NUG ၼႆႉ ႁပ်ႉပဵၼ်လူင်ပွင်ၸိုင်ႈႁင်းၵူၺ်းသေ ၶိုၼ်ႈၼႃႈလူၺ်ႈ ၾႅတ်ႊတရႄႊတီႊမူဝ်ႊၶရေႊၸီႊ ၶျႃႇတႃႇမႃး မီး 4 ပီပၢႆၶိုင်ႈယဝ်ႉ၊ ၵႂႃႇၼႃႈထႅင်ႈ သီႇႁႃႈႁူၵ်းလိူၼ် ဢႃယုလူင်ပွင် ၸိုင်ႈၶဝ် တေသဵင်ႈယဝ်ႉလႄႈ တေႁဵတ်းႁိုဝ်သိုပ်ႇတေႃႇၵႂႃႇထႅင်ႈၼႆ ဢွၵ်ႇပဵၼ်ၵႂၢမ်းထၢမ်ဝႆႉယူႇ။

NUG ၼႆႉ ယွၼ်ႉပိူဝ်ႈမၼ်းယၼ်ၼိူဝ်ၽွၼ်းၵၢၼ်ပၢင်လိူၵ်ႈတင်ႈ 2020 သေ ၶွတ်ႇၽွတ်ႈဝႆႉလႄႈ ပေႃးဝႃႈပၢင်လိူၵ်ႈတင်ႈ ဢၼ်ၸုမ်းသိုၵ်းယိုတ်းမိူင်း ပဵၼ်ပၢင်ၵႂႃႇတႄႉၼႆ လွင်ႈၶဝ်ႈတၢင်းၵၢၼ်ၶွင်ၸုမ်း NUG ၼႆႉ တေပဵၼ်တီႈတဝ်ႉၼႄးမႃးယဝ်ႉ။

ၸဵမ်ၸင်ႇၵေႃႇႁႅၵ်ႈၽွတ်ႈတင်ႈ သင်ဝႃႈ ႁွင်ႈႁပ်ႉၸိူဝ်းၸုမ်းၸၢဝ်းၶိူဝ်းလုၵ်ႉၽိုၼ်ႉ ၶဝ်ႈႁူမ်ႈႁွမ်းမိုဝ်းၵေႃႇတင်ႈ ၸွင်ႇတေထူပ်းၺႃးလွင်ႈၶွင်ႈၶမ်ၼႆႉႁိုဝ်ၼႆၵေႃႈ ပဵၼ်တီႈလီၶႆႈၸႂ်မႃးယဝ်ႉ။

ၵၢၼ်မိူင်းၽိုတ်ႉတီႈၼင်ႈ ႁိမ်ဢွင်ႈထႃႈၼႆႉ ၵႆႉလႄႇၵၢၼ်ႉသုမ်းသေ ဢွၼ်ဢဝ်သရေႇၼႃႈတႃလူႉၼႆ ႁူႉထိုင်ၵၼ်ယူႇသေတႃႉ ပိူဝ်ႈဢမ်ႇလူၼ်ႉလိူဝ်လႆႈ ၸႂ်ၽႂ်ႇၶႂ်ႈၵၢၼ်မိူင်း ဢတ်ႉတပဵၼ်ယႂ်ႇၼၼ်ႉလႄႈ မိူဝ်ႈလဵဝ်ၸင်ႇႁႃတၢင်းဢွၵ်ႇဝႃႈ တေမႄးၽိူမ်ႉၸိူဝ်းၸုမ်းၸၢဝ်းၶိူဝ်းသေ ၽွတ်ႈတင်ႈၶိုၼ်း ၸုမ်းလူင်ပွင်ၸိုင်ႈမႂ်ႇၼႆ ၸွင်ႇတေၶိုတ်းၶၼ်ယဝ်ႉႁိုဝ်။

ပေႃးလၢတ်ႈသိုဝ်ႈၸိုင် တူၵ်းလိုၼ်းၼႃႇယဝ်ႉသႄႈ။ ယဝ်ႉၵေႃႈ တႃႇတေမႄးၽွတ်ႈတင်ႈၶိုၼ်းမႂ်ႇၼၼ်ႉ ၶၵ်ႉတီႈ ႞ တေလႆႈထၢမ်ဝႃႈ ၸိူဝ်းၸုမ်းၸၢဝ်းၶိူဝ်းလုၵ်ႉၽိုၼ်ႉ ၸွင်ႇယုမ်ႇယမ်ႁၼ်လီတီႈ NUG ႁိုဝ်ၼႆ ဢွၼ်တၢင်းသုတ်းယဝ်ႉ။

NUG ၼႆႉ ၶႂ်ႈပဵၼ်လူင်ပွင်ၸိုင်ႈႁႃႉ ၶႂ်ႈတိုၵ်းၵဵၼ်ၸဝ်ႈဢႃႇၼႃႇသိုၵ်းသိူဝ်ၼႄႇ။ မိူဝ်ႈၸင်ႇတႄႇတႄႉ NUG ၼႆႉ ၵူၼ်းမိူင်းတင်းလၢႆ ဢွၼ်လုမ်ႈႁူဝ်ပၼ်ႁႅင်းမႃး၊ ၵွပ်ႈဢွၼ်ႁၼ်ထိုင်ဝႃႈ ၼွၵ်ႈလိူဝ် မႅၵ်ႇၵွင်ႈတိုၵ်းၵဵၼ်ပႅတ်ႈ ဢမ်ႇၸၢင်ႈၸႂ်ယႂ်ႇလၢႆးလႂ်ထႅင်ႈ ၼႆယဝ်ႉ။

ၸင်ႇၼၼ် ၵူၼ်းၼႂ်းမိူင်းၼွၵ်ႈမိူင်း၊ ၸိူဝ်းမၢၵ်ႈမီးၵေႃႈ ၼင်ႇမၢၵ်ႈမီးသေၽူၵ်းသႂ်ႇ၊ ၸိူဝ်းၵူၼ်းၽၢၼ်ၵေႃႈ ဢဝ်ၵႃႈႁႅင်းဢွၼ်ႇၶဝ် ၸွႆႈႁွမ်းၸွမ်းသႂ်ႇ၊ ယူဝ်တပ်ႉသိုၵ်းယိုတ်းမိူင်း တေ ၸဵဝ်းၵူၼ်ႇၸဵဝ်းၵၢၼ်ႉ ၼၼ်ႉယဝ်ႉ။

ၵူၺ်းၵႃႈ ၶၢဝ်းယၢမ်းသဵင်ႈၵႂႃႇမႃႇလၢႆၵူၺ်း၊ ပၢင်တိုၵ်းဢၼ်ဝႃႈၼၼ်ႉ ထွင်ႉထိင်ႉထွင်ႉထႅင်ႉသေယဝ်ႉ ၵႂႃႇၵမ်ႈၼမ်။ ငိုၼ်းၵွင်ၵၢင်လႆႈဢၢၼ်ႇလၢၼ်ႉတေႃႊလႃႊ ငိၼ်းဝႃႈၼႆသေတႃႉ တႃႇတပ်ႉၵွင် ႞ ဢၼ် တေႃႉတႄႉပၼ်လႆႈ ၵွင်ႈဢွၼ်ႇမွၵ်ႈသိပ်းလဝ်း၊ ၶဝ်ႈၼမ်ႉတၢင်းၵိၼ် ၶူဝ်းၼုင်ႈတၢင်းတိုဝ်း ဢမ်ႇၸႅၵ်ႇပၼ်လႆႈၵုမ်ႇ။

ၶုၼ်ၽွင်းလူင် ၾၢႆႇၵႅတ်ႇၶႄ ၶွင် NUG ပိုၼ်ၽၢဝ်ႇဝႃႈ တႂ်ႈၵုမ်းၵမ်မၼ်း မီးဝႆႉတပ်ႉၵွင် PDF 258 တပ်ႉ၊ ၼႂ်းၸႄႈဝဵင်း 250 ၼႆႉ တပ်ႉၵႅတ်ႇၶႄၵူၼ်းမိူင်း ဢၼ်ၶဝ်ဝႃႈ ပၵၽၼၼ်ႉ မီးဝႆႉတပ်ႉၵွင် 400 ပၢႆ ၼႆယဝ်ႉ။

ၵူၺ်းၵႃႈ ပၢင်တိုၵ်းၼႆႉ ၵႆႉလႆႈႁၼ် ပဵၼ်ၵႂႃႇယဝ်ႉၵႂႃႇၸွမ်း ၶေႃႈၶၢၼ်ပၢၵ်ႇ၊ ၶေႃႈပိုၼ်ၽၢဝ်ႇၼၼ်ႉၵူၺ်းသႄႈ။

ထႅင်ႈၾၢႆႇ ႞ ၼႆ ၼင်ႇႁိုဝ် ၸိူဝ်းႁူဝ်ၼႃႈ ၸုမ်းၸၢဝ်းၶိူဝ်းလုၵ်ႉၽိုၼ်ႉၶဝ် တေၶဝ်ႈႁူမ်ႈပႃးမႃး ၼႂ်းၸုမ်း လူင်ပွင်ၸိုင်ႈၼၼ်ႉ ဢမ်ႇႁၼ် NUG သူၼ်းႁူၺ်းလႆႈသႄႈ။

တေဝႃႈ ၸုမ်းမႅၵ်ႇၵွင်ႈဢၼ်မီးတဵမ်မိူင်းပေႃးမိူဝ်လူင်ၵႂႃႇၼၼ်ႉၵေႃႈ ဢမ်ႇသူၼ်းတုမ်ၶွၼ်ႈႁူၼ်းလႆႈ ဢမ်ႇၵႃး ပၢႆသေလိူဝ်ၸီႉသင်ႇၶၢတ်ႈၶွပ်ႇတီႈတပ်ႉတၢင်းတႂ်ႈၶဝ် ယႃႇႁႂ်ႈၶဝ်ႈဢွၵ်ႇ ၵၼ်တင်း ၸုမ်းတၢင်းၼွၵ်ႈၼႆထႅင်ႈ။

ၽိူဝ်ႇတေဝႆႉၸႂ်ဝႃႈ ၽူႈလုၵ်ႉၽိုၼ်ႉၼင်ႇၵၼ် တူၺ်းထိုင်ၵၼ် သမ်ႉမိူၼ်ၶႂ်ႈဝႃႈ ၸိူဝ်းဢမ်ႇၶဝ်ႈသွၼ်ႈ တႂ်ႈၵဝ်ပဵၼ်ၶဵၼ်ၵဝ်ၼႆၵေႃႈ ငၢႆးငၢႆးယဝ်ႉ။

ပိူင်ပဵၼ်တႄႉၸိုင် ၵၢၼ်မႅၵ်ႇၵွင်ႈလုၵ်ႉၽိုၼ်ႉၼႆႉ မိူဝ်ႈလႂ်ၸုမ်းဢူၺ်းလီပွတ်းႁွင်ႇသၢမ်ပီႈၼွင်ႉ ၽႅၼ်ယၼ်ႇတိုၵ်းတေႃးၸင်ႇ ၶႂ်ႈၶိုၼ်းၶီးၸိုၼ်ႈႁုၼ်ႈမႂ်ႇမႃးယဝ်ႉ၊ ၵူၺ်းၵႃႈ ၽဝ်ႇဝႃႈ ၸုမ်းဢူၺ်းလီသၢမ်ပီႈၼွင်ႉ ၺႃးၶႄႇမိပ်ႇငႅၼ်းၼႆ ၼွၵ်ႈလိူဝ်ရၶႅင်ႇ ဢမ်ႇၵိုတ်းလိူဝ်ၽႂ် တိုၵ်းတႄႉတိုၵ်းဝႃႈယဝ်ႉ။

ၵမ်းၼႆႉ မီးၶေႃႈထၢမ်မႃးဝႃႈ NUG တေႁဵတ်းသင်၊ တေဢၢၼ်းတိုၵ်းတႄႉယူႇႁႃႉ။ တပ်ႉၵွင်ဢၼ်မီး 200 ပၢႆၼၼ်ႉ ၽႅဝ်ၵႂႃႇလႂ်။ ႁူဝ်ၼႃႈ NUG ၵမ်ႈၼမ်ၼမ် ဢၼ်မီးယူႇမိူင်းၼွၵ်ႈ ၸိူဝ်းၼၼ်ႉ ၸွင်ႇၶဝ်မီးၸႂ်ၶႂ်ႈတိုၵ်းတႄႉယူႇႁႃႉ၊ ဢမ်ႇၼၼ် ၶဝ်ၶႂ်ႈပဵၼ်လူင်ပွင်ၸိုင်ႈမႃႇလၢႆၵူၺ်းၼႄႇ။ လူင်ပွင်ၸိုင်ႈဢၼ်ဝႃႈၼၼ်ႉ ဢၢၼ်းႁဵတ်းတႃႇမိူင်းမၢၼ်ႈထုင်ႉပဵင်းၵူၺ်းႁႃႉ ၼႆ မီးၵူၼ်းၶႂ်ႈထဵတ်ႈၶႂ်ႈထၢမ်မႃးယဝ်ႉ။

တူၺ်းၸွမ်းတၢင်းႁဵတ်း NUG ၼႆႉ ၽိူဝ်ႇတေသုတ်ႉၶဝ်ႈၸူး လူင်ပွင်ၸိုင်ႈမိူင်းႁိမ်းႁွမ်း သမ်ႉၵုမ်ႇမူၼ်ႈၸႂ်ၸွမ်း လွင်ႈလႆႈသိုဝ်ႇသၢၼ်ၸွမ်း ၽွင်းတၢင်ထၢၼ်ႈတႂ်ႈ ၶွင်မိူင်းဝၼ်းတူၵ်းၶဝ်ၼၼ်ႉ ပဵၼ်ယႂ်ႇ၊ ပွႆႇႁႂ်ႈၸွမ်ၸိုင်ႈလႄႈ ၸွမ်ၽွင်းလူင် ၼႄၼႃႈၼိူဝ်ဢွၼ်ႊလၢႆႊလၢႆလၢႆလွၵ်ႇလွၵ်ႇသေ တၢမ်တူဝ်ၵူၼ်းယိပ်း ယႅဝ်ၸုမ်းၶဝ်ၸမ်ၸမ်တင်းသဵင်ႈသမ်ႉ ဢမ်ႇၽၢတ်ႇယၢၼ်လႆႈ တၢင်းဝၼ်းတူၵ်း။

တေႃႈၼင်ႇ မိူင်းႁိမ်းႁွမ်းၸိူဝ်းပဵၼ်လုၵ်ႈၸုမ်း ASEAN ၵူၺ်းၵေႃႈ ယူႇတီႈ NUG ဢမ်ႇသၢင်ႈလႆႈ လွင်ႈယုမ်ႇယမ်ၼိူဝ်ၵၢၼ်မိူင်း။ ဢမ်ႇၼႄလႆႈ လွင်ႈၶွတ်ႇလိူတ်ႈၽၼ်ႈၵႅၼ်ႇၵၼ်တင်း ၸုမ်းၸၢဝ်းၶိူဝ်း။

ၸိူဝ်းၸိုင်ႈမိူင်းႁိမ်းႁွမ်းလႄႈ ၸိူဝ်းၸိုင်ႈမိူင်းႁႅင်းယႂ်ႇၶဝ် ၶႂ်ႈႁႂ်ႈပဵၼ်ၼႆႉ NUG တင်း EROs ၸုၵ်းၸင်ႈ ၽဵင်ႇပဵင်းၵၼ်သေ လၢတ်ႈၸႃၶၢၼ်ပၢၵ်ႇၸွမ်းၵၼ်ယဝ်ႉႁပ်ႉပၢၵ်ႇလႆႈ လွင်ႈႁူမ်ႇလူမ်ႈၵူႈၸၢဝ်းၶိူဝ်း ဢၼ်ဢမ်ႇဢဝ်ၸိုင်ႈမိူင်း တူၵ်းလူမ်ႇၶဝ်ႈလုၵ်းလဝ် သိုၵ်းၵၢင်မိူင်းၼၼ်ႉဢေႃႈ။

ၵူၺ်းၵႃႈ NUG ၸွင်ႇႁပ်ႉႁၼ်ႁဵတ်းၸွမ်းၼင်ႇၼၼ်။ ဢမ်ႇႁၼ်သႄႈ။ ၵူႈမိူင်းမိူင်း ၸိူဝ်းပႂ်ႉပႃးလူလွမ် တေႃႇမိူင်းႁဝ်းၼႆႉ မုင်ႈမွင်းတူဝ်တႅၼ်းပဵၼ်တၢင်းၵၢၼ် ၶွင်ၸုမ်းဢူၺ်းလီ ဢၼ်မၵ်းမၼ်ႈဝႆႉ ထၢၼ်ႈၽဵင်ႇပဵင်းၵၼ်ၼၼ်ႉ ပိူဝ်ႈတႃႇႁူမ်ႈမိုဝ်းၸွမ်းယူႇဢေႃႈ။ ၵူၺ်းၵႃႈ NUG ဢမ်ႇၶိုင်သၢင်ႈၶိုတ်း ထိုင်ၶၵ်ႉၼၼ်ႉသႄႈ။

ပေႃးႁုပ်ႈလၢတ်ႈၸိုင် ၵၢၼ်ၶွတ်ႇလိူတ်ႈၽွမ်ႉႁူမ်ႈဢၼ် NUG ၶႂ်ႈလႆႈၶႂ်ႈပဵၼ်ၸမ်ႉ EROs ၸိူဝ်းၸုမ်း ၸၢဝ်းၶိူဝ်းလုၵ်ႉၽိုၼ်ႉတင်းသဵင်ႈ ႁႂ်ႈလႆႈမႃးၶွၼ်ႈတႂ်ႈႁူမ်ႈၶဝ် တေၶႂ်ႈဝႃႈၼၼ်ႁိုဝ်ၼႆ ထိုင်ၵမ်းတေလႆႈ ထၢမ်ၵၼ်တႅၵ်ႇလႅင်းယဝ်ႉ။

ႁူႉယူႇဝႃႈ လၢႆးၵၢၼ် NUG ၼႂ်းမိူဝ်ႈလဵဝ်ၼႆႉ ဢမ်ႇပဵၼ်ၵၢၼ်၊ ႁူႉယူႇဝႃႈ လူဝ်ႇလႆႈပိၼ်ႇပႅင်ႇလႅၵ်ႈလၢႆႈ ယူင်ႉၶွတ်ႇၽွတ်ႈၸုမ်းလူင်ပွင်ၸိုင်ႈ ႁႂ်ႈလႆႈပႃးၸၢဝ်းၶိူဝ်း တင်းလၢႆယဝ်ႉ၊ လၢႆးႁဵတ်းသမ်ႉ မိူၼ်ၵူၼ်းႁုပ်ႈ ၸၼ်ၵၢၼ်ႇထရႅၵ်ႉ ၵၢၼ်လုၵ်ႉၽိုၼ်ႉယူႇၵူၺ်းတႄႉ တႃႇတေပဵၼ်မႃးလူင်ပွင်ၸိုင်ႈမိူင်းႁူမ်ႈတုမ်ဝႆႉ သေၵွၼ်ႇ၊ တေႃႈၼင်ႇ လူင်ပွင်ၸိုင်ႈမိူင်းမၢၼ်ႈ ပွတ်းထုင်ႉပဵင်းၵူၺ်းၵေႃႈ တေတင်ႈပဵၼ်လႆႈယၢပ်ႇယဝ်ႉ။

ဢၼ်ၼႆႉ ပိူဝ်ႈဢမ်ႇပုတ်းၶၢတ်ႇလႆႈၼိူဝ်ၶေႃႈယၼ်ႇၸႂ်ဢၼ်ဝႃႈ တၵ်းတေၵူၼ်ႇမူၺ်ႉပႅတ်ႈ လွၵ်းပိူင်ၸဝ်ႈဢႃႇၼႃႇၼၼ်ႉယဝ်ႉၼႆ ယွၼ်းပၢႆးၼႄမွၵ်ႈၼႆႈၵွၼ်ႇဢေႃႈ။