သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းၼႆႉ ၼႄၶေႃႈဢၢင်ႈဝႃႈ တႃႇၸတ်းပၢင်လိူၵ်ႈတင်ႈ ဢၼ်မီးလွင်ႈၽဵင်ႇပဵင်းပဵၼ်ထမ်းၼႆ လၢတ်ႈၸပ်းသူပ်းၸပ်းပၢၵ်ႇမႃးဢမ်ႇထၢတ်ႇဢမ်ႇဝၢႆး။ ယိူင်းဢၢၼ်းဝႃႈ တေၸတ်းပၢင်လိူၵ်ႈတင်ႈၼႂ်းလိူၼ်ဢေႃႊၵတ်ႊသ် 2025 ၼႆ ၸဵမ်မိူဝ်ႈတႄႇယိုတ်းမိူင်းၼၼ်ႉမႃး။ ၵူၺ်းဢမ်ႇပဵၼ်ၸွမ်းၼင်ႇလၢတ်ႈဝႆႉ။ ၸင်ႇၶိုၼ်း ပိုၼ်ၽၢဝ်ႇလၢတ်ႈထႅင်ႈ ၼႂ်းလိူၼ်ဢေႃႊၵတ်ႊသ် 2025 ၼႆႉဝႃႈ တေၸတ်းပၢင်လိူၵ်ႈတင်ႈ ၼႂ်းဝၼ်းတီႈ 28/12/2025 ၼႆထႅင်ႈ။
ၵူၺ်းၵႃႈ တေပဵၼ်မႃးၸိူင်ႉႁိုဝ်ထႅင်ႈၽႂ်ဢမ်ႇလၢမ်းလႆႈ၊ ၵူၼ်းမိူင်းတႄႉ ပေႃးၵဵဝ်ႇလွင်ႈၵၢၼ်ဝၢၼ်ႈၵၢၼ်မိူင်းမႃးၼႆ ဢိမ်ႇမိူဝ်ႇၼႃႇယဝ်ႉလႄႈ ဢမ်ႇႁၼ်ၽႂ်တိုၼ်ႇတဵၼ်ႈသႂ်ႇၸႂ်သင်ၸွမ်း။ တိူၵ်ႈတီႈဝႃႈ လႆႈပဵၼ်ပၢင်လိူၵ်ႈတင်ႈမႃးၵေႃႈ ၵူၼ်းမိူင်းဢမ်ႇၸၢင်ႈမုင်ႈမွင်းသင်။ တိုၵ်ႉပဵၼ်ငဝ်းလၢႆး ဢမ်ႇၽဵင်ႇပဵင်းယူႇလႄႈ ယင်းၸၢင်ႈၺႃးၵိၼ် ၸၢၵ်ႇၸွမ်းၵႄႈမၼ်းထႅင်ႈလူးၵွၼ်ႇ။
မိူဝ်ႈၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တႄႇယိုတ်းမိူင်းတႄႉ ၵူၼ်းမိူင်းလွမ်မုင်ႈမွင်းတီႈသိုၵ်းၸၢဝ်းၶိူဝ်း ၸိူဝ်းလုၵ်ႉၽိုၼ်ႉဝႆႉၸိူဝ်းၼၼ်ႉ တေၸၢင်ႈႁဵတ်းပၼ် လွင်ႈထၢင်ႇႁၢင်ႈလွတ်ႈလႅဝ်းၽဵင်ႇပဵင်း တွၼ်ႈတႃႇၵူၼ်းမိူင်းယူႇ။
ၵူၺ်းၵႃႈ ႁိုင်မႃး 4 ပီပၢႆ ဢမ်ႇႁၼ် ႁဵတ်းပၼ်ၵူၼ်းမိူင်းထၢင်ႇႁၢင်ႈလွတ်ႈလႅဝ်းသေဢမ်ႇၵႃး ႁဵတ်းႁႂ်ႈၵူၼ်းမိူင်းလႆႈပၢႆႈလႆႈတၢႆထႅင်ႈၵူၺ်း။ ၵွပ်ႈၵူၼ်းမိူင်းလႆႈၶၢမ်ႇလွင်ႈႁၢႆႉၸႃႉၸိူဝ်းၼႆႉမႃးၶိူဝ်းယႂ်းလႄႈ ၼမ်ႉၸႂ်ၵူၼ်းမိူင်းၼိုင်ႈၵေႃႉ ဢၼ်ၶႂ်ႈသၢင်ႈၶႂ်ႈႁၢင်ႈပွင် တႃႇဝၢၼ်ႈတႃႇမိူင်းၵေႃႈ ၸိူမ်ႈႁၢႆမႃးၵမ်းလွႆးလွႆး။
ၵမ်ႈၼမ် ဢွၼ်ၵၼ်ဝၢင်းၸႂ်တမ်းၶေႃးသေ လၢတ်ႈဝႃႈ – တူၵ်းလွၵ်းလႂ်ၵေႃႈ လူဝ်ႇမေႃယူႇၸွမ်းလွၵ်းၼၼ်ႉၵူၺ်းယဝ်ႉ။ ဢမ်ႇၶႂ်ႈယုင်ႈ ဢမ်ႇၶႂ်ႈၵဵဝ်ႇၵၼ်တင်း ၸုမ်းၸိူဝ်းယွင်ႇဢႃႇ ၼႃႇၶဝ် – ဝႃႈၼႆယူႇ။
ဢၼ်သိုၵ်းမၢၼ်ႈ တေဢွၼ်ၼမ်းၸတ်းႁဵတ်းပၢင်လိူၵ်ႈတင်ႈၼႆႉၵေႃႈ တူၺ်းပိုၼ်းသိုၵ်းမၢၼ်ႈပၢၼ်သိုပ်ႇပၢၼ်သေ ၵူၼ်းမိူင်းၵေႃႉလႂ်ၵေႃႈ ဢမ်ႇႁတ်းမွင်းၽွၼ်းလီသင်ဝႆႉ ဢမ်ႇႁတ်းယုမ်ႇယမ်သင်။
ဢမ်ႇသၢင်ႇတေႃႇ ၽွင်းၸတ်းပၢင်လိူၵ်ႈတင်ႈၼၼ်ႉ သမ်ႉၺႃးတၢင်ႇမူႇတၢင်ႇၸုမ်း ဢၼ်ဢမ်ႇပဵၼ်ၸႂ်သိုၵ်းမၢၼ်ႈၼၼ်ႉ ၸၢင်ႈဝၢင်းၽႅၼ်သေ မႃးတွပ်ႇတႅၼ်းလႄႈ ၵူၼ်းမိူင်းၸၢင်ႈတူၵ်းပဵၼ်ယိူဝ်ႇ ၸၢင်ႈလူႉႁၢႆတၢႆၵွပ်ႈမၼ်းထႅင်ႈ။
ႁွင်ႈၵၢၼ်လႂ် ၸုမ်းလႂ်ၵေႃႈယဝ်ႉ ပေႃးဝႃႈ ပဵၼ်ၸႂ်တပ်ႉသိုၵ်းမၢၼ်ႈ လႆႈယူႇတႂ်ႈသိုၵ်းမၢၼ်ႈယူႇၼႆ ၽွၼ်းလီဢၼ်ၵူၼ်းမိူင်းလႆႈၸၢမ်ႇ ဢမ်ႇသူႈမီး။ ၶဝ်ႁဵတ်းၶဝ်သၢင်ႈဢၼ်လႂ်ၵေႃႈ ပဵၼ်တႃႇၼႃႈႁိူၼ်း ၶဝ်တႃႇတူင်ႇဝူင်းၶဝ်ၵူၺ်း။ တႃႇၵူၼ်းမိူင်း ဢမ်ႇတူၺ်းသင်ပၼ်ၼႆ ၵူၼ်းမီးတူဝ်ထူပ်း ၼႂ်းၵၢၼ်မိူင်းၵေႃႉၼိုင်ႈလၢတ်ႈ။
သင်ပဵၼ်မႃးလႆႈပၢင်လိူၵ်ႈၵေႃႈ လိူဝ်သေပႂ်ႉတူၺ်းငဝ်းလၢႆး ၵူၼ်းမိူင်းတႄႉ ႁိုဝ်တေၸၢင်ႈၸတ်းပွင် ႁဵတ်းသၢင်ႈသင်။ ဢၼ်လႆႈၶၢမ်ႇတၢမ်ႇသိုၵ်းသိူဝ်ၼႆႉၵူၺ်းၵေႃႈ ပေႃးႁိူဝ်ႉဢူၼ်ႈ ၼူၼ်းၸႂ်ၼႃႇယဝ်ႉလႄႈ လွင်ႈၵၢၼ်ဝၢၼ်ႈၵၢၼ်မိူင်း ဢမ်ႇၸၢင်ႈဢဝ်သႂ်ႇၸႂ်သေဢိတ်းယဝ်ႉၼႆ ၵူၼ်းပၢႆႈၽေး ၵေႃႉၼိုင်ႈလၢတ်ႈ။
ၵူၼ်းၸိူဝ်းဢၼ် လႆႈပၢႆႈၽေးသိုၵ်း၊ ဢိုပ်းဢိုပ်းယၢၵ်ႈယၢၵ်ႈယူႇၸိူဝ်းၼႆႉတႄႉ ဝၢၼ်ႈမိူင်းတေပဵၼ်ႁိုဝ်ၵေႃႈ ပွႆႇႁႂ်ႈပဵၼ်ၵွၼ်ႇ၊ ၵူၺ်းၵႃႈ မွင်းပၢင်တိုၵ်းၸဵဝ်းယဵၼ်ၸဵဝ်းဝၢႆးၵူၺ်းၼႆယူႇ။
မၢင်ၸိူဝ်း ၵူၼ်းႁိူၼ်းလဵဝ်ၵၼ်ၵေႃႈ ဢမ်ႇလႆႈယူႇၸွမ်းၵၼ် ၽၢတ်ႇၽႄၵၼ်ၵႂႃႇၵူႈႁူးၵူႈတၢင်း။ မူႇၽိူၼ်ၶဝ်ႈဢၼ်ယၢမ်ႈၵိၼ်ႁူမ်ႈၵၼ်မူၼ်ႈမူၼ်ႈသိူဝ်းသိူဝ်းၼၼ်ႉၵေႃႈ ၸူမ်ႁၢႆၵႂႃႇၸွမ်းပၢင်တိုၵ်းသိုၵ်းသိူဝ်မူတ်း။
ယႃႇဢမ်ႇလွတ်ႈလႆႈလႄႈ တေပဵၼ်ၵႂႃႇပၢင်လိူၵ်ႈတင်ႈၼႆၵေႃႈ ဢၼ်တေႁၼ်လီၸွမ်းဢိတ်းဢီႈတႄႉ ပေႃးလိူၵ်ႈတင်ႈ ၸၢင်ႈမီးမႃးလႆႈၽူႈတႅၼ်း။ ၽူႈတႅၼ်းၸိူဝ်းၼၼ်ႉ ၸၢင်ႈဢဝ်သဵင်ၵၢင်ၸႂ်ၵူၼ်းမိူင်း တေႃႉၵႂႃႇလၢတ်ႈၼႂ်းသၽႃး။ ယူႇတီႈသၽႃးသေ ယူဝ်ၸၢင်ႈမီးမႃး လွင်ႈပိၼ်ႇပၢႆႇလႅၵ်ႈလၢႆႈယူႇႁိုဝ်ၼႆတႄႉ ၵူၼ်းမိူင်းၵမ်ႈၽွင်ႈလၵ်ႉမုင်ႈမွင်းဝႆႉ။
ၵူၺ်းၵႃႈ မီးၽူႈတႅၼ်းမႃးၵေႃႈ ၽူႈတႅၼ်းၼၼ်ႉသမ်ႉ ၵုမ်ႇမိုင်ႉတူၺ်းပုၼ်ႈသုၼ်ႇတူဝ် တႃႇတူဝ်မၼ်း တႃႇပီႈၼွင်ႉၸိူဝ်ႉၶိူဝ်းမၼ်းလွတ်ႈၵူၺ်းတႄႉ ၵူၼ်းမိူင်းယိင်ႈၶႅၼ်းတေယၢပ်ႇတိူဝ်းလိူဝ်ၵဝ်ႇ – ၽူႈၸၢႆး ဢၼ်ႁဵတ်းၵၢၼ်ၼႂ်းတူင်ႇၵူၼ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ။
“ၽွၼ်းၸႃႉမၼ်းတႄႉၵေႃႈ မၼ်းၸၢင်ႈမီးသင်မႃးထႅင်ႈၼႆ ပၢႆလိူဝ်ဢၼ်ၵိၼ်သူးၵိၼ်လၢပ်ႈၼႆႉ ပေႃးၼမ်ၼႃႇယဝ်ႉဝႃႈ။ ၵမ်းၼႆသမ်ႉ လိူၵ်ႈတႅၼ်းၽွင်းၶိုၼ်ႈမႃးသေ တႅၼ်းၽွင်း ၼၼ်ႉသမ်ႉ ဢမ်ႇႁဵတ်းပၼ်တႃႇၵူၼ်းမိူင်း။ သမ်ႉႁႃႁဵတ်းႁႃၵိၼ်တႃႇသုၼ်ႇတူဝ် ႁႃငိုၼ်းတႃႇသုၼ်ႇတူဝ်ၼႆတႄႉ သမ်ႉတေတိူဝ်းၼႃႇၸႃႉၵႂႃႇတိၵ်းတိၵ်း”။
မိူဝ်ႈလဵဝ် ယွၼ်ႉဝႃႈ ၽူႈတႅၼ်းဢမ်ႇမီးလႄႈ ၵူၼ်းမိူင်းဢမ်ႇၸၢင်ႈတိူင်ႇလၢတ်ႈၽႂ်၊ တေဝႃႈ ၸႂ်ယႂ်ႇပလိၵ်ႈလႄႈ သိုၵ်းၼႆၵေႃႈ သမ်ႉပဵၼ်ဢၼ်ပေႉၵိၼ်လူလၢႆၵူၼ်းမိူင်းၶိုၼ်း။ တေႃႈၼင်ႇ တႅမ်ႈလၢတ်ႈၸီႉၸမ်ႈလွင်ႈသိုၵ်းမၢၼ်ႈ တၢင်ႇၼိူဝ်ၾဵတ်ႉပုၵ်ႉ ဢိတ်းဢွတ်းၵူၺ်းၵေႃႈ ယင်းၺႃးတီႉၺွပ်း တူတ်ႈတၢမ်ႇၶွၵ်ႈ။
သင်ဝႃႈ လိူၵ်ႈတင်ႈသေ ၾၢႆႇပႃႇတီႇသၢင်ႈသီႈ USDP သမ်ႉပေႉထႅင်ႈၼႆတႄႉ တႃႇတေယုမ်ႇယမ် ၼိူဝ်ၵၢၼ်မိူင်း မိူင်းႁူမ်ႈတုမ်ၼႆႉ လႅပ်ႈတေဢမ်ႇမီးၽႂ်ယဝ်ႉ။ လိူဝ်သေ ၵူၼ်းၸိူဝ်း ဢၼ် လႆႈၼမ်ႉတွၼ်းၽွၼ်းလီၸွမ်းပႃႇတီႇၼၼ်ႉ။
ဢမ်ႇၼၼ်ၵေႃႈ သင်ဝႃႈ ပႃႇတီႇတၢင်ႇဢၼ်ပေႉၼႆတႄႉၵေႃႈ ၸၢင်ႈမီးမႃးငဝ်းလၢႆးမႂ်ႇ။ ၵူၺ်းၵႃႈ သင်ဝႃႈ ပႃႇတီႇဢၼ်ပေႉၼႆႉ သမ်ႉလႆႈဢဝ်သိုၵ်းမၢၼ်ႈဝႃႈၵူၺ်းၼႆၵေႃႈ မိူၼ်ထူမ်ႇ ၼမ်ႉလၢႆးယွၵ်ႇၸႂ်ပႃၵူၺ်း၊ ဢမ်ႇမီးသင်လီ လိူဝ်မႃး။
ပႃႇတီႇသၢင်ႇသီႈၼႆႉ ပၢၼ်သိုပ်ႇပၢၼ်ၵေႃႈ ပဵၼ်ၶွၼ်ႉတဝ်ႉသိုၵ်းမၢၼ်ႈမႃးၵူၺ်းလႄႈ ထိုင်မႃးၵမ်းၼႆႉၵေႃႈ တေၵႂႃႇလၢႆးၼၼ်ႉၵူၺ်း။
မိူဝ်ႈပႃႇတီႇသၢင်ႇသီႈ ယၢမ်ႈပဵၼ်လူင်ပွင်ၸိုင်ႈမႃးၵေႃႈ ၶဝ်တိုၼ်းဢမ်ႇသူၼ်ၸႂ်ၵူၼ်းမိူင်း။ ၶဝ်ၵူၺ်း မေႃဢဝ်ၼမ်ႉမျၢတ်ႈ ၼမ်ႉတွၼ်း တီႈၵူၼ်းမိူင်းၼၼ်ႉၵူၺ်း။ တေႃႈၼင်ႇ ၶူဝ်းပူၺ်ႈၵိုၵ်းမိူင်း ၸၢဝ်းၶိူဝ်းၸိူဝ်းၼႆႉ ၶဝ်ယင်းဢဝ်ၸႂ်ႉဢဝ်ၶၢႆ ပေႃးမၢၵ်ႈမီးၵႂႃႇၵေႃႉလႂ်ၵေႃႉၼၼ်ႉ။ ၸဵမ်မိူဝ်ႈပၢၼ် ၶိၼ်ႇၺုၼ်ႉ၊ တၢၼ်းသူၺ်ႇ၊ တဵင်းၸဵင်ႇ။
လွင်ႈသိုၵ်းမၢၼ်ႈၶဝ် တေၸတ်းပၢင်လိူၵ်ႈတင်ႈၼႆႉၵေႃႈ ပေႃးႁဵတ်းၾိင်ႈပိူင်ၸိုင်ႈမိူင်းတႄႉတႄႉၸိုင် ပိူင်ငဝ်ႈပိုင်းမိူင်း 2008 ၼႆႉ မၼ်းပေႃးလူႉၵႂႃႇၸဵမ်မိူဝ်ႈၶဝ်ယိုတ်းဢႃႇၼႃႇယဝ်ႉ။
ၵူၺ်းၵႃႈ သိုၵ်းမၢၼ်ႈသမ်ႉ ၼႃႈၼႃတႃၼိူဝ်ႉ ၼႃႈဢမ်ႇဢၢႆတႃဢမ်ႇၶၢၼ်ႉသေ ဢၢၼ်းႁူမ်ႇတူမ်းပႅတ်ႈ လွင်ႈၶဝ်ပူၼ်ႉပႅၼ်ၼၼ်ႉ၊ ယဝ်ႉၵေႃႈ ဢၢၼ်းၸတ်းပၢင်လိူၵ်ႈတင်ႈထႅင်ႈ ၵွပ်ႈ ၶဝ်ၶႂ်ႈပဵၼ်တၢင်းၵၢၼ် ၼႂ်းသၢႆတႃဢႃႊသီႊယၼ်ႊလႄႈ လုမ်ႈၾႃႉ။ သမ်ႉၶႂ်ႈႁႂ်ႈပိူၼ်ႈယွမ်းႁပ်ႉၶဝ်ယူႇ ၾၢႆႇၼိုင်ႈၵေႃႈသမ်ႉ တိုၵ်ႉၸွမ်းဢဝ် မၢၵ်ႇလူင်ပွႆႇသႂ်ႇၵူၼ်းမိူင်း လူႉႁၢႆတၢႆယူႇၵူႈဝၼ်းၼႆ ၼၢင်းယိင်းၵူၼ်းမိူင်းယၢင်းလႅင် ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –
“ပၢင်လိူၵ်ႈတင်ႈၼႆႉ တေမီးၽွၼ်းလီၽွၼ်းၸႃႉၸိူင်ႉႁိုဝ်ၼႆၼၼ်ႉတႄႉ မၼ်းတေယူႇဝႃႈ ပေႃးၸတ်းယဝ်ႉ ၽႂ်တေပေႉ။ ပေႃးဝႃႈ USDP (ပႃႇတီႇသၢင်ႈသီႇ) ပေႉ ၸွင်ႇၶဝ်တေ ၸႂ်ႉဢႃႇၼႃႇ မိူၼ်မိူဝ်ႈဢွၼ်တၢင်းယူႇႁႃႉ။ မိူဝ်ႈၵူႈပွၵ်ႈၼၼ်ႉ မိူဝ်ႈၶဝ်ယၢမ်ႈလႆႈတီႈယူႇမႃး ၶဝ်ၵႆႉၸႂ်ႉဢႃႇၼႃႇ သင်ႇႁႂ်ႈၵူၼ်းမိူင်း ႁဵတ်းဢၼ်ၼၼ်ႉဢၼ်ၼႃႈ။ လႆႈႁဵတ်း (လုပ် အားပေး) တီႇၽဵဝ်ႈပၼ်သူၼ်ၶဝ်ၸိူဝ်းၼႆႉ။ ၸဵမ်ဢဝ်လူင်းၵဵပ်းၶွၼ်ႇၸိူဝ်းၼႆႉ ၵူၼ်းမိူင်းလႆႈပၼ်”။
သင်ဝႃႈ သိုၵ်းမၢၼ်ႈၶဝ် ၶႂ်ႈႁဵတ်းၼႄဝႃႈ ၶဝ်ႁဵတ်းပိူဝ်ႈတႃႇ တီႊမူဝ်ႊၶရေႊသီႊတႄႉၼႆသေ ပၼ်ပႃႇတီႇ တၢင်ႇဢၼ်ပေႉၼႆၵေႃႈ ပဵၼ်လွၵ်းလၢႆးႁႃၵိၼ်ၶဝ်ၵူၺ်းလႄႈ ဢမ်ႇၸၢင်ႈတမ်းၸႂ်လႆႈ။ သိုၵ်းမၢၼ်ႈၶဝ် တိုၼ်းတေၵမ်ၵိၼ်းပႃး ပႃႇတီႇဢၼ်လိူၵ်ႈတင်ႈ ပေႉဝႆႉၸိူဝ်းၼၼ်ႉယူႇလႄႈ တေဢမ်ႇမီးလွင်ႈသင် လီမႃးၼႆ – ၼၢင်းယိင်း ၵူၼ်းမိူင်းယၢင်းလႅင် ၵေႃႉၼိုင်ႈသိုပ်ႇလၢတ်ႈၼင်ႇၼႆ။
ၸွမ်းၼင်ႇ ၶွမ်ႊမသျိၼ်ႊၵၢၼ်လိူၵ်ႈတင်ႈ ပိုၼ်ၽၢဝ်ႇတႄႉ ပႃႇတီႇၸိူဝ်းမီးသုၼ်ႇၶဝ်ႈလိူၵ်ႈတင်ႈ လူင်းႁူၺ်းသူၼ်း ၵူၼ်းမိူင်း သႂ်ႇပၼ်ၶႅပ်းၵၢင်ၸႂ် ပတ်းပိုၼ်ႉၸိုင်ႈမိူင်းၼၼ်ႉ ပဵၼ်ပႃႇတီႇသၢင်ႇသီႈ (USDP) ဢၼ်ပဵၼ်ၶွင် ၸုမ်းသိုၵ်းမၢၼ်ႈ၊ ပႃႇတီႇဢွၼ်ၼမ်းၵူၼ်းမိူင်း (PPP)၊ ပႃႇတီႇၵၢၼ်ၽွမ်ႉႁူမ်ႈၸၢဝ်းၶိူဝ်း၊ ပႃႇတီႇ တီႇမူဝ်ႇၶရႅၵ်ႉတိၵ်ႉ ၵၢၼ်မိူင်းၸိူဝ်ႉၸၢတ်ႈ – Democratic Party of National Politics (DNP) ၊ ပႃႇတီႇ ႁုၼ်ႈမုၼ်းၶိုၼ်ႈယႂ်ႇ ၸဝ်ႈႁႆႈၸဝ်ႈၼႃး မိူင်းမၢၼ်ႈ (MFDP)၊ တီႇမူဝ်ႇၶရႅတ်ႉတိၵ်ႉ ပႃႇတီႇၸၢဝ်းၶိူဝ်းတႆး (SNDP)၊ ပႃႇတီႇ ၼၢင်းယိင်းၸၢဝ်းၶိူဝ်းမွၼ်း၊ ပႃႇတီႇ ႁူမ်ႈႁႅင်းတီႇမူဝ်ႇၶရေႇၸီႇ ၸိူဝ်ႉၸၢတ်ႈ (NDF) လႄႈ ပႃႇတီႇၵူၼ်းမိူင်း (PP) ၸဵမ်ၸိူဝ်းၼႆႉ။
ဢွင်ႈတီႈ ဢၼ်သိုၵ်းမၢၼ်ႈ တေဢၢၼ်းၸတ်းပၢင်လိူၵ်ႈတင်ႈၼႆႉ ပႃးဝႆႉဝဵင်းၸိူဝ်းဢၼ် ၸုမ်းဢူၺ်းလီပွတ်းႁွင်ႇ 3 ၸုမ်း လေႃႇတိုၵ်း ၵုမ်းလႆႈဝႆႉၸိူဝ်းၼၼ်ႉလူးၵွၼ်ႇ။ ၾၢႆႇၼိုင်ႈ ၵေႃႈ မိူင်းၶႄႇ ပၼ်ႁႅင်းဢီးႁႂ်ႈသိုၵ်းၸၢဝ်းၶိူဝ်း ၵိုတ်းတိုၵ်းတင်း သိုၵ်းမၢၼ်ႈဝႆႉလၢႆၵမ်းယဝ်ႉလႄႈ ပၢင်လိူၵ်ႈတင်ႈၼႆႉ ဢမ်ႇဝႆးၵေႃႈထိူင်း ဢမ်ႇလၢႆးၼိုင်ႈၵေႃႈ လၢႆးၼိုင်ႈ ပဵၼ်လႆႈယူႇႁိုဝ်ၼႆ ၵူၼ်းမိူင်းတင်းထၢင်ႇ တင်းငမ်းငဝ်းၵၼ်ဝႆႉ။
မိူဝ်ႈလဵဝ် ၶွမ်ႊမသျိၼ်ႊၵၢၼ်လိူၵ်ႈတင်ႈ ပႆႇပၼ်ၶႂၢင်ႉႁႃသဵင်သေတႃႉ ၼေႃႇၽူႈတႅၼ်းမၢင်ၸိူဝ်း သမ်ႉပေႃး ဢဝ်သုၼ်ႇတူဝ်လၢတ်ႈႁူၺ်းဝႆႉ ၵူၼ်းမိူင်းၵေႃႈမီး။ မၢင်ဝဵင်းၵေႃႈ တႃႇ ၵူၼ်းမိူင်း တေပွင်ႇၸႂ်ပၢင်လိူၵ်ႈတင်ႈလီလီၼႆသေ ဢဝ်ၶိူင်ႈမႆႉၶိူင်ႈမိုဝ်းမႃးဝၢင်းၼႄ မႃးသွၼ်ၼႄ လၢႆးတွတ်ႈၶႅပ်းၵၢင်ၸႂ်ယူႇ။ မိူၼ်ၼင်ႇ ပွတ်းမိူင်းသၢတ်ႇ၊ တႃႈၶီႈလဵၵ်း၊ မိူင်းၽျၢၵ်ႈ၊ မိူင်းယွင်း၊ ၵဵင်းတုင်၊ မိူင်းပၼ်ႇ၊ လၢင်းၶိူဝ်း၊ မိူင်းၼၢႆး ၸိူဝ်းၼႆႉသေ သမ်ႉပၢႆတဵင်ၵႂၢမ်းၼၵ်းဝႆႉပႃးဝႃႈ ၽႂ်ပၼ်ၶၢဝ်ႇႁူဝ်ႈ တေၺႃးတူတ်ႈတၢမ်ႇ ၼႆဝႆႉထႅင်ႈလူးၵွၼ်ႇ လႆႈႁူႉၸွမ်းၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ