ယၢမ်းလဵဝ် ၵူၼ်းပၢႆႈၽေးသိုၵ်းၵျွၵ်ႉမႄး ပၢႆႈႁွတ်ႈထိုင်ဝႆႉ တီႈဝဵင်းလႃႈသဵဝ်ႈ ႁူဝ်ၵူၼ်းမွၵ်ႈ 500 ၵေႃႉ ယၢပ်ႇၽိုတ်ႇဝႆႉ လွင်ႈၶဝ်ႈၼမ်ႉတၢင်းၵိၼ်လႄႈ လွင်ႈယူႇသဝ်း – ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈလၢတ်ႈ။

“ၵူၼ်းပၢႆႈၽေးသိုၵ်းႁဝ်းၶႃႈ မွၵ်ႈ 500 ၵေႃႉၼႆႉ ယၢပ်ႇၽိုတ်ႇဝႆႉ လွင်ႈတီႈယူႇသဝ်း၊ လွင်ႈၵိၼ်ယႅမ်ႉ ၸိူဝ်းၼႆႉဢေႃႈ။ တေႃႈလဵဝ် ၵူၼ်းပၢႆႈၽေးႁဝ်းၶႃႈ ယူႇဝႆႉၸွမ်းႁိူၼ်းယေးပီႈၼွင်ႉ ၽႂ်မၼ်းၶႃႈဢေႃႈ။ ယၢမ်းလဵဝ် ႁဝ်းၶႃႈ တိုၵ်ႉဢွၼ်ၵၼ်ႁၢင်ႈႁႅၼ်းပၼ် တီႈၵေႃလိၵ်ႈလၢႆးၶႃႈဢေႃႈ။ ၵူၼ်းပၢႆႈၽေးသိုၵ်းႁဝ်း ဢၼ်ပၢႆႈမႃး ၼႆႉ တေပဵၼ်ၵူၼ်းၼႂ်းဝဵင်းၵျွၵ်ႉမႄးတင်း ၼွင်ပိင် ၸိူဝ်းၼႆႉၶႃႈ”- ဝႃႈၼႆ။

မိူဝ်ႈဝၼ်းတီႈ 20/08/2025 ၼၼ်ႉ သိုၵ်းမၢၼ်ႈ ၸႂ်ႉႁိူဝ်းမိၼ် ပွႆႇမၢၵ်ႇသႂ်ႇတီႈၼႂ်းဢိူင်ႇၼွင်ပိင် ၸႄႈဝဵင်းၵျွၵ်ႉမႄး လိူဝ်ၼၼ်ႉ သိုၵ်းမၢၼ်ႈတင်း သိုၵ်းတဢၢင်း TNLA ၵေႃႈ ပဵၼ်ပၢင်တိုၵ်းၵၼ်ႁၢဝ်ႈႁႅင်းထႅင်ႈ တေႃႇထိုင်ဝၼ်းမိူဝ်ႈၼႆႉ။  

ဢိင်ၼိူဝ် လွင်ႈႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇတီႈဢိူင်ႇၼွင်ပိင်ၼႆႉသေ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလႆႈလူႉတၢႆမွၵ်ႈ 20 ၵေႃႉ မၢတ်ႇၸဵပ်းမွၵ်ႈ 50 ၵေႃႉ ႁူမ်ႈပႃး ၵူၼ်းပၢႆႈၽေးသိုၵ်းၼွင်ၶဵဝ် ဢၼ်ပၢႆႈမႃးသွၼ်ႈဝႆႉ တီႈၵျွင်းၵၢင် ဝၢၼ်ႈပၢင်တီး ၼၼ်ႉထႅင်ႈ။

“ၵူၼ်းမၢတ်ႇၸဵပ်း တီႈဝဵင်းၵျွၵ်ႉမႄး ဢၼ်ႁွတ်ႈထိုင်မႃးတီႈႁူင်းယႃလူင်လႃႈသဵဝ်ႈၼႆႉ မိူဝ်ႈၶမ်ႈသိုၼ်း ဝၼ်းတီႈ 20 ၼၼ်ႉ ႁွတ်ႈထိုင်မႃး 23 ၵေႃႉ၊ မိူဝ်ႈဝႃး ဝၼ်းတီႈ 21 ယၢမ်းဝၢႆးဝၼ်း 1 မူင်းသမ်ႉ ႁွတ်ႈထိုင်မႃးထႅင်ႈ 11 ၵေႃႉ ႁူမ်ႈၵၼ်တင်းမူတ်းႁွတ်ႈထိုင်ဝႆႉ 34 ၵေႃႉ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ယူႇတီႈၸုမ်းၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈ လႆႈဢွၼ်ၵၼ်ႁၢင်ႈႁႅၼ်း ဢဝ်ၶဝ်ႈၽၵ်းၸွၵ်းလဵင်ႉလူပၼ် တီႈၵူၼ်းမၢတ်ႇၸဵပ်းလႄႈ ၵူၼ်းၸိူဝ်းမႃးပႂ်ႉၵူၼ်းပဵၼ် တီႈႁူင်းယႃလႃႈသဵဝ်ႈၼႆႉ မွၵ်ႈ 70 ၵေႃႉ ၼႆယဝ်ႉ။