ယၢမ်းလဵဝ် သိုၵ်းမၢၼ်ႈ ယိုတ်းမိူင်း ႁွင်ႈၶိုၼ်းၵူၼ်းပၢႆႈၽေးသိုၵ်းဝဵင်းၾၢႆၶုၼ် ပွၵ်ႈႁိူၼ်းယေး တႃႇႁၢင်ႈႁႅၼ်းပၢင်လိူၵ်ႈတင်ႈ ဝႃႈၼႆ။

ပူၼ်ႉမႃး မိူဝ်ႈလိူၼ်ၵျူႊလၢႆႊၼႆႉ သိုၵ်းမၢၼ်ႈ ယိုတ်းၵုမ်းလႆႈၶိုၼ်း ဝဵင်းၾၢႆၶုၼ်တင်း ဝဵင်းမိူင်းပၢႆး ၼႂ်းၸိုင်ႈတႆးပွတ်းၸၢၼ်း ယဝ်ႉလႄႈ ယၢမ်းလဵဝ် ၵူၼ်းပၢႆႈၽေးသိုၵ်း ၸိူဝ်းပၢႆႈၵႂႃႇသွၼ်ႈဝႆႉ တၢင်းဝဵင်းပၢင်လွင်း၊ ယွင်ႁူၺ်ႈလႄႈ သီႇသႅင်ႇ ၸိူဝ်းၼၼ်ႉ ႁႂ်ႈဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း ၼႆယဝ်ႉ။

ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်တဵၵ်းၸႂ်ႉပွၵ်ႈၸိူင်ႉၼၼ်တႄႉ ဢမ်ႇၸႂ်ႈၼင်ႇၵဝ်ႇ၊ သိုၵ်းမၢၼ်ႈၶဝ်ဝႃႈ လႆႈၵႂၢတ်ႇလၢင်ႉၼႂ်းပိုၼ်ႉတီႈလီငၢမ်းယဝ်ႉ ၵွပ်ႈၼႆလႄႈ ၶဝ်ပွင်ႇၸူးၽူႈ ယႂ်ႇၵူၼ်းလူင် ၸိူင်ႉၼၼ်ၵူၺ်း။ တေႃႈလဵဝ် ၵူၼ်းပၢႆႈၽေးတႄႉ ဢွၼ်ၵၼ်ပွၵ်ႈယဝ်ႉ။ ဢၼ်မီးတီႈဝဵင်းပၢင်လွင်းၼၼ်ႉတႄႉ တိုၵ်ႉၵိုတ်းဝႆႉယူႇ”- ဝႃႈ ၼႆ။

မိူၼ်ၼႆၼင်ႇၵဝ်ႇ ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈယူႇဝႆႉ တီႈဝဵင်းယွင်ႁူၺ်ႈၼၼ်ႉၵေႃႈ မိူဝ်ႈႁူဝ်လိူၼ်ဢေႃႊၵတ်ႊသ်ၼႆႉ လႆႈဢွၼ်ၵၼ်ပွၵ်ႈၶိုၼ်းႁိူၼ်းၽႂ်မၼ်း တီႈဝဵင်းၾၢႆ ၶုၼ်ယဝ်ႉ။

“တေႃႈလဵဝ် ၵူၼ်းပၢႆႈၽေးသိုၵ်း တီႈဝဵင်းၾၢႆၶုၼ်တႄႉ ဢွၼ်ၵၼ်ပွၵ်ႈၶိုၼ်းယဝ်ႉ။ လုၵ်ႈဢွၼ်ႇတႄႉ ယွၼ်ႉလႆႈၶိုၼ်ႈႁူင်းႁဵၼ်းဝႆႉတီႈၼႆႈလႄႈ ၵႂႃႇၵႂႃႇမႃးမႃး ၸိူင်ႉၼၼ်ၶႃႈဢေႃႈ။ ဢၼ်ၶဝ် ပွၵ်ႈမိူဝ်းၼၼ်ႉ လၢတ်ႈဝႃႈ တႃႇႁၢင်ႈႁႅၼ်းပၢင်လိူၵ်ႈတင်ႈၼႆၶႃႈဝႃႇ။ ၸိူဝ်းႁိူၼ်းယေး ထုၵ်ႇၾႆးမႆႈၼၼ်ႉၵေႃႈ ဢွၼ်ၵၼ် ပွၵ်ႈယဝ်ႉၶႃႈ”- ၵူၼ်းပိုၼ်ႉတီႈ ဝဵင်းယွင်ႁူၺ်ႈ လၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းၾၢႆၶုၼ်ၼႆႉ သိုၵ်းမၢၼ်ႈ ယိုတ်းၵုမ်းလႆႈဝႆႉယဝ်ႉ ၵွပ်ႈၼႆ ၶဝ်ၸင်ႇႁွင်ႉၶိုၼ်း ၾၢႆႇပၢႆးပၺ်ႇၺႃႇ မႃးပိုတ်ႇႁူင်းႁဵၼ်းၸၼ်ႉၵၢင်လႄႈ ၸၼ်ႉသုင် ၵႂႃႇၶိုၼ်း ၼႆယဝ်ႉ။

ဝၢႆးသေ သိုၵ်းမၢၼ်ႈ ယိုတ်းၵုမ်းလႆႈၶိုၼ်းဝဵင်းၾၢႆၶုၼ်တင်း မိူင်းပၢႆးၼႆႉယဝ်ႉ ယၢမ်းလဵဝ် သဵၼ်ႈတၢင်းလူင် ၾၢႆၶုၼ် – မိူင်းပၢႆး – လွႆၶေႃ ၸိူဝ်းၼႆႉတႄႉ ရူတ်ႉၵႃးၵႂႃႇမႃးၶိုၼ်း မိူၼ်ၵဝ်ႇ ၵူႈဝၼ်းယဝ်ႉ။

တႄႇဢဝ် ႁူဝ်ပီ 2025 ၼၼ်ႉမႃး တေႃႇထိုင်လိူၼ်ၵျူႊလၢႆႊၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ႁူမ်ႈၵၼ်သေ လေႃႇတိုၵ်းၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈမႃးႁၢဝ်ႈ ႁႅင်း ႁဵတ်းႁႂ်ႈၵူၼ်းမိူင်း ၸႄႈဝဵင်းၾၢႆၶုၼ်တင်း မိူင်းပၢႆး လႆႈဢွၼ်ၵၼ်ပၢႆႈၽေးသိုၵ်းမွၵ်ႈ 1 မိုၼ်ႇ ၼႆယဝ်ႉ။

တႅမ်ႈ – ၸၢႆးသႅင်ဢၢႆႈ