ပျီႇတူႉၸိတ်ႉပဢူဝ်း PNO  ၽဝ်ႁိူၼ်းၵူၼ်းမိူင်းသီႇသႅင်ႇ  ၶႃႈႁႅမ်ၵူၼ်းဝၢၼ်ႈတၢႆၵေႃႉၼိုင်ႈၼႆ တပ်ႉသိုၵ်း ပူတ်းပွႆႇၸိူဝ်ႉၸၢတ်ႈပဢူဝ်း PNLA ပိုၼ်ၽၢဝ်ႇ လၢတ်ႈဝႆႉၼႂ်းဝၼ်းတီႈ 13/8/2025 ၼၼ်ႉၼင်ႇၼႆ ။

တႄႇၼႂ်းဝၼ်းတီႈ 5/8/2025 ၼႆႉမႃး သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ထူဝ်းသိုၵ်းမႃးတၢင်း ဢိူင်ႇၼွင်ၵႅဝ်း ( နောင်ကျော )လႄႈ ၼႂ်းဢိူင်ႇတွင်ႇသျေႉ(တောင်ရှေ့ကျေးရွာအုပ်စု) ႁဵတ်းႁႂ်ႈတုမ်ႉတိူဝ်ႉ ပဵၼ်ပၢင်တိုၵ်းၵၼ်တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA   ။

ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ – ၼႂ်းဝၼ်းတီႈ 9/8/2025 ၼၼ်ႉ ပျီႇတူႉၸိတ်ႉပဢူဝ်း PNO ၶဝ်ႈၼႂ်းပွၵ်ႉၵယၢၼ်း (ကယန်းပိုင်း) လႄႈ ပွၵ်ႉၵလႃး (ကုလား) ဢၼ်မီးၼႂ်းဝၢၼ်ႈ ၼွင်ထဝ် (နောင်ထောဝ်)  ၽဝ်ႁိူၼ်းၵူၼ်းပိုၼ်ႉတီႈ 24 လင်  ဝႃႈၼႆ ။

ၵဵဝ်ႇလွင်ႈၼႆႉ ၶုၼ်ႇရဵင်းယၼ်ႇ  ၽူႈၶၢၼ်ပၢၵ်ႇ PNLA   လၢတ်ႈၽူႈတွႆႇႁွၵ်ႈဝႃႈ-“ PNO ၶႃႈႁႅမ်ၵႂႃႇၵူၼ်း ဝၢၼ်ႈသလွင်းတွင်ႇၵေႃႉၼိုင်ႈ ၊ ၵူၼ်းဢၼ်ၶဝ်ၶႃႈႁႅမ်ၼၼ်ႉ ပဵၼ်ၸၢဝ်းပဢူဝ်းၵူၺ်း ။  တွၼ်ႈတႃႇ ဢႃႇၼႃႇ ၵူၼ်းၸုမ်းၼိုင်ႈသေၶႃႈႁႅမ်ၸိူဝ်ႉၶိူဝ်းၸၢဝ်းၶိူဝ်းၸဝ်ႈၵဝ်ႇၶိုၼ်းၼႆႉ  ထုၵ်ႇမႅၼ်ႈယဝ်ႉႁႃႉၼႆ လီဝူၼ်ႉ တူၺ်းၶိုၼ်းယူႇ ။ ၸုမ်း PNO ၼႆႉ ပဵၼ်ၸုမ်းဢၼ်လုၵ်ႉတီႈၵူၼ်းမိူင်းမႃးၵူၺ်း ၊ တလဵဝ်ၼႆႉ ပဵၼ်ၶွၼ်ႉတဝ်ႉ ၸဝ်ႈဢႃႇၼႃႇသိုၵ်း ၵႂႃႇယဝ်ႉ၊ ပေႃးမီးတၢင်းဝူၼ်ႉတႄႉ ထုၵ်ႇလီလႆႈဢၢႆသေ ထုၵ်ႇလီလုၵ်ႉတိုၼ်ႇထွႆလင်ယဝ်ႉ”- ဝႃႈၼႆ ။

လိူဝ်ၼၼ်ႉယၢမ်းလဵဝ် သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယိုတ်း ဝၢၼ်ႈၼွင်ထဝ် ယဝ်ႉ ၵႆႉပိုတ်းယိုဝ်း တီႈလုမ်းငဝ်ႈငုၼ်းတပ်ႉသိုၵ်း  PNLA  ပိုၼ်ၽၢဝ်ႇဝႆႉပႃးၼင်ႇၼႆ ။

ၵဵဝ်ၵပ်းလွင်ႈၼႆႉၾၢႆႇတင်းပျီႇတူႉၸိတ်ႉPNO ၶိုၼ်းပိုၼ်ၽၢဝ်ႇၵႄႈတူဝ်ဝႃႈ လွင်ႈၽဝ်ႁိူၼ်းၵူၼ်းမိူင်းၼႆႉ ၸုမ်းၶဝ် ဢမ်ႇလႆႈႁဵတ်း၊  ယၢမ်းလဵဝ် ဝၢၼ်ႈၼွင်ထဝ်ၼႆႉ PNO ၵုမ်းၵမ်လႆႈဝႆႉ ဝႃႈၼႆ ။

ၵဵဝ်ႇလူၺ်ႈလွင်ႈၼႆႉသေ ၸဝ်ႈႁၢၼ် တၢၼ်းၵျွႆႇ  ၵေႃႈလၢတ်ႈဝႃႈ-“ PNO  ဢမ်ႇလႆႈၽဝ် ႁိူၼ်းယေး ၵူၼ်း မိူင်း၊ ပဵၼ်ၶၢဝ်ႇၽႄႈၼိူဝ်ဢွၼ်ႊလၢႆႊၵူၺ်း ၊ ၽဝ်တႄႉဢမ်ႇၽဝ်တႄႉၼႆ  ၵႂႃႇတူၺ်း ထိုင်တီႈ ၵေႃႈလႆႈ။ ပေႃးၶႂ်ႈၵႂႃႇ PNO  တေၸွမ်းဢဝ်ႁူမ်ႇလူမ်ႈပၼ် ၊ ၼႂ်းပိုၼ်ႉတီႈတႄႉယၢမ်းလဵဝ် ဢမ်ႇမီးပၢင်တိုၵ်း ၊ ႁဝ်းၶႃႈ ယူႇတၢင်းၼွင်ထဝ် ၊ ဢၼ်ပွႆႇမၢၵ်ႇတႄႉ ပဵၼ်ၼမ်ႇမိုဝ်းသိုၵ်းမၢၼ်ႈ ”- ဝႃႈၼႆ ။

ၼႂ်းဝၼ်းတီႈ 7/6 /2025 ၾၢႆႇတၢင်းပျီတူႉၸိတ်ႉပဢူဝ်း PNO သူင်ႇလိၵ်ႈ ႁႂ်ႈၵူၼ်းဝၢၼ်ႈ တပူးထူဝ်ႇ (တပူးထို) ၊  ၵွင်ထူဝ်ႇ(ကောင်ထို) ၊ လွႆငွၼ်း(လွယ်ငွန်း) ၊ ၼွင်ဝူဝ် (နောင်ဘို) ၊ ပၢင်ႇၸၢၵ်ႈ(ပင်စက်) ဢၼ်မီးၼႂ်းဢိူင်ႇၼွင်ၵႅဝ်း လႄႈ ဝၢၼ်ႈၼွင်ထဝ် 6 ဝၢၼ်ႈ ႁူဝ်ၵူၼ်း 6 ႁဵင် ပၢႆ ပၢႆႈၽေးသိုၵ်း ယၢမ်းလဵဝ် လူဝ်ႇတင်းၸွႆႈထႅမ်ၶဝ်ႈၼမ်ႉတင်းၵိၼ်ဝႆႉ ဝႃႈၼႆ ။