ပူၼ်ႉမႃးလၢႆဝၼ်းၼႆႉ ၾူၼ်တူၵ်းႁႅင်း လိၼ်ၵူၼ်ႇ ၼႂ်းမိူင်းပႃႊၵိတ်ႊသတၢၼ်ႊ ပွတ်းႁွင်ႇလႄႈ ထုင်ႉၵႅတ်ႉသ်မီးယိူဝ်း ပိုၼ်ႉတီႈၾၢႆႇမိူင်းပႃႊၵိတ်ႊသတၢၼ်ႊၵုမ်းၵမ်ၼၼ်ႉ ၽူႈမီးပုၼ်ႈၽွၼ်းၶဝ်လၢတ်ႈဝႃႈ မီးၵူၼ်းလူႉတၢႆ 300 ပၢႆ ႁၢႆလၢႆဝႆႉ 200 ပၢႆ – ဝႃႈၼႆ။

ၵူၼ်းၸိူဝ်းလူႉတၢႆၵမ်ႈၼမ် ပဵၼ်ၼႂ်းၸႄႈတွၼ်ႈၶၢႆႇပႃႇ ပႃႇၶျႃႉတုၼ်ႇဝႃႇ၊ ဢၼ်မီးလွင်ႈတုမ်ႉတိူဝ်ႉ လူႉသုမ်းၼမ်လိူဝ်ပိူၼ်ႈသမ်ႉ ပဵၼ်ၸႄႈတွၼ်ႈပူႇၼႃႇ မီးၵူၼ်းႁၢႆလၢႆဝႆႉ 209 ၵေႃႉ၊ ၶၢတ်ႈလၢမ်းဝႆႉဝႃႈ ၸၢင်ႈၼမ်မႃးလိူဝ်သေၼႆႉထႅင်ႈ ဝႃႈၼႆ။

မိူၼ်ၼႆ ၼႂ်းၸႄႈတွၼ်ႈသျႅၼ်ႇၵလႃႇၵေႃႈ မီးၵူၼ်းလူႉတၢႆၼမ်။ ၼႂ်းၸႄႈတွၼ်ႈပၢၼ်ႇၵျႅတ်ႉသမ်ႉ မိူဝ်ႈၼႂ်းလိူၼ်ၵျူႊလၢႆႊပူၼ်ႉမႃးၼၼ်ႉ ၾူၼ်တူၵ်းၼမ်လိူဝ်မိူဝ်ႈပီၵၢႆ 73% ၼႆယဝ်ႉ။

မိူင်းပႃႊၵိတ်ႊသတၢၼ်ႊ ပွတ်းႁွင်ႇၼႆႉ ပဵၼ်ပိုၼ်ႉတီႈ မီးမႄႈၼမ်ႉ(ၼမ်ႉၵၢမ်ႈ/ ၼမ်ႉၶႅင်) တင်းၼမ်။ ယွၼ်ႉၾိင်ႈၾႃႉရႃႇသီႇလႅၵ်ႈလၢႆႈလႄႈ ႁဵတ်ႁႂ်ႈၼမ်ႉၶႅင်ၸိူမ်ႈဝႆး၊ ၾၢႆႇၼိုင်ႈၵေႃႈ ၾူၼ်တူၵ်းႁႅင်းလႄႈ လွင်ႈၼမ်ႉလုပ်ႇၼွင်းထူမ်ႈ၊ လိၼ်ၵူၼ်ႇပင်း ၸိူဝ်းၼႆႉ တိူဝ်းႁၢႆႉႁႅင်းမႃး။

လူင်ပွင်ၸိုင်ႈ မိူင်းပႃႊၵိတ်ႊသတၢၼ်ႊတႄႉ ပိုၼ်ၽၢဝ်ႇပၼ်ၾၢင်ႉဝႆႉ – ပိုၼ်ႉတီႈၵမ်ႈၽွင်ႈ ပဵၼ်ပိုၼ်ႉတီႈမီးၽေးသေ ၾူၼ်တေသိုပ်ႇတူၵ်းႁႅင်း တေႃႇထိုင်ဝၼ်းတီႈ 21 လိူၼ် ဢေႃႊၵတ်ႊသ်ၼႆႉ ဝႃႈၼႆ။

တႄႇႁူဝ်လိူၼ်ၵျုၼ်ႊပူၼ်ႉမႃး တေႃႇထိုင်ယၢမ်းလဵဝ် ၶၢဝ်းတၢင်း 2 လိူၼ်ပၢႆၼႆႉ တီႈမိူင်းပႃႊၵိတ်ႊသတၢၼ်ႊ ယွၼ်ႉၾူၼ်တူၵ်းႁႅင်းသေ မီးၵူၼ်းလူႉတၢႆထိုင် 650 ၵေႃႉယဝ်ႉ။

မိူၼ်ၼႆ ၼႂ်းဝူင်ႈပူၼ်ႉမႃးၼႆႉၵူၺ်း တီႈထုင်ႉၵႅတ်ႉသ်မီးယိူဝ်း ၾၢႆႇတႂ်ႈမိူင်းဢိၼ်ႊတီႊယိူဝ်ႊ ၵုမ်းၵမ်ၼၼ်ႉၵေႃႈ ယွၼ်ႉၾူၼ်တူၵ်းႁႅင်းသေ မီးၵူၼ်းလူႉတၢႆ 60 ပၢႆ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။