ဢမေႊရိၵၼ်ႊ ပိုၼ်ၽၢဝ်ႇယုၵ်ႉလိူၵ်ႈပႅတ်ႈ ဝီႊသႃႊႁဵၼ်းလိၵ်ႈ လုၵ်ႈႁဵၼ်း 6,000 ပၢႆ ယွၼ်ႉႁဵတ်းၽိတ်းပူၼ်ႉပႅၼ်ပၵ်းပိူင်မၢႆမီႈ ၼႂ်းမိူင်းၶဝ် ဝႃႈၼႆ။

ၽွင်းလူင် ႁွင်ႈၵၢၼ်ၾၢႆႇၼွၵ်ႈမိူင်း မိူင်းဢမေႊရိၵၼ်ႊလၢတ်ႈဝႃႈ – ယွၼ်ႉလုၵ်ႈႁဵၼ်းၸိူဝ်းၼၼ်ႉ ႁဵတ်းၽိတ်းပူၼ်ႉပႅၼ်ပၵ်းပိူင်မၢႆမီႈ မိူင်းဢမေႊရိၵၼ်ႊလႄႈ ယူႇသဝ်းပူၼ်ႉလိူဝ်ၶၢဝ်းယၢမ်း (Overstay) – ဝႃႈၼႆ။

ၼႂ်းၼၼ်ႉ ၵမ်ႈၼမ်ပဵၼ်လုၵ်ႈႁဵၼ်း ၸိူဝ်းမီးဝႆႉပိုၼ်းႁဵတ်းၽိတ်းပၵ်းပိူင်မၢႆမီႈ မိူၼ်ၼင်ႇ ၽိတ်း မေႃးႁဵတ်းႁၢႆႉၵၼ်၊ ၵိၼ်လဝ်ႈ/ ၸႂ်ႉတိုဝ်းယႃႈမဝ်းၵမ်ဝႆႉသေ ႁေႃႈရူတ်ႉၵႃး၊ လၵ်ႉ ၸူၼ်လႄႈ ပၼ်ႁႅင်းၵမ်ႉထႅမ်လွင်ႈၵေႃႇၵၢၼ်ႁၢႆႉ ၸိူဝ်းၼႆႉ။

ၼႂ်းလုၵ်ႈႁဵၼ်း 6,000 ပၢႆၼၼ်ႉ တႃႇ 4,000 ပၢႆ ပဵၼ်ၸိူဝ်းယူႇသဝ်းပူၼ်ႉ လိူဝ်ၶၢဝ်းယၢမ်း (Overstay)၊ တႃႇ 200 – 300 သမ်ႉ ၺႃးမၢပ်ႇမႂ်ဝႃႈ ၵမ်ႉထႅမ်ပၼ်ႁႅင်းလွင်ႈၵေႃႇၵၢၼ်ႁၢႆႉ ဝႃႈၼႆ။

ၼႂ်းပၵ်းပိူင်မၢႆမီႈ မိူင်းဢမေႊရိၵၼ်ႊၼၼ်ႉ လွင်ႈၵေႃႇၵၢၼ်ႁၢႆႉၼႆႉ ပိုတ်ႇဝႆႉတီႈပွင်ႇၵႂၢင်ႈၶႂၢင် မိူၼ်ၼင်ႇ လွင်ႈႁဵတ်းၽိတ်းပူၼ်ႉပႅၼ် ပၵ်းပိူင်မၢႆမီႈ၊ ႁဵတ်းႁႂ်ႈမီးၽေးထိုင်သၢႆၸႂ်ၵူၼ်း သေၵေႃႉၵေႃႉ ၸဵမ်ၸိူဝ်းၼႆႉ ၶဝ်ႈပႃးဝႆႉမူတ်း။

လွင်ႈၼႆႉ ပဵၼ်ၽွၼ်းတုမ်ႉယွၼ်ႈ ဢၼ်ပဵၼ်မႃး ဝၢႆးသေလူင်ပွင်ၸိုင်ႈမိူင်းဢမေႊရိၵၼ်ႊ သႂ်ႇႁႅင်းႁဵတ်းသၢင်ႈ ၽဵဝ်ႈမူၺ်ႉႁႅင်းၵၢၼ်ယၢၼ်မိူင်းလႄႈ လုၵ်ႈႁဵၼ်းၵူႈမိူင်းမိူင်း ၸိူဝ်းယူႇသဝ်းၼႂ်း မိူင်းဢမေႊရိၵၼ်ႊ လူၺ်ႈဢမ်ႇမႅၼ်ႈတၢင်းၵၢၼ် ၼႆယဝ်ႉ။

မိူဝ်ႈပီၵၢၼ်ႁဵၼ်း 2023 – 2024 ၼၼ်ႉ လုၵ်ႈႁဵၼ်းၵူႈမိူင်းမိူင်း ၸိူဝ်းႁဵၼ်းလိၵ်ႈဝႆႉတီႈ မိူင်းဢမေႊရိၵၼ်ႊ မီး 1.1 လၢၼ်ႉပၢႆ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။