ပျီႇတူႉၸိတ်ႉပဢူဝ်း PNO ၸီႉသင် ႁႂ်ႈၵူၼ်းၶၢႆၵၢတ်ႇၼႂ်းၵၢတ်ႇၼွင်ထဝ် ယႃႉႁၢၼ်ႉၶၢႆၶူဝ်း ဢၼ်မီးၼႂ်းၵၢတ်ႇၼွင်ထဝ် ၸႄႈဝဵင်းသီႇသႅင် ၸိုင်ႈတႆးပွတ်းၸၢၼ်း ဝႃႈၼႆ။

ဝၢႆးလင် ပျီႇတူႉၸိတ်ႉပဢူဝ်း PNO ႁူမ်ႈသိုၵ်းမၢၼ်ႈ ပဵၼ်ပၢင်တိုၵ်းၵၼ်တင်း တပ်ႉသိုၵ်း ပူတ်းပွႆႇၸိူဝ်ႉၸၢတ်ႈပဢူဝ်း PNLA ၼႂ်းဝၼ်းတီႈ 9/8/2025 ၼၼ်ႉယဝ်ႉ ပျီႇတူႉၸိတ်ႉၶဝ်ႈၵုမ်းၵမ် လႆႈၶိုၼ်း ၼႂ်းဝၢၼ်ႈၼွင်ထဝ် ၸႄႈဝဵင်းသီႇသႅင်ႇၶိုၼ်း ။

 တႄႇႁၢင်လိူၼ်ဢေႃႊၵတ်ႉသ်ၼႆႉမႃး ပျီႇတူႉၸိတ်ႉပဢူဝ်း PNO ၸီႉသင်ၵူၼ်းၶၢႆၵၢတ်ႇ ၼႂ်းၵၢတ်ႇၼွင်ထဝ်ႁႂ်ႈ ယႃႉႁၢၼ်ႉတင်းသဵင်ႈ ဝႃႈၼႆ ။

ၵူၼ်းၸၢႆးဢႃယု 50 ပီၵူၼ်းသီႇသႅင်ႇလၢတ်ႈၽူႈတွႆႇႁွၵ်ႈဝႃႈ -“ႁၢၼ်ႉၶၢႆၼႂ်းၵၢတ်ႇၼၼ်ႉ တေလႆႈယႃႉမူတ်းၼႆဝႃႇ  ၊ၶဝ်လၢတ်ႈဝႃႈတေမႄးၶိုၼ်းဢၼ်မႂ်ႇ ၼႆ ။ ႁၢၼ်ႉဢၼ်မီးဝႆႉၸိူဝ်းၼႆႉ တိုၵ်ႉလီယူႇဢေႃႈ ၊ ၵူၺ်းတေလႆႈယႃႉပႅတ်ႈၼႆၶႃႈ ၊ သင်ဝႃႈႁၢၼ်ႉတင်းၶၢႆၸိူဝ်းၼႆႉ လူႉၵွႆႇလႄႈ တေမႄးမႂ်ႇၶိုၼ်းတႄႉၸႂ်ႈၵႂႃႈၼေႃႈ။ၼႆႉသမ်ႉ တိုၵ်ႉလီယူႇလႄႈ ၸႂ်ႉယႃႉပႅတ်ႈၸိူင်ႉၼႆ ယွၼ်ႉသင်ၵေႃႈ ဢမ်ႇႁူႉ ၊ တလဵဝ်ၶဝ်တႄႇယႃႉယူႇယဝ်ႉ”- ဝႃႈၼႆ ။

ၼွင်ထဝ်လႄႈ ဝဵင်းသီႇသႅင်ႇၼႆႉယၢၼ်ၵႆၵၼ် 12 လၵ်း ၊ ၵၢတ်ႇၼႂ်းဝၢၼ်ႈၼွင်ထဝ်ၼႆႉ ပဵၼ်ၵၢတ်ႇၵိုၼ်းၶွၼ်ႈ ၵူၼ်းဝၢၼ်ႈ ၵုင်းၵၢတ်ႇ (စျေးကုန်း) ၊ မၢၼ်ႈၻူင်ႈ(မန့်ဒုံး) ၊ တူင်ႈၵုင်း(ဒုံကုန်း) ၊ ဝၢၼ်ႈမႂ်ႇ(ရွာသစ်) ၊ ပွၵ်ႉၵလႃး (ကုလားလမ်း) ၸိူဝ်းၼႆႉ မႃးသိုဝ်ႉၶၢႆၵၼ် ။ ပေႃးယႃႉပႅတ်ႈ ၵၢတ်ႇၸိူင်ႉၼၼ် ၸဝ်ႈသူၼ်ၸဝ်ႈႁႆႈ ၵူၼ်းဝၢၼ်ႈၵူၼ်းသူၼ်တေယၢပ်ႇၽိုတ်ႇ ဢမ်ႇၸၢင်ႈႁႃၵိၼ်လဵင်ႉတွင်ႉ – ၵူၼ်းပိုၼ်ႉတီႈလၢတ်ႈ ။  

ၵဵဝ်ၵပ်းလွင်ႈၼႆႉ ၽူႈၶၢၼ်ပၢၵ်ႇ ပျီႇတူႉၸိတ်ႉပဢူဝ်း PNO ၶုၼ်ႇသၢၼ်းဢွင်ႇ လၢတ်ႈဝႃႈ – “လွင်ႈဢၼ်ၸႂ်ႉယႃႉၵၢတ်ႇၼႆႉ ဢမ်ႇၸႂ်ႈ ၊ တေဢၢၼ်းမႄးသၢင်ႈပၼ်ႁႂ်ႈမၼ်းၵိုၼ်းၶွၼ်ႈၵူၺ်း ၊ တလဵဝ်ၼႆႉ တၢင်းဝၢၼ်ႈဢိူင်ႇတွင်ႇႁႄႉ ၼႆႉၶႂ်ႈဝႃႈ ႁဝ်းၶႃႈၵုမ်းလႆႈၶိုၼ်းတင်းသဵင်ႈၶိုၼ်းယဝ်ႉ ၊ ၵူၼ်းပိုၼ်ႉတီႈ တၢင်းဝၢၼ်ႈ ၵွင်းထူဝ် ၊ ၼွင်ထဝ် ၊ ၼွင်ဝူဝ် ၸိူဝ်းၼႆႉတႄႉ ပွၵ်ႈၶိုၼ်းႁိူၼ်းယေးၵၼ်ၶိုၼ်းယဝ်ႉ”- ၼႆယဝ်ႉ ။

လိူဝ်ၼၼ်ႉ တွၼ်ႈတႃႇ ၵူၼ်းပၢႆႈၽေးသိုၵ်းဢၼ်ၸိူဝ်းပွၵ်ႈမိူဝ်းၶိုၼ်းၼၼ်ႉ သင်ဝႃႈဢမ်ႇမီးလွင်ႈ ၵဵဝ်ႇၶွင်ႈၵၼ်တင်း ၸုမ်း PDF ၼႆ တေဢဝ်လွင်ႈႁူမ်ႇလူမ်ႈပၼ်တင်းဝၢၼ်ႈသေ ယၢမ်းလဵဝ် ၸုမ်းႁဝ်းၶႃႈ (PNO )  ၶဝ်ႈၵႂၢတ်ႇလၢင်ႉမၢၵ်ႇမႅင်းၼႂ်းဝၢၼ်ႈ ဝႆႉယူႇ ၼႆယဝ်ႉ ။

ၼႂ်းဝၼ်တီႈ 20 /8/2025 တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ပိုၼ်ၽၢဝ်ႇဝႃႈ ပျီႇတူႉၸိတ်ႉပဢူဝ်းလႄႈၸုမ်းသိုၵ်းမၢၼ်ႈႁူမ်ႈၵၼ်ႁွၼ်ႈထဝ်ႇၶဝ်ႈတဝ်ၼႂ်း ဢိူင်ႇၼွင်ထဝ် ၼႂ်းဝၢၼ်ႈၼွင်ထဝ်မႂ်ႇ ၊ ၼွင်ထဝ်ပွၵ်ႉၵလႃး ၊ ၼွင်ထဝ်ဢယၢၼ်း ၊ ၼွင်ဝူဝ်လႄႈ ဝၢၼ်ႈတပူးထူဝ်ႇ သေ ၽဝ်ႁိူၼ်းၵူၼ်းမိူင်းလူႉၵွႆႇ 100 ပၢႆ ယဝ်ႉ ဝႃႈၼႆ ။

ၼႂ်းဝၼ်းတီႈ 7/6 /2025  ၾၢႆႇတၢင်းပျီတူႉၸိတ်ႉပဢူဝ်း PNO သူင်ႇလိၵ်ႈ ႁႂ်ႈၵူၼ်းဝၢၼ်ႈ တပူးထူဝ်ႇ (တပူးထို) ၊  ၵွင်းထူဝ်ႇ(ကောင်ထို) ၊ လွႆငွၼ်း(လွယ်ငွန်း) ၊ ၼွင်ဝူဝ် (နောင်ဘို) ၊ ပၢင်ႇၸၢၵ်ႈ(ပင်စက်) ဢၼ်မီးၼႂ်းဢိူင်ႇၼွင်ၵႅဝ်း လႄႈ ဝၢၼ်ႈၼွင်ထဝ် 6 ဝၢၼ်ႈ  ႁူဝ်ၵူၼ်း 6 ႁဵင် လႆႈငိူင်ႉပၢႆႈၽေးသိုၵ်းဝႃႈၼႆ ။