သိုၵ်း KNDF ပိုၼ်ၽၢဝ်ႇပၼ်ၾၢင်ႉၵူၼ်းပၢႆႈၽေးသိုၵ်း ၸိူဝ်းယူႇၾၢႆႇဢွၵ်ႇ ၼမ်ႉၽီလူး ဢၼ်မီးၼႂ်း ၸႄႈဝဵင်းမိူင်းပၢႆး လႅၼ်လိၼ်တႆး – ယၢင်းလႅင်ၼၼ်ႉ ႁႂ်ႈၶၢႆႉပၢႆႈ ၼႂ်းၶၢဝ်းတၢင်းသၢမ်ဝၼ်းဝႃႈၼႆ ။

သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈမႃးတင်း ၾၢႆႇဢွၵ်ႇၼမ်ႉထႅင်ႈလႄႈ ၸၢင်ႈပဵၼ်ပၢင်တိုၵ်းသိုၵ်းသိူဝ် ဢမ်ႇ ၼၼ် ၵူဝ်ပဵၼ် ၽေးတေႃႇၵူၼ်းဝၢၼ်ႈ ။ ၵွပ်ႈၼႆတႄႇဝၼ်းတီႈ 19/8/2025 ထိုင် ဝၼ်းတီႈ 21 /8/2025 ၼႂ်းၶၢဝ်းတၢင်း သၢမ်ဝၼ်း ႁႂ်ႈၵူၼ်းပၢႆႈၽေးသိုၵ်း ဢၼ်မီးၾၢႆႇဢွၵ်ႇၼမ်ႉၽီလူးၼၼ်ႉ ငိူင်ႉၵႂႃႇ ယူႇဝႆႉ တၢင်ႇတီႈ တီႈတေလွတ်ႈၽေး  – ဝႃႈၼႆ  ။  

လုၵ်ႈၸုမ်း KNDFၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈထႅမ်ႁႅင်းသိုၵ်းမႃးတၢင်း ၾၢႆႇဢွၵ်ႇ ၼမ်ႉၽီလူးလႄႈ  ၾၢႆႇတူၵ်းမိူင်းပၢႆး  ။ တၢင်းၼၼ်ႉတေမီးမွၵ်ႈ 20 ဝၢၼ်ႈၼႆႉ ၊ လႆႈၸႂ်ႉၶၢႆႉဝႆႉၵူႈဝၢၼ်ႈ ၊ တင်းဢွၵ်ႇၾၢႆၶုၼ်လႄႈ  တီႈမူၵ်းသိူဝ် ၸိူဝ်းၼႆႉသိုၵ်းမၢၼ်ႈ ဢဝ်တီႈယူႇဝႆႉ မူတ်းယဝ်ႉ ၊ ပေႃးၶဝ်ထူဝ်း သိုၵ်းၶဝ်ႈ ပဵၼ်ပၢင်တိုၵ်းၵၼ်ၼႆႉ ၵူဝ်ၵူၼ်းပိုၼ်ႉတီႈဢမ်ႇၸၢင်ႈပၢႆႈလႄႈ ၸႂ်ႉငိူင်ႉပၢႆႈဝႆႉ တလဵဝ် ” – ဝႃႈၼႆ ။

ယၢမ်းလဵဝ်ၼႃႈတီႈဢၼ်သိုၵ်းမၢၼ်ႈၵုမ်းဝႆႉၼၼ်ႉ သိုၵ်းမၢၼ်ႈတဵၵ်းၸႂ်ႉ ၵူၼ်းပၢႆႈၽေးသိုၵ်း ပွၵ်ႈၶိုၼ်း ႁိူၼ်းယေး တွၼ်ႈတႃႇတေၵုမ်းၵမ်ၼႃႈလိၼ် ပၢင်လိူၵ်ႈတင်ႈၼႆသေ သိုၵ်းမၢၼ်ႈထူဝ်းသိုၵ်း ၶဝ်ႈမႃး တင်းၼမ်ၼႆ မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ ။

ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ – ၵူၼ်းတေၵႂႃႇႁဵတ်းၵၢၼ်ၵေႃႈ ႁႂ်ႈၵႂႃႇ ၼႂ်းၶၢဝ်းတၢင်း  ၵၢင်ၼႂ် 6 မူင်း ထိုင် ၵၢင်ၶမ်ႈ 6 မူင်းၵူၺ်း။ ႁၢမ်ႈ ၵူၼ်းပိုၼ်ႉတီႈၵႂႃႇမႃး တၢင်းၾၢႆႇဢွၵ်ႇသၢႆၼမ်ႉၽီလူး ။ လိူဝ်ၼၼ်ႉ ပၼ်ၾၢင်ႉပႃး ယႃႇႁဵတ်းလွင်ႈဢၼ် တေယႃႉၵဝ်း ၸုမ်းသိုၵ်းၸိူဝ်းဢဝ်ႁူမ်ႇလူမ်ႈ လႄႈ ယႃႇ ၸႂ်ႉၾႆး ထၢတ်ႈ ယၢမ်းၵၢင်ၶမ်ႈၵၢင်ၶိုၼ်း ၊ ယႃႇႁႂ်ႈမီးလွင်ႈၽိတ်းမေႃးၵၼ်  ယႃႇႁွင်ႉသႅၼ်ႇ ဢူၼ်ဢၢၼ်မေႃးမႄး ၵၼ် ယၢမ်းၵၢင်ၶမ်ႈ ပေႃးဢမ်ႇႁဵတ်းၸွမ်း တေဢဝ်လိူင်ႈၼၵ်းၼႃႈ ဝႃႈၼႆ ။

တႄႇၵၢင်လိူၼ်ၵျူႊလၢႆႊၼႆႉမႃး ၵူၼ်းပိုၼ်ႉတီႈၸိူဝ်းယူႇၸွမ်းၾၢႆႇဢွၵ်ႇၼမ်ႉၽီလူး လႄႈ ၵူၼ်းပိုၼ်ႉတီႈ ၸိူဝ်းယူႇတင်းတီႈမူၵ်းသိူဝ် လႆႈၶၢႆႉပၢႆႈဝႆႉသေ ၊ ယၢမ်းလဵဝ်ၵိုတ်းၵူၼ်းပိုၼ်ႉတီႈၸိူဝ်း ပႂ်ႉဢဝ်မၢၵ်ႇၶဝ်ႈ တဝ်ႈၼမ်ႉ ၼႂ်းသူၼ် ၼႂ်းႁႆႈ ၵမ်ႈၽွင်ႈၵူၺ်းလႄႈ သိုၵ်း KNDF ၸႂ်ႉၶၢႆႉပၢႆႈ  ဝႃႈၼႆ ။

ၵူၼ်းၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ- “ ၸဵမ်မိူဝ်ႈၼႂ်းလိူၼ်ၵျူႊလၢႆႊမႃးယဝ်ႉ ၊ မိူဝ်ႈၼၼ်ႉတႄႉ ၵူၼ်းပၢႆႈၽေးသိုၵ်းမီးၼိုင်ႈႁဵင် ၊ ၵူၼ်းဢၼ်ၵိုတ်းဝႆႉတလဵဝ်ၼႆႉပဵၼ်ၵူၼ်းဢၼ် ၶဝ်ပႂ်ႉဢဝ် မၢၵ်ႇၶဝ်ႈတဝ်ႈၼမ်ႉၼႂ်းသူၼ်ၶဝ် ၊ ပေႃးမႃးႁူမ်ႈၵၼ်တင်းသဵင်ႈၵူၼ်းပၢႆႈၽေးသိုၵ်း တေမီး သၢမ်ႁဵင်ၼႆႉ ၊ တလဵဝ်ၸႂ်ႉၶဝ်ၶၢႆႉၵႂႃႇယူႇဝႆႉတီႈၾၢႆႇတူၵ်းၼမ်ႉၽီလူးဝႆႉ”- ဝႃႈၼႆ ။

မိူဝ်ႈဝၼ်းတီႈ 5 လိူၼ်ၵျူႊလၢႆႊပူၼ်ႉမႃး ဝၢႆးယိုတ်းၵုမ်းလႆႈၶိုၼ်း ဝဵင်းမိူင်းပၢႆး တီႈလႅၼ်လိၼ် တႆး – ယၢင်းလႅင် တပ်ႉသိုၵ်းမၢၼ်ႈ သိုပ်ႇႁၢင်ႈႁႅၼ်း ထူဝ်းသိုၵ်းထႅင်ႈ တႃႇယိုတ်းၵုမ်းလႆႈ ဝဵင်းတီႈမူၵ်းသိူဝ်။ တပ်ႉသိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇ တီႈတပ်ႉ 102 လႄႈ 427 သေ ၸတ်းငႃးသိုၵ်း 4သၢႆ လေႃႇတိုၵ်း ၸုမ်းသိုၵ်းယၢင်းလႅင်ႁၢဝ်ႈႁႅင်းဝႆႉ – တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ပိုၼ်ၽၢဝ်ႇဝႆႉၼင်ႇၼႆ။