ၵၢပ်ႈဝၢၼ်ႈပၢၼ်မိူင်းပဵၼ်ပၢၼ်ဢၢႆႊထီႊ IT ဝၼ်းမိူဝ်ႈၼႆႉ လွင်ႈၸႂ်ႉတိုဝ်းထဵၵ်ႊၼူဝ်ႊလူဝ်ႊၵျီႊ ၵၢၼ်ၸႂ်ႉဢွၼ်ႊလၢႆႊ တူဝ်ႈၸွတ်ႇထိုင် ၵူၼ်းၵူႈၵေႃႉယဝ်ႉလႄႈ ဢမ်ႇၵွမ်ႉၽူႈသိုဝ်ႇၶၢဝ်ႇ  ဢၼ်မီးႁွင်ႈၶၢဝ်ႇ ႁဵတ်းဢွၵ်ႇ ႁၢႆးငၢၼ်း  ပိုၼ်ၽႄႈ ၶၢဝ်ႇၵူၺ်း၊    ၸိူဝ်းသူင်လၢတ်ႈသူင်ၸႃၼၼ်ႉ ဢွၼ်ၵၼ်ဢွၵ်ႇမႃးလၢတ်ႈၸႃ လွင်ႈၶၢဝ်ႇလွင်ႈငၢဝ်း ဢၼ်ၸဝ်ႈ ၵဝ်ႇႁၼ် ဢၼ်ၸဝ်ႈၵဝ်ႇငိၼ်းၼၼ်ႉ တၢင်းဢွၼ်ႊလၢႆႊ ႁင်းၽႂ်မၼ်း။ 

တင်းၸိုဝ်ႈဢမ်ႇၸိုဝ်ႈ ၸႂ်ႈဢမ်ႇၸႂ်ႈၵေႃႈ ၵႂႃႇတူၺ်းတီႈပိူၼ်ႈတႂ်ႈတႂ်ႈၼိူဝ်ၼိူင်မႃးတႅင်ႇ ထႅမ်မီႇထႅမ်ၵီးသေ လၢတ်ႈၸႃလူၺ်ႈဢမ်ႇမီးလွင်ႈႁပ်ႉပုၼ်ႈၽွၼ်းသင်ၸွမ်းလင်။

 သၢင်ႈၼႂ်းၾဵသ်ႉသုၼ်ႇတူဝ် ဢွၵ်ႇလၢတ်ႈ Live တင်းတီႈ Page   လႄႈၼႂ်း Youtube ။ မၢင်ၸိူဝ်းၵမ်ႈၼမ် ယင်းတေဢမ်ႇႁူႉ  ပိူင်တိုဝ်းၵမ် ၽူႈသိုဝ်ႇၶၢဝ်ႇၼၼ်ႉ မီးၸိူင်ႉႁိုဝ် ပဵၼ်သင်လၢႆလၢႆ။ 

ၵၢၼ်ႁႃၵိၼ်လဵင်ႉတွင်ႉ ၸိူင်ႉႁိုဝ်ၵေႃႈယဝ်ႉ တိုၼ်းမီးပိူင်တိုဝ်းၵမ်ႁင်းမၼ်း။ ၼႂ်းလွင်ႈႁၵ်ႉသႃ ၵၢၼ်ႁႃလဵင်ႉတွင်ႉ ၸဝ်ႈၵဝ်ႇၼၼ်ႉ ပႃးတင်းလွင်ႈမႅတ်ႇပႅင်းပႂ်ႉပႃး ပုၼ်ႈပိူၼ်ႈပုၼ်ႈႁဝ်း။ တၵ်းလႆႈမီးသိၼ်မီးထမ်းၵဵဝ်ႇလူၺ်ႈၵၢၼ်ဢၼ်ႁဝ်းႁဵတ်းယူႇၼၼ်ႉၵူႈဢၼ်။

 ၵွပ်ႈၼႆ ၵူၼ်းၸိူဝ်းႁဵတ်းၵၢၼ်ၶၢဝ်ႇသုၼ်ႇတူဝ်တၢင်းဢွၼ်ႊလၢႆႊၵေႃႈ ထုၵ်ႇလီႁူႉပိူင်တိုဝ်းၵမ်ၽူႈသိုဝ်ႇၶၢဝ်ႇ။ တေလႆႈႁၢင်ႈႁႅၼ်းၶေႃႈမုလ်း၊ တေလႆႈႁူႉပိူင်တႅမ်ႈလႄႈ လၢႆး ႁၢႆးငၢၼ်းၶၢဝ်ႇ၊ တႃႈမုင်ႈ ယိူင်းမၢႆဢၼ်လႆႈ ဢွၵ်ႇၶၢဝ်ႇႁူဝ်ၼႆႉ၊ ၸွင်ႇမီးလွင်ႈၽဵင်ႇပဵင်းပဵၼ်ထမ်း၊ ၸွင်ႇမၼ်းၸပ်းၽၢၵ်ႇ၊ ၸွင်ႇမၼ်းတေမီးလွင်ႈၽိတ်းထုၵ်ႇ ၼႂ်းတူင်ႇဝူင်းၵူၼ်း၊  ၸွင်ႇမၼ်းတေပဵၼ်ၶၢဝ်ႇဢၼ်သၢင်ႈလွင်ႈပၼ်ႁႃတေႃႇၸိူဝ်ႉၸၢတ်ႈ ၸဵမ်ၸိူဝ်းၼႆႉ။ ပိူင်လူင် ၶၢဝ်ႇဢၼ်ႁၢႆးငၢၼ်းၵႂႃႇၸိူဝ်းၼၼ်ႉၸဝ်ႈၵဝ်ႇတၵ်းလႆႈႁပ်ႉပုၼ်ႈၽွၼ်းၸွမ်းလိုၼ်းလင်- ႁဵတ်းသင်ၵေႃႈႁႂ်ႈလႆႈပဵၼ်တူဝ်ယၢင်ႇလီ မိူၼ်ၽူႈလူင်ႉလႅၼ်ႇတႄႉတႄႉ။

လၵ်းၵၢၼ်လမ်ႇလွင်ႈ  ပိူင်တိုဝ်းၵမ် ၽူႈသိုဝ်ႇၶၢဝ်ႇၼၼ်ႉမီးသင်လၢႆလၢႆ –

လွင်ႈထုၵ်ႇမႅၼ်ႈလႄႈမႅၼ်ႈယမ်

ၽူႈသိုဝ်ႇၶၢဝ်ႇ ၵိုင်ႇလႆႈၸွပ်ႇထၢမ်လွင်ႈပဵၼ်တႄႉမီးတႄႉလႄႈ  ႁၢႆးငၢၼ်းၶေႃႈမုလ်း လူၺ်ႈလွင်ႈထုၵ်ႇမႅၼ်ႈ၊ မႅၼ်ႈယမ် ။ ငိူင်ႉဝႄႈၶေႃႈမုလ်းၽိတ်း၊ ၶေႃႈမုလ်းဢၼ်ဢမ်ႇထုၵ်ႇမႅၼ်ႈ။ 

ယူႇၵၢင် ဢမ်ႇၸပ်းၾၢႆႇ

 ၽူႈသိုဝ်ႇၶၢဝ်ႇ တၵ်းပဵၼ်ၵၢင်လႄႈ ဢမ်ႇၵိူင်းၾၢႆႇ ဢမ်ႇဢဝ်ပၢႆးဝူၼ်ႉသုၼ်ႇတူဝ်တႅမ်ႈသႂ်ႇပႃး။ ၽွင်းႁၢႆးငၢၼ်းၶၢဝ်ႇၼၼ်ႉ တေဢမ်ႇလႆႈၸႂ်ႉၼမ်ႉသဵင် လႄႈလူမ်းၶိုၼ်ႈလူင်း ၼင်ႇၵၢင်ၸႂ် ၸဝ်ႈၵဝ်ႇမီးတေႃႇၼိူဝ်ပိူင်ပဵၼ်ၶၢဝ်ႇ။  

လွင်ႈၽဵင်ႇပဵင်းပဵၼ်ထမ်း   

ၽူႈသိုဝ်ႇၶၢဝ်ႇၵိုင်ႇလီပၼ်တိုဝ်ႉတၢင်း ၽူႈၶႂ်ႈပၼ်ၶေႃႈမုလ်းၶၢဝ်ႇ လႄႈၽူႈယူႇၼႂ်းပိူင်ပဵၼ်၊ ဢမ်ႇၼၼ် ၽူႈသိုဝ်ႇၶၢဝ်ႇၵူၼ်းမိူင်း CJ Citizen Journalist  

လွင်ႈႁပ်ႉပုၼ်ႈၽွၼ်းတေႃႇ တူင်ႇဝူင်းၵူၼ်း

ၽူႈသိုဝ်ႇၶၢဝ်ႇၵိုင်ႇလီဝႆႉၼၵ်းၽွၼ်းၵၢၼ်တုမ်ႉယွၼ်ႈ လွင်ႈၶၢဝ်ႇသၢၼ်ဢၼ်ၸဝ်ႈၵဝ်ႇ ႁဵတ်းဢွၵ်ႇပိုၼ်ၽႄႈ ။ တၵ်းလႆႈပဵၼ်ၶၢဝ်ႇဢၼ်မၢၼ်ႇမႅၼ်ႈ ပွင်ႇၸႂ်ငၢႆႈ၊ ၶၢဝ်ႇဢၼ်တေမီးၽွၼ်းလီတေႃႇတူင်ႇဝူင်းၵူၼ်း။

ငိူင်ႉဝႄႈ ဢၼ်တေပဵၼ်ၽွၼ်းၸႃႉလႄႈ ဢၼ်တေပဵၼ်ၼမ်ႉတွၼ်းတႃႇတူဝ်ၵဝ်ႇ

 ၽူႈသိုဝ်ႇၶၢဝ်ႇ တၵ်းလႆႈငိူင်ႉဝႄႈ ၶၢဝ်ႇငၢဝ်းဢၼ်တေၼမ်းၸူးသူႇ လွင်ႈတႅၵ်ႇယႅၷ်ႈ လွင်ႈတေၸၢင်ႈပဵၼ်ၽွၼ်းႁၢႆႉၸႃႉတေႃႇတူင်ႇဝူင်းလႄႈၵူၼ်းမိူင်း။ ၵူၺ်းၵႃႈ ၶၢဝ်ႇဢၼ်တေပဵၼ်ၽွၼ်းလီတေႃႇၵူၼ်းမိူင်းမိူင်းၼၼ်ႉတႄႉ (ပဵၼ်ၽွၼ်းယွၼ်ႈတေႃႇသေမူႇသေၸုမ်း သေၵေႃႉသေၵူၼ်းယူႇၵေႃႈ) တိုၼ်းဝႄႈဢမ်ႇလႆႈ တၵ်းတေလႆႈဢွၵ်ႇပၼ်။

ၵၢၼ်ၼပ်ႉၼႃႈထိုဝ်တႃ  (တေဢမ်ႇလႆႈလိူင်း)

ၽူႈသိုဝ်ႇၶၢဝ်ႇတေလႆႈ ႁၵ်ႉသႃလွင်ႈယဵၼ်ႇငႄႈ ၸဵမ်လၢႆးႁဵတ်းလႄႈ လွင်ႈလၢတ်ႈၸႃ ၽွင်းလူင်းပိုၼ်ႉတီႈဢဝ်ၶၢဝ်ႇၵေႃႈလီ ၵပ်းသိုပ်ႇလၢတ်ႈတေႃႇၵၼ်တင်းၾူၼ်ႊ/တၢင်းဢွၼ်ႊလၢႆႊၵေႃႈလီ။  

လွင်ႈလူင်ႉလႅင်းပူင်ႇသႂ်   

ၽူႈသိုဝ်ႇၶၢဝ်ႇ တေလႆႈပိုတ်ႇလၢတ်ႈပၼ်တီႈ/ၸိုဝ်ႈသဵင် – ဢၼ်လႆႈၶေႃႈမုလ်းၶၢဝ်ႇမႃး ၵူႈၵမ်း ၽွင်းမိူဝ်ႈႁၢႆးငၢၼ်းၶၢဝ်ႇ (ၸဵမ်တူဝ်ၵဝ်ႇလမ်းၵူၺ်းလႄႈ ဢၼ်ဢဝ်မႃးတီႈပိူၼ်ႈ) 

ၵၢၼ်ၵႅတ်ႇၶႄပၼ်လႅင်ႇၶၢဝ်ႇ  

ၽူႈသိုဝ်ၶၢဝ်ႇ တၵ်းလႆႈၵႅတ်ႇၶႄႁႄႉၵင်ႈလွင်ႈလွတ်ႈၽေးပၼ် လႅင်ႇၶၢဝ်ႇၸဝ်ႈၵဝ်ႇ။ သင်ဝႃႈလႅင်ႇၶၢဝ်ႇ ဢမ်ႇၶႂ်ႈလၢတ်ႈၸိုဝ်ႈ၊ ဢမ်ႇၶႂ်ႈၼႄၼႃႈၼႆၸိူဝ်းၼႆႉၵေႃႈတေလႆႈႁဵတ်းၸွမ်းၼင်ႇလႅင်ႇၶၢဝ်ႇတုၵ်းယွၼ်း။

ၵၢၼ်ႁၢႆးငၢၼ်းၶၢဝ်ႇၵၢၼ်မိူင်း  

ၽူႈသိုဝ်ႇၶၢဝ်ႇ ၵိုင်ႇလီႁၢႆးငၢၼ်းၶၢဝ်ႇၵၢၼ်မိူင်း ဢၼ်ပဵၼ်တႄႉမီးတႄႉ ၊ တေဢမ်ႇလႆႈၸွမ်းၽၢၵ်ႇ၊ တေဢမ်ႇလႆႈသႂ်ႇပႃးတၢင်းႁၼ်ထိုင်သုၼ်ႇတူဝ် ဢၼ်ႁၼ်ၼိူဝ်ၵၢၼ်မိူင်း။

ႁၵ်ႉသႃၶေႃႈၸႂ်ႉတိုဝ်း

ၽွင်းႁၢႆးငၢၼ်းၶၢဝ်ႇပၼ်ႁႃ (ပတိၵ်ႈၶၢတ်ႈ) ၼၼ်ႉ ၽူႈသိုဝ်ႇၶၢဝ်ႇ တေဢမ်ႇလႆႈႁဵတ်းႁႂ်ႈ  ၽူႈထုၵ်ႇပဵၼ်ပၼ်ႁႃ လႄႈ ၽူႈၵေႃႇပၼ်ႁႃ တင်းသွင်ၾၢႆႇ လူႉသုမ်းသေႁၢႆ၊ တေဢမ်ႇလႆႈႁဵတ်းႁႂ်ႈတူင်ႇဝူင်းၵူၼ်းတႅပ်းတတ်း လူၺ်ႈဢမ်ႇမီးၶေႃႈယိုၼ်ယၼ် ။ ၶေႃႈၸႂ်ႉတိုဝ်းတႅၼ်းတၢင် – မိူၼ်ၼင်ႇ- ၵူၼ်းႁၢႆႉ၊ ၵူၼ်းၸူၼ်၊ ၽူႈမီးတၢင်းၽိတ်း ၸိူဝ်းၼႆႉ ၸူဝ်ႈလုမ်းတြႃးပႆႇတႅပ်းတတ်းၼၼ်ႉ ၽူႈသိုဝ်ႇၶၢဝ်ႇတၵ်းတေဢမ်ႇလႆႈၸႂ်ႉတိုဝ်းထႃႈ။

တၵ်းလႆႈဝႆႉၼၵ်းသလေႇၼႃႈတႃ ၽူႈပဵၼ်ၶၢဝ်ႇ

ၽူႈသိုဝ်ႇၶၢဝ်ႇ တၵ်းတေဢမ်ႇလႆႈၵႂႃႇလူလၢႆ လွင်ႈသုၼ်ႇတူဝ် ၽူႈပဵၼ်ၶၢဝ်ႇ(ပဵၼ်ၽူႈပူၼ်ႉပႅၼ်မီးတၢင်းၽိတ်းတႄႉယူႇသေတႃႉၵေႃႈယဝ်ႉ) ။ 

တၵ်းလႆႈဝႆႉၼၵ်းသလေႇၼႃႈတႃလုၵ်ႈဢွၼ်ႇ

ၽူႈသိုဝ်ႇၶၢဝ်ႇ လီဝႆႉၼၵ်းၼိူဝ်သုၼ်ႇလႆႈလႄႈလွင်ႈလွတ်ႈၽေး လုၵ်ႈဢွၼ်ႇၽူႈပႃးၼႂ်းၶၢဝ်ႇ။ တေဢမ်ႇလႆႈပိုၼ်ၽႄႈၶေႃႈမုလ်း ဢၼ်တေၸၢင်ႈပဵၼ်ၽေးတေႃႇလုၵ်ႈဢွၼ်ႇၼႂ်းၶၢဝ်ႇၼၼ်ႉလႃးလႃး။ 

ႁၢမ်ႈႁဵတ်းႁႂ်ႈၵူၼ်းထွမ်ႇ/တူၺ်းၶၢဝ်ႇတူၵ်းၸႂ်

ၽွင်းႁၢႆးငၢၼ်းၶၢဝ်ႇ ဢၼ်မီးပၼ်ႁႃ( ပၢင်တိုၵ်း ၊ ၶၢဝ်ႇၽိတ်းမၢႆမီႈ၊ လွင်ႈၵေႃႇၵၢၼ်ႁၢႆႉ၊ ၽိတ်းမေႃးၶႃႈႁႅမ်ၵၼ်  ) ၸိူဝ်းၼႆႉ တၵ်းတေဢမ်ႇလႆႈႁဵတ်းႁႂ်ႈၵူၼ်းပၼ်ႁႅင်း၊ ၵူၼ်းထွမ်ႇၶၢဝ်ႇ တူၵ်းၸႂ်လႂ်တိုၼ်ႇ။

ပိူင်တိုဝ်းၵမ်ၽူႈသိုဝ်ႇၶၢဝ်ႇၼႆႉ လမ်ႇလွင်ႈတွၼ်ႈတႃႇၵူၼ်းႁဵတ်းၵၢၼ်ၶၢဝ်ႇ ၸဵမ်သုၼ်ႇတူဝ်လႄႈ ၸုမ်းၶၢဝ်ႇ ဢၼ်ၼိုင်ႈတႄႉတႄႉ။   ၸုမ်းလႂ်/ ၵေႃႉလႂ်တိုဝ်းၵမ်ပိူင် ဢၼ်ၽူႈသိုဝ်ႇၶၢဝ်ႇတၵ်းလႆႈတိုဝ်းၵမ်ၼၼ်ႉၸိုင် ၵူၼ်းၼၼ်ႉ/ ၸုမ်းၼၼ်ႉ ၼႃႈၵၢၼ်တၵ်းဢွင်ႇမၢၼ်၊လႆႈတၢင်းယုမ်ႇယမ် ဝႆႉဝၢင်းၸႂ်တီႈ ၵူၼ်းထွမ်ႇၶၢဝ်ႇ ၵူၼ်းဢၢၼ်ႇၶၢဝ်ႇ ၶၢဝ်းႁိုင်။ ၵၢၼ်ၶၢဝ်ႇၵေႃႈတေမၼ်ႈၵိုမ်းယိုၼ်းယၢဝ်း။

ၵူၼ်းၶိူဝ်း ဢၼ်မီးၸုမ်းၶၢဝ်ႇၵႅၼ်ႇၶႅင်မၼ်ႈၵိုမ်းၼၼ်ႉ ႁဵတ်းႁႂ်ႈၸဵဝ်းပူတ်းပွႆႇ ၵၢၼ်ၸိူဝ်ႉၸၢတ်ႈၵူၼ်းၶိူဝ်းၼၼ်ႉ သေ ပႃးၵၼ်ၶိုၼ်ႈယႂ်ႇလွတ်ႈလႅဝ်း ဢွင်ႇမၢၼ်ဝႆး  ။