တႄႇဢဝ် မိူဝ်ႈၼႆႉဝၼ်းတီႈ 22/08/2025 ယၢမ်းၵၢင်ၼႂ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA ဝႆႉ 7 ၸုမ်းလႄႈ ၶွမ်ႊမတီႊ ဢုပ်ႇဢူဝ်းလွင်ႈငမ်းယဵၼ် ၶွင်ၸုမ်းသိုၵ်းမၢၼ်ႈ NSPNC ႁူပ်ႉထူပ်းဢုပ်ႇဢူဝ်းၵၼ် လွင်ႈတႃႇႁူမ်ႈၵၼ် ၸတ်းႁဵတ်းပၢင်ၶွပ်ႈၶူပ်ႇ NCA တဵမ် 10 ပီ တီႈဝဵင်းလူင်ၼေႇပျီႇတေႃႇ။
ၽူႈလဵပ်ႈႁဵၼ်း ၵၢၼ်မိူင်း၊ ၵၢၼ်သိုၵ်း ၼႂ်းမိူင်းတႆး၊ မိူင်းႁူမ်ႈတုမ် ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ –“ၽူႈၼမ်းၸုမ်းသိုၵ်းၸၢဝ်းၶိူဝ်း 7 ၸုမ်းၼႆႉ ႁွတ်ႈၽႅဝ်ၵႂႃႇတီႈၼေႇပျီႇတေႃႇ ၸဵမ်မိူဝ်ႈဝႃးယဝ်ႉ။ ၼႂ်ၼႆႉ တႄႉ ၶဝ်တႄႇႁူပ်ႉဢုပ်ႇၵၼ်ယူႇယဝ်ႉ။ လႆႈငိၼ်းဝႃႈ ပၢင်ၶွပ်ႈၶူပ်ႇတဵမ် 10 ပီ NCA ၼႆႉ တေႁူမ်ႈၵၼ် ၸတ်းႁဵတ်းၵႂႃႇ ႁႂ်ႈပေႃးၶိုၵ်ႉၶႅမ်ႉ။ ၸုမ်း NSPNC ၼႆႉ သိုၵ်းမၢၼ်ႈ ပိုၼ်ၽၢဝ်ႇ ယႃႉပႅတ်ႈသေ ၶိုၼ်းၶွတ်ႇၽွတ်ႈဝႆႉမႂ်ႇမႂ်ႇ။ ၶိုၼ်းပဵၼ်ၸိုဝ်ႈၼႆႉၵူၺ်းၼင်ႇၵဝ်ႇ”- ဝႃႈၼႆ။
ၼႂ်းပၢင်ႁူပ်ႉထူပ်းဢုပ်ႇဢူဝ်းၵၼ် တီႈၼေႇပျီႇတေႃႇပွၵ်ႈၵမ်းၼႆႉ ၾၢႆႇၸုမ်းသိုၵ်းၸၢဝ်းၶိူဝ်း မီးတူဝ်တႅၼ်း လၢႆလၢႆၸုမ်းၶဝ်ႈႁူမ်ႈၸွမ်း။ တူဝ်တႅၼ်းၾၢႆႇၶွင်ႇသီႇဢဝ်ၶိုၼ်းၸိုင်ႈတႆး (RCSS) ၼႆႉ ပဵၼ်ၽူႈၼမ်းၼႂ်းမၢႆ (1) ၸဝ်ႈသိုၵ်းလူင် ၸၢႆးငိုၼ်း၊ ၾၢႆႇၸုမ်းသိုၵ်းယၢင်း KNU/KNLA (PC) ပဵၼ်ၸဝ်ႈသိုၵ်းလူင် သေႃးၵျေႃႇၺုၼ်ႉ၊ တူဝ်တႅၼ်း ၾၢႆႇၸုမ်းသိုၵ်းၸၢဝ်းၶိူဝ်းမွၼ်း(NMSP) တႄႉ ပဵၼ်ၽူႈပွင်ၵၢၼ် ငဝ်ႈငုၼ်း ဢူးဢွင်ႇမငႄးလႄႈ ဢူးမဵဝ်းဝိၼ်း ၶဝ်ႈႁူမ်ႈဢုပ်ႇဢူဝ်းၵႂႃႇ ၼႆယဝ်ႉ။
ပၢင်ၵုမ်တႃႇၸတ်းႁဵတ်းပၢင်ၵႅဝ်ႈ ၶွပ်ႈၶူပ်ႇ 10 ပီတဵမ် NCA ၼႆႉ မိူဝ်ႈပူၼ်ႉမႃး ဝၼ်းတီႈ 15 ၼႆႉၵေႃႈ တူဝ်တႅၼ်းသိုၵ်းမၢၼ်ႈ NSPNC တင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 7 ၸုမ်း ၸိူဝ်းလူင်းလၢႆးမိုဝ်းၵိုတ်းတိုၵ်း NCA ဝႆႉ ႁူပ်ႉထူပ်းဢုပ်ႇဢူဝ်းၵၼ် ၼိူဝ်ဢွၼ်ႊလၢႆႊ ပွၵ်ႈၼိုင်ႈယဝ်ႉ။ ယၢမ်းလဵဝ်သမ်ႉ တၢမ်တူဝ် ၸုမ်းတူဝ်တႅၼ်းတင်းသွင်ၾၢႆႇ ၵႂႃႇႁူပ်ႉထူပ်းၵၼ်ထႅင်ႈၼႆ ၽူႈလူင်ႉလႅၼ်ႇၵၢၼ်မိူင်း၊ ၵၢၼ်သိုၵ်း ၼႂ်းမိူင်းႁူမ်ႈတုမ် လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“တင်းၾၢႆႇၸုမ်းသိုၵ်းၸၢဝ်းၶိူဝ်း 7 ၸုမ်းၼႆႉတႄႉဝႃႈ တႃႇတေၸတ်းႁဵတ်းပွႆးၼႆႉ ၶဝ်တေလႆႈဢုပ်ႇဢူဝ်း ငူပ်ႉငီႉၵၼ်လီလီယဝ်ႉ မၵ်းမၼ်ႈတူၵ်းလူင်းလႆႈၸႂ်ၵၼ်လီငၢမ်းယဝ်ႉ ၸင်ႇတေၸတ်းႁဵတ်းပွႆးၵႂႃႇ။ သင်ဝႃႈ ၾၢႆႇသိုၵ်းမၢၼ်ႈၶဝ် တေၶိုင်ႁဵတ်းၸဝ်ႈႁိူၼ်းသေ ဝႆႉၸုမ်းယိပ်းၵွင်ႈၵၢင်ႇ 7 ၸုမ်း ပဵၼ်ၶႅၵ်ႇၵႂႃႇၶဝ်ႈႁူမ်ႈ ၸိူင်ႉၼၼ်ၵူၺ်းတႄႉ ၸိူဝ်းပဵၼ်ႁူဝ်ပဝ်ႈ ၸုမ်း EAO ၶဝ် တေဢမ်ႇၵႂႃႇၶဝ်ႈႁူမ်ႈၼမ်”။
ပေႃးထိုင်မႃး ဝၼ်းတီႈ 15/10/2025 တေထိုင်မႃးၼႆႉ တေပဵၼ်ဝၼ်းၶွပ်ႈၶူပ်ႇ 10 ပီတဵမ် NCA ယဝ်ႉလႄႈ လႆႈႁူႉဝႃႈ တေၽိတ်ႈမွၵ်ႇပႃး ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းလူင် ယွတ်ႈသိုၵ်းလႄႈ ႁူဝ်ပဝ်ႈၵဝ်ႇ ၸုမ်းသိုၵ်းယၢင်းၽိူၵ်ႇ (KNU) ၸေႃးမူႇတူးသေးၽူဝ်းၶဝ် ၶဝ်ႈႁူမ်ႈၸွမ်း ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ