မိူဝ်ႈဝၼ်းတီႈ 24/08/2025 ၼႆႉ ၶူဝ်လူင် ဢၼ်ၵၢႆႇဝႆႉၼိူဝ်ၵႄးၼမ်ႉတိင် ဢၼ်ၵပ်းသိုပ်ႇၵၼ်တင်း ဝဵင်းၼမ်ႉတိုၵ်းလႄႈ ဝဵင်းၼမ်ႉၽႃႈ (ၶျိၼ်ႊသူၺ်ႊႁေႃႊ) ဢွင်ႈတီႈလႅၼ်လိၼ်ၼႃႈတီႈၵုမ်းၵမ်သိုၵ်းၵဝ်ႈၵၢင်ႉလႄႈ သိုၵ်းဝႃႉ တိတ်းၵၼ်ဝႆႉၼၼ်ႉ ႁၵ်းတူၵ်းၵႂႃႇ ယၢမ်းၵၢင်ၼႂ်ၸဝ်ႉမွၵ်ႈ 2 မူင်း ၼႆယဝ်ႉ။

ၶူဝ်းၵုၼ်ႇလႄႈ ရူတ်ႉၵႃး ၸိူဝ်းတေႃႉဢဝ်မႃးတၢင်း ၵဵတ်ႉလၢၼ်ႇဝဵင်းၼမ်ႉၽႃႈၼၼ်ႉ လႆႈတေႃႉလတ်းၶၢမ်ႈၶူဝ်လူင်ၼၼ်ႉသေ ၶဝ်ႈမႃးၼႂ်းမိူင်းတႆးပွတ်းႁွင်ႇ။ ယွၼ်ႉၼၼ် ၶူဝ်ၼႆႉ ပဵၼ်ၶူဝ်ဢၼ်လမ်ႇလွင်ႈတႃႇၵၢၼ်ၵႃႉၶၢႆ ၼႂ်းမိူင်းတႆးပွတ်းႁွင်ႇ လင်ၼိုင်ႈၼႆ ၵူၼ်းၵႃႉၶၢႆ ၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၼႄၼင်ႇၼႆ။

“တီႈႁူဝ်ၶူဝ် တင်း 2 ၾၢႆႇၼၼ်ႉ မီးၸုမ်းသိုၵ်းဝႃႉတင်း ၾၢႆႇၵဵပ်းၶွၼ်ႇ တၢင်းမိူင်းၶႄႇ၊ မီးၵဵတ်ႉလၢၼ်ႇ ႁွင်ႈၵၢၼ်ၵူတ်ႇထတ်း ၵူၼ်းၶဝ်ႈဢွၵ်ႇမိူင်း (လဝၵ) ၶဝ်ပႂ်ႉဝႆႉ။ ၶူဝ်းၵုၼ်ႇတၢင်းမိူင်းၶႄႇၼႆႉ ႁဝ်းလႆႈတေႃႉၶၢမ်ႈ ၶူဝ်ၼၼ်ႉမႃး။ မိူဝ်ႈလဵဝ် ႁဝ်းဢမ်ႇၸၢင်ႈဢဝ်ၶူဝ်းၵုၼ်ႇႁဝ်းၶၢမ်ႈၶူဝ်။ ၶူဝ်းၶမ်ဝႆႉၾင်ႇတၢင်းမိူင်းဝႃႉ။ ပေႃးၶဝ်ပႆႇမႄးယဝ်ႉတႄႉ ၵႃႈလႆႈၵိုတ်းဝႆႉၸူဝ်ႈၶၢဝ်းယဝ်ႉ”။

ၵဵဝ်ႇလူၺ်ႈၶူဝ်ႁၵ်းတူၵ်းၼႆႉသေ ၾၢႆႇပိုၼ်ၽၢဝ်ႇ ၶၢဝ်ႇငၢဝ်းၼႂ်းဝဵင်းႁူဝ်ပၢင်ႇတႄႉ ပိုၼ်ဢွၵ်ႇဝႆႉဝႃႈ – ၶူဝ်လူင်ၼႆႉ ၵဝ်ႇၼႃႇယဝ်ႉႁႄ မၼ်းၽင်ႉဝႆႉယဝ်ႉ။ ရူတ်ႉၵႃးတေႃႉတၢင်ႇၵုၼ်ႇႁမ်ႉ လတ်းၵႂႃႇမႃးၼိူဝ်မၼ်း ၼၵ်းလူၼ်ႉလိူဝ်ၼႃႇလႄႈ ၸင်ႇလႆႈႁၵ်းတူၵ်းၵႂႃႇ – ၼႆယဝ်ႉ။

ၽွင်းၸုမ်းသိုၵ်းၸၢဝ်းၶိူဝ်းသၢမ်ၸုမ်း ၸတ်းပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 လွပ်ႈၼိုင်ႈၼၼ်ႉ ၶူဝ်လင်ၼႆႉ ၸုမ်းသိုၵ်းၵဝ်ႈၵၢင်ႉၶဝ် ၵုမ်းၵမ်ဝႆႉသေတႃႉ ဝၢႆးလင်ၼၼ်ႉဢမ်ႇႁိုင် ၸုမ်းသိုၵ်းၵဝ်ႈၵၢင်ႉ ၶိုၼ်းမွပ်ႈဢၢပ်ႈပၼ် ၸုမ်းသိုၵ်းဝႃႉၵုမ်းၵမ်လႄႈ ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ် ၼႆယဝ်ႉ။

တႅမ်ႈ – ၽူၺ်းၼုမ်ႇ