မိူဝ်ႈၼႆႉ ဝၼ်းတီႈ 16 လိူၼ်ဢေႃးၵၢတ်ႉသ် ၶႃႈႁၢပ်ႇၵၢၼ် ၼႂ်းၸုမ်းသိုၵ်းတဢၢင်း TNLA လူင်းတဝ်ၼႂ်းဝၢၼ်ႈ တဵၵ်းၵဵပ်းသဵၼ်ႈမၢႆႁူဝ်ၼပ်ႉၵူၼ်း ၼႂ်းထုင်ႉမၢၼ်ႈၸၢမ် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇသေ လွၵ်ႇငိုတ်ႈ တဵၵ်းႁႂ်ႈႁဵတ်းမၢႆၾၢင် ၼိုင်ႈႁိူၼ်းလႂ်ၼိုင်ႈၵေႃႉ ။
ၾၢႆႇၶႃႈႁၢပ်ႇၵၢၼ် ၸုမ်းသိုၵ်းတဢၢင်း လွၵ်ႇငိုတ်ႈလၢတ်ႈတီႈ ၵူၼ်းမိူင်းၼႂ်းပိုၼ်ႉတီႈဝႃႈ သင်ဢမ်ႇယွမ်းၵႂႃႇႁဵတ်းမၢႆၾၢင်တဢၢင်းၸိုင် ပေႃးလတ်းၸွမ်းၵဵၵ်ႉ လၢၼ်ႇဢၼ်မီးသိုၵ်းတဢၢင်းပႂ်ႉၵူတ်ႇထတ်းၼၼ်ႉ သင်ၵူတ်ႇထတ်းလႄႈ ဢမ်ႇၼႄလႆႈ မၢႆၾၢင်ၼၼ်ႉ တေထုၵ်ႇဢဝ်လိူင်ႈၵႂႃႇၼႆ ၵူၼ်းမိူင်း ထုင်ႉမၢၼ်ႈၸၢမ် လၢတ်ႈၼႄၼင်ႇၼႆ။
“ၵူၼ်းႁဵတ်းၵၢၼ်ပၼ် သိုၵ်းပလွင်ႈၶဝ် ၼုင်ႈတၢင်းၶူဝ်းၾၢႆႇႁွင်ႈၵၢၼ် လဝၵ ပလွင်ႈၶဝ်ၼၼ်ႉႁႄ မႃးၼႂ်းဝၢၼ်ႈ 8 ၵေႃႉ။ မႃးႁွင်ႉဢဝ် ၵူၼ်းလူင်ၼႂ်းဝၢၼ်ႈႁဵတ်းပၢင်ၵုမ်။ လၢတ်ႈဝႃႈ တေလႆႈႁဵတ်းမၢႆၾၢင်တဢၢင်း တီႈဢေႇသုတ်း ၼိုင်ႈႁိူၼ်းၼိုင်ႈၵေႃႉ။ မိူဝ်ႈၽုၵ်ႈ (ဝၼ်းတီႈ 17/8/2025) ၼႆႉ ၵူၼ်းၼႂ်းပွၵ်ႉ 1 တေလႆႈတႄႇၵႂႃႇႁဵတ်းယဝ်ႉဢေႃႈ။ ပေႃးႁဝ်းဢမ်ႇႁဵတ်းၵေႃႈ ၵဵၵ်ႉလၢၼ်ႇၶဝ်သမ်ႉ မီးလူင်ၵႂႃႇ ၵူႈတီႈ။ ပေႃးလုၵ်ႉတၢင်းမၢၼ်ႈၸၢမ်ၵႂႃႇတၢင်းလႃႈသဵဝ်ႈ၊ သီႇပေႃႉၸိူဝ်းၼႆႉ တေလႆႈလတ်းၵဵၵ်ႉၶဝ်ၵႂႃႇလူး။ ယၢပ်ႇၸႂ်ယၢပ်ႇၶေႃး ၵိၼ်းၸႂ်ဝႆႉယူႇဢေႃႈ” ဝႃႈၼႆ။
တွၼ်ႈတႃႇၵႃႈၸႂ်ႉၸၢႆႇ လႄႈ လွင်ႈၵိၼ်ယႅမ်ႉ ၶႃႈႁၢပ်ႇၵၢၼ် ၼႂ်းၸုမ်းသိုၵ်းတဢၢင်း TNLA ၸိူဝ်းလူင်းပိုၼ်ႉတီႈႁဵတ်းပၼ်မၢႆၾၢင်ၼၼ်ႉၵေႃႈ ႁႂ်ႈၵူၼ်းၸိူဝ်းမႃးႁဵတ်းမၢႆၾၢင်ၶဝ်ၼၼ်ႉႁပ်ႉပုၼ်ႈၽွၼ်းတူၺ်းလူပၼ်- ဝႃႈၼႆပႃး။
ၵူၼ်းၸိူဝ်းမႃးႁဵတ်းမၢႆၾၢင် တဢၢင်းၼၼ်ႉ တေလႆႈဢဝ် ဝႂ်မုင်ႉႁေႃႁိူၼ်း လႄႈ မၢႆၾၢင် ဢၼ်လူင်ပွင်ၸိုင်ႈမၢၼ်ႈႁဵတ်းဝႆႉပၼ်ၼၼ်ႉမႃးပႃး ပိုၼ်ၽၢဝ်ႇဝႆႉၼင်ႇၼႆ။
တႅမ်ႈ-ၽူၺ်းၼုမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ