႉၼင်ႇၼႆ ။
လိူဝ်ၼၼ်ႉ ၵူတ်ႇထတ်းသဵၼ်ႈမၢႆ ၶႅၵ်ႇၵူႈဝၼ်းသေ ပေႃးၸဝ်ႈႁိူၼ်း ဢမ်ႇတၢင်ႇ သဵၼ်ႈမၢႆ ၶႅၵ်ႇဝႆႉၼႆၸိုင် ၽူႈၵွၼ်းၸႄႈတွၼ်ႈ တင်း ၽူႈၵွၼ်း ပိဝ်ႇႁႃႇ တေတီႉၺွပ်း မႂ်ငိုၼ်း 3 မိုၼ်ႇထိုင် 7 မိုၼ်ႇ ပျႃးယဝ်ႉ ၸင်ႇတေပွႆႇပၼ်ၶိုၼ်းၼႆ ၵၢင်ႉၵႄႇလၢတ်ႈၼႄၼင်ႇၼႆ ။
ၼၢင်းယိင်းၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ ယူႇတီႈတူၼ်ႈတီးၼႆႉၵေႃႈယၢပ်ႇၸႂ်ၵူႈမဵဝ်း ၊ ၵူၼ်းပၢႆႈၽေးသိုၵ်းမၢင်ၸိူဝ်း ဢမ်ႇပၼ်လႆႈၵႃႈၶၢတ်ႈႁိူၼ်းလႄႈ လႆႈပွၵ်ႈမိူဝ်းၶိုၼ်းၵေႃႈမီး ၊ မၢင်ၸိူဝ်းဢမ်ႇမီးတီႈယူႇ လႆႈၼွၼ်းတႂ်ႈၵႃးၸိူဝ်းၼႆႉဢေႃႈ ။ လိူဝ်ၼၼ်ႉၼိုင်ႈဝူင်ႈၼိုင်ႈပွၵ်ႈ ၸႂ်ႉတၢင်ႇသဵၼ်ႈမၢႆၶႅၵ်ႇ ၊ ၼိုင်ႈၵေႃႉ 3 ႁဵင် ၊ မီး 7 ၵေႃႉၵေႃႈ 21,000 ယဝ်ႉၶႃႈလူး ၵၢၼ်ၵေႃႈဢမ်ႇမီး ယွၼ်းတၢင်ႇၼိုင်ႈလိူၼ်ၼိုင်ႈပွၵ်ႈၵေႃႈဢမ်ႇလႆႈၶႃႈ ”- ဝႃႈၼႆ ။
ၵူၼ်းပၢႆႈၽေးသိုၵ်းတီႈဝဵင်းလွႆၶေႃ ဢၼ်ၶဝ်ႈမႃးသွၼ်ႈယူႇၸွမ်းဝဵင်းတူၼ်ႈတီးၸိူဝ်းၼၼ်ႉ ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ ၊ လႆႈပၼ်ၵႃႈၶၢတ်ႈႁိူၼ်းၼမ်လႄႈ ၊ ဢွၼ်ၵၼ်ပွၵ်ႈမိူဝ်းႁိူၼ်းၶိုၼ်းၽႂ်မၼ်းၵမ်ႈၼမ်ယဝ်ႉၼႆ – ၵူၼ်းပၢႆႈၽေးသိုၵ်းဢၼ်ၵိုတ်းဝႆႉတီႈဝဵင်းတူၼ်ႈတီးဢွၼ်ၵၼ်လၢတ်ႈၼင်ႇၼႆ ။
တီႈဝဵင်းတူၼ်ႈတီးၼႆႉ ၼႂ်းပီ 2023 ၼႆႉ ပေႃးပဵၼ် ႁိူၼ်းၸၼ်ႉလဵဝ် ၵႃႈၶၢတ်ႈႁိူၼ်းၼိုင်ႈလိူၼ် 2 သႅၼ် 5 မိုၼ်ႇ ၊ ၼႂ်းႁူဝ်ပီ 2025 ၼႆႉ ၶိုၼ်ႈထိုင် 8 သႅၼ် ၊ တႃႇၵူၼ်းႁဵတ်းၵိၼ်ၵၢၼ်ဝၼ်းလႂ်ဝၼ်းၼၼ်ႉ ပဵၼ်ဢၼ်ယၢပ်ႇၽိုတ်ႇ ၵိၼ်းၸႂ် ႁႅင်းလႄႈ ၵူၼ်းဢမ်ႇမီးႁိူၼ်းမီးယေး ၼမ်မႃး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ