ဝၼ်းတီႈ 14/08/2025 ယၢမ်းၵၢင်ၶမ်ႈ 8 မူင်းၶိုင်ႈလႄႈ ယၢမ်းတဵင်းၶိုၼ်း 12 မူင်းပၢႆ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇၼႂ်းၼႃႈတီႈသိုၵ်းတဢၢင်း ၵုမ်းၵမ်ၸူဝ်ႈၶၢဝ်း တီႈဝဵင်းမိူင်းၵုတ်ႈတင်း ၸႄႈဝဵင်းၼမ်ႉၶမ်း မီးၵူၼ်းလူႉတၢႆမၢတ်ႇၸဵပ်းၸွမ်းမွၵ်ႈ 20 ၵေႃႉ ၼႆယဝ်ႉ။

ယွၼ်ႉမၢၵ်ႇလူင်သႅၼ်း 500 ပွင်ႊ ႁိူဝ်းမိၼ်တိုၵ်းသိုၵ်းမၢၼ်ႈ ၵႂႃႇတူၵ်းသႂ်ႇ ၼႂ်းဝဵင်းမိူင်းၵုတ်ႈ ဢွင်ႈတီႈပွၵ်ႉ ဢၼ်မီးၵူၼ်းမိူင်းယူႇသဝ်းဝႆႉ ၵမ်းသိုဝ်ႈၼၼ်ႉသေ မႄႈမၢၼ်း (မႄႈပႃးတွင်ႉ)၊ လုၵ်ႈဢွၼ်ႇ၊ ၼၢင်းယိင်းလႄႈ ၵူၼ်းၸၢႆးၼုမ်ႇ ဢိၵ်ႇၸဝ်ႈမုၼ် ၸိူဝ်းၼႆႉ လူႉတၢႆၵႂႃႇၸွမ်း 8 ၵေႃႉ မၢတ်ႇၸဵပ်းၵႂႃႇ 7 ၵေႃႉၼႆ ၾၢႆႇသိုၵ်းတဢၢင်းၶဝ် ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်း ၵၢၼ်ၼင်ႇၼႆ။

မၢၵ်ႇလူင်တူၵ်းသႂ်ႇပႃး ၵျွင်းမုၼ်ၸဝ်ႈ လိၼ်းယွင်ႇၶျီႇ ၾၢႆႇပွတ်းဢွၵ်ႇမိူင်းၵုတ်ႈလႄႈ မီးၵူၼ်းလူႉတၢႆ မၢတ်ႇၸဵပ်းၵႂႃႇႁၢဝ်ႈႁႅင်း မၢင်ၸိူဝ်း ႁႃတူဝ်တၢႆယင်းဢမ်ႇပႆႇႁၼ်ၵွၼ်ႇၼႆ ၵူၼ်းမိူင်း ၵေႃႉယူႇၼႂ်းပိုၼ်ႉတီႈ ဝဵင်းမိူင်းၵုတ်ႈလၢတ်ႈၼႄၼင်ႇၼႆ။

“တႃႇႁိူၼ်းလင်ၼိုင်ႈၼႆႉ တၢႆၵႂႃႇတင်းမုင်ႉႁေႃႁိူၼ်း၊ ၶဝ်မႃးပွႆႇမၢၵ်ႇပွၵ်ႈၼႆႉ တူၵ်းသႂ်ႇႁိူၼ်းလီလီလႄႈ မၢင်ၸိူဝ်း ၽိတ်ႇတူဝ်တၢႆၶဝ် ဝူင်ၵႂႃႇတၢင်းလႂ်တၢင်းလီႇၵေႃႈဢမ်ႇႁူႉ။ လႆႈၵႂႃႇႁႃ ၵဵပ်းမႃးဢဝ်။ ၵူၼ်းၸိူဝ်းတၢႆၵႂႃႇၼႆႉ မီးယူႇ 10 ၵေႃႉ ဢၼ်မၢတ်ႇၸဵပ်းၸွမ်းသမ်ႉ မီးယူႇမွၵ်ႈ 20 ၵေႃႉပၢႆၼႆႉ။ ႁဝ်းၶႂ်ႈဝႃႈတႄႉ ၸုမ်းယိပ်းၵွင်ႈၵၢင်ႇၸိူဝ်းၼႆႉ ပေႃးတေတိုၵ်းၵေႃႈ တိုၵ်း ႁႂ်ႈပေႃးႁူႉလမ်ႁူႉလႅင်ထႅင်ႈႁႄလႄႈ။ မိူဝ်ႈလဵဝ်ၼႆႉသမ်ႉ  ၵုမ်ႇလႆႈၵူဝ်ယူႇ။ ၵၢင်ၶမ်ႈၵၢင်ၶိုၼ်းၵေႃႈ ဢမ်ႇလႆႈယူႇသႃႇ။ ပႃးၵၼ်တုၵ်ႉၶမူတ်း”။

ထိုင်ယၢမ်းတဵင်ႈၶိုၼ်းမွၵ်ႈ 12 မူင်းၶိုင်ႈ ႁူဝ်ၼႂ်ၸဝ်ႉ ဝၼ်းတီႈ 15 (မိူဝ်ႈၼႆႉ) ႁိူဝ်းမိၼ်တိုၵ်းသိုၵ်းမၢၼ်ႈ ၶိုၼ်ႈမိူဝ်းပွႆႇမၢၵ်ႇသႂ်ႇ ၼႂ်းထုင်ႉမၢၼ်ႈဝဵင်းလူင် ဢၼ်ၸမ်ၵၼ်တင်း ၸႄႈဝဵင်း ၼမ်ႉၶမ်းၼၼ်ႉထႅင်ႈ 4 လုၵ်ႈ။ ၵူၼ်းမိူင်းတႄႉ ဢမ်ႇတိူဝ်ႉမၢတ်ႇၸဵပ်းၸွမ်းသေတႃႉ ၸၢၵ်ႇမၢၵ်ႇလူင်သဵၼ်ၵႂႃႇ တူၵ်းသႂ်ႇႁိူၼ်းၵူၼ်း မိူင်းလူႉၵွႆပႃးယူႇလၢႆလင်ၼႆ – ၵူၼ်းမိူင်း ၼႂ်းၸႄႈဝဵင်းၼမ်ႉၶမ်း လၢတ်ႈၼႄၼင်ႇၼႆ။

“မၢၵ်ႇၵႂႃႇတူၵ်းတၢင်း တပ်ႉၵဝ်ႇသိုၵ်းမၢၼ်ႈ။ ပဵၼ်တီႈမၢၼ်ႈဝဵင်း ၵွင်းၶၢင် ၶဝ်ႈပႃးၼႂ်းမိူင်းၶၢင်ယဝ်ႉ။ တီႈၶဝ် မႃးပွႆႇၼၼ်ႉ ၵႆၵၼ်တင်း ႁိူၼ်းၵူၼ်းမိူင်းယူႇ။ ပဵၼ်ၾၢႆႇဝၼ်းတူၵ်းဝဵင်းၼမ်ႉၶမ်း။ ၵူၼ်းမိူင်းတူၵ်းၸႂ်ၵႂႃႇ ႁႅင်းတႄႉတႄႉ။ ၶဝ်မႃးပွႆႇၵႂႃႇမွၵ်ႈသၢမ်သီႇလုၵ်ႈ။ မၼ်းပဵၼ်ၼႂ်းၸႄႈဝဵင်းမၢၼ်ႈၸေႊၼႆၵေႃႈ မၼ်းၸမ်ၼမ်ႉၶမ်း။ ႁိူဝ်းမိၼ်ၼႆႉ လတ်းမႃးတၢင်းၼမ်ႉ ၶမ်းၼၼ်ႉၼႃႇ ၵူၼ်းၼႂ်းမိူင်းဢွၼ်ၵၼ်ႁႃတီႈပႅပ်ႉၵၼ်ႁႄ တိုၼ်ႇၵၼ်ၵႂႃႇမူတ်းဢိူဝ်ႈ”။

လႆႈႁူႉဝႃႈ ဢွင်ႈတီႈသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းၵႂႃႇပွႆႇမၢၵ်ႇသႂ်ႇ ၼႂ်းၸႄႈဝဵင်းၼမ်ႉၶမ်းၼၼ်ႉ တိတ်းၸပ်းၵၼ်တင်း လႅၼ်လိၼ်ၾင်ႇမိူင်းၶႄႇႁႅင်းၼႃႇလႄႈ ထိုင်တီႈၾၢႆႇတၢင်းမိူင်း ၶႄႇ ပေႃးဢဝ်ၾႆးထွင်ႇ ပိူင်းၶိုၼ်ႈၼိူဝ်ၵၢင်ႁၢဝ်သေ လၼ်ႇၵွင်ႈလူင်ဢွၵ်ႇလၢႆလၢႆၵမ်းသေ ပၼ်ၾၢင်ႉ။ ႁိမ်းႁွမ်းၼၼ်ႉ ၸမ်ၵၼ်ပႃး ဢွင်ႈတီႈမီးသိုၵ်းၶၢင်ၵုမ်းၵမ်ဝႆႉ။ ဝဵင်းၼမ်ႉၶမ်းလႄႈ မၢၼ်ႈဝဵင်းလူင်ၼႆႉ ယၢၼ်ၵႆၵၼ်မွၵ်ႈ 13 လၵ်း၊ ဢွင်ႈတီႈ ဢၼ်သိုၵ်းမၢၼ်ႈ ဢဝ်မၢၵ်ႇမႃးပွႆႇၼႆႉ ယၢၼ်ၵႆၵၼ်တင်း ဝဵင်းၼမ်ႉၶမ်းမွၵ်ႈ 7 လၵ်း ၼႆယဝ်ႉ။

ၼႂ်းလိူၼ်ဢေႃႊၵတ်ႊသ်ၼႆႉ သိုၵ်းမၢၼ်ႈတင်း သိုၵ်းတဢၢင်း မီးၽႅၼ်ၵၢၼ်တႃႇတေၵႂႃႇႁူပ်ႉဢုပ်ႇဢူဝ်းၵၼ် ၵဵဝ်ႇလူၺ်ႈပၢင်တိုၵ်း ၼႂ်းမိူင်းတႆးပွတ်းႁွင်ႇၼႆႉ တီႈၼႂ်းမိူင်းၶႄႇၼႆသေတႃႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉၵေႃႈ ယင်းပႆႇမီးၾၢႆႇလႂ်ပိုၼ်ၽၢဝ်ႇဢွၵ်ႇ ဝၼ်းတႃႇတေႁူပ်ႉဢုပ်ႇၵၼ်ပဵၼ်တၢင်းၵၢၼ်တႄႉတႄႉ။

ၾၢႆႇၼိုင်ႈၵေႃႈ မိူဝ်ႈဝၼ်းတီႈ 12 ၼၼ်ႉ တၢမ်တူဝ်မိၼ်းဢွင်ႇလၢႆႇ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ တီႈၼႂ်းပၢင်ၵုမ်လူင် ၶွမ်ႊမသျိၼ်ႊၵတ်းယဵၼ်သႃႇယႃႇလႄႈ ၵၢၼ်ႁူမ်ႇလူမ်ႈၸိုင်ႈမိူင်းၼၼ်ႉဝႃႈ ၼင်ႇႁိုဝ် တေၸတ်းႁဵတ်းပၢင်လိူၵ်ႈတင်ႈလႆႈပတ်းပိုၼ်ႉၸိုင်ႈမိူင်းလီငၢမ်း ႁႂ်ႈပေႃးဢွင်ႇမၢၼ်ၼၼ်ႉ တေၶတ်းၸႂ် သိုပ်ႇၸတ်းၽႅၼ်ႁဵတ်းသၢင်ႈဢဝ်ၶိုၼ်း ဢွင်ႈတီႈ ၸိူဝ်းလႆႈသုမ်းပၼ်ၸုမ်းသိုၵ်း ၸၢဝ်းၶိူဝ်းၵုမ်းၵမ်ၼၼ်ႉယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ