ၼႂ်းၵၢင်လိူၼ်ဢေႃႊၵတ်ႊသ်ၼႆႉ သိုၵ်းမၢၼ်ႈ ၸႂ်ႉၶိူင်ႈၵွင်ႈလူင်၊ ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၸွမ်းဝတ်ႉဝႃးၽႃသိူဝ်ႇ၊ ႁိူၼ်းယေးၵူၼ်းမိူင်း ၸိူဝ်းမီးၵူၼ်းမိူင်းယူႇသဝ်းလႄႈ ၸိူဝ်းၵူၼ်းမိူင်းဝဵင်းၼွင်ၶဵဝ်၊ ၵျွၵ်ႉမႄး ဢၼ်ပၢႆႈၽေးသိုၵ်းမႃးသွၼ်ႈယူႇဝႆႉ ၼႂ်းထုင်ႉၼွင်ပိင် ၸိူဝ်းၼႆႉၵေႃႈ တိူဝ်ႉၺႃးၸၢၵ်ႇမၢၵ်ႇ ထိုင်တီႈလႆႈလူႉတၢႆမၢတ်ႇၸဵပ်းၵႂႃႇ ဢမ်ႇယွမ်း 60 ၵေႃႉ။

ယၢမ်းလဵဝ် ၵူၼ်းမိူင်းၼႂ်းထုင်ႉၼွင်ပိင်လႄႈ ၵူၼ်းပၢႆႈၽေးသိုၵ်းၸိူဝ်းၼႆႉ ဢွၼ်ၵၼ်ပၢႆႈဢွၵ်ႇၼႂ်းထုင်ႉ ၼွင်ပိင်ၵႂႃႇၵူႈၾၢႆႇၵူႈတၢင်း။ ၵမ်ႈၽွင်ႈ ပၢႆႈၵႂႃႇတၢင်း ဝဵင်းလႃႈသဵဝ်ႈ၊ ပုင်ႇဝူဝ်း၊ ႁၢႆးၵုၺ်၊ ၼမ်ႉႁၢင်ႈၶိူင်ႈ၊ ၼမ်ႉႁူး၊ ၼွင်ၵႂၢင်၊ ပၢင်ၸူင်၊ ၶွၵ်ႈဝူဝ်း၊ ၼွင်မိူင်း ၸဵမ်ၸိူဝ်းၼႆႉသေ လူဝ်ႇတၢင်းၵမ်ႉၸွႆႈ ၶဝ်ႈၼမ်ႉတၢင်းၵိၼ်လႄႈ ၶူဝ်းၼုင်ႈတၢင်းဝႆယူႇႁၢဝ်ႈႁႅင်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းၸိူဝ်းပၢႆႈၽေးပၢင်တိုၵ်း၊ ၸုမ်းၸွႆႈထႅမ်လႄႈ ၸုမ်းတူင်ႇဝူင်းၵူၼ်းၶဝ် ႁူပ်ႉတၢင်းယၢပ်ႇၽိုတ်ႇၸိူင်ႉႁိုဝ် မီးတၢင်းလူဝ်ႇသင်လႄႈ ၶႂ်ႈတုၵ်းယွၼ်း ပၼ်တၢင်းႁၼ်ထိုင်တေႃႇ ၸုမ်းယိပ်းၵွင်ႈၵၢင်ႇလႄႈ ၸုမ်းသိုၵ်းမၢၼ်ႈ ၸိူဝ်းပဵၼ်ပၼ်ႁႃၵၼ်ယူႇ ၼႂ်းမိူင်းတႆးပွတ်းႁွင်ႇၼႆႉ ၸိူင်ႉႁိုဝ်ၼႆ ယူႇတီႈ ၽူႈသိုဝ်ႇၶၢဝ်ႇ ၼၢင်းၽူၺ်းၼုမ်ႇ ၵပ်းသိုပ်ႇတွင်ႈထၢမ်တီႈ ၸုမ်းၸွႆႈထႅမ်ၵူၼ်းပၢႆႈၽေးသိုၵ်း ၸိူဝ်းတူင်ႉၼိုင်ႁဵတ်းသၢင်ႈၼႃႈၵၢၼ်ယူႇ ၼႂ်းမိူင်းတႆးပွတ်းႁွင်ႇ ဝႆႉၼင်ႇၼႆ။  

ထၢမ် – ယၢမ်းလဵဝ် ငဝ်းလၢႆးၼႂ်းထုင်ႉၼွင်ပိင် ပဵၼ်ဝႆႉၸိူင်ႉႁိုဝ်ၽွင်ႈၶႃႈ?

တွပ်ႇ – ဝၼ်းတီႈ 22/08/2025 တႄႉ ယဵၼ်ဝႆႉယူႇၶႃႈ။ မိူဝ်ႈသိုၼ်းတႄႉ သဵင်ၵွင်ႈသဵင်မၢၵ်ႇ ပၼ်းၵၼ်တင်းၶိုၼ်းယူႇ။ မိူဝ်ႈလဵဝ် ၵူၼ်းမိူင်းၼႂ်းထုင်ႉၼွင်ပိင် ဢွၼ်ၵၼ်ပၢႆႈၵႂႃႇတၢင်း ပုင်ႇဝူဝ်း၊ ႁၢႆးၵုၺ် တီႈသွင်ဝၢၼ်ႈၼႆႉ ၼမ်ဝႆႉဢေႃႈ။ မၢင်ၵေႃႉၵေႃႈ ပၢႆႈၵႂႃႇတၢင်းဝဵင်းလႃႈသဵဝ်ႈ။ ၼႂ်းထုင်ႉၼွင်ပိင်ၼႆႉ ယၢမ်းလဵဝ် ဢမ်ႇပေႃး မီးၵူၼ်းသင်ယဝ်ႉ။ ဢွၼ်ၵၼ်ပၢႆႈဢွၵ်ႇဝၢၼ်ႈမူတ်းယဝ်ႉဢေႃႈ။

ထၢမ် – ႁူဝ်ၼပ်ႉၵူၼ်းမၢတ်ႇၸဵပ်းလူႉတၢႆ ယွၼ်ႉၶိူင်ႈၵွင်ႈလူင်လႄႈ ႁိူဝ်းမိၼ်သိုၵ်းမၢၼ်ႈၼႆႉ တေမီးမွၵ်ႈၵႃႈႁိုဝ် ၸွင်ႇလႆႈႁူႉၸွမ်း သဵၼ်ႈမၢႆမၼ်းလႆႈတႅတ်ႈတေႃးၶႃႈ?

တွပ်ႇ – မိူဝ်ႈလဵဝ် ၼႂ်းထုင်ႉၼွင်ပိင်ၼႆႉ ပႆႇမီးၽႂ်ႁတ်းၶဝ်ႈၵႂႃႇတူၺ်းတႄႉတႄႉ။ ယၢမ်းလဵဝ် ပိုၼ်ႉတီႈၼၼ်ႉ တိုၵ်ႉပဵၼ်ဝႆႉပိုၼ်ႉတီႈ ၵႄႈၵၢင်ပၢင်တိုၵ်းၼႆလႄႈ ၶၢဝ်ႇၼႆႉပႆႇတႅတ်ႈၼႅတ်ႈလီ။ ၼႂ်းထုင်ႉၼွင်ပိင်ၼႆႉ ၾူၼ်းလႅင်းၵေႃႈ ဢမ်ႇလႆႈလီ။

ထၢမ် – ပီႈၼွင်ႉၼႂ်းထုင်ႉၼွင်ပိင် ၸိူဝ်းလႆႈပၢႆႈၽေးပၢင်တိုၵ်းၼႆႉ တင်းမူတ်းမီးမွၵ်ႈၵႃႈႁိုဝ် ပဵၼ်ၵူၼ်းဝၢၼ်ႈလႂ်လၢႆလၢႆၽွင်ႈၶႃႈ?

တွပ်ႇ – ၵူၼ်းပၢႆႈၽေးသိုၵ်းၼႆႉ တႄႉမိူဝ်ႈဝၼ်းတီႈ 21/08/2025 မႃး တီႈပုင်ႇဝူဝ်းၼႆႉၵူၺ်း တေမီးယူႇမွၵ်ႈ 2,000 ၵေႃႉ၊ ၸိူဝ်းမီး ယူႇတီႈႁၢႆးၵုၺ်ၼႆႉသမ်ႉ တေမီးယူႇမွၵ်ႈ 800 ၵေႃႉ၊ ဢၼ်ယူႇၸွမ်းဝၢၼ်ႈ ၸွမ်းႁိူၼ်း ၸိူဝ်းၼၼ်ႉ ၶဝ်ၵႂႃႇသွၼ်ႈယူႇဝႆႉၸွမ်း ႁိူၼ်းပီႈႁိူၼ်းၼွင်ႉၼႆလႄႈ ဢမ်ႇပႆႇၸၢင်ႈၵဵပ်းသဵၼ်ႈမၢႆမၼ်းတႅတ်ႈၼႅတ်ႈၶႃႈ။

ၵူၼ်းၸိူဝ်းယူႇဝႆႉၼႂ်းထုင်ႉၼွင်ပိင်ႁႄ ၵူၼ်းၸိူဝ်းပၢႆႈၽေးပၢင်တိုၵ်း တၢင်းၼွင်ၶဵဝ်မႃးယူႇဝႆႉဝၼ်းၼၼ်ႉႁႄၼႆ လၢမ်းၶၢတ်ႈဝႃႈ တင်းမူတ်းတေမီးယူႇမွၵ်ႈ သီႇႁဵင်ၵေႃႉၸိူဝ်းၼႆႉ။

ထၢမ် – ယၢမ်းလဵဝ် ၵူၼ်းပၢႆႈၽေးသိုၵ်း ၸွင်ႇမီးလွင်ႈယၢပ်ႇၽိုတ်ႇလႄႈ မီးတၢင်းလူဝ်ႇၸိူင်ႉႁိုဝ်ၽွင်ႈၶႃႈ?

တွပ်ႇ – တၢင်းယၢပ်ႇတႄႉၵေႃႈ ၸဵမ်မိူဝ်ႈပႆႇပၢႆႈၽေးၼၼ်ႉ ပေႃးယၢပ်ႇယူႇယဝ်ႉၶႃႈၼႃႇ။ မိူဝ်ႈလဵဝ်ႁမ်ႉ လႆႈသိုပ်ႇပၢႆႈၽေးထႅင်ႈၼႆ ၶႅၼ်းဢမ်ႇမီးတီႈလၢတ်ႈယဝ်ႉၶႃႈဢေႃႈ။ ဢၼ်လူဝ်ႇတၢင်းၵမ်ႉၸွႆႈၶိုၵ်ႉၶၵ်ႉလႄႈ လူဝ်ႇၼႃႇၼႃႇၼႆႉ ပဵၼ်ၶဝ်ႈၼမ်ႉတၢင်းၵိၼ်ၶႃႈဢေႃႈ။ လူဝ်ႇၼမ်ႁႄပိူၼ်ႈပဵၼ်ထီႉၼိုင်ႈယဝ်ႉၶႃႈ။ ၵွပ်ႈပိူဝ်ႈဝႃႈ တေလႆႈပၢႆႈတၢင်းလႂ် မိူဝ်ႈလႂ်၊ ႁိူဝ်းမိၼ်သမ်ႉ တေမႃးပွႆႇၶၢဝ်းလႂ်ၵေႃႈ ဢမ်ႇႁူႉ။ မၢင်ၵေႃႉၵေႃႈ ဢမ်ႇတၼ်းလႆႈဢဝ်သင်ၵႂႃႇ။

ထၢမ် – ယၢမ်းလဵဝ် ငဝ်းလၢႆးၵၢၼ်သိုၵ်းၼႂ်းပိုၼ်ႉတီႈတႄႉ ၼိမ်ဝႆႉယူႇၶႃႈၼေႃႈ။ ပဵၼ်ဝႆႉၸိူင်ႉႁိုဝ်ၽွင်ႈၶႃႈ?  

တွပ်ႇ – ဢၼ်ၼႆႉယဝ်ႉလီၵူဝ်ၼႃႇၶႃႈ။ ၵူၼ်းႁဝ်းၼႆႉ ပေႃးဝႃႈငဝ်းလၢႆးမၼ်းၼိမ် ဢိတ်းၼိုင်ႈယဝ်ႉၵေႃႈ ဢွၼ်ၵၼ်ၵႂႃႇတူၺ်း ၼၼ်ႉၼႃႇ။ ပေႃးဝႃႈ ၵိုင်ႉၵၢင်ႉပဵၼ်ပၢင်တိုၵ်းၶိုၵ်ႉၶၵ်ႉမႃးႁႄ ၵႂႃႇတူၺ်းၼႆ ၸၢင်ႈပဵၼ်ၽေးၼၼ်ႉၼႃႇ။

မိူၼ်ၸိူင်ႉသိုၵ်းမၢၼ်ႈၶဝ် မႃးပွႆႇမၢၵ်ႇၼႂ်းၵျွင်းပၢင်တီးၼၼ်ႉ ၽႂ်ၵေႃႈဢမ်ႇထၢင်ႇႁႄ လႆႈပဵၼ်ၵႂႃႇ။ မၼ်း ပဵၼ်ၶိုၵ်ႉၶၵ်ႉ မၼ်းဝႆးၼႃႇဢႃးလႃး။ မိူဝ်ႈလဵဝ် ၵၢၼ်ဝၢၼ်ႈၵၢၼ်မိူင်းၵၢၼ်သိုၵ်းၶဝ်ၼႆႉ ၶဝ်ႁဵတ်းၶိုၵ်ႉၶၵ်ႉ။ ပေႃးဝႃႈ ဢမ်ႇထၢင်ႇမႃးၼႆ ၶဝ်ႁမ်ႉမႃး။ ၶၢဝ်းယၢမ်းမၼ်း ဢမ်ႇပေႃးပၼ်ႁိုင်ၼၼ်ႉၼႃႇ။ ပေႃးဝႃႈႁိူဝ်းမိၼ်မႃးၼႆ မွၵ်ႈ 10 မိၼိတ်ႉၼႆႉၵူၺ်း ၶဝ်ပေႃး ၶိုၼ်ႈမႃးၽႅဝ်တၢင်းၼွင်ပိင် ၼႆႉယဝ်ႉ။ ၸင်ႇဝႃႈ ပေႃးယဵၼ်ၸိူင်ႉၼႆၼႆႉ ၸၢင်ႈပဵၼ်ၽေးတေႃႇၵူၼ်းမိူင်းႁဝ်းၼၼ်ႉၼႃႇ။ ၸင်ႇဝႃႈ ၶႂ်ႈႁႂ်ႈပၼ်ၾၢင်ႉၵူၼ်းမိူင်းႁဝ်း လွင်ႈၼႆႉ ပႃးၽွင်ႈ။

ထၢမ် – ယူႇတီႈၸုမ်းၸွႆႈထႅမ်ၵူၼ်းပၢႆႈၽေးသိုၵ်းသေ ၸွင်ႇမီးလွင်ႈတၢင်း ဢၼ်ၶႂ်ႈတိုၵ်းသူၼ်းထိုင် ၵူၼ်းမိူင်းၸိူဝ်းလႆႈပၢႆႈၽေး ပၢင်တိုၵ်းၽွင်ႈၶႃႈ?  

တွပ်ႇ – မိူဝ်ႈလဵဝ်ၼႆႉ ၽႂ်ယိပ်းၵွင်ႈလႆႈၵေႃႈမၼ်းပဵၼ်ၶုၼ်ၼၼ်ႉၼႃႇ။ ၵွပ်ႈၼၼ် ၼႂ်းၶၢဝ်းတၢင်းၵၢၼ်မိူင်း သုၵ်ႉသၵ်ႉယုင်ႈယၢင်ႈယူႇၼႆႉ ၼင်ႇႁိုဝ် တေဢဝ်တူဝ်ယူႇလွတ်ႈၵႂႃႇၼၼ်ႉ ႁႂ်ႈမီးသတိႁႄ ငိူင်ႉဝႄႈပၼ်ဝႆႉ ၵမ်းၼိုင်ႈ ႁင်းၽႂ်ႁင်းမၼ်းၼႆႉ ၶႅမ်ႉလိူဝ်ပိူၼ်ႈယဝ်ႉ။

ထၢမ် – ၸွင်ႇၶႂ်ႈတုၵ်းယွၼ်းသင်ထိုင်တီႈ ၸုမ်းယိပ်းၵွင်ႈၵၢင်ႇၶဝ်ၽွင်ႈၶႃႈ?  

တွပ်ႇ – ယၢမ်းလဵဝ် ၸုမ်းယိပ်းၵွင်ႈၵၢင်ႇၵေႃႈၼမ်ၼႃႇဢႃးလႃး။ ဢဝ်တေႃးသဝႃႈႁႄ ႁိမ်တီႈယူႇၵၼ်၊ ႁိမ်ဝၢၼ်ႈႁိမ်ဝဵင်းၵၼ်ၼႆႉ ပဵၼ်ၸူဝ်ႈၵႅပ်ႉၵူၺ်းၼႃႇ။ ဢၼ်လႆႈၶၢမ်ႇႁိုင်ၼႆႉသမ်ႉ ပဵၼ်ၵူၼ်းဝၢၼ်ႈ ၵူၼ်းမိူင်းၼႂ်းပိုၼ်ႉတီႈၵူၺ်း လႆႈတုၵ်ႉၶယၢပ်ႇၽိုတ်ႇၶၢၼ်ၸႂ်။ ၸင်ႇဝႃႈ ပေႃးဝႃႈတေဢမ်ႇဢၢပ်ႈပဵၼ်လႆႈယဝ်ႉၼႆၵေႃႈ ၶႂ်ႈႁႂ်ႈတင်းသွင်ပႃႈသွင်ၾၢႆႇ ဢုပ်ႇဢူဝ်းငူပ်ႉငီႉၵၼ်ၵႂႃႇၼိူဝ်ၽိူၼ် ႁႂ်ႈပေႃးလႆႈၶေႃႈတွပ်ႇမၼ်းၵႂႃႇၼႆ မၼ်းတေၶႅမ်ႉလိူဝ်ႁႄ ဢၼ်ႁဝ်းမႃးတိုၵ်းၵၼ်။ ပေႃးႁဵတ်းၸိူင်ႉၼၼ် ၵူၼ်းမိူင်းၵေႃႈ တေယူႇလႆႈလွတ်ႈၽေးၼၼ်ႉၶႃႈ ဢေႃႈ။

ထၢမ် – ၼွၵ်ႈလိူဝ်ဢၼ်ၶႃႈဢမ်ႇလႆႈထၢမ်ပႃးၵႂႃႇၼၼ်ႉ ၸွင်ႇမီးသင်ၶႂ်ႈလၢတ်ႈပၼ်တၢင်းႁၼ်ထိုင်၊ ပၼ်ၾၢင်ႉ၊ ၸီႉၸမ်ႈၼႄႉၼမ်း ၸိူင်ႉႁိုဝ်ထႅင်ႈၶႃႈ?

တွပ်ႇ – ၽွင်းပဵၼ်ပၢင်တိုၵ်းၼႆႉ ၵူၼ်းမိူင်းဢမ်ႇၸၢင်ႈၵႂႃႇမႃးလႆႈလွတ်ႈလႅဝ်း၊ ဢမ်ႇမီးလွင်ႈႁူမ်ႇလူမ်ႈ။ ၵမ်းၼႆႉ ၸုမ်းယိပ်းၵွင်ႈၵၢင်ႇၼႆႉ ထၢင်ႇထိူမ်တေႃႇၵူၼ်းမိူင်းဝႃႈ ၵူၼ်းၵဝ်ဢိူဝ်ႈ ၵူၼ်းမႂ်းဢိူဝ်ႈၼႆၼၼ်ႉ။ ပေႃးပဵၼ်ၼႆမႃး ၸၢဝ်းၶိူဝ်းၼင်ႇၵၼ် ၸၢင်ႈမီးပၼ်ႁႃတေႃႇၵၼ်သေ မိူဝ်းၼႃႈထႃႈပၢႆမႃး တႃႇပူၵ်းပွင်ဝၢၼ်ႈ မိူင်းၵႂႃႇၼၼ်ႉ တေၸၢင်ႈမီးပၼ်ႁႃ ႁူပ်ႉလွင်ႈယၢပ်ႇမႃး။ ၼင်ႇႁိုဝ် တေဢမ်ႇမီးပၼ်ႁႃ လွင်ႈထၢင်ႇထိူမ် ၼႂ်းၸၢဝ်းၶိူဝ်းၼင်ႇၵၼ်ၼၼ်ႉ ၶႃႈတႄႉႁၼ်ထိုင်ဝႃႈ ယိပ်းၵွင်ႈဝႆႉယူႇသေတႃႉၵေႃႈ ယႃႇႁႂ်ႈလႆႈၸႂ်ႉဢႃႇ ၼႃႇတေႃႇၵၼ် ၼႆ ၶႃႈဢေႃႈ။  

ယိၼ်းၸူမ်းၶွပ်ႈၸႂ်ယႂ်ႇၼမ်ၶႃႈ တီႈဢၼ်ဝႆႉၶၢဝ်းယၢမ်း ဢၼ်မီးၵႃႈၶၼ်သေ တွပ်ႇပၼ်ႁဝ်းၶႃႈဢေႃႈ။