ပေႃးတူၵ်ႇထိုင်ၽႅၼ်ယၼ်ႇသိုၵ်း ပၢင်တိုၵ်း 1027 ၼႆၸိုင် ၸုမ်းၸိူဝ်းဢၼ်ဢၢင်ႈၸိုဝ်ႈဝႃႈ သၢၼ်ၶတ်းသိုၵ်းမၢၼ်ႈၸိူဝ်းၼၼ်ႉ ႁၼ်လီႁူမ်ၸူမ်းၸွမ်းယႂ်ႇလူင်။ သမ်ႉပၢႆသေႉသွမ်း ၸုမ်းယိပ်းၵွင်ႈၵၢင်ႇ ၸိူဝ်းဢမ်ႇၶဝ်ႈႁူမ်ႈၸွမ်းပၢင်ယၼ်ႇသိုၵ်းၼၼ်ႉလူးၵွၼ်ႇ။

မိူဝ်ႈလဵဝ် ပၢင်ယၼ်ႇသိုၵ်းၵေႃႈ ႁိုင်ပီပၢႆယဝ်ႉလႄႈ ၵမ်ႈၼမ်ႁူႉၽွၼ်းယွၼ်ႈမၼ်းမႃး။ မၢင်ဝဵင်းလွတ်ႈ တႂ်ႈသိုၵ်းမၢၼ်ႈသေ သိုၵ်းၸၢဝ်းၶိူဝ်းၵုမ်းဝႆႉယဝ်ႉသေတႃႉ ၵူၼ်းမိူင်းပႆႇလွတ်ႈတၢင်းမႆႈ။ ပေႃးတူၺ်းတီႈ ဝဵင်းၼမ်ႉၶမ်းၼၼ်ႉ ၵူၼ်းမိူင်းလႆႈယူႇတႂ်ႈ သိုၵ်းတဢၢင်း TNLA ပဵၼ်သိုၵ်းၸၢဝ်းၶိူဝ်း ၵုမ်းၵမ်ဝႆႉယဝ်ႉ ဝႃႈၼႆသေတႃႉ တိုၵ်ႉလႆႈမႆႈၸႂ်ယူႇၵူႈလွင်ႈ ၵူႈၶမ်ႈၵူႈဝၼ်း။ ပၢင်တိုၵ်းဢမ်ႇပဵၼ်ဝႃႈၼႆသေတႃႉ ၼႂ်းလိူၼ်ၼႆႉ ႁွင်ႈၵၢၼ် ၾၢႆႇၾႆးၾႃႉ ဢၼ်ယူႇတႂ်ႈသိုၵ်းတဢၢင်း လူင်းၵဵပ်းၵႃႈၾႆးၾႃႉ ၼမ်လိူဝ်သေ ဢၼ်ၶဝ်တမ်းဝၢင်းဝႆႉ။

ပေႃးဢဝ်မၢၵ်ႇတႃႁၼ်လီ၊ ဝႆႉၸႂ်ၽႃႇၵၢင်ဝၢင်းၶိုင်ႈသေတူၺ်းတႄႉ မိူင်းတႆးၼႆႉ ၸၢဝ်းၶိူဝ်းလႂ် ၵုမ်းလႆႈၵေႃႈ တိုၼ်းလီ တိုၼ်းၵျႃႉလိူဝ်သိုၵ်းမၢၼ်ႈၵုမ်း – သင်ဝႃႈ ပဵၼ်ၸၢဝ်းၶိူဝ်းၼႂ်း ၽႅၼ်ႇလိၼ်တႆး။ ၵူၺ်းၵႃႈ ငဝ်းလၢႆးမိူဝ်ႈလဵဝ်သမ်ႉ လၼ်ႇၵွင်ႈယိုဝ်းၵၼ်သေ ပေႉဝႆႉတီႈၽႂ်တီႈမၼ်း လူၺ်ႈဢမ်ႇပႃးၵၢင်ၸႂ်ၵူၼ်းပိုၼ်ႉတီႈ။ ၸုမ်းၼိုင်ႈတိုၵ်းပေႉဝႆႉၵေႃႈ ၸုမ်းၼိုင်ႈသမ်ႉပေႃးႁၢင်ႈႁႅၼ်းႁိမ်ၸိင်းၶိုၼ်းၵူၺ်းလႄႈ မိူင်းတႆး ဢမ်ႇသူႇၸူးလႆႈလွင်ႈငမ်းယဵၼ်သေပွၵ်ႈၼႆ ၽူႈထတ်းသၢင်ၵၢၼ်မိူင်းၶဝ် ၵႆႉလၢတ်ႈၼင်ႇၼႆ။

မိူၼ်ၼင်ႇ ပၢင်ယၼ်ႇသိုၵ်း 1027 ၼႆႉ တႄႇမႃးပေႃးလႆႈပဵၼ်ပီပၢႆ ၼႂ်းၵႄႈၼႆႉ သမ်ႉပၢႆမီးတွၼ်ႈၼိုင်ႈ တွၼ်ႈသွင်လူးၵွၼ်ႇ။

မိူဝ်ႈပၢင်ယၼ်ႇသိုၵ်း ၶၵ်ႉတွၼ်ႈၼိုင်ႈၼၼ်ႉတႄႉ လႆႈႁၼ်ၸုမ်းဢူၺ်းလီပွတ်းႁွင်ႇ TNLA – MNDAA – AA တင်း 3 ၸုမ်း ႁူမ်ႈၵၼ်လေႃႇတိုၵ်းသိုၵ်းမၢၼ်ႈယူႇ ဝႃႈၼႆသေတႃႉ ၶၵ်ႉတွၼ်ႈသွင်မႃး မိူၼ်ႁၢင်ႈတိုၵ်းၽႂ်တိုၵ်းမၼ်းသေ ၽႂ်ပေႉၵေႃႈမၼ်းဢဝ်။

ဝၢႆးၼၼ်ႉၵေႃႈ ၽႂ်တိုၵ်းၵုမ်းလႆႈဝဵင်းလႂ်ၵေႃႈဝႃႈ ဝဵင်းၼၼ်ႉ ပဵၼ်ၼႃႈတီႈၵုမ်းၵမ် ၽႂ်မၼ်းၵႂႃႇ။ မၢင်ဢွင်ႈတီႈ ၸုမ်းဢူၺ်းလီၼင်ႇၵၼ်ၵူၺ်းၵေႃႈ ဢမ်ႇထုၵ်ႇမေႃပေႃးၵႂၢမ်းၵၼ်ၵေႃႈ မီးမႃး။

လွင်ႈသိုၵ်းၼင်ႇၵၼ် ဢမ်ႇမႅၼ်ႈၵၼ်တႄႉ ဢမ်ႇၵႃႈႁိုဝ်၊ ဢၼ်တုမ်ႉယွၼ်ႈႁႅင်းသမ်ႉ ပဵၼ်ၵူၼ်းဝၢၼ်ႈၵူၼ်းမိူင်း ဢၼ်ဢမ်ႇၵဵဝ်ႇသင်ၸွမ်း။

ၸိူဝ်းလႆႈၼမ်ႉတွၼ်းၽွၼ်းလီ ၸွမ်းပၢင်တိုၵ်းၽႅၼ်ယၼ်ႇသိုၵ်း 1027 ၼႆႉတႄႉ ၶဝ်လၢတ်ႈလႆႈဝႃႈ လႆႈလွင်ႈဢွင်ႇမၢၼ် ယူႇသေတႃႉ ၵူၼ်းမိူင်းၸိူဝ်းလႆႈတုၵ်ႉလႆႈယၢၵ်ႈၸွမ်းတႄႉ ႁိုဝ်ႁၼ်လီၸွမ်းလႆႈ။ တေႃႈၼင်ႇ ဝဵင်းဢၼ်ၸုမ်းဢူၺ်းလီ ပွတ်းႁွင်ႇၵုမ်းဝႆႉလႆႈၼၼ်ႉ လွတ်ႈတႂ်ႈသိုၵ်းမၢၼ်ႈယဝ်ႉ ဝႃႈၼႆသေတႃႉ သမ်ႉပႆႇထိုင်တီႈဝႃႈၵူၼ်းမိူင်းလႆႈတမ်းၸႂ်။ ထိုင်မိူဝ်ႈလဵဝ် တိုၵ်ႉၺႃးသိုၵ်းမၢၼ်ႈ ၸွမ်းယႃႉၸွမ်းၽဝ်။

မၢင်ၸႄႈဝဵင်း သိုၵ်းၸၢဝ်းၶိူဝ်းတိုၵ်ႉၵုမ်းဝႆႉ၊ ၾၢႆႇသိုၵ်းမၢၼ်ႈၵေႃႈ ယဵၼ်ဝႆႉလႄႈ ပၢင်တိုၵ်းဢမ်ႇသိုပ်ႇ ပဵၼ်ဝႃႈၼႆသေတႃႉ ၵူၼ်းမိူင်းပိုၼ်ႉတီႈသမ်ႉၶၢၼ်ၸႂ်ၸွမ်းပိူင်ၵဵပ်းၶွၼ်ႇ။

မိူၼ်ၼင်ႇ တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼႆႉ ယၢမ်းလဵဝ် ယူႇတႂ်ႈသိုၵ်းတဢၢင်း TNLA ၵုမ်းဝႆႉၼႆ ၽႂ်ၽႂ်ၵေႃႈတေႁူႉၵၼ်ယူႇ။

ၸဵမ်မိူဝ်ႈသိုၵ်းတဢၢင်း ယိုတ်းၵုမ်းဝဵင်းၼမ်ႉၶမ်းလႆႈ ပီ 2023 ၼၼ်ႉသေ ယူႇဢမ်ႇႁိုင် ဢွၵ်ႇပိူင်ၽွင်း ငမ်းႁင်းၵူၺ်း။ ၶွၼ်ႇၵူႈလွင်ႈလွင်ႈၸိူဝ်းၼႆႉၵေႃႈ ၵူၼ်းမိူင်းလႆႈပၼ်တီႈ ၾၢႆႇၽွင်းငမ်း ဢၼ်သိုၵ်းတဢၢင်းတႅင်ႇတင်ႈမႃး။

ၸဵမ်ဢဝ်ၵႃႈၾႆးၾႃႉၸိူဝ်းၼႆႉၵေႃႈ ႁွင်ႈၵၢၼ်ဢၼ်ယူႇတႂ်ႈသိုၵ်းတဢၢင်းၵူၺ်း ဢၼ်လူင်းၵဵပ်း။ မိူဝ်ႈသိုၵ်းမၢၼ်ႈၵုမ်းၵေႃႈ တိုၼ်းလႆႈပၼ်ယူႇလႄႈ သိုၵ်းတဢၢင်းလူင်းၵဵပ်းၵေႃႈ ၵူၼ်းမိူင်းပႆႇႁၼ် ပိူင်ႈသင်။

ၵူၺ်းၵႃႈ ယိင်ႈႁိုင်ယိင်ႈၵဵပ်းၼမ်လိူဝ်မႃးၵမ်းလွႆးလွႆး။ ထိုင်မႃးၼႂ်းလိူၼ်ဢေႃႊၵတ်ႊသ် ပီ 2025 ၼႆႉသမ်ႉ ယိင်ႈၶႅၼ်းၼႃႇ။ ႁွင်ႈၵၢၼ်ၾၢႆႇႁႅင်းထၢတ်ႈၾႆးၾႃႉ လူင်းၵဵပ်းငိုၼ်းၵူၼ်းမိူင်း ၼမ်လိူဝ်သေ ပိူင်ၶဝ်တမ်းဝႆႉလႄႈ ၵူၼ်းမိူင်းၵိၼ်းၸႂ်ဝႆႉ။

ၼႂ်းပိူင်ဢၼ်သိုၵ်းတဢၢင်း တမ်းၼႄဝႆႉတႄႉ ၵႃႈၾႆးၼႆႉ ပေႃးၸႂ်ႉ 1 ထိုင် 50 ယူႊၼိတ်ႉ တေတူၵ်း 1 ယူႊၼိတ်ႉ 50 ပျႃး ၊ သင်ဝႃႈ 51 ယူႊၼိတ်ႉထိုင် 100 ယူႊၼိတ်ႉသမ်ႉ တေတူၵ်းယူႊၼိတ်ႉလႂ် 100 ပျႃး ၊ 101 ထိုင် 200 ယူႊၼိတ်ႉသမ်ႉ ယူႊၼိတ်ႉလႂ် တေတူၵ်းၶၼ်ငိုၼ်း 150 ပျႃးလႄႈ သင်ဝႃႈ ၸႂ်ႉ 201 ယူႊၼိတ်ႉ ၶိုၼ်ႈၼိူဝ်တႄႉ လႆႈၸၢႆႇငိုၼ်းၼိုင်ႈယူႊၼိတ်ႉလႂ် 300 ပျႃး။

ၵူၺ်းၵႃႈ ဢၼ်ႁွင်ႈၵၢၼ်ၾၢႆႇၾႆးၾႃႉ ဢၼ်ယူႇတႂ်ႈသိုၵ်းတဢၢင်း လူင်းၵဵပ်းၼႆႉသမ်ႉ ၵူၼ်းမိူင်းမၢင် ႁိူၼ်းၸႂ်ႉၾႆးၾႃႉမွၵ်ႈ 100 ယူႊၼိတ်ႉၵူၺ်းသေတႃႉ ၶဝ်သမ်ႉတႅမ်ႈမၢႆၵႂႃႇ 400 – 500 ယူႊၼိတ်ႉလႄႈ ၵိုင်ႇလီသဵင်ႈ 1 မိုၼ်ႇပျႃးၵူၺ်းသေတႃႉ မၢင်ႁိူၼ်းသဵင်ႈၸမ် 1 သႅၼ်ပျႃး၊ မၢင်ႁိူၼ်းၵေႃႈ ၵူႈလိူၼ်ယၢမ်ႈ သဵင်ႈမွၵ်ႈ 2 မိုၼ်ႇပျႃးၵူၺ်း၊ ၼႂ်းလိူၼ်ၼႆႉသမ်ႉ သဵင်ႈပဵၼ်မွၵ်ႈ 6 မိုၼ်ႇပျႃး။ လၢတ်ႈလႆႈဝႃႈ သဵင်ႈၼမ် လိူဝ်ပိူင်ဢၼ်တမ်းဝႆႉ 3 ပုၼ်ႈၼႆ ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၶဝ်ဢမ်ႇၵဵပ်းၸွမ်းယူႊၼိတ်ႉမၼ်းမၢၼ်ႇ တင်ႈၸႂ်မၢႆလိူဝ်။ လိူၼ်ၼႆႉ ပဵၼ်ၼမ်သေပိူၼ်ႈ။ ပိူၼ်ႈၵေႃႈ ပွင်ႉတင်းဝဵင်းယဝ်ႉဝႃႈ။ မၼ်းဢမ်ႇၸၢင်ႈႁဵတ်းႁိုဝ်ၼၼ်ႉၼႃႇ။ ၶဝ်ၵေႃႈလၢတ်ႈဝႃႈ သႂၢင်းၵႂႃႇတၢင်းၼိူဝ်။ ၽႂ်ၵေႃႈဢမ်ႇၸၢင်ႈလၢတ်ႈတီႈၶဝ်။ မၼ်းၽိတ်းၼမ်ၼႃႇ။ ပဵၼ်ၼမ်ၼႃႇ။ မၢင်ၵမ်းၶဝ်မႃးၵဵပ်း မႅၼ်ႈမိူဝ်ႈၵူၼ်းမိူင်းဢမ်ႇႁူႉႁိူၼ်း။ ဢၼ်တႄႇပဵၼ်တႄႉ မႃးပဵၼ်ၼႂ်းလိူၼ်ၼႆႉၼၼ်ႉၼႃႈ”။

ဢိင်ၼိူဝ်လွင်ႈၼႆႉ ၵူၼ်းမိူင်းတႄႉ လၢတ်ႈတီႈ ႁွင်ႈၵၢၼ် ၾၢႆႇၾႆးၾႃႉၼၼ်ႉယူႇသေတႃႉ ၾၢႆႇၶဝ်ၶိုၼ်း လၢတ်ႈဝႃႈ လႆႈယိုၼ်ႈသဵၼ်ႈမၢႆၸိူဝ်းၼႆႉၵႂႃႇၸူးၸၼ်ႉပႃႈၼိူဝ်ယဝ်ႉလႄႈ ပႆႇၸၢင်ႈၵႄႈပၼ်။ ပေႃးလိူၼ် ၼႃႈလိူၼ်လိုၼ်းမႃး တေယွမ်းၵဵပ်းပၼ်ယူႇဝႃႈၼႆသေတႃႉ ၵူၼ်းမိူင်းပႆႇႁတ်းတမ်းၸႂ်ၼႆ ၵူၼ်းပိုၼ်ႉတီႈလၢတ်ႈ။

မိူၼ်ၼင်ႇ ဝဵင်းၼမ်ႉၶမ်းၼႆႉၵူၺ်းၼင်ႇၵဝ်ႇ။ ဝဵင်းၵျွၵ်ႉမႄး – သီႇပေႃႉ – ၼွင်ၶဵဝ် – ၼမ်ႉတူႈ ၸိူဝ်းၼႆႉ ပိုၼ်ႉတီႈဢၼ်သိုၵ်းတဢၢင်း TNLA တူင်ႉၼိုင်ၵုမ်းၵမ်ဝႆႉၸွမ်းဝၢၼ်ႈၸွမ်းဢိူင်ႇၸိူဝ်းၼၼ်ႉၵေႃႈ သိုၵ်းတဢၢင်းၵဵပ်းၶွၼ်ႇၵူၼ်းၵႃႉ – ၸဝ်ႈရူတ်ႉၵႃး – ပႃးၸဵမ်ႁၢၼ်ႉၶၢႆတၢင်းၵိၼ် ၼႂ်းဝၢၼ်ႈၼႂ်းဢိူင်ႇ။ ယၢၼ် 3-4 လိူၼ်ၵဵပ်းၼိုင်ႈၵမ်း- သမ်ႉလႆႈပၼ်ငိုၼ်းၼမ် ၶိုၼ်ႈမႃးတိၵ်းတိၵ်း။ မိူၼ်ၼင်ႇ ၼႂ်းၸႄႈဝဵင်း သီႇပေႃႉၼႆႉ ၵူၼ်းဝၢၼ်ႈမၢင်တီႈ သမ်ႉပေႃးဢမ်ႇၸၢင်ႈယူႇသဝ်း ထိုင်တီႈလႆႈပၢႆႈလႆႈၼီၶဝ်ႈယူႇၼႂ်းဝဵင်း၊ ၵမ်ႈၽွင်ႈ ပၢႆႈၵႂႃႇယူႇတၢင်ႇတီႈတၢင်ႇဝဵင်းၵေႃႈမီး။

ၸိူင်ႉၼၼ်ၼင်ႇၵဝ်ႇ မိူၼ်ၼင်ႇ ၵႃႈၶွၼ်ႇရူတ်ႉၵႃး ၸိူဝ်းၼႆႉၵေႃႈ ႁွင်ႈၵၢၼ် ဢၼ်ယူႇတႂ်ႈသိုၵ်းတဢၢင်းၶဝ် တမ်းပိူင်မၼ်းဝႆႉသေတႃႉ ပေႃးၵဵပ်းမႃးတႄႉတႄႉသမ်ႉ ၵဵပ်းလူၼ်ႉၵဵပ်းလိူဝ် ၼႆယဝ်ႉ။

ၸွမ်းၼင်ႇ ပိူင်ဢၼ်သိုၵ်းတဢၢင်း တမ်းဝႆႉတႄႉ တီႈဝဵင်းၼမ်ႉၶမ်း – ၵႃႈၶၼ် ၵႃးသႅၼ်းလဵၵ်ႉ သႅၼ်းႁၢတ်ႈ သႅၼ်းယႂ်ႇ တေလႆႈပၼ်ၸွမ်းသႅၼ်းမၼ်း။ ၵႃႈၶၼ်ၶွၼ်ႇၵႃးၼၼ်ႉ မီး 2 သႅၼ်ပျႃး ထိုင် 5 သႅၼ်ပျႃး။ ၵိုင်ႇလီသဵင်ႈ 2 သႅၼ်ပျႃးၼႆႉၵူၺ်းသေတႃႉ ၵဵပ်းမွၵ်ႈ 3 သႅၼ်ပျႃးၼႆႉၵႂႃႇ။ ပေႃးပဵၼ်သႅၼ်း ဢၼ်ၵိုင်ႇလီသဵင်ႈ 3 သႅၼ်သမ်ႉ ပဵၼ်ၵႂႃႇ 4 သႅၼ် ၸိူဝ်းၼႆႉ။ ၵဵပ်းလိူဝ်ၵႂႃႇၼိုင်ႈသႅၼ်ပျႃး ဝႃႈၼႆ။

ဢိင်ၼိူဝ် လွင်ႈလႆႈသဵင်ႈငိုၼ်းဢမ်ႇမီးပၵ်းပိူင်တႅတ်ႈတေႃးၼႆႉသေ ၵူၼ်းမိူင်းၼမ်ႉၶမ်း ၵေႃႉၼိုင်ႈ လၢတ်ႈဝႃႈ –

“မိူဝ်ႈလဵဝ် ၵုၼ်ႇၵူႈသႅၼ်းသႅၼ်းၼႆႉ မၼ်းဢမ်ႇလွတ်ႈၶဝ်သေမဵဝ်း။ ၵႃးတၢင်ႇၵုၼ်ႇ လတ်းၵႂႃႇလတ်းမႃးၵေႃႈ လႆႈပၼ်ၶွၼ်ႇပဵၼ်သွင်သၢမ်ၸုမ်း။ ၵူၼ်းမိူင်းလႆႈၶၢမ်ႇတၢမ်ႇၶွၼ်ႇႁႅင်း။ မိူဝ်ႈဢွၼ်တၢင်း ၵူၼ်းယူႇၸွမ်းလႅၼ်လိၼ်ၼႆႉ ဢီႈသင်ၵေႃႈ ပေႃးလိူဝ်ပိူၼ်ႈ။ မိူဝ်ႈလဵဝ်သမ်ႉ ၵူၼ်းယူႇၸွမ်းလႅၼ်လိၼ်ၼႆႉ ဢီႈသင်ၵေႃႈ မၼ်းၵႃႈလိူဝ်ပိူၼ်ႈ။ ပေႃးဢဝ် ၶူဝ်းမိူင်းမၢၼ်ႈမႃးၵေႃႈ ၵႃႈၶွၼ်ႇမၼ်းၼႆႉ လႆႈၼပ်ႉၸွႆႉမၼ်းသေပၼ်။ ၼိုင်ႈၸွႆႉလႂ်မီး 2,500 ထိုင် 4,000 ပျႃး။ သင်သင်ၵေႃႈ လႆႈၼပ်ႉၼမ်ႉၼၵ်းမၼ်းသေပၼ်”။

တႃႇတေၵႃႉတေၶၢႆသင်ၵေႃႈ ဢမ်ႇၸႂ်ႈလွင်ႈငၢႆႈ။ ၶူဝ်းၵုၼ်ႇ ဢၼ်ဢဝ်မႃးတၢင်းမိူင်းမၢၼ်ႈလႄႈသင် မိူင်းၶႄႇလႄႈသင် ၸိူဝ်းၼႆႉ ယွၼ်ႉဢဝ်လတ်းတၢင်းမႃး လႆႈပၼ်ၶွၼ်ႇမႃးလၢႆတီႈလၢႆတၢင်းလႄႈ ၽိူဝ်ႇထိုင်တီႈၼမ်ႉၶမ်းၵေႃႈ ၸဝ်ႈၵုၼ်ႇသမ်ႉလႆႈၶိုၼ်းၶၢႆၵႃႈ။ ပေႃးဢမ်ႇၶၢႆၵႃႈၵေႃႈ သမ်ႉဢမ်ႇလႆႈၶိုၼ်း တိုၼ်းလၢင်းမၼ်း။ ၵူၼ်းမိူင်းၸိူဝ်းလူဝ်ႇသိုဝ်ႉၵိၼ်သိုဝ်ႉၸႂ်ႉသမ်ႉ လႆႈသိုဝ်ႉၵႃႈ။ တင်းၵူၼ်းသိုဝ်ႉလႄႈ ၵူၼ်းၶၢႆ ယၢပ်ႇၵိၼ်းၸႂ်မိူၼ်ၵၼ်မူတ်း။ ဢၼ်လိူဝ်ႁႅင်းသမ်ႉ ၸိူဝ်းမီးတၢင်းပဵၼ်ၵိုၵ်းတူဝ်ဝႆႉၸိူဝ်းၼၼ်ႉ ပေႃးလူဝ်ႇသိုဝ်ႉယႃႈယႃမႃး ပဵၼ် ဢၼ်ၵိၼ်းၸႂ်တႄႉတႄႉ ယွၼ်ႉၵႃႈမၼ်းသုင်လိူဝ်ၵဝ်ႇလၢႆပုၼ်ႈၼႆ ၵူၼ်းၼမ်ႉၶမ်းလၢတ်ႈ။

လွင်ႈၵဵပ်းၶွၼ်ႇတီႈၵူၼ်းမိူင်းၼႆႉ ယူႇတီႈၸုမ်းၶၢဝ်ႇႁဝ်းၶႃႈ ဢၢင်ႈတေထၢမ်တီႈၽူႈၶၢၼ်ပၢၵ်ႇ TNLA ၼႆ – တိတ်းတေႃႇႁႃမၼ်းၼၢင်းၵေႃႈ ဢမ်ႇႁပ်ႉတွပ်ႇပၼ်။ 

ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊၼႆႉ ၵွၼ်ႇၼႃႈ 1027 ၼၼ်ႉတႄႉ တိုၵ်ႉပဵၼ်သိုၵ်းမၢၼ်ႈၵုမ်းဝႆႉ ၵူၺ်းသေ တႄႇဢဝ်ႁၢင်ပီ 2023 ၼၼ်ႉမႃးတႄႉ ပဵၼ်သိုၵ်းတဢၢင်း TNLA ၵုမ်း။  

ဝၼ်းတီႈ 12/01/2024 ၼၼ်ႉ တူၵ်းမႅၼ်ႈဝၼ်းလုၵ်ႉၽိုၼ်ႉတဢၢင်း ၶွပ်ႈတဵမ် 61 ပီ ၼႆသေ ၸွမ်သိုၵ်း တႃႉဢၢႆႈၽူင်း မွၵ်ႇလၢတ်ႈၶေႃႈၵႂၢမ်း ၼႂ်းပၢင်ၵႅဝ်ႈၼၼ်ႉဝႃႈ တေတႄႇပၼ်ႇ ၵၢၼ်ဢဝ်ႁူမ်ႇလူမ်ႈ၊ ၵၢၼ်ၽွင်းငမ်း ဢၼ်ဢမ်ႇၸႅၵ်ႇၽႄ ၸၢဝ်းၶိူဝ်းလႄႈ ဢၼ်ၵူၼ်းမိူင်း တေလႆႈလွင်ႈၽဵင်ႇပဵင်းၼင်ႇၵၼ် ဝႃႈၼႆဝႆႉသေတႃႉ ပိူင်ပဵၼ်ဢၼ်ထူပ်းယူႇ ယၢမ်းလဵဝ်သမ်ႉ ၵူၼ်းမိူင်းဢမ်ႇလႆႈလွင်ႈၽဵင်ႇပဵင်းသင် တႃႇလိပ်းၶီးမီးၸႂ်ၵူၺ်းၵေႃႈ ဢမ်ႇႁၼ်မီးသုၼ်ႇၼႆ ၵူၼ်းမိူင်းတႆးပွတ်းႁွင်ႇ ဢွၼ်ၵၼ်ၶၢင်းပွင်ႉၼင်ႇၼႆ။