ဝၼ်းတီႈ 01/09/2025 ယၢမ်းၵၢင်ၼႂ် 7 မူင်းပၢႆ ၵႃးတၢင်ႇၼမ်ႉမၼ်းၸၢၵ်ႈ (ၼမ်ႉမၼ်းၸိူဝ်ႉၾႆး) လမ်းၼိုင်ႈ ဢမ်ႇၵုမ်းလႆႈတၢင်းဝႆးသေ ႁေႃႈၽႃႇသႂ်ႇ ႁၢၼ်ႉၼမ်ႉၼဵင်ႈၸဵမ်း 7 Star ဢၼ်မီးႁိမ်း ၽြႃးသႅင်ၶဵဝ် (ကျောက်စိမ်းဘုရား) မီးၵူၼ်းလူႉတၢႆ 3 ၵေႃႉ ႁၢၼ်ႉၼမ်ႉၼဵင်ႈၸဵမ်းၵေႃႈ ထုၵ်ႇၾႆးမႆႈလူႉၵွႆ။
လွင်ႈၼႆႉ ပဵၼ်ၵႂႃႇတီႈၼိူဝ်သဵၼ်ႈတၢင်း ၸႄႈၵႅင်း – မျိတ်ႉငႄႇ ၼႂ်းၸႄႈဝဵင်းဢမႃႇရပူႇရ တိူင်းဝဵင်းလိူဝ်ႇ (မၼ်းတလေး)။
မိူဝ်ႈၽွင်း ၵႃးတၢင်ႇၼမ်ႉမၼ်း ဢၢၼ်းဝႄႈရူတ်ႉၶိူင်ႈၼၼ်ႉ ဢမ်ႇၵုမ်းထိင်းလႆႈတၢင်းဝႆးသေ ၵႂႃႇၽႃႇသႂ်ႇ ႁၢၼ်ႉၼမ်ႉၼဵင်ႈၸဵမ်းသေ လႆႈပဵၼ်လွင်ႈၾႆးမႆႈၵႂႃႇ။ ၸုမ်းၾၢႆႇၶႄၾႆး ဝဵင်းလိူဝ်ၶဝ် လႆႈၵႂႃႇၸွႆႈထႅမ်ႁူတ်းၾႆး။
ယွၼ်ႉမႅၼ်ႈၶၢဝ်း ၵူၼ်းၵိုၼ်းလႄႈ ၵူၼ်းႁဵတ်းၵၢၼ်ၼႂ်းႁၢၼ်ႉတင်း ၵူၼ်းမႃးသိုဝ်ႉၵိၼ်ၵေႃႈ မီးလွင်ႈမၢတ်ႇၸဵပ်းၸွမ်း တင်းၼမ်။
မိူၼ်ၼႆ တီႈဝဵင်းလိူဝ်ႇ (မၼ်းတလေး) ၼႆႉ မိူဝ်ႈဝၼ်းတီႈ 20 တင်း 21 ၼႂ်းလိူၼ်ဢေႃႊၵတ်ႊသ် ၼၼ်ႉၵေႃႈ ၾႆးမႆႈ ဢွင်ႈတီႈႁုင်ၼမ်ႉမၼ်းမဵၼ် ႁိမ်းဝၢၼ်ႈၸႃႇတူဝ်း မျိတ်ႉငႄႇ ၸႄႈဝဵင်းဢမႃႇရပူႇရလႄႈ ၾႆးမႆႈႁိူၼ်း ၼႂ်းဝၢင်းႁၢၼ်ႉၶၢႆၼမ်ႉမၼ်း ႁိမ်းသဵၼ်ႈတၢင်းထူင်းပူဝ်ႇ – မျိတ်ႉငႄႇ ၸႄႈဝဵင်းပတဵင်ႇၵျီး – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ