မိူဝ်ႈၼႆႉ ဝၼ်းတီႈ 20 /8/2025 ယၢမ်းၵၢင်ဝၼ်း 11 မူင်းပၢႆ သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႅၼ်း  500 ပွၼ်ႊ သွင်လုၵ်ႈ တီႈဝဵင်းၵျွၵ်ႉမႄး ၵူၼ်းမိူင်းမၢတ်ႇၸဵပ်း 20 ပၢႆ လူႉတၢႆ 20 ပၢႆ။

မၢၵ်ႇလူင် တူၵ်းသႂ်ႇၵျွင်းၵၢင် ဝၢၼ်ႈၼွင်ပိင် လုၵ်ႈၼိုင်ႈ လႄႈ တူၵ်းတီႈဝၢၼ်ႈလုၵ်းပႃ ႁိမ်းၸမ်ႁူင်းပလိၵ်ႈ လုၵ်ႈၼိုင်ႈ  ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“  ႁိူဝ်းမိၼ်မႃးပွႆႇမၢၵ်ႇတူၵ်းသႂ်ႇၵၢင်ဝၢင်း ၵျွင်းၵၢင်  ၵမ်းလဵဝ်  ၊ မၢင်ၸိူဝ်းတိၼ်ပုတ်း ၊ မၢင်ၸိူဝ်းၵေႃႈ တၢႆထင်တီႈ ၊ မၢင်ၸိူဝ်းတင်းဢမ်ႇႁႃႁၼ်ၶၢပ်ႈတူဝ် ယိၼ်းဝႃႈ  တၢႆ 20 ပၢႆ ၊ မၢတ်ႇၸဵပ်း 20 ပၢႆၼႆ ”- ဝႃႈၼႆ ။

ယၢမ်းလဵဝ် သိုၵ်းမၢၼ်ႈသိုပ်ႇထူဝ်းသိုၵ်းၶဝ်ႈမႃးႁိမ်းၸမ် ဝၢၼ်ႈၼွင်ပိင်လႄႈ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်ဝႆႉ  ၵူၼ်းပိုၼ်ႉတီႈလႆႈယိၼ်းသဵင်ၵွင်ႈသဵင်မၢၵ်ႇဢမ်ႇထၢတ်ႇ လႆႈငိူင်ႉပၢႆႈၽေးသိုၵ်းထႅင်ႈ   ။

ၼၢင်းယိင်းဢႃယု 20 ပၢႆလၢတ်ႈၽူႈတွႆႇႁွၵ်ႈဝႃႈ -“ ၵူၼ်းပၢႆႈၽေးသိုၵ်းမႃးပိုင်ႈ ၵျွင်းမုၼ်ၸဝ်ႈသေ ယူႇသဝ်းဝႆႉၼမ်ၼႃႇ။ မိူဝ်ႈဝႃး ယွၼ်ႉယိၼ်းသဵင်ၵွင်ႈသဵင်မၢၵ်ႇ လႄႈ ၵူၼ်းပၢႆႈၽေးသိုၵ်း လုၵ်ႉၼွင်ပိင် ၵိုင်ႉၵၢင်ႉလႆႈပၢႆႈ ၵႂႃႇတၢင်း ဝၢၼ်ႈၵုင်းၺွင်ႇ မၢင်ၸိူဝ်း ပၢႆႈၵႂႃႇတင်းၼမ်ႉႁၢင်ႈၶိူင်ႈ ၊ သိုၵ်းမၢၼ်ႈ သမ်ႉဢဝ်ႁိူဝ်းမိၼ်သိုၵ်းမႃးပွႆႇမၢၵ်ႇသႂ်ႇလႄႈ ၸိူဝ်းဢမ်ႇတၼ်းပၢႆႈတိူဝ်ႉမၢတ်ႇၼမ်။ ပဵၼ်ၵူၼ်းတၢင်း ဝၢၼ်ႈပၢင်တီး ၵျွင်းၵၢင်။ တၢႆၵေႃႈ  တၢႆၼမ်ၼႃႇ” – ဝႃႈၼႆ ။

ယွၼ်ႉပၢင်တိုၵ်းသိုၵ်းသိူဝ် ၼႂ်းႁူဝ်လိူၼ်ၵျူႊလၢႆႊၼႆႉသေ ၵူၼ်းမိူင်းၼႂ်းၸႄႈဝဵင်းၼွင်ၶဵဝ် ဢွၼ်ၵၼ် ပၢႆႈၵႂႃႇသွၼ်ႈဝႆႉ တၢင်းၼွင်ပိင်ၼမ်။ ဢိင်ၼိူဝ်သိုၵ်းမၢၼ်ႈၵႆႉပိုတ်းယိုဝ်းၵွင်ႈလူင်ၸိူင်ႉၼႆသေ ၵူၼ်းမိူင်း လႄႈၵူၼ်းပၢႆႈၽေးသိုၵ်းတီႈၼွင်ပိင် ဢွၼ်ၵၼ်ပၢႆႈၵႂႃႇတၢင်းဝၢၼ်ႈလုၵ်းပႃ ထႅင်ႈ  လႆႈႁူႉၼင်ႇၼႆ။

မိူၼ်ၼႆၼင်ႇၵဝ်ႇမိူဝ်ႈပူၼ်ႉမႃးလိူၼ်ၵျူႊလၢႆႊဝၼ်းတီႈ 30  ယၢမ်းၵၢင်ဝၼ်း 11 မူင်းၼၼ်ႉ သိုၵ်းမၢၼ်ႈ လုၵ်ႉတၢင်း ၸႄႈဝဵင်း ၼွင်ၶဵဝ် ယိုဝ်းၵွင်ႈလူင်ၵႂႃႇတၢင်း ၸႄႈဝဵင်းၵျွၵ်ႉမႄး 10 လုၵ်ႈ တူၵ်းသႂ်ႇ ၵျွင်းတူၵ်း တီႈဢိူင်ႇၼွင်ပိင်လူႉၵွႆ၊ တိူဝ်ႉၺႃး ၸဝ်ႈသၢင်ႇ ပႃးၼိုင်ႈ ၶႅၼ်သၢႆႉၶၢတ်ႇ  ထိုင်တီႈလူႉလွၼ်ႇ၊ မၢတ်ႇၸဵပ်းႁၢဝ်ႈႁႅင်း 4 တူၼ် ။

ၸူဝ်ႈသိုၵ်းမၢၼ်ႈယိုတ်းလႆႈၶိုၼ်းဝဵင်းၼွင်ၶဵဝ် ၼႆႉ ၶဝ်လုၵ်ႉတၢင်းႁူဝ်ၵိုတ်ႈသေ ယိုဝ်းၵွင်ႈလူင် ပွႆႇမၢၵ်ႇၵႂႃႇတၢင်းဝဵင်းၵျွၵ်ႉမႄး မီး 4 ပွၵ်ႈယဝ်ႉ။ ႁဵတ်းႁႂ်ႈၵူၼ်းမိူင်းလူႉတၢႆ  ႁိူၼ်းၵူၼ်းမိူင်း လူႉၵွႆၵႂႃႇၸွမ်းတင်းၼမ် ။

ၼႂ်းလိူၼ်ဢေႃးၵတ်ႊသ်ၼႆႉ သိုၵ်းမၢၼ်ႈတင်း သိုၵ်းတဢၢင်း မီးပၢင်ဢုပ်ႇဢူဝ်းၵၼ် ၼႂ်းမိူင်းၶႄႇၼႆလႄႈ ၾၢႆႇသိုၵ်းမၢၼ်ႈၵေႃႈ ၶတ်းၸႂ်ၸႂ်ႉတိုဝ်းႁိူဝ်းမိၼ်တိုၵ်း၊ ၶိူင်ႈၵွင်ႈလူင်ၸိူဝ်းၼႆႉ ပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်ဝႆႉ  ဢမ်ႇထၢတ်ႇ   ။ ၾၢႆႇၼိုင်ႈတၢင်းၼိုင်ႈ တဵၵ်းၸႂ်ႉၵူၼ်းမိူင်း ၼႂ်းမိူင်းတႆးပွတ်းၸၢၼ်းဢွၵ်ႇၼေၵၢင်ၸႂ်သၢၼ်ၶတ်းသိုၵ်းဢူၺ်းလီ 3 ၸုမ်းၼႂ်းမိူင်းတႆးပွတ်းႁွင်ႇယူႇၵူႈမိုဝ်ႉၵူႈဝၼ်း။