မိူဝ်ႈၼႆႉ ဝၼ်းတီႈ 17/08/2025 ယၢမ်းၵၢင်ၼႂ် 8 မူင်းၶိုင်ႈ ထိုင် 9 မူင်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၾၢႆႇဝၼ်းဢွၵ်ႇ ဝဵင်းမိူင်းၵုတ်ႈ ထႅင်ႈသေ တိူဝ်ႉသႂ်ႇၵူၼ်းမိူင်းလူႉတၢႆ ၵႂႃႇ 3 ၵေႃႉ၊ ႁူဝ်ၼပ်ႉၵူၼ်းမၢတ်ႇၸဵပ်းၵႂႃႇၸွမ်းတႄႉ ပႆႇလႆႈႁူႉႁူဝ်ယွႆႈတႅတ်ႈတေႃး။
ႁိူဝ်းမိၼ်တိုၵ်း သိုၵ်းမၢၼ်ႈ ၵိုင်ႉၵၢင်ႉမႃးပွႆႇမၢၵ်ႇ ၼႂ်းၵၢင်ဝဵင်းလူင် မိူင်းၵုတ်ႈ ဢွင်ႈတီႈမီးၵူၼ်းမိူင်းယူႇသဝ်း တူင်ႉၼိုင်ၵႂႃႇမႃးၼမ်ၼၼ်ႉ လုၵ်ႈၼိုင်ႈ၊ ပွႆႇသႂ်ႇတၢင်းလုမ်းၽွင်းငမ်းၸႄႈဝဵင်း သိုၵ်းတဢၢင်း (ပလွင်ႈ) တၢင်း ပွတ်းပတ်ႉတမျႃးငမွၵ်ႉ ((ပတ္တမြားငမောက်) ၼၼ်ႉလုၵ်ႈၼိုင်ႈ ၊ တႃႇထႅင်ႈလုၵ်ႈၼိုင်ႈသမ်ႉၵႂႃႇတူၵ်းသႂ်ႇၼိူဝ်ၵၢင်တၢင်းလူင်ၼႆ ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းမိူင်းၵုတ်ႈ လၢတ်ႈၼႄၼင်ႇၼႆ။
“တၢင်းမူတ်းၶဝ်မႃးပွႆႇၵႂႃႇ 3 လုၵ်ႈ။ ၵူၼ်းလူင် ၸၢဝ်းၵေႃႇရၶႃးၵေႃႉၼိုင်ႈ ၊ လုၵ်ႈဢွၼ်ႇၵေႃႉၼိုင်ႈလႄႈ ၵူၼ်းၼုမ်ႇၵေႃႉၼိုင်ႈ တၢႆ။ ၼၢင်းယိင်း ဢၼ်လႄႇႁႃၶၢႆတၢင်းၶၢႆၼၼ်ႉၵေႃႈ ႁၢႆဝႆႉၵေႃႉၼိုင်ႈ။ လွင်ႈမၢတ်ႇၸဵပ်းလူႉတၢႆၼႆႉလႅပ်ႈတေၽိူမ်ႉမႃးထႅင်ႈယူႇ။ မိူဝ်ႈလဵဝ် တိုၵ်ႉပဵၼ်ၽွင်းၶဝ်ႁႃၵဵပ်းတူဝ်တၢႆ လႄႈ ၵူၼ်းမၢတ်ႇၸဵပ်းယူႇ။ တၢင်းႁူင်းယႃလူင်ၼၼ်ႉၵေႃႈ မၢၵ်ႇၵႂႃႇတူၵ်းသႂ်ႇပႃး။”
မိူဝ်ႈႁူဝ်လိူၼ်ဢေႃႊၵတ်ႉသ်ၼႆႉၵေႃႈ ယွၼ်ႉမၢၵ်ႇႁိူဝ်းမိၼ်သိုၵ်းမၢၼ်ႈလႄႈ ၵူၼ်းမိူင်းဝဵင်းမိူင်းၵုတ်ႈ လူႉတၢႆၵႂႃႇ 21 ၵေႃႉ၊ ပႃးသင်ႇၶၸဝ်ႈ၊ လုၵ်ႈဢွၼ်ႇ၊ ၼၢင်းယိင်း လႄႈ မႄႈမၢၼ်း ၊ မႄႈယူႇၾႆး ဢၼ်တိုၵ်ႉၵိူတ်ႇ လုၵ်ႈဢွၼ်ႇလႅင်ဝႆႉဢမ်ႇပႆႇတဵမ်လိူၼ် ၸဵမ်ၸိူဝ်းၼႆႉ တႃႇ 4 မုင်ႉႁေႃႁိူၼ်းသေ မၢတ်ႇၸဵပ်းၵႂႃႇၸွမ်းထႅင်ႈ တင်းၼမ် ၼႆယဝ်ႉ။
လႆႈႁူႉဝႃႈ ၼႂ်းလိူၼ်ဢေႃးၵၢတ်ႉသ်ၼႆႉ မိူင်းၶႄႇ ယူႇၵၢင်ႁဵတ်းၶဵဝ်ပၼ်သေ သိုၵ်းမၢၼ်ႈ တင်း သိုၵ်းတဢၢင်း မီးၽႅၼ်ၵၢၼ်တႃႇ တေႁူပ်ႉထူပ်းဢုပ်ႇဢူဝ်းၵၼ် ၼႂ်းမိူင်းၶႄႇ။ တႄႇႁူဝ်လိူၼ်ဢေႃးၵၢတ်ႉသ် ဝၢႆးလင် သိုၵ်းမၢၼ်ႈယိုတ်းလႆႈဝဵင်းၼွင်ၶဵဝ်ၶိုၼ်းယဝ်ႉ ငႃးသိုၵ်းမၢၼ်ႈလုၵ်ႉတၢင်း ဝဵင်းၼွင်ၶဵဝ် သိုပ်ႇမုင်ႈၼႃႈၶိုၼ်ႈၵႂႃႇတၢင်းဝဵင်းမိူင်းၵုတ်ႈသေ တင်းသွင်ၾၢႆႇလႆႈပဵၼ်ပၢင်တိုၵ်းၵၼ်ဝႆႉ ၸွမ်းသဵၼ်ႈတၢင်း ၼွင်ၶဵဝ်-မိူင်းၵုတ်ႈ။
ၾၢႆႇၼိုင်ႈၵေႃႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်ဝႆႉၸူဝ်ႈၶၢဝ်း ၸွမ်းဝဵင်းမိူင်းၵုတ်ႈ၊ ဝဵင်းၵျွၵ်ႉမႄး၊ ဝဵင်းသီႇပေႃႉ၊ ဝဵင်းၼမ်ႉၶမ်း ၸဵမ်ၸိူဝ်းၼႆႉ။ ပိူဝ်ႈတႃႇပဵၼ်ႁႅင်းမိပ်ႇဢီး ႁႂ်ႈသိုၵ်းတဢၢင်းထွႆဢွၵ်ႇဝဵင်းၸိူဝ်းၵုမ်းၵမ်ဝႆႉ ၼၼ်ႉၶိုၼ်း လႄႈ ပိူဝ်ႈတႃႇပဵၼ်ၶေႃႈတေႃႇလွင်း ၼႂ်းပၢင်ၵုမ်ဢုပ်ႇဢူဝ်း ၼႂ်းမိူင်းၶႄႇပႃးထႅင်ႈ။
ၸွမ်းၼင်ႇၸုမ်းၶၢဝ်ႇၽူႈတွႆႇႁွၵ်ႈၵဵပ်းသဵၼ်ႈမၢႆဝႆႉ ၼင်ႇတိုတ်ႉတၢမ်းလႆႈၼၼ်ႉ ၶၢဝ်းတၢင်း ၽၢၵ်ႇလိူၼ်ၵူၺ်း ၵူၼ်းမိူင်းၸိူဝ်းယူႇၼႂ်းပိုၼ်ႉ တီႈသိုၵ်းတဢၢင်းၸူဝ်ႈၶၢဝ်း လူႉတၢႆယွၼ်ႉမၢၵ်ႇႁိူဝ်းမိၼ်တိုၵ်းသိုၵ်းမၢၼ်ႈ တႃႇ 41 ၵေႃႉ မၢတ်ႇၸဵပ်းၵႂႃႇၸွမ်း ဢမ်ႇယွမ်း 30 ၵေႃႉ။
ဝဵင်းမိူင်းၵုတ်ႈၼႆႉပဵၼ်ဝဵင်းၼိုင်ႈၼႂ်းသဵၼ်ႈမၢႆ ဢၼ်သိုၵ်းမၢၼ်ႈပိုၼ်ၽၢဝ်ႇၸိုဝ်ႈ 63 ဝဵင်း- ဢၼ်တေသိုပ်ႇပိုတ်ႇၼႃႈသိုၵ်းတေႃႇ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ