လူင်ပွင်ၸိုင်ႈၼႆႉ တေလႆႈႁပ်ႉပုၼ်ႈၽွၼ်းတေႃႇၵူၼ်းမိူင်း၊ တေလႆႈၵႅတ်ႇၶႄႁႄႉၵင်ႈပၼ်ၵူၼ်းမိူင်း၊ ၼင်ႇႁိုဝ် ၵူၼ်းမိူင်းၽႃးၵႃႇ တေလွတ်ႈၽေးၵၢင်းၶဵၼ်ၼၼ်ႉ ၸိူဝ်းပဵၼ်လူင်ပွင် ၸိုင်ႈ၊ တပ်ႉသိုၵ်း၊ ၽူႈဢုပ်ႉပိူင်ႇၽွင်းငမ်းၼႆႉ တေလႆႈႁူမ်ႇလူမ်ႈပၼ်။

ပေႃးဢမ်ႇၵႅတ်ႇၶႄပၼ်လႆႈၸိုင် တေလႆႈမၢႆထိုင်ဝႃႈ ပဵၼ်လူင်ပွင်ၸိုင်ႈ ဢမ်ႇပူၼ်ႉပုၼ်ႈၽွၼ်းယဝ်ႉၼႆ ၼႂ်းၾိင်ႈၽွင်းငမ်းၸိုင်ႈမိူင်းလီ ၶွင်ၵူႈမိူင်းမိူင်း ဢွၼ်ယွမ်းႁပ်ႉမၵ်းမၼ်ႈၵၼ်ဝႆႉသေတႃႉ တီႈၸိုင်ႈမိူင်းလူႉပင်းလူၺ်ႈပၢင်တိုၵ်းသိုၵ်းသိူဝ်တႄႉ တၢမ်တူဝ်ၸုမ်းသိုၵ်း ပၢႆပိုတ်းတိုၵ်းႁဵတ်းႁၢႆႉတေႃႇၵူၼ်းမိူင်း၊ လူလၢႆပေႉၵိၼ်တေႃႇၵူၼ်းမိူင်းယူႇ ၵူႈတီႈၵူႈတၢင်းယဝ်ႉ။

တႄႇမိူဝ်ႈဝၼ်းတီႈ 18 တေႃႇထိုင်မႃးဝၼ်းမိူဝ်ႈၼႆႉ ၸုမ်းသိုၵ်းမၢၼ်ႈၶဝ် တဵၵ်းၸႂ်ႉၵူၼ်းၽႃးၵႃႇမိူင်းတႆး ပူၵ်းပၢႆႉမႅၵ်ႇတုင်းသေ ၶဝ်ႈထႅဝ်ႁွင်ႉသႅၼ်ႇၼႄၵၢင်ၸႂ်ဝႃႈ ႁႂ်ႈၸုမ်းသိုၵ်းပလွင်ႈလႄႈ ၸုမ်းသိုၵ်းၶႄႇ ၵဝ်ႈၵၢင်ႉ ပၢႆႈဢွၵ်ႇၵႂႃႇဝႆးဝႆး၊ ႁႂ်ႈပၼ်ၶိုၼ်းသီႇပေႃႉ၊ ၵျွၵ်ႉမႄး၊ သႅၼ်ဝီ ၸဵမ်ၸိူဝ်းၼႆႉ တိုၼ်းပဵၼ်လွင်ႈ လူလၢႆတေႃႇ ၵူၼ်းမိူင်းၸၢဝ်းၶိူဝ်းလုမ်းလုမ်းယဝ်ႉ။

သုတ်းတီႈ ၶဝ်ယွင်ႇမဝ်းဢႃႇၼႃႇ၊ ၶဝ်ၶီႈၶုၺ်ႈႁင်းၶဝ်လႄႈ ၸင်ႇလႆႈသုမ်းၵၢၼ်ႉပွႆႇၾႃႈ ၼႃႈတီႈၶဝ်ၵုမ်းၵမ်လူင်၊ ၵွပ်ႈသင် တေလႆႈမႃးၸႂ်ႉၵူၼ်းမိူင်းၽႃးၵႃႇ ႁွင်ႇသႅၼ်ႇၼႄၵၢင်ၸႂ်၊ ၵွမ်ႉၵႃႈ ၵူၼ်းမိူင်းႁွင်ႉသႅၼ်ႇၵူၺ်း ၸုမ်းလႂ်ၽႂ်တေဢွၵ်ႇၸႂ်ငိုၼ်းၸႂ်ၶမ်း ထွႆပၢႆႈၶၢႆႉဢွၵ်ႇလႃႇ။

တေႃႈၼင်ႇၶဝ်ၵေႃႈ ၼႃႈလိူမ်ႈႁၢမ်းဢၢႆသေ ႁိမ်လိပ်းႁိမ်တၢႆဢဝ်လၢႆဝႆႉၵူၺ်းယိုင်။ ၵၢၼ်ယုတ်ႈမိူၵ်ႈ ထၢၼ်ႈတႅမ်ႇၼင်ႇၼႆ ယူႇတီႈ လူင်ပွင်ၸိုင်ႈၸုမ်း ႞ ႁတ်းၸီႉသင်ႇပူင်လူင်း ႁႂ်ႈ ၵူၼ်းမိူင်းၵူမ်ႈႁူဝ်ႁဵတ်း ဢၼ်ဝႃႈၼႆႉ မိူၼ်တင်းပိူင်းၼႄၾၢင်ႁၢင်ႈ လွင်ႈၶဝ်ဢမ်ႇၵုမ်းၵမ်လႆႈဢႃႇၼႃႇပၢၼ်ႇပွင် ဢမ်ႇၼၼ် မိူၼ်တင်းၶဝ်ယိုၼ်တူဝ်ဝႃႈ မၢၼ်ႈမိူင်းလူႉၵွႆၵူၼ်ႇပင်းယဝ်ႉၼၼ်ႉၵူၺ်း။

ၶွမ်ႊမသျိၼ်ႊ သိုၵ်းယိုတ်းမိူင်းၼႆႉ ၸွမ်းၼင်ႇမၼ်းဢမ်ႇၸႂ်ႈ လူင်ပွင်ၸိုင်ႈပဵၼ်တၢင်းၵၢၼ် ဢၼ်ၵူၼ်းမိူင်းလိူၵ်ႈတင်ႈလႄႈ လွင်ႈမၼ်းဢမ်ႇသိူဝ်းလႆႈႁဵတ်းၼႆ ဢမ်ႇမီး၊ ၵၢၼ်ယုတ်ႈမိူၵ်ႈတၢၼ်ႇလႂ် ႞ ၵေႃႈ ပေႃးတေလႆႈဢႃႇၼႃႇၼႆ မၼ်းတိုၼ်းလမ်တၼ်ႁဵတ်းယဝ်ႉ။

တႃႇတေဝၵ်ႉလႆႈဝႆႉဢႃႇၼႃႇ ၵႂႃႇၼႃႈၶၢဝ်းႁိုင်ၼၼ်ႉ ဢဝ်ၽူႈလႂ်ၶိူဝ်းလႂ် ၸၢဝ်းလႂ် မိူင်းလႂ် ႁဵတ်းပဵၼ်တုမ်မွၼ်ၵေႃႈ တိုၼ်းသိူဝ်းလႆႈႁဵတ်းယဝ်ႉ။

ၵူၼ်းမိူင်းၼႆႉ မၼ်းဝႆႉပဵၼ်ယိူဝ်ႇၵၢၼ်မိူင်းမၼ်းၵူၺ်း၊ ၸၢဝ်းၶိူဝ်းၼႆႉ မၼ်းဝႆႉပဵၼ်ၶႃႈၸႂ်ႉ မၼ်းၵူၺ်း။ ၸင်ႇၼၼ် တႃႇတေဢဝ်မီႈမေႃႈတႃးၼႃႈသေ ၸႂ်ႉၸၢဝ်းၶိူဝ်းမိူင်းလဵဝ် ၽိတ်းမေႃးတိုၵ်းတေႃး မင်ႁူဝ်ၵၼ်ၼၼ်ႉ ၸဝ်ႈဢႃႇၼႃႇၸုမ်းသိုၵ်းၶဝ် တိုၼ်းႁၢင်ႈလွၵ်းတမ်းၽႅၼ် ၶိုင်ပွင်ယူႇၵူႈၶၢဝ်းယဝ်ႉ။

ၸဵမ်မိူဝ်ႈပၢၼ်ၸဝ်ႈဢူႈၶဝ် ၼေႇဝိၼ်း တေႃႇထိုင်ပၢၼ်တၢၼ်းသူၺ်ႇ၊ ၶိၼ်ႇၺုၼ်ႉ ႁၢၼ်ႉတေႃႇထိုင်မႃး ၼႂ်းမိုဝ်းမိၼ်းဢွင်ႇလၢႆႇ ၶဝ်တိုၼ်းၸႅၵ်ႇထႅၵ်ႇၼိူဝ်ႉလိူတ်ႈၸၢဝ်းၶိူဝ်းသေ ဢဝ်ႁူဝ်လေႃႇၵၼ်တိၵ်းတိၵ်း ဢမ်ႇႁၼ်ယဝ်ႉႁၼ်ဝၢႆး ဢမ်ႇႁၼ်လိုၼ်ႈႁၼ်ယူဝ်းသေၽဝ်ႇ။

ပေႃးမႃး ၸဵၼ်းတူၺ်းၼႆ လၢႆးၸႅၵ်ႇၼိူဝ်ႉလိူတ်ႈ ၽုင်ၵူၼ်းၶဝ်တေမီးယူႇတင်းၼမ် …

လၢႆး႞တႄႉ ဢဝ်ၶိူဝ်းၵူၼ်းၼင်ႇၵၼ် ၽိတ်းၽႅၵ်ႇတႅၵ်ႇၸတ်ႉၵၼ်၊ မိူၼ်ၸိူင်ႉၼင်ႇ ပၼ်ၼမ်ႉတွၼ်းၽွၼ်းလီ တီႈၸုမ်းၸၢဝ်းၶိူဝ်းၾၢႆႇၼႆႉယဝ်ႉ ၶိုၼ်းၶိုင်တိုၵ်းတေႃႇၸၢဝ်းၶိူဝ်းၾၢႆႇ ၼၼ်ႉ၊ ၵိုတ်းထႅင်ႈတၢင်ႇၾၢႆႇသမ်ႉ ၶိုင်ႁဵတ်းပဵၼ်ဢူၺ်းလီဝႆႉ ၼၼ်ႉယဝ်ႉ။

ၽွၼ်းယွၼ်ႈမၼ်းၸိုင် ၸုမ်းၸၢဝ်းၶိူဝ်းၼင်ႇၵၼ်ၼႆႉ ၵဝ်ဢမ်ႇယုမ်ႇမႂ်း မႂ်းဢမ်ႇယုမ်ႇၵဝ်သေ ပိၼ်ႇပႆႇတိုၵ်းတေႃးမင်ႁူဝ်ၵၼ်ၼၼ်ႉယိုင်။

လၢႆးသွင် ဢဝ်ၽႃသႃၵိူဝ်းယမ် ႁဵတ်းပဵၼ်ၶိူင်ႈမိုဝ်းသေၸႅၵ်ႇထႅၵ်ႇ၊ ႁဵတ်းႁႂ်ႈၵူၼ်းၵိူဝ်းယမ်ပုတ်ႉထ ၽႃသႃလႄႈ ၸိူဝ်းဢမ်ႇၸႂ်ႈပုတ်ႉထၽႃသႃ ႁိူင်ႈႁၢင်ႇထၢင်ႇထိူမ်ၵၼ်ၼၼ်ႉယဝ်ႉ။

ၽွၼ်းယွၼ်ႈမၼ်းၸိုင် ၽႃသႃဢၼ်ၵူၼ်းဢေႇၼႆႉ လႆႈၺႃးပူၼ်ႉပႅၼ်မိပ်ႇငႅၼ်းတဵၵ်းတဵင်၊ မိူၼ်ၸိူင်ႉ ဢိတ်ႇသလၢမ်ႇ၊ ၶရိယၢၼ်ႇၶဝ် ၺႃးတဵၵ်းတဵင်ႁႄႉႁၢမ်ႈ ၶၢတ်ႈၶွပ်ႇယူႇ တႂ်ႈ ၼႃႈတႂ်ႈတႃၼၼ်ႉယိုင်။

လၢႆးသၢမ် ၸႅၵ်ႇပဵၼ်တွၼ်ႈသေ ဢဝ်ၽႅၼ်ယၼ်ႇသိုၵ်း မိပ်ႇငႅၼ်းပေႉၵိၼ်ၼႂ်းၼႃႈတီႈၵမ်ႈၽွင်ႈယဝ်ႉ ပွႆႇႁႂ်ႈၼႃႈတီႈတၢင်ႇဢၼ်လွတ်ႈလူမ်ဝႆႉ။

ၽွၼ်းယွၼ်ႈမၼ်းၸိုင် တူၺ်းႁၼ်ၽိဝ်ၼင် မိူၼ်ႁၢင်ႈၵတ်းယဵၼ်ဝႆႉယူႇသေ ၵူၼ်းပိုၼ်ႉတီႈၼင်ႇၵၼ် ထၢင်ႇထိူမ်ငမ်းငဝ်းမူမ်ႇၸႂ်တေႃႇၵၼ်ၼၼ်ႉယိုင်။

လၢႆးသီႇတႄႉ ဢဝ်ၸုမ်းၵၢၼ်မိူင်းၼင်ႇၵၼ် ႁၼ်ၽိတ်းႁၼ်ပိူင်ႈၵၼ်၊ မိူၼ်ၸိူင်ႉ ဢိုတ်းႁၢမ်ႈတေႃႇ ပႃႇတီႇၵၢၼ်မိူင်းၵမ်ႈၽွင်ႈသေ တီႈပႃႇတီႇမၢင်ဢၼ်သမ်ႉ ပၼ်သုၼ်ႇလႆႈ၊ တီႈတၢင်ႇၸုမ်း ၶိုၼ်းယဵပ်ႇယမ်ႈႁဵတ်းၶဵၼ်ၼၼ်ႉယဝ်ႉ။

ၽွၼ်းယွၼ်ႈမၼ်းၵေႃႈ ႁဵတ်းႁႂ်ႈပႃႇတီႇၵၢၼ်မိူင်းၶဝ် ဢမ်ႇၸၢင်ႈၶွၼ်ႈႁႅင်းတုမ်ၵေႃၵၼ်သေ ၽိုၼ်ႉဝၢႆႇတေႃႇလွၵ်းပိူင်ၸဝ်ႈဢႃႇၼႃႇၼၼ်ႉယိုင်။

လၢႆးႁႃႈၸမ်ႉ ၸႅၵ်ႇၽႄပႅတ်ႈ ၽုင်ၵူၼ်းၼၼ်ႉယဝ်ႉ။ မုၼ်ၸဝ်ႈ၊ လုၵ်ႈႁဵၼ်း၊ ႁႅင်းၵၢၼ်၊ ၵူၼ်းၼုမ်ႇ၊ ၶႃႈႁၢပ်ႇၵၢၼ်ၶုၼ် ၸိူဝ်းၼႆႉ ၽႄၸႅၵ်ႇယႅၵ်ႈယၢၼ်ၵၼ်သေ ႁဵတ်းႁႂ်ႈၵူၼ်းမိူင်း ၼင်ႇၵၼ် ဢမ်ႇႁတ်းယုမ်ႇယမ်ၵၼ်၊ ႁဵတ်းႁႂ်ႈလွင်ႈၵွင်ႉသၢၼ်တူင်ႉၼိုင် ဢမ်ႇယွၼ်ႈၽဵင်ႇၵၼ် ၸိူဝ်းၼႆႉယဝ်ႉ။

ၵၢၼ်ယုတ်ႈမိူၵ်ႈၸၼ်ႉတႅမ်ႇ ဢၼ်လၢတ်ႈမႃးၸိူဝ်းၼႆႉ ႁွႆးဝႃႈပဵၼ်လၢႆးဢထမ်ႇမ ႁဵတ်းၶဵၼ်တေႃႇ ၵူၼ်းမိူင်း၊ ပဵၼ်လၢႆးၸူၼ်လိပ်းတေႃႇသုၼ်ႇလႆႈသုၼ်ႇပဵၼ်ၵူၼ်းမိူင်းၼႆ တၢမ်တူဝ် ၵူၼ်းၵၢၼ်မိူင်း ၶဝ်ၵေႃႈ ဢမ်ႇႁတ်းတၵ်ႉႁတ်းတိူၼ်၊ ယူႇတီႈ ၸိူဝ်းၸုမ်းၸၢဝ်းမႅၵ်ႇၵွင်ႈလုၵ်ႉၽိုၼ်ႉၵေႃႈ ဢမ်ႇၶတ်းဢမ်ႇၶႂၢင်၊ ယူႇယူႇပၢႆၶႂ်ႈယဵပ်ႇၸွမ်းႁွႆးတိၼ်ၶဝ်ထႅင်ႈ ပေႃးပဵၼ်ၼႆမႃးတႄႉ မိူၼ်ဝႃႈ ၵူၼ်းႁူမ်ႈယႃႉမိူင်းလူႉပင်းၼႆႉ ၶဝ်ႈပႃးၸဵမ်ၸိူဝ်းၵူၼ်းႁဵတ်းၵိၼ်ၵၢၼ်မိူင်း ၵူၼ်းႁဵတ်းၵိၼ်ၵၢၼ်လုၵ်ႉၽိုၼ်ႉၼၼ်ႉပႃးယဝ်ႉ တေလႆႈဝႃႈၼႆယူႇ။

ၸင်ႇၼၼ် သမ်ႇသရႃႇၵူင်းပၼ်ႇ ဢၼ်ၸႂ်ႉမႃႇႁႅင်းတပ်ႉသိုၵ်းသေ လွၵ်ႇငိုတ်ႈယိုတ်းမိူင်းယဝ်ႉ ပေႃးႁိုင်ၼၢၼ်းတၢၼ်ႇတၢၼ်ႇ သမ်ႉၶိုၼ်းၸႂ်ႉလူင်းလိူၵ်ႈတင်ႈ၊ မီးမႃးသၽႃးတႅၼ်းၽွင်း လူင်ပွင်ၸိုင်ႈယဝ်ႉ သမ်ႉၶဝ်ႈၸိမ်ႁိမ်ႁဵတ်း လူၺ်ႈလၢႆးတပ်ႉသိုၵ်းပဵၼ်ယႂ်ႇ၊ သႂ်ႇသႂ်ႇပေႃးၵူၼ်းမိူင်း ၶႂ်ႈပွင်ႉၶင်းမႃးၼမ် ၶိုၼ်းယုၵ်ႉၵွင်ႈငႃ ႁႃႁဵတ်းၶဵၼ်ယိုတ်းမိူင်းထႅင်ႈ … လၢႆးၼင်ႇ ၼႆၵူၺ်း တိုၵ်ႉတေမွင်းမၢင်ႇဝႃႈ ၽိူဝ်တိုၵ်းၵၼ် တႃႉၶဝ်ႈႁႃၵၼ် ဢၼ်ဝႃႈၼၼ်ႉ ၸွင်ႇဢမ်ႇၸႂ်ႈၵၢၼ်ပႅတ်ႉလႅၼ်ၶိုၼ်း ၶႂၼ်ငဝ်းတူဝ်ၵဝ်ႇႁိုဝ်ၼႆ လီလႆႈၶႆႈၸႂ်ၽႂ်မၼ်းယူႇယဝ်ႉ။