ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် ၵမ်ႈၼမ် ဢွၼ်ၵၼ်ပွၵ်ႈၶိုၼ်းႁိူၼ်းယေးသေ ထူပ်းတၢင်းယၢပ်ႇၽိုတ်ႇဝႆႉ လွင်ႈတီႈယူႇတၼ်းသဝ်း မိူဝ်ႈၽွင်းပဵၼ်ပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ၼၼ်ႉ ႁိူၼ်းယေးၵူၼ်းမိူင်း ၺႃးမၢၵ်ႇလူင်တူၵ်းသႂ်ႇလူႉၵွႆလႄႈ ၺႃးၾႆးၽဝ်ပႅတ်ႈ ၸိူဝ်းၼႆႉ တင်းၼမ်။

ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “လႅဝ်ၼမ်ၼႃႇၶႃႈ ႁိူၼ်းယေးတႄႉ ဢၼ်ၵိုတ်းဝႆႉႁိူၼ်းပဵၼ်လင်တႄႉ ဢမ်ႇမီးၼမ်ယဝ်ႉၶႃႈ။ မၢင်ႁိူၼ်းၵေႃႈ ၺႃး ၽဝ်၊ မၢင်ႁိူၼ်းၵေႃႈ ၺႃးၸၢၵ်ႇမၢၵ်ႇ။ မၢင်ႁိူၼ်း ၵိုတ်းၼင်လိၼ်မၼ်းၵူၺ်းၶႃႈဢေႃႈ။ လင်ႁိူၼ်း 200 ပၢႆၼႆႉ ၶႂ်ႈဝႃႈၵွႆတင်းဝၢၼ်ႈယဝ်ႉၶႃႈ။ ၵိုတ်းဝႆႉၽႃဢုတ်ႇမၼ်း ၼိုင်ႈဢိတ်းၼိုင်ႈဢွတ်းၸိူင်ႉၼၼ်ၵူၺ်းၶႃႈ”- ဝႃႈၼႆ။

ၽွင်းၵူၼ်းမိူင်း ဢွၼ်ၵၼ်ပၢႆႈၽေးသိုၵ်းယူႇၼႆႉ ၶူဝ်းႁိူၼ်းယေး ဢၼ်ၵိုတ်းဝႆႉတၢင်းလင် ၸိူဝ်းၼၼ်ႉၵေႃႈ ၺႃးၵူၼ်းၶဝ်ႈသွၵ်ႈတဝ်လၵ်ႉဢဝ်ၵႂႃႇတင်းၼမ်။

“ႁိူၼ်းယေးတႄႉ ၺႃးသွၵ်ႈတဝ်ပေႇၸႂ်ယဝ်ႉ။ ႁိူၼ်းလႂ်လႄႈ ဢမ်ႇၺႃးသွၵ်ႈတဝ်ၼႆႉ ၶႂ်ႈဝႃႈဢမ်ႇမီးသေ လင်ယဝ်ႉ။ ႁိူၼ်းယေးၵေႃႈ ဢမ်ႇလီသေဢိတ်းယဝ်ႉ။ မႅၼ်ၵေႃႈမႅၼ် ပေႃး ၾူၼ်မႃးႁိူၼ်းသမ်ႉႁူဝ်ႈ။ သိူဝ်ႈၶူဝ်းၸိူဝ်းၼႆႉၵေႃႈ မၢၵ်ႇမိူဝ်ၸွမ်းၼႂ်းႁိူၼ်းမူတ်း။ သၢႆၾႆးဢၼ်ဢဝ်ၶဝ်ႈမႃးတီႈတၢင်းၵႃးသေထိုင်ႁိူၼ်း ၸိူဝ်းၼၼ်ႉၵေႃႈ ဢမ်ႇမီးယဝ်ႉ။ ၶဝ်တတ်းဢဝ်ၵႂႃႇမူတ်း ဢမ်ႇမီးသင်ယဝ်ႉ တီႈႁိူၼ်းတႄႉ။ လႆႈမိူဝ်းပၢတ်း ၽဵဝ်ႈႁိူၼ်းၼႆႉ ပဵၼ် 4-5 ဝၼ်းၵေႃႈ ဢမ်ႇယဝ်ႉၶႃႈ။ ယၢပ်ႇၶႃႈဢေႃႈ ပေႃးဝႃႈလႆႈၾႆးၶိုၼ်းၵေႃႈ ၽႂ်ဢမ်ႇဢဝ်ယဝ်ႉၶႃႈယူဝ်ႉ ဢမ်ႇမီးငိုၼ်းမီးတွင်းသင်ယဝ်ႉ။ တေႃႈၼင်ႇ သၢႆၾႆးတီႈၵျွင်းမုၼ်ၸဝ်ႈ ယင်းဢမ်ႇၵိုတ်းဢဝ်ၵႂႃႇမူတ်း”- ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

မိူဝ်ႈၽွင်းပဵၼ်ပၢင်တိုၵ်းၵၼ်ၼၼ်ႉ မၢၵ်ႇၵွင်ႈလူင်မၢၵ်ႇမႅင်း ၸိူဝ်းၼႆႉ ဢၼ်ပႆႇတႅၵ်ႇၵေႃႈ တိုၵ်ႉၵိုတ်းဝႆႉယူႇလႄႈ ယွၼ်ႉၼၼ် သင်ၵူၼ်းပၢႆႈၽေးသိုၵ်း ပွၵ်ႈမိူဝ်းယူႇၶိုၼ်းတႄႉၸိုင် ယင်းလႆႈမႆႈၸႂ်ပႃးမၢၵ်ႇမႅင်းၸိူဝ်းၼၼ်ႉ ထႅင်ႈလူႉၵွၼ်ႇ။

“တေလႆႈဝႆႉသတိ တူၺ်းသေၵႂႃႇမႃးၶႃႈယဝ်ႉ။ ၵမ်ႈၽွင်ႈၵေႃႈ ၺႃးၶႃႈဢေႃႈ။ မၢၵ်ႇဢၼ်ပႆႇတႅၵ်ႇၸိူဝ်းၼႆႉ ၵေႃႈမီးဢေႃႈ။ မိူဝ်ႈ 4-5 ဝၼ်းပူၼ်ႉမႃးၼၼ်ႉ ၵူၼ်းဝၢၼ်ႈပၢင်ၺွင်ႇၶဝ် မိူဝ်းပတ်းၽဵဝ်ႈႁိူၼ်းသေ ၺႃးမၢၵ်ႇတႅၵ်ႇသႂ်ႇ တိူဝ်ႉၺႃးတီႈပဵမ်ႉ ပဵၼ်ၵူၼ်းၸၢႆးၶႃႈဢေႃႈ”- ၵူၼ်းပၢႆႈၽေးသိုၵ်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

ၵူၼ်းမိူင်း ဢၼ်လႆႈပၢႆႈၽေးသိုၵ်း ၼပ်ႉႁူဝ်ႁဵင် ၼႂ်းၸႄႈဝဵင်းၼွင်ၶဵဝ်ၼႆႉ ယွၼ်ႉပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်းသေ ၸင်ႇလႆႈပၢႆႈၽေးသိုၵ်းၵၼ် ႁိုင်ၶၢဝ်းတၢင်း 2 ပီပၢႆ။ ယၢမ်းလဵဝ် ၼႂ်းၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈ ယိုတ်းၵုမ်းလႆႈၶိုၼ်းယဝ်ႉၼႆ ၾၢႆႇသိုၵ်းမၢၼ်ႈၶဝ် ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 18/07/2025 ၼၼ်ႉသေ ၵူၺ်းၵႃႈ ယူႇတီႈ ၵူၼ်းပၢႆႈၽေးသိုၵ်းၶဝ်တႄႉ တိုၵ်ႉလႆႈမႆႈၸႂ် လွင်ႈႁူမ်ႇလူမ်ႈဝႆႉယူႇ ဝႃႈၼႆ။