ပေႃးထိုင်မႃး ႁၢင်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈ တေၸတ်းႁဵတ်းပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်းႁူမ်ႈတုမ်ၼႆလႄႈ မိူဝ်ႈဝႃး ဝၼ်းတီႈ 28/08/2025 ယၢမ်းၵၢင်ၶမ်ႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈ မိူင်းႁူမ်ႈတုမ် ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ ပိုၼ်ၽၢဝ်ႇဢွၵ်ႇမႃး သဵၼ်ႈၸိုဝ်ႈ ပႃႇတီႇၵၢၼ်မိူင်း ၸိူဝ်းတေၶဝ်ႈၸွမ်းပၢင်လိူၵ်ႈတင်ႈၵႂႃႇ ပဵၼ်တၢင်းၵၢၼ် ႁႂ်ႈတႅတ်ႈတေႃး။
ပႃႇတီႇၵၢၼ်မိူင်း ၸိူဝ်းတေၶဝ်ႈႁူမ်ႈၸွမ်းပၢင်လိူၵ်ႈတင်ႈ ဢၼ်သိုၵ်းမၢၼ်ႈ ယိုတ်းမိူင်းဢွၼ်ၼမ်း ၸတ်းႁဵတ်းၼႆႉ ႁူမ်ႈသဵၼ်ႈမီး 61 ၸုမ်း။ ပႃႇတီႇၸိူဝ်းမီးသုၼ်ႇ ၶဝ်ႈလိူၵ်ႈတင်ႈလႆႈ ပတ်းပိုၼ်ႉၸိုင်ႈမိူင်းမီးယူႇ 9 ၸုမ်း၊ ၸိူဝ်းမီးသုၼ်ႇလူင်းႁူၺ်းသူၼ်း ၶဝ်ႈပၢင်လိူၵ်ႈတင်ႈလႆႈ ၼႂ်းၸႄႈမိူင်းလႄႈ တိူင်းၵူၺ်း ၼၼ်ႉသမ်ႉ မီးယူႇ 52 ၸုမ်း။
ပႃႇတီႇၸိူဝ်းမီးသုၼ်ႇၶဝ်ႈလိူၵ်ႈတင်ႈ လူင်းႁူၺ်းသူၼ်းၵူၼ်းမိူင်း သႂ်ႇပၼ်ၶႅပ်းၵၢင်ၸႂ် ပတ်းပိုၼ်ႉၸိုင်ႈမိူင်းၼၼ်ႉ ပဵၼ်ပႃႇတီႇသၢင်ႇသီႈ (USDP) ဢၼ်ပဵၼ်ၶွင်ၸုမ်းသိုၵ်းမၢၼ်ႈ၊ ပႃႇတီႇဢွၼ်ၼမ်းၵူၼ်းမိူင်း (PPP)၊ ပႃႇတီႇၵၢၼ်ၽွမ်ႉႁူမ်ႈၸၢဝ်းၶိူဝ်း၊ ပႃႇတီႇတီႇမူဝ်ႇၶရႅၵ်ႉတိၵ်ႉ ၵၢၼ်မိူင်းၸိူဝ်ႉၸၢတ်ႈ – Democratic Party of National Politics (DNP) ၊ ပႃႇတီႇ ႁုၼ်ႈမုၼ်းၶိုၼ်ႈယႂ်ႇၸဝ်ႈႁႆႈၸဝ်ႈၼႃးမိူင်းမၢၼ်ႈ (MFDP)၊ တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး (SNDP)၊ ပႃႇတီႇၼၢင်းယိင်းၸၢဝ်းၶိူဝ်းမွၼ်း၊ ပႃႇတီႇႁူမ်ႈႁႅင်းတီႇမူဝ်ႇၶရေႇၸီႇ ၸိူဝ်ႉၸၢတ်ႈ (NDF) လႄႈ ပႃႇတီႇၵူၼ်းမိူင်း (PP) ၼႆယဝ်ႉ။
ပႃႇတီႇၵၢၼ်မိူင်းၸိူဝ်းမီးသုၼ်ႇလႆႈ ၶဝ်ႈလိူၵ်ႈတင်ႈ ၼႂ်းၸႄႈမိူင်းလႄႈ တိူင်း တီႈလႂ်တီႈၼၼ်ႈ တႃႇ 52 ၸုမ်းၼၼ်ႉ လႆႈႁၼ်ပႃးဝႆႉ တီႇမူဝ်ႇၶရႅၵ်ႉတိၵ်ႉပႃႇတီႇၵူၼ်းမိူင်းမၢၼ်ႈ၊ ပႃႇတီႇမႂ်ႇ တီႇမူဝ်ႇၶရေႇၸီႇ (ၸၢဝ်းၶိူဝ်းၶၢင်)၊ ပႃႇတီႇရၶႅင်ႇ၊ ပႃႇတီႇမႂ်ႇတီႇမူဝ်ႇၶရေႇၸီႇ ၸိူဝ်ႉၸၢတ်ႈ၊ တီႇမူဝ်ႇၶရႅၵ်ႉတိၵ်ႉပႃႇတီႇ ၸၢဝ်းၶိူဝ်းၽလူင်ႇ – ၸဝေႃႇ ၸဵမ်ၸိူဝ်းၼႆႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ